Wanani Thuso

“Muthu a nga kundwa nga muṅwe arali e eṱhe, fhedzi vhe vhavhili vha nga ima vha lwa nae.”​—Muhuweleli 4:12.

MUSI ri tshi tikedzwa nga vhaṅwe, ri a kona u kunda swina, hu sa londwi uri ḽeneḽo swina ndi nnyi kana ndi mini. Arali ni tshi ṱoḓa u litsha u daha, zwi nga vha vhuṱali uri ni humbele vha muṱani waṋu na khonani dzaṋu uri vha ni thuse kana muṅwe na muṅwe ane a ḓo ni tikedza na u sa ni fhelela mbilu.

Wanani thuso kha vhathu vho litshaho u daha ngauri vha ḓo ni pfela vhuṱungu na u ni thusa. Muṅwe Mukriste wa Denmark ane a pfi Torben o ri: “Nḓila ye vhaṅwe vha ntikedza ngayo a i vhambedzwi na tshithu.” Abraham ane a dzula India o ri: “Nḓila ye vha muṱani wanga na vhaṅwe Vhakriste vha mpfuna ngayo yo nthusa uri ndi litshe u daha.” Fhedzi nga zwiṅwe zwifhinga a zwo ngo eḓana u tikedzwa nga vha muṱani na nga khonani.

Muṅwe munna ane a pfi Bhagwandas o ri: “Ndo daha lwa miṅwaha ya 27, fhedzi nda ḓivhudza uri ndi tea u litsha musi ndi tshi guda zwine Bivhili ya zwi funza nga ha mikhwa i songo kunaho. Ndo lingedza u fhungudza, nda ṱutshela khonani dzanga. Nahone ndo ya u wana thuso kana vhane vha thusa vha re na thaidzo ya u daha, fhedzi zwa sokou sea zwi tshi ṱanama. Mafheleloni, ndo rabela ḽiṅwe ḓuvha nga madekwana, nda humbela Yehova Mudzimu uri a nthuse uri ndi litshe u daha. Nda kona u litsha.”

Tshiṅwe tshine tsha nga thusa ndi u lugiselela thaidzo dzine na nga sedzana nadzo. Ndi dzifhio? Thero i tevhelaho i ḓo zwi haseledza.

[Bogisi]

NAA NI TEA U SHUMISA MISHONGA?

Khamphani dzine dza ita mishonga ine ya shumiselwa u thusa vhathu u litsha u daha, i ngaho sa nicotine patch, dzi khou ita tshelede nnzhi nga maanḓa. Ni sa athu ita phetho ya u shumisa yeneyi mishonga, ḓivhudziseni mbudziso dzi tevhelaho:

Ndi vhuyelwa hani? Hu pfi vhunzhi ha ngalafho dzi a thusa vhukuma uri muthu a litshe u daha nga u fhungudza sakha ḽine muthu a nga vha naḽo a tshi khou litsha. Fhedzi a hu na vhuṱanzi ha uri dzi shuma lungafhani nga u ya ha tshifhinga.

Masiandoitwa ndi afhio? Miṅwe mishonga i na masiandoitwa a si avhuḓi, a ngaho sa u silingwa, u tsikeledzea na u humbula nga ha u ḓivhulaya. Ni songo hangwa uri ngalafho dzine ha pfi dzi thusa u litshisa muthu u daha, dzi ni ṋea tshiṅwe tshidzidzivhadzi na thaidzo dza mutakalo dzine dza vhangwa ngatsho. Zwine zwa amba uri ane a khou shumisa yeneyo ngalafho u vha a tshi kha ḓi vha na dzema.

Nḓila ya khwine ndi ifhio? Kha iṅwe ṱhoḓisiso, phesenthe dza 88 ya vhathu vho konaho u litsha u daha vho amba uri vho kona u ṱavhanya u litsha vha songo thusiwa nga zwiṅwe zwidzidzivhadzi.