NAA ni ḓipfa u fana na Linda we a pfiswa vhuṱungu nga zwiito zwa mutendi ngae? Zwi ṱungufhadzaho ndi uri vhaṅwe vho khukhuliswa nga vhuḓifari ha vhaṅwe lwe zwa kwama mbekanyo yavho ya lwa muya. Naa zwenezwo ndi zwe zwa itea kha inwi?

Ndi ngoho uri zwi nga ri konḓela vhukuma u hangwela mutendi nga riṋe we a ri pfisa vhuṱungu. Zwenezwo ndi nga nṱhani ha uri Vhakriste vha fanela u funana. (Yohane 13:34, 35) Arali ro khakhelwa nga mutendi nga riṋe, ri nga kulea nungo na u pfa vhuṱungu vhuhulwane.—Psalme ya 55:12.

Vhukuma, Bivhili i amba uri hu na zwifhinga zwine Vhakriste vha ṋeana “tshiitisi tsha u vhilaela.” (Vhakolosa 3:13) Naho zwo ralo, musi zwenezwo zwi tshi itea kha riṋe, ri nga wana zwi tshi ri konḓela u sedzana nazwo. Naa hu na zwine zwa nga ri thusa? Ṱhogomelani maitele mararu a re Maṅwaloni:

Khotsi ashu wa ṱaḓulu u ḓivha zwoṱhe. Yehova u ḓivha zwoṱhe zwine zwa khou itea, u katela na u shayea ha khaṱulokwayo naho hu hufhio hune ra sedzana naho na vhuṱungu vhune ha ḓiswa ngazwo. (Vhaheberu 4:13) Zwiṅwe hafhu, Yehova u a ri pfela vhuṱungu musi ri tshi shengela. (Yesaya 63:9) Ha tendeli “vhuṱungu, mutsiko” kana naho tshi tshini—naho hu muṅwe mushumeli wawe—zwi tshi ri ‘fhandekanya na lufuno lwawe.’ (Vharoma 8:35, 38, 39) Na riṋe a ro ngo fanela u tendela naho tshi tshini kana muthu naho e ufhio a tshi ri fhandekanya na Yehova.

U hangwela a si u tendela vhukhakhi. Musi ri tshi hangwela vhe vha ri khakhela, a ri khou vhuyafhedza, u imelela kana u tendela zwiito zwavho. Humbulani uri Yehova ha ṱanganedzi tshivhi, fhedzi u a hangwela arali hu na tshiitisi tsha u ita nga u ralo. (Psalme ya 103:12, 13; Habakuku 1:13) Musi Yehova a tshi ri ṱuṱuwedza uri ri hangwele vhaṅwe, u vha a tshi khou ri humbela uri ri mu edzise. “Ha dzuli ó sinyuwa maḓuvha manzhi.”—Psalme ya 103:9; Mateo 6:14.

Musi ri tshi litsha u fara muthu nga mbilu, ri a vhuyelwa. Nga nḓila-ḓe? Edzani u humbula nga ha tshifanyiso tshi tevhelaho. Kha ri ri ni takula tombo, khamusi ḽi sa lemelesi. Zwi nga ni lelutshela u hwala ḽeneḽo tombo lwa tshifhinganyana. Fhedzi hu ḓo itea mini arali na lingedza u ḽi hwala tshifhinga tshilapfu? Ni nga kona u ḽi hwala tshifhinga tshingafhani—mimunithi i si gathi? awara? kana u fhira? A zwi timatimisi uri tshanḓa tshaṋu tshi ḓo neta! Ngoho ndi uri tshileme tsha ḽeneḽo tombo tshi vha tshi songo shanduka. Fhedzi musi no ḽi hwala tshifhinga tshilapfu, ḽi mbo ḓi thoma u pfala ḽi tshi lemela. Zwo tou ralo na nga u fara muthu nga mbilu. Musi ri tshi fara muthu nga mbilu tshifhinga tshilapfu—naho hu nga tshithu tshiṱuku—ri vha ri tshi khou ḓivhaisa. Ndi ngazwo Yehova a tshi ri ṱuṱuwedza uri ri si dzule ro fara vhathu nga mbilu. Vhukuma, u sa fara muthu nga mbilu zwi vhuyedza riṋe vhaṋe.—Mirero 11:17.

Ndi mini zwe zwa thusa Linda uri a si dzule o fara mutendi ngae nga mbilu nge a mu fara nga nḓila i si yavhuḓi? Zwiṅwe zwe zwa mu thusa ndi u elekanya nga ha zwiitisi zwi re Maṅwaloni zwa u hangwela. (Psalme ya 130:3, 4) Tshe tsha ṱuṱuwedza vhukuma Linda ndi u ḓivha uri musi ri tshi hangwela, na Yehova u ḓo ri hangwela. (Vhaefesa 4:32–5:2) A tshi amba nga ha nḓila ye eneo maipfi a mu kwama ngayo, u ri: “Ndo pfa u nga Yehova u khou tou amba nṋe.”

Nga u ya ha tshifhinga, Linda ho ngo tsha fara mutendi ngae nga mbilu. O hangwela wahawe wa tshisadzini nga mbilu yoṱhe nahone zwino vha tou vha madele mapfani. Linda u bvela phanḓa a tshi shumela Yehova. Ni khwaṱhisedzwa uri Yehova u ṱoḓa u ni thusa uri na inwi ni ite nga u ralo.