Mutendi nga riṋe a funwaho:

Samusi ni tshi zwi ḓivha, Bivhili ndi bugu ine ya amba nga maanḓa nga ha vhathu. Vhunzhi havho ndi vhanna na vhafumakadzi vha fulufhedzeaho vhe vha sedzana na khaedu dzi fanaho na dzashu. Vho vha vhe na “maḓipfele a fanaho na ashu.” (Yakobo 5:17) Vhaṅwe vho vha vho tsikeledzwa nga thaidzo na mbilaelo. Vhaṅwe vho vhaiswa vhukuma nga miraḓo ya muṱa kana nga vhagwadameli ngavho. Vhanzhi vho tsikeledzwa nga u ḓivhona mulandu nga nṱhani ha vhukhakhi havho.

Naa vhenevho vhathu vho ṱutshela Yehova lwa tshoṱhe? Na khathihi. Vhunzhi havho vho vha vha tshi fana na mupsalme we a rabela a ri: “Ndá xela, nṋe mulanda wau U nṱoḓe vhunga nngu musi yó xela, ngauri zwe wa laya a thi zwi hangwi.” (Psalme ya 119:176) Naa na inwi ni ḓipfa nga yeneyi nḓila?

Yehova a nga si vhuye a hangwa vhagwadameli vhawe vhane vha xelana na tshitumba. Nṱhani hazwo, u sumbedza uri u a vha funa—kanzhi a tshi shumisa vhatendi ngavho. Sa tsumbo, ṱhogomelani nḓila ye Yehova a thusa ngayo mulanda wawe Yobo, we a ṱangana na maṱungu manzhi—u katela u xelelwa siani ḽa zwa masheleni, u felwa nga vhane a vha funa na thaidzo ya zwa mutakalo. Yobo o dovha a konḓelela maipfi a ṱhavhaho o ambiwaho nga vhe vha vha vho tea u mu tikedza. Fhedzi ho ngo vhuya a furalela Yehova, naho nga zwiṅwe zwifhinga o kheluwa kha mahumbulele awe. (Yobo 1:22; 2:10) Yehova o thusa hani Yobo uri a dovhe a vhe na mahumbulele o teaho?

Yehova o thusa Yobo a tshi shumisa mutendi ngae ane a pfi Elihu. Musi Yobo a tshi amba nḓila ine a ḓipfa ngayo, Elihu o mu thetshelesa nahone zwa mu sudzulusela u amba. O vha a tshi ḓo ri mini? Naa o vha a tshi ḓo sasaladza Yobo kana o vha a tshi ḓo lingedza u mu ṱuṱuwedza nga u mu ita uri a ḓivhone mulandu kana nga u mu ita uri a farwe nga ṱhoni? Naa Elihu o ḓidzhia e wa khwine u fhira Yobo? Na khathihi! A tshi sudzuluswa nga muya wa Mudzimu, Elihu o ri: “Na nṋe ndi wa Mudzimu ndi nga iwe; na nṋe ndo vhumbiwa nga vumba.” Nga zwenezwo, a khwaṱhisedza Yobo a ri: “U songo tshenuwa wa ṋyofha; vhuhali hanga vhu si U lemele.” (Yobo 33:6, 7) Elihu ho ngo inga Yobo muṅwe muhwalo, nṱhani hazwo o mu ṋea nyeletshedzo na ṱhuṱhuwedzo zwe a vha a tshi zwi ṱoḓa.

Ri takalela u ni vhudza uri ro lugiselela yeneyi bugwana nga muhumbulo u fanaho. Ro thoma ra thetshelesa, ra ṱhogomela nga vhuronwane zwiimo na zwe zwa ambiwa nga vhunzhi ha vhe vha kheluwa. (Mirero 18:13) Nga murahu ha zwenezwo, ra lavhelesa Maṅwalo, ra rabela nahone ra ṱolisisa nḓila ye Yehova a thusa ngayo vhashumeli vhawe tshifhingani tsho fhiraho musi vho sedzana na zwiimo zwi fanaho. Mafheleloni ra ṱanganya eneo mafhungo a re Maṅwaloni na tshenzhelo dza musalauno u itela u ṅwala yeneyi bugwana. Ri ni humbela nga lufuno uri ni ṱolisise yeneyi bugwana. Ri ni khwaṱhisedza uri ri ni funa nga mbilu yoṱhe.

Tshigwada Tshi Langaho Tsha Ṱhanzi Dza Yehova