U Ambara Na U Ḓilugisa Ndi Zwone Zwo Nnyimaho Phanḓa

MUANETSHELI NDI VHO EILEEN BRUMBAUGH

NDO aluselwa kha vhurereli ha Old Order German Baptist Brethren vhune ha fana na vhurereli ha Amish na Mennonite. Tshigwada tsha Brethren tsho thoma Germany nga 1708 tshi tshi bva kha Pietism. The Encyclopedia of Religion yo amba uri Pietism yo vhumbwa “ho sedzwa uri vhathu vha ṱoḓa evangeli ya Kristo.” Enea mavhonele o ita uri tshenetshi tshigwada tshi thome fulo ḽa u rumela vharumiwa kha mashango o fhambanaho.

Nga 1719, tshigwada tshiṱuku tshi tshi khou rangwa phanḓa nga Alexander Mack, tsho ḓa hune zwino ha vhidzwa Pennsylvania kha ḽa Amerika. U bva tshee tsho, ho vhumbwa zwigwada zwo fhambanaho zwi bvaho kha tshenetsho tshigwada. Tshigwada tshiṅwe na tshiṅwe tsho thoma u ita zwithu nga nḓila ine tsha pfesesa ngayo pfunzo dza Alexander Mack. Kereke yashu yo vha i na miraḓo i ṱoḓaho u vha 50. Ro ṱuṱuwedzwa u vhala Bivhili na u tevhedza nga vhuronwane milayo yo vhewaho nga miraḓo ya kereke.

U swika kha mirafho i ṱoḓaho u vha miraru muṱa wahashu wo farelela kha lwonolu lutendo na kutshilele. Ndo vha muraḓo wa kereke na u lovhedzwa ndi na muṅwaha ya 13. Ndo aluswa ndi tshi tenda uri zwo khakhea u vha na goloi, ṱereṱere, u katela na radio kana tshiṅwe na tshiṅwe tshine tsha shuma nga muḓagasi. Vhafumakadzi vho vha vha tshi ambara nga nḓila yo leluwaho nahone ro vha ri sa tendelwi u gera mavhudzi kana u sa ambara tshithu kha ṱhoho. Vhanna vho vha vha tshi alusa ndebvu. Ro vha ri tshi dzhia uri u sa vha tshipiḓa tsha shango zwi katela u sa ambara zwiambaro zwa tshi zwino zwino, u ḓola zwiḓolo kana u ambara malungu. U ita zwenezwi ro vha ri tshi zwi dzhia hu u ḓihudza.

Ro gudiswa u ṱhonifha Bivhili nga ho dzikaho. Nga matsheloni maṅwe na maṅwe ri sa athu ḽa zwiḽiwa zwa nga matsheloni, ro vha ri tshi kuvhangana ra thetshelesa khotsi ashu vha tshi ri vhalela ndima ya Bivhili na u ri ṱalutshedza zwine ya amba zwone. Nga murahu ra gwadama khotsi ashu vha rabela. Musi vho no fhedza, mme ashu vho vha vha tshi ri dovhololela Thabelo Ya Murena. Ndo vha ndi tshi dzula ndo lavhelela vhurabeli hashu ha nga matsheloni, hune muṱa woṱhe wa vha wo kuvhangana u itela u guda nga ha Bivhili.

Ro vha ri tshi dzula bulasini tsini na Delphi, Indiana USA he ra vha ri tshi lima zwiliṅwa zwo fhambanaho. Ro vha ri tshi hwala zwenezwi zwiliṅwa nga gariki ra ya ra zwi rengisa tshiṱaraṱani kana nnḓu nga nnḓu. Ro vha ri tshi dzhia u shuma nga maanḓa zwi tshipiḓa tsha u shumela Mudzimu. Nga zwenezwo, ro vha ri tshi livhisa ṱhogomelo kha u shuma nga nnḓa ha Swondaha ngauri ro vha ri sa iti mushumo naho u ufhio u lemelaho nga ḽeneḽi ḓuvha. Tshiṅwe tshifhinga, muṱa washu wo ḓidzhenisa nga maanḓa kha mushumo wa bulasini, lwe ra kundelwa u livhisa ṱhogomelo kha u shumela Mudzimu.

U Maliwa Na U Thoma Muṱa

Nga 1963 ndi na miṅwaha ya 17, ndo vhingwa nga James we na ene a vha e muraḓo wa Old Brethren. Vhomakhulukuku wawe vho vha vhe miraḓo ya vhurereli ha Old Brethren. Roṱhe ro vha ri tshi funa u shumela Mudzimu nahone ri tshi tenda uri kereke yashu ndi yone i yoṱhe ya ngoho.

Nga 1975 ro vha ro no vha na vhana vha rathi nahone nga 1983 ro vha na ṅwana wa vhusumbe wa lupedzi. Rebecca we a tevhela ṅwana washu wa tanzhe, ndi ene musidzana e eṱhe. Ro vha ri tshi shuma nga maanḓa, ri sa shumisesi tshelede nahone ri tshi tshila vhutshilo ho leluwaho. Ro lwela u gudisa vhana vhashu zwe ra zwi guda kha vhabebi vhashu zwi tshi bva Bivhilini na zwe ra guda kha vhaṅwe vha vhurereli ha Old Brethren.

Mbonalo ya muthu yo vha i ya ndeme vhukuma kha vhathu vha vhurereli ha Old Brethren. Ro vha ri tshi dzhia nḓila ine muthu a ambara ngayo i tshi dzumbulula zwine a vha zwone nga ngomu samusi hu si na muthu ane a kona u vhona zwa mbiluni. Zwenezwi zwi amba uri arali muthu a tshi itesa zwitaela zwa mavhudzi, o vha a tshi dzhiiwa a tshi ḓihudza. Arali zwo oliwaho kha rokho zwo vha zwi tshi vhonalesa, na zwone zwo vha zwi tshi sumbedza uri u a ḓihudza. Tshiṅwe tshifhinga, mavhonele ashu nga ha u ambara o vha a tshi vhonala e a ndeme u fhira zwine Bivhili ya amba.

Tshenzhelo Ya U Valelwa Dzhele

Mafheloni a vho 1960, Jesse murathu wa mukalaha wanga we na ene a aluswa kha vhurereli ha Old Brethren, o valelwa dzhele nga nṱhani ha u hana u dzhenela vhuswole. Musi e henengei, o ṱangana na Ṱhanzi Dza Yehova, vhe na vhone vha vha vha tshi tenda uri u dzhenela vhuswole zwi hanedzana na zwine Bivhili ya funza. (Yesaya 2:4; Mateo 26:52) Jesse o ḓiphiṋa nga u haseledza Bivhili na Ṱhanzi dza Yehova na u vhona nḓila ine vha tshila ngayo nga awe maṱo. Nga murahu ha u guda Bivhili lwa tshifhinga tshilapfu, Jesse o lovhedziwa sa muṅwe wa Ṱhanzi Dza Yehova nahone zwenezwi a zwo ngo ri takadza.

Jesse o amba na mukalaha wanga nga zwe a zwi guda Bivhilini, o ita vhungoho ha uri mukalaha wanga a dzule a tshi wana magazini wa Tshiingamo na Fhaṱuwani! U vhala dzenedzi magazini zwo ita uri mukalaha wanga a fune Bivhili nga ho engedzeaho. Mukalaha wanga James, o vha a tshi funa u shumela Mudzimu, fhedzi o vha a tshi ḓipfa e kule nae. Nga zwenezwo, o vha a tshi takalela tshiṅwe na tshiṅwe tshine tsha nga ita uri a sendele tsini na Mudzimu.

Vhahulwane vhashu vha Old Brethren vho ri ṱuṱuwedza uri ri vhale magazini dza vhurereli ha Amish, Mennonites na dza dziṅwe kereke dza Old Brethren naho ri tshi dzi dzhia dzi tshipiḓa tsha shango. Fhedzi khotsi anga vho vha vha sa funi Ṱhanzi Dza Yehova. Vho vha vha sa ṱoḓi ri tshi vhala Tshiingamo na Fhaṱuwani! Nga zwenezwo ndo pfa na malofha anga a tshi shavha musi ndi tshi vhona mukalaha wanga a tshi khou vhala dzenedzi magazini. Ndo vha ndi tshi khou ofha uri u ḓo tenda pfunzo dza mazwifhi.

Naho zwo ralo, mukalaha wanga o vha o no vha na thaidzo na dziṅwe pfunzo dza Old Brethren, o vha a tshi pfa uri dzi lwisana na zwine Bivhili ya funza. Zwihulu hulu pfunzo ya uri ndi tshivhi u ita mushumo u lemelaho nga Swondaha. Sa tsumbo, vhurereli ha Old Brethren ho vha hu tshi funza uri zwo tendelwa u ṋea zwifuwo maḓi nga Swondaha, fhedzi u tupula tsheṋe zwo khakhea. Vhahulwane a vho ngo kona u mu sumbedza zwi tshi bva maṅwaloni uri ndi ngani vho vhea wonoyo mulayo. Nga zwiṱuku nga zwiṱuku, na nṋe nda thoma u timatima pfunzo dzi fanaho na dzenedzi.

Zwo ri konḓela u litsha vhurereli ha Old Brethren, ngauri ro vha ri tshi tenda uri ndi hone vhurereli ha ngoho nahone ri tshi ḓivha zwine zwa nga itea arali ra vhu ṱutshela. Fhedzi mvalo dzashu dzo vha dzi si tsha ri tendela u dzula kha vhurereli vhune ra ḓivha uri zwiṅwe zwithu zwine ha funza a zwi tendelani na Bivhili. Nga zwenezwo, nga 1983 ro ṅwala vhurifhi ra ṱalutshedza uri ndi ngani ri tshi khou ṱutshela vhurereli ha Old Brethren ra humbela na uri vhu vhalelwe tshivhidzo. Roṱhe ro mbo ḓi bviswa tshivhidzoni.

U Ṱoḓa Vhurereli Ha Ngoho

Nga murahu ha zwenezwo, ro thoma u ṱoḓa vhurereli ha ngoho. Ro vha ri tshi khou ṱoḓa vhurereli vhune ha ita zwine ha funza zwone. Tsha u thoma, ro thudzela kule vhurereli vhuṅwe na vhuṅwe vhune ha dzhenelela kha zwa nndwa. Ro vha ri tshi kha ḓi ṱoḓa vhurereli vhu sa ambari zwiambaro zwa vho mmboneni na vhune ha tshila vhutshilo ho leluwaho ngauri ro vha ri tshi dzhia zwenezwi zwi tshi sumbedza uri vhurereli a si tshipiḓa tsha shango. Nga 1983 u swika nga 1985 ro ḓiṋea tshifhinga tsha u mona na shango ḽa Amerika ri tshi khou ṱolisisa vhurereli nga vhuthihi nga vhuthihi, vhurereli ha Mennonites, Quakers na zwiṅwe zwigwada zwine zwa tshila vhutshilo ho leluwaho.

Nga tshenetshi tshifhinga, Ṱhanzi Dza Yehova vho ri dalela bulasini yashu tsini na Camden Indiana. Ro vha ri tshi thetshelesa, ri tshi vha humbela uri vha shumise ṱhalutshedzelo ya King James fhedzi. U sa dzhia sia kha zwa nndwa ha Ṱhanzi Dza Yehova ho ita uri ndi vha ṱhonifhe. Fhedzi zwo vha zwi tshi nkonḓela u vha thetshelesa ngauri ndo vha ndi tshi dzhia uri vhurereli havho vhu nga si vhe ha ngoho arali vha sa ṱhogomeli uri vha tea u ḓifhambanya na shango nga nḓila ine vha ambara ngayo. Ndo pfa uri u ḓikukumusa ndi zwone zwine zwa ita uri vhathu vha ambare nga nḓila yo fhambanaho na ine riṋe ra ambara ngayo. Ndo vha ndi tshi tenda uri zwithu zwine muthu a vha nazwo zwi ita uri a ḓihudze.

Mukalaha wanga James o thoma u ya Holoni Ya Ṱhanzi Dza Yehova a tshi ṱuwa na vhaṅwe vha vhana vhashu. Zwenezwi zwo vha zwi tshi ntsinyusa vhukuma. O nkhumbela uri ndi ṱuwe nae, fhedzi nda hana. Ḽiṅwe ḓuvha ambo ḓi mmbudza uri, “Naho ni sa ḓo tendelana na zwine vha funza, iyani u vhona nḓila ine vha farana ngayo.” O vha o mangadzwa nga nḓila ine vha farana ngayo.

Ndo fhedzisela ndo tenda u ṱuwa nae, fhedzi ndo vha ndi na vhusedzi. Ndo dzhena Holoni ndo ambara rokho yanga i si ya mivhalavhala na kuṅadzi. Vhaṅwe vha vhana vhashu vho vha vha songo ambara na zwienda, vha songo ambara na zwiambaro zwa mivhalavhala. Naho zwo ralo, Ṱhanzi Dza Yehova vho ḓa kha riṋe, vha ri fara nga nḓila yavhuḓi. Nga mbilu ndo ri, ‘Ro fhambana, fhedzi vha khou ri ṱanganedza naho zwo ralo.’

Ndo kwamea nga nḓila ye vha sumbedza ngayo lufuno, fhedzi ndo vha ndi kha ḓi vha ndo ḓiimisela u sokou sedza fhedzi. Ndo vha ndi sa imi kana u imba nyimbo dzavho. Nga murahu ha muṱangano, ndo vha vhudzisa mbudziso nnzhi nga ha zwithu zwe nda vha ndi tshi vhona u nga a vha khou zwi ita zwone kana uri luṅwalo lukene lu amba mini. Naho ndo vha ndi sa khou amba navho zwavhuḓi, muṅwe na muṅwe we nda mu vhudzisa o sumbedza dzangalelo kha nṋe. Ndo dovha nda mangadzwa na ngauri naho nda vhudzisa mbudziso i fanaho kha vhathu vho fhambanaho, ndo vha ndi tshi wana phindulo dzi fanaho. Tshiṅwe tshifhinga vho vha vha tshi ṅwala fhasi phindulo nahone zwo nthusa uri ndi kone u vhalulula nga murahu.

Nga tshilimo tsha 1985, nṋe na muṱa wanga ro ya buthanoni ḽa Ṱhanzi Dza Yehova Memphis, Tennessee u itela u sokou vhona. Mukalaha wanga James o vha a tshi kha ḓi vha o alusa ndebvu nahone ro vha ri tshi kha ḓi ambara zwiambaro zwashu zwi si zwa mivhalavhala. Nga tshifhinga tsha u awela, ho vha hu tshi dzulal hu na muthu ane a khou ḓa u ri lumelisa. Ro kwamea nga nḓila ye vha ri sumbedza ngayo lufuno, u livhisa ṱhogomelo kha riṋe na u ri ṱanganedza. Ro dovha ra mangadzwa nga vhuthihi vhune vha vha naho, ngauri hu sa londwi uri ri ya ngafhi, zwine zwa funzwa zwo vha zwi tshi fana.

Mukalaha wanga James o ṱanganedza pfunzo ya Bivhili nge a kwamea nga nḓila ine Ṱhanzi Dza Yehova vha sumbedza ngayo u vha na ndavha. O ṱolisisa tshiṅwe na tshiṅwe u itela a u vha na vhungo ha uri zwine a khou zwi guda ndi ngoho. (Mishumo 17:11; 1 Vhathesalonika 5:21) Nga u ya ha tshifhinga, James o pfa uri o wana ngoho. Naho zwo ralo, nṋe ndo ḓipfa ndo ḓaḓa. Ndo vha ndi tshi ṱoḓa u ita zwo lugaho, fhedzi ndo vha ndi sa ṱoḓi u ita “zwithu zwa tshizwino zwino,” zwine zwa nga ita uri ndi vhonale ndi “muthu wa shango.” Musi ndi tshi thoma u guda Bivhili na Ṱhanzi Dza Yehova, kha tshiṅwe tshanḓa ndo vha ndu tshi vha ndo fara Bivhili ya King James Version kha tshiṅwe ndo fara ya Ṱhalutshedzelo Ya Shango Ḽiswa. Ndo vhambedza vese iiṅwe na iṅwe kha dzenedzi ṱhalutshedzelo dzoṱhe u itela u ita vhungo ha uri a thi khou ḓodzwa museṱo maṱoni.

Zwo Itaho Uri Ndi Tende Uri Ndo Wana Ngoho

Musi ri tshi bvela phanḓa na u guda na Ṱhanzi Dza Yehova, ro guda uri Khotsi ashu wa ṱaḓulu ndi Mudzimu muthihi hu si vhararu, na u ri muthu ha na muya une wa bvela phanḓa na u tshila musi o no lovha. (Genesi 2:7; Dotoronomio 6:4; Hesekiele 18:4; 1 Vhakorinta 8:5, 6) Ro guda na uri hele ndi vhiḓa ḽo ḓoweleaho hu si fhethu hune vhafu vha swa nga mulilo lwa tshoṱhe. (Yobo 14:13; Phisalema 16:10; Muhuweleli 9:5, 10; Mishumo 2:31) U guda ngoho nga ha hele, yo vha i mvela phanḓa khulwane, zwihuluhulu ngauri vha Old Brethren vho vha vha sa tendelani nga ha uri hele ndi mini.

Fhedzi ndo vha ndi tshi kha ḓi ḓivhudzisa uri vhurereli ha Ṱhanzi Dza Yehova vhu nga vha hani ha ngoho ngeno ndi tshi kha ḓi vha dzhia vhe tshipiḓa tsha shango. Vho vha vha sa tshili vhutshilo ho leluwaho, he nda vha ndi tshi dzhia vhu hone ha ndeme. Fhedzi ndo dovha nda ṱhogomela na uri vha khou tevhedza ndaela ya Yesu Kristo ya u huwelela mafhungo maḓifha a Muvhuso kha vhathu vhoṱhe. Ndo pfa ndo ḓaḓa!​—Mateo 24:14; 28:19, 20.

Nga tshenetshi tshifhinga tshi konḓaho, lufuno lwe Ṱhanzi Dza Yehova dza ntsumedza lwone, lwo nṱuṱuwedza uri ndi bvele phanḓa na u ita ṱhoḓisiso. Tshivhidzo tshoṱhe tsho sumbedza u ṱhogomela na u vha na ndavha na muṱa washu. Musi vhaṅwe vha miraḓo ya tshivhidzo vha tshi ḓa u ri dalela, tshiṅwe tshifhinga vha tshi ita u nga vho ḓa u renga mafhi na makumba, ndo thoma u zwi vhona uri ndi vhathu vhavhuḓi. A vho ngo litsha u ri dalela naho hu na muṅwe wa Ṱhadzi Dza Yehova we a vha a khou guda na riṋe. Tshifhinga tshoṱhe musi vhe tsini na muḓi washu, vho vha vha tshi dzhena. Ro vha ri tshi khou ṱoḓa tshenetshi tshibuli u itela u ḓivha Ṱhanzi Dza Yehova khwiṋe nahone ro thoma u dzhiela nṱha nḓila ine vha vha na ndavha ngayo na riṋe na u ri sumbedza lufuno lwa vhukuma.

Ro vha ri sa sumbedzwi lufuno nga Ṱhanzi Dza Yehova dzi re tshivhidzoni tsha tsini na riṋe fhedzi. Musi ndi tshi khou bvela phanḓa na u lwisana na mafhungo a kuambarele na u ḓilugisa, Kay Briggs muṅwe wa Ṱhanzi a re kha tshivhidzo tsha nga tsini we a khetha u sa ambara zwiambaro zwa mivhalavhala nahone a sa iti zwa zwiḓoloḓolo, o ḓa a ndalela. Ndo ḓipfa ndi hayani musi ndi nae nahone ndo vha ndo vhofholowa u amba nae. Zwiṅwe hafhu, ḽiṅwe ḓuvha Lewis Flora we na ene a vha o aluswa kha vhurereli vhu sa ambari zwiambaro zwa mivhalavhala na ene o ḓa a ndalela. O zwi vhona kha tshifhaṱuwo tshanga uri ndo ḓaḓa, a nthumela vhurifhi ha masiaṱari a fumi u itela u nkhuthadza. Nḓila ye a ntsumbedza ngayo vhuthu yo ita uri ndi tsengise na miṱodzi nahone ndo vhala vhurifhhi hawe lunzhi lunzhi.

Ndo humbela Wahashu Vho O’Dell vhane vha vha mulavhelesi a dalelaho uri vha nṱalutshedze uri Yesaya 3:18-23 na 1 Petro 3:3, 4 dzi amba mini. Ndo vha vhudzisa uri “Naa dzenedzi vese a dzi sumbedzi uri u ambara zwiambaro zwi si zwa mivhalavhala zwi takadza mudzimu?” Vho vhudzisa uri “Naa zwo khakhea u ambara gebisi na u luka mavhudzi?” Kha vhurereli ha Old Brethren ro vha ri tshi luka mavhudzi a vhana vha vhasidzana nahone vhafumakadzi vho vha vha tshi ambara dzigebisi kana zwiṅadzi. Ndo zwi vhona uri zwiṅwe zwithu a ri khou zwi ita zwone nahone ndo mangadzwa nga nḓila ye mulavhelisi a vha a sa fheli mbilu ngayo na u sumbedza vhuthu.

Nga zwiṱuku nga zwiṱuku ndo thoma u tenda, fhedzi ho vha hu kha ḓi vha na iṅwe thaidzo ye ya vha i tshi khou mbilaedzisa nga maanḓa, ya uri vhafumakadzi vho vha vha tshi gera mavhudzi. Vhahulwane vho ntsumbedzisa uri mavhudzi a vhaṅwe vhafumakadzi a aluwi a vha malapfu, ngeno a vhaṅwe a tshi aluwa a vha malapfu vhukuma. Naa zwenezwi zwi ita uri mavhudzi a muṅwe a vhe khwiṋe kha a muṅwe? Vho dovha vha nthusa u vhona uri mafhungo a u ambara na u ḓilugisa a ya nga luvalo lwa muthu ene muṋe nahone vha nṋea zwithu zwine nda nga zwi vhala hayani.

U Shumisa Zwe Ra Zwi Guda

Ro vha ri tshi khou ṱoḓa zwianwiwa zwavhuḓi nahone ro zwi wana. Yesu o ri: “Arali ni tshi funana, ndi hone vhathu vhoṱhe vha tshi ḓo ḓivha zwa uri ni vhafunziwa vhanga.” (Yohane 13:35) Ro vha ri sa timatimi uri Ṱhanzi Dza Yehova ndi vhathu vhane vha sumbedza lufuno lwa vhukuma. Naho zwo ralo, zwenezwi zwo ita uri vhana vhashu vhahulwane, Nathan na Rebecca vha ḓaḓe samusi vho vha vho no ṱanganedza vhurereli ha Old Brethren nahone vho no lovhedziwa. Nga u ya ha tshifhinga vho kwamea nga ngoho ye ra vha gudisa yone na lufuno lwe lwa sumbedzwa nga Ṱhanzi Dza Yehova.

Sa tsumbo, Rebecca ho vha hu kale a tshi ṱoḓa u vha na vhushaka havhuḓi na Mudzimu. O wana zwi tshi vho mu lelutshela u rabela musi o no guda uri Mudzimu ha dzuli o dzudzanya uri ri ḓo ita mini kana uri vhumatshelo hashu vhu ḓo vha hani. U guda uri Mudzimu a si tshipiḓa tsha vhuraruthihi, fhedzi ndi muthu ane a nga kona u mu edzisa, na zwone zwo mu thusa uri a sendele tsini na Mudzimu. (Vhaefesa 5:1) Nahone zwo mu takadza u ḓivha uri ha kombetshedzei u vhidza Mudzimu nga luambo lwo shumiswaho kha King James version. O ḓipfa e tsini tsini na Musiki wawe musi a tshi guda nga ha nḓila ine Mudzimu a ṱoḓa ri tshi mu rabela ngayo na nga ha tshipikwa tshawe tsha uri vhathu vha tshile tshoṱhe kha ḽifhasi ḽa pharadiso.​—Phisalema 37:29; Nzumbululo 21:3, 4.

Ndugelo Dzine Roṱhe Ra Ḓiphiṋa Ngadzo

Nṋe, James na vhana vhashu vhaṱanu vhahulwane Nathan, Rebecca, George, Daniel, na John ro lovhedza sa vhaṅwe vha Ṱhanzi Dza Yehova nga tshilimo tsha 1987. Harley o lovhedzwa nga 1989 nahone Simon a lovhedzwa nga 1994. Muṱa washu woṱhe wo ḓiṋekedzela kha u ita mushumo we Yesu a u ṋea vhatevheli vhawe, wa u ḓivhadza mafhungo maḓifha a Muvhuso wa Mudzimu.

Vhana vhashu vhaṱanu vha vhatukana, Nathan, George, Daniel, John na Harley na ṅwananyana washu Rebecca, vhoṱhe vho vhuya vha shuma ofisini ya davhi ya Ṱhanzi Dza Yehova ya Amerika. George u kha ḓi vha henengei, o no fhedza miṅwaha ya 14 nahone Simon we a fhedza tshikolo nga 2001, a si kale o vha muraḓo wa muṱa wa bethele henengei. Vharwa vhashu vhoṱhe ndi vhahulwane kana vhashumeli zwivhidzoni zwa Ṱhanzi Dza Yehova. Mukalaha wanga u shuma sa muhulwane tshivhidzoni tsha Thayer nahone nṋe ndi dzula ndo farekanea nga mushumo wa u huwelela.

Zwa zwino ri na vhaḓuhulu vhararu Jessica, Latisha na Caleb, nahone zwi a takadza u vhona vhabebi vhavho vha tshi vha gudisa u funa Yehova vha tshi kha ḓi vha vhaṱuku. Sa muṱa, ro takala vhukuma uri Yehova o ri kokodzela khae, nahone a ri thusa u vhona vhathu vhane vha vhidzwa nga dzina ḽawe na lufuno lune vha lu sumbedza.

Ri pfela vhuṱungu vhathu vhe vha wana ṱhuṱhuwedzo i si yavhuḓi kha vhathu vho vha tangaho nṱhani ha u ṱuṱuwedzwa nga Bivhili, fhedzi vhe na lutamo lwa u ṱoḓa u takadza Mudzimu. Ri fhulufhela uri vha ḓo wana dakalo ḽine ra ḓiphiṋa ngaḽo zwa zwino ḽa u ya nnḓu nga nnḓu, ri sakhou rengisa fhedzi ri tshi khou ḓivhadza mulaedza wa Muvhuso wa Mudzimu na zwithu zwavhuḓi zwine wa ḓo zwi khunyeledza. Mbilu yanga i ḓala nga dakalo fulo na u livhuwa musi ndi tshi humbula nga ha nḓile ye vhathu vhane vha vhidzwa nga dzina ḽa Yehova vha ri sumbedza ngayo u sa fhela mbilu na lufuno.

[Zwifanyiso]

Musi ndi tshi kha ḓi vha na miṅwaha ya sumbe na musi ndo no vha muthu muhulwane

[Tshifanyiso]

James, George, Harley na Simon vho ambara zwiambaro zwavho zwi si zwa mivhalavhala

[Tshifanyiso]

Hetshi tshinepe tsha musi ndi tshi khou isa zwiliṅwa makete tsho bvelela kha gurannḓa ya henefho hayani

[Ṱhaluso ya Vhubvo ha Tshifanyiso]

Journal na Courier, Lafayette, Indiana

[Tshifanyiso]

Ndi na muṱa wanga zwa zwino