TSHIPIḒA 5
Vhuyelelani kha “Mulisa Na Mulavhelesi Wa Vhutshilo Haṋu”
Naa ni na khaedu nthihi kana dzo vhalaho dzo haseledzwaho kha ino bugwana? Arali zwo ralo, a ni noṱhe. Vhashumeli vhanzhi vha Mudzimu vha fulufhedzeaho—vha zwifhingani zwa Bivhili na vha misini yashu—vho sedzana na khaedu dzi fanaho na dzenedzo. Samusi Yehova o vha thusa uri vha kunde dzenedzo khaedu, na inwi a nga ni thusa.
Yehova u ḓo ni tikedza musi ni tshi vhuyelela khae
U vhuyelela kha Yehova ndi zwithu zwavhuḓi vhukuma zwine na nga zwi ita. Ndi ngani? Ngauri ni ḓo takadza mbilu ya Yehova. (Mirero 27:11) Samusi ni tshi zwi ḓivha, Yehova u na maḓipfele nahone u a kwamea nga zwine ra zwi ita. Ndi ngoho uri Yehova ha ri kombetshedzi uri ri mu fune na u mu shumela. (Doiteronomio 30:19, 20) Muṅwe mugudi wa Bivhili o ri: “A hu na muthu ane a nga vula mbilu yaṋu. Ni fanela u i vula nga dzaṋu.” Musi ri tshi gwadamela Yehova nga mbilu yo ḓalaho lufuno, ri vha ri tshi khou mu vulela mbilu yashu. Musi ri tshi ita nga u ralo, ri vha ri tshi khou mu ṋea tshifhiwa tsha ndeme—u fulufhedzea hashu—nahone ri ita uri mbilu yawe i takale vhukuma. Vhukuma, a hu na tshine ra nga tshi vhambedza na dakalo ḽine ra ḽi wana musi ri tshi gwadamela Yehova nga nḓila yo mu fanelaho.—Mishumo 20:35; Nzumbululo 4:11.
Zwiṅwe hafhu, musi ni tshi vusulusa vhurabeli haṋu ha Vhukriste, u ṱoḓa haṋu u ḓivha Mudzimu hu ḓo fushwa. (Mateo 5:3) Nga nḓila-ḓe? Vhathu shangoni ḽoṱhe vha a ḓivhudzisa uri, ‘Ndi ngani ri fhano?’ Vha ṱoḓa phindulo dza mbudziso nga ha ndivho ya vhutshilo. Vhathu vha na yeneyo ṱhoḓea ngauri Yehova o vha sika vhe nayo. O ri sika ri tshi ṱoḓa u fushea nga u mu shumela. A hu na tshine tsha nga ri fusha u fana na u ḓivha uri ri khou gwadamela Yehova ngauri ri a mu funa.—Psalme ya 63:1-5.
Zwi ḓivheni uri Yehova u ṱoḓa ni tshi vhuyelela khae. Zwenezwo ni zwi ḓivha hani? Ṱhogomelani hezwi: Ho rabelwa vhukuma uri yeneyi bugwana i lugiselelwe nga vhuronwane. Khamusi no i sumbedzwa nga muhulwane wa Mukriste kana nga muṅwe mutendi nga inwi. Nga zwenezwo, na sudzuluselwa u i vhala na u aravha mulaedza wayo. Zwenezwi zwoṱhe ndi vhuṱanzi ha uri Yehova ho ngo ni hangwa. Zwi re zwone ndi uri u khou ni kokodzela khae nga vhulenda.—Yohane 6:44.
Ri nga khuthadzwa nga u ḓivha uri Yehova ha vhuyi a hangwa vhashumeli vhawe vho xelaho. Zwenezwi ndi zwe muṅwe wahashu wa tshisadzini ane a pfi Donna a zwi ṱhogomela. O ri: “Ndo pambuwa nga zwiṱuku nga zwiṱuku ngohoni, fhedzi kanzhi ndo vha ndi tshi elekanya nga ha luṅwalo lwa Psalme ya 139:23, 24, lune lwa ri: ‘Itou mphenḓa, Iwe Mudzimu, U ḓivhe mbilu yanga; U ndinge, U ḓivhe zwiné nda elekanya. Wá vhoná ndi kha nḓila mmbi, U ntshimbidze kha nḓila ya zwa lini na lini.’ Ndo vha ndi tshi zwi ḓivha uri a thi tshipiḓa tsha shango—ndo vha ndi tshi ḓipfa ndo xela—nahone ndo vha ndi tshi zwi ḓivha uri ndi fanela u vha ndi ndanguloni ya Yehova. Ndo thoma u zwi ṱhogomela uri Yehova ho ngo nndaṱa; ndi nṋe we nda vha ndi tshi fanela u wana nḓila ya u vhuyelela khae. Ndo takala vhukuma nge nda ita nga u ralo!”
“Ndo thoma u zwi ṱhogomela uri Yehova ho ngo nndaṱa; ndi nṋe we nda vha ndi tshi fanela u wana nḓila ya u vhuyelela khae”
Ri rabela zwi tshi bva mbiluni uri na inwi ni dovhe ni tshenzhele ‘dakalo ḽine Yehova a ḽi ṋea.’ (Nehemia 8:10) Ni nga si vhuye na ḓisola nge na vhuyelela kha Yehova.