Bethele ndi dzina ḽa Luheberu ḽine ḽa amba ‘Nnḓu ya Mudzimu.’ (Genesi 28:17, 19) Ndi ipfi ḽo teaho ḽa zwifhaṱo zwe Ṱhanzi dza Yehova vha zwi fhaṱa shangoni ḽoṱhe hune ha livhiswa na u tikedzwa mushumo wa u huwelela. Tshigwada tshi Langaho tshi shuma tshi ngei ofisini khulwane dzi re Doroboni ya New York, U.S.A., nahone tshi ingamela tshi henengei mushumo une wa itwa ofisini dza davhi dzi re mashangoni manzhi. Vhathu vhane vha shuma kha zwenezwo zwifhaṱo vha vhidzwa muṱa wa Bethele musi vhe tshigwada. Vha fana na muṱa ngauri vha dzula vhoṱhe na u shuma vhoṱhe, vha ḽa vhoṱhe nahone vha guda vhoṱhe Bivhili nga vhuthihi.—Psalme ya 133:1.

Ndi fhethu ho khetheaho hune miraḓo ya wonoyo muṱa ya shuma nga u ḓifunela. Kha tshifhaṱo tshiṅwe na tshiṅwe tsha Bethele, hu na vhanna na vhafumakadzi vha Vhakriste vhe vha ḓikumedzela kha u ita zwi funwaho nga Mudzimu na u ita zwithu zwine zwa tshimbidzana na Muvhuso tshifhinga tshoṱhe. (Mateo 6:33) A hu na na muthihi wavho ane a holelwa, fhedzi vhoṱhe vha ṋewa zwiḽiwa na fhethu ha u dzula na tsheledenyana ine ya vha thusa u lifha tshinyalelo dzavho. Muṅwe na muṅwe Bethele u avhelwa mushumo, a nga avhelwa u shuma ofisini, khishini kana holoni ya u ḽela. Vhaṅwe vha shuma hune ha gandiswa kana u ṱanganywa dzibugu, vhaṅwe vha shuma u kunakisa dzikamara, hune ha kuvhelwa hone zwiambaro, vhaṅwe vha shuma u lugisa zwithu kana u ita miṅwe mishumo.

Ndi fhethu hune ha shumiwa vhukuma u itela u tikedza mushumo wa u huwelela nga ha Muvhuso. Ndivho khulwane ya Bethele iṅwe na iṅwe ndi u phaḓaladza mafhungo-ngoho a Bivhili kha vhathu vhanzhi nga hune zwa nga konadzea ngaho. Na yeneyi bugwana yo gandiselwa zwone. Musi i tshi ṅwalwa yo livhiswa nga Tshigwada tshi Langaho, ya rumelwa nga khomphyutha kha zwigwada zwa vhaṱalutshedzeli vha maḓana shangoni ḽoṱhe, ya gandiswa nga mitshini ya luvhilo luhulwane ine ya vha hone Bethele dzo vhalaho nahone ya rumelwa zwivhidzoni zwi fhiraho 110 000. Kha enea maitele oṱhe, miṱa ya Bethele i tikedza mushumo wa ndeme wo ṱavhanyiswaho vhukuma u fhira yoṱhe—une wa vha u huwelela mafhungo maḓifha.—Marko 13:10.

• Ndi vhafhio vhane vha shuma Bethele nahone vha ṱhogomelwa hani?

• Ndi ufhio mushumo wo ṱavhanyiswaho une wa tikedzwa nga mishumo ine ya itwa Bethele iṅwe na iṅwe?