1, 2. (a) Ri nga guda mini kha u konḓelela ha Gideoni na mmbi yawe ya vhanna vha 300? (Sedzani tshifanyiso tsha u thoma.) (b) U ya nga Luka 21:19, ndi ngani u konḓelela zwi zwa ndeme?

LINGEDZANI u humbula nndwa i konḓaho na i netisaho vhukuma vhukati ha Vhaisiraele vhe vha vha vho rangwa phanḓa nga Muhaṱuli Gideoni, vha tshi lwa na maswina avho. Gideoni na mmbi yawe vho pandamedza Vhamidiani u katela na vhashumisani navho vhusiku hoṱhe lwa khilomithara dzi ṱoḓaho u vha 32! Bivhili i ri vhudza uri ho bvelela zwi tevhelaho: “Gideoni a swika mulamboni wa Yorodane, é na vhanna vhaḽa vha ná maḓana mararu. Ó no wela vha vha vhó no neta.” Fhedzi vho vha vha sa athu u kunda, vho vha vha kha ḓi tea u lwa na maswole a 15 000. Maswina o vha o no tsikeledza Vhaisiraele lwa miṅwaha minzhi, ndi ngazwo vho vha vha nga si laṱele thaula. Nga zwenezwo, Gideoni na mmbi yawe vho bvela phanḓa vha tshi pandamedza maswina avho nahone vha fhedzisela vho a kunda!—Vhahaṱuli 7:22; 8:4, 10, 28.

² Na riṋe ri khou lwa nndwa i konḓaho na i netisaho. Maswina ashu ndi Sathane, shango ḽawe u katela na u sa fhelela  hashu. Vhaṅwe ro no fhedza miṅwaha minzhi ri tshi khou lwisana na enea maswina. Ro no kunda lunzhi nga nṱhani ha thuso ya Yehova. Naho zwo ralo, nndwa a i athu u fhela. Nga zwiṅwe zwifhinga ri nga kha ḓi netiswa nga u lwa. Kana ri nga kha ḓi netiswa nga u lindela vhufhelo ha ano maitele mavhi. Yesu o ri sevha uri ri ḓo sedzana na milingo i konḓaho u katela na u tovholwa maḓuvhani a vhufhelo. Fhedzi o dovha amba uri arali ra konḓelela ri nga kunda. (Vhalani Luka 21:19.) U konḓelela zwi katela mini? Ndi mini zwine zwa ḓo ri thusa u konḓelela? Ri nga guda mini kha vhe vha konḓelela? Nahone “u konḓelela hu fanela u khunyeledza mushumo waho” nga nḓila-ḓe?—Yakobo 1:4.

3. U konḓelela zwi katela mini?

³ U ya nga Bivhili, u konḓelela a si u sokou sedzana na vhuimo vhu konḓaho. Zwi katela nḓila ine ra humbula na u ḓipfa ngayo musi ro sedzana na milingo. U konḓelela zwi ita uri ri vhe na tshivhindi, ri fulufhedzee nahone ri sa fhele mbilu. Iṅwe bugu ya ndaedzi i amba uri u konḓelela ndi pfaneleo ine ya ita uri ri vhe na fulufhelo ḽo khwaṱhaho nahone ri iledze u laṱela thaula musi ro sedzana na milingo. Zwi ri thusa uri ri dzule ro khwaṱha na musi ro sedzana na milingo i konḓaho vhukuma. Nahone u konḓelela zwi ita uri ri kunde milingo na u livhisa ṱhogomelo kha tshipikwa tshashu hu si kha vhuṱungu ha tshenetsho tshifhinga.

4. Ndi ngani ri tshi nga amba uri u konḓelela hu ṱuṱuwedzwa nga lufuno?

⁴ Lufuno lu ri ṱuṱuwedza uri ri konḓelele. (Vhalani 1 Vhakorinta 13:4, 7.) Kha masia afhio? U funa hashu Yehova zwi ri ṱuṱuwedza u konḓelela zwine a tenda zwi tshi ri linga. (Luka 22:41, 42) U funa hashu vhahashu zwi ita uri ri konḓelele u sa fhelela havho. (1 Petro 4:8) U funa hashu mufarisi wa mbingano zwi ita uri ri konḓelele “vhuṱungu” vhune na vhavhingani vho takalaho vha sedzana naho nahone zwi dovha zwa thusa u khwaṱhisa mbingano.—1 Vhakorinta 7:28.

5. Ndi ngani hu Yehova fhedzi ane a fanelea u ri thusa u konḓelela?

⁵ Humbelani nungo kha Yehova. Yehova ndi “Mudzimu ane a ni thusa u konḓelela na u ni khuthadza.” (Vharoma 15:5) Ndi ene e eṱhe ane a pfesesa vhuimo, maḓipfele na vhubvo hashu. Nga zwenezwo, u a ḓivha zwine zwa ḓo ri thusa u konḓelela. Bivhili i ri: “Zwiné a ita ndi u tonda vhané vha mu ofha; zwililo zwavho u a zwi pfa a vha tshidza.” (Psalme ya 145:19) Fhedzi Mudzimu u fhindula hani thabelo dzashu dza u humbela nungo?

6. Samusi zwo fulufhedziswa Bivhilini, Yehova a nga ri ‘vulela nḓila ine ra ḓo bva ngayo’ kha milingo nga nḓila-ḓe?

⁶ Musi ri tshi humbela Yehova uri a ri thuse u konḓelela, u fulufhedzisa u ri ‘vulela nḓila ine ra ḓo bva ngayo.’ (Vhalani 1 Vhakorinta 10:13.) Zwenezwo u zwi itisa hani? Nga zwiṅwe zwifhinga, a nga kha ḓi fhelisa mulingo. Fhedzi kanzhi u ri ṋea nungo u itela uri ri ‘konḓelele nga vhuḓalo  ri sa fheli mbilu nahone ro takala.’ (Vhakolosa 1:11) Ngauri u a ri ḓivha zwavhuḓi, Yehova a nga si vhuye a tendela uri vhuimo vhu konḓe vhukuma lune ra ḓo kundelwa u dzula ri tshi fulufhedzea.

7. Ndi tshifanyiso tshifhio tshi sumbedzaho uri ri ṱoḓa zwiḽiwa zwa muya u itela u konḓelela?

⁷ Khwaṱhisani lutendo lwaṋu nga zwiḽiwa zwa muya. Ndi ngani zwiḽiwa zwa muya zwi zwa ndeme? Sa tsumbo: U itela u gonya Thavha ya Everest, muthu u fanela u vha e na calorie dzi ṱoḓaho u vha 6 000 muvhilini. Hetsho tshi fhira tshikalo tshine nga u tou angaredza muthu a fanela u vha e natsho. U itela u konḓelela na u swikelela tshipikwa tshawe, muthu ane a khou gonya thavha u fanela u vha o ḽa zwiḽiwa zwi re na calorie nnzhi vhukuma. Nga nḓila i fanaho, ri fanela u ḽa zwiḽiwa zwinzhi vhukuma zwa muya u itela u konḓelela na u swikelela tshipikwa tshashu. Ri fanela u ḓiimisela u fhedza tshifhinga kha pfunzo ya muthu nga eṱhe na miṱanganoni yashu. U ita nga u ralo zwi ḓo khwaṱhisa lutendo lwashu.—Yohane 6:27.

8, 9. (a) U ya nga Yobo 2:4, 5, nḓila ine ra aravha ngayo musi ro sedzana na milingo i sumbedza mini? (b) Musi no sedzana na milingo, ndi tshiitea tshifhio tshine tsha nga kha ḓi ḓa muhumbuloni waṋu?

⁸ Ni songo hangwa u fulufhedzea kha Mudzimu. Milingo a i ri pfisi vhuṱungu fhedzi. I dovha ya linga u fulufhedzea hashu kha Mudzimu. Nḓila ine ra aravha ngayo musi ro sedzana na milingo i bvisela khagala arali ri tshi dzhia Yehova sa Muvhusahoṱhe. Nga nḓila-ḓe? Sathane, swina ḽa Mudzimu ḽi lwisanaho na vhuvhusi hawe, o lwisana na Yehova nga u amba uri vhathu vha shumela Mudzimu nga zwiitisi zwa tseḓa. Sathane o ri: “Zwoṱhe zwine muthu a vha nazwo’, a nga zwi bvisa a tshi lamulela vhutshilo hawe.” Nga murahu ha zwenezwo Sathane o amba nga ha Yobo a ri: “Zwino edzou isa tshanḓa U fare marambo awe na ṋama yawe, U vhone a tshi ḓo U ṱala.” (Yobo 2:4, 5) Naa maitele a Sathane o shanduka? Na luthihi! Nga murahu ha miṅwaha yo vhalaho, musi Sathane a tshi poswa kha ḽifhasi, o bvela phanḓa a tshi pomoka vhashumeli vha Mudzimu vha fulufhedzeaho. (Nzumbululo 12:10) Na ṋamusi, Sathane u kha ḓi amba uri vhathu vha shumela Mudzimu nga zwiitisi zwa tseḓa. O ḓiimisela u ri vhona ri tshi landula ndugelo ya Mudzimu ya vhuvhusi na u litsha u mu shumela.

⁹ Musi ni tshi khou pfa vhuṱungu nga nṱhani ha mulingo, lingedzani u vhona nga maṱo a muhumbulo tshiitea tshi tevhelaho. Kha ḽiṅwe sia, Sathane na madimoni awe vho ita tshikhuvhugu. Vho lindela u vhona nḓila ine na ḓo aravha ngayo nahone vha khou ḓivhudza uri ni ḓo laṱela thaula. Kha ḽiṅwe sia, hu na Yehova, Khosi yashu Yesu Kristo, vhaḓodzwa vho vuswaho na vharuṅwa vhanzhi. Na vhone vha khou ṱhogomela zwine na khou sedzana nazwo, fhedzi vha ni vhandela zwanḓa! Vho takalela u vhona ni tshi khou kona u konḓelela na u bvela phanḓa ni tshi khou fulufhedzea kha Yehova. Na mbo ḓi pfa Yehova a tshi ni vhudza uri: “Ṅwana’nga, ṱalifha, U takadze mbilu yanga; ndi kone u hanedza vha u nnyadza.”—Mirero 27:11.

10. Ni nga edzisa hani Yesu musi zwi tshi ḓa kha u livhisa ṱhogomelo kha malamba a u konḓelela?

¹⁰ Livhisani ṱhogomelo kha malamba.  Kha ri ri no fara lwendo. Musi ni tshi khou tshimbila, na swika hune na dzhena thaneleni. Hoṱhe hune na sedza, ni vhona swiswi fhedzi. Fhedzi ni a zwi ḓivha uri arali na bvela phanḓa na lwendo u swika magumoni a thanele, ni ḓo vhona tshedza. Vhutshilo vhu fana na lwendo. Nga zwiṅwe zwifhinga, ni ḓo sedzana na zwifhinga zwi konḓaho nahone ni ḓo pfa no tsikeledzea nga thaidzo dzaṋu. Na Yesu a nga vha o ḓipfa nga yeneyo nḓila. Musi a tshi khou vhambiwa kha danda ḽa tshengedzo, o shoniswa nahone o vha a tshi khou pfa vhuṱungu vhuhulu. Tshenetshi tshi nga vha tsho vha tshi tshifhinga tshi konḓaho vhukuma vhutshiloni hawe! Ndi mini tsho mu thusaho uri a konḓelele? Bivhili i amba uri o lavhelela “dakalo ḽe a vha o vhetshelwa ḽone.” (Vhaheberu 12:2, 3) Yesu o livhisa ṱhogomelo kha malamba a u konḓelela hawe, tsha ndeme khae ho vha hu u ita uri dzina ḽa Mudzimu ḽi khethwe na u tikedza vhuvhusahoṱhe hawe. O vha a tshi zwi ḓivha uri mulingo ndi wa tshifhinganyana na uri malamba awe a ngei ṱaḓulu ndi a tshoṱhe. Milingo ine ra sedzana nayo ṋamusi i a tsikeledza nahone i pfisa vhuṱungu, fhedzi ni songo hangwa uri zwenezwo ndi zwa tshifhinganyana.

11. Ndi ngani ri tshi fanela u ṱolisisa tshenzhelo dza “vhe vha konḓelela”?

¹¹ A zwi ṱoḓei uri ri sedzane na milingo ri roṱhe. U itela u ṱuṱuwedza Vhakriste uri vha konḓelele milingo minzhi i bvaho kha Sathane, muapostola Petro o ṅwala uri: “Ilwani nae, no khwaṱha lutendoni, ni tshi ḓivha uri vhatendi nga inwi vhoṱhe vha khou konḓelela u tambula hu fanaho shangoni ḽoṱhe.” (1 Petro 5:9) Tshenzhelo dza “vhe vha konḓelela” dzi ri gudisa nḓila ya u dzula ri tshi fulufhedzea, dzi ri khwaṱhisedza uri ri nga kunda nahone dzi ri humbudza uri u fulufhedzea hashu hu ḓo lambedzwa. (Yakobo 5:11) Kha ri livhise ṱhogomelo kha tsumbo dzi si gathi. ^[1]—Sedzani notsi dza u fhedzisela.

12. Ri guda mini kha tsumbo ya vhakerube musi vhe tsimuni ya Edeni?

¹² Vhakerube ndi vharuṅwa vha re na vhuimo ha nṱha vhukuma. Nga murahu ha musi Adamu na Eva vha tshi ita tshivhi, Yehova o ṋea vhaṅwe vhakerube mushumo muswa kha ḽifhasi. Wo vha wo fhambana vhukuma na we vha vha vhe nawo ngei ṱaḓulu. Tsumbo yavho i nga ri gudisa nḓila ya u konḓelela musi ro ṋewa mushumo u konḓaho. Bivhili i amba uri Yehova o “dzudza Vha-kherube tsimuni ya Edeni thungo ya Vhubvaḓuvha, na lupenyo lwa tshusa i ṱungedzaho; ha vha u linda nḓila i yaho murini wa vhutshilo.” ^[2] (Sedzani notsi dza u fhedzisela.) (Genesi 3:24) Bivhili a i ambi uri vhakerube vho gungula kana u ḓipfa vhe vha ndeme kha u ita mushumo wavho  muswa. A vho ngo borea kana u laṱela thaula. Nṱhani hazwo, vho ita mushumo wavho u swika musi u tshi fhela, khamusi nga tshifhinga tsha Maḓi Mahulu, ane a nga vha o ḓa nga murahu ha miṅwaha i fhiraho 1 600!

13. Ndi mini zwo thusaho Yobo uri a kone u konḓelela milingo?

¹³ Yobo munna a fulufhedzeaho. Nga zwiṅwe zwifhinga ni nga kha ḓi ṱungufhala ngauri khonani yaṋu kana muraḓo wa muṱa wa haṋu o amba zwithu zwi kulaho nungo. Kana khamusi ni khou lwala kana u pfa vhuṱungu nga nṱhani ha uri no felwa nga muthu ane na mu funa. Fhedzi hu sa londwi zwiṅwe na zwiṅwe zwine zwa nga itea, ni nga khuthadzwa nga tsumbo ya Yobo. (Yobo 1:18, 19; 2:7, 9; 19:1-3) Yobo o vha a sa ḓivhi uri ndi ngani o sokou ḓelwa nga milingo, fhedzi ho ngo laṱela thaula. Ndi mini zwo mu thusaho u konḓelela? Tsha u thoma, o vha a tshi funa Yehova nahone a tshi ofha u mu ṱungufhadza. (Yobo 1:1) Yobo o vha tshi ṱoḓa u takadza Mudzimu hu sa londwi uri zwiimo ndi zwavhuḓi kana a si zwavhuḓi. Zwiṅwe hafhu, Yehova o sumbedza Yobo maanḓa awe nga u mu vhudza nga ha zwiṅwe zwa zwithu zwi akhamadzaho zwe a zwi sika. Zwenezwi zwo khwaṱhisedza Yobo vhukuma u ḓivha uri Yehova u ḓo fhelisa milingo yawe nga tshifhinga tsho teaho. (Yobo 42:1, 2) Zwo mbo ḓi itea nga u ralo. “Yehova a mbo humisa maṱhupho a Yobo . . . Yehova a dovha a ṋea Yobo lupfumo, lwa fhira luḽa lwe a vha e nalwo.” Yobo o tshila a “kalaha ó fura vhutshilo.”—Yobo 42:10, 17.

14. U ya nga 2 Vhakorinta 1:6, u konḓelela ha Paulo ho thusa hani vhaṅwe?

¹⁴ Muapostola Paulo. Naa ni khou holedzwa kana u tovholwa? Naa ni muhulwane wa tshivhidzo kana mulavhelesi wa ḽiisela ane a khou lemelwa nga vhuḓifhinduleli vhunzhi vhune na vha naho? Arali zwo ralo, tsumbo ya Paulo i nga ni thusa. Paulo o sedzana na u tovholwa hu vhavhaho vhukuma nahone o dzula a tshi vhilaedziswa nga vhahawe zwivhidzoni.  (2 Vhakorinta 11:23-29) Fhedzi Paulo ho ngo laṱela thaula nahone tsumbo yawe yo khwaṱhisa vhaṅwe. (Vhalani 2 Vhakorinta 1:6.) Nga hu fanaho, u konḓelela haṋu hu nga ṱuṱuwedza vhaṅwe uri vha konḓelele.

15, 16. (a) Ndi ufhio “mushumo” une wa fanela u khunyeledzwa nga u konḓelela? (b) Ṋeani tsumbo dza nḓila dzine ngadzo ‘u konḓelela ha fanela u khunyeledza mushumo waho.’

¹⁵ Mufunziwa Yakobo o hevhedzwa zwi tevhelaho: “U konḓelela hu fanela u khunyeledza mushumo waho, uri ni vhe vho khunyeledzaho na vha sa solei kha masia oṱhe, ni sa shayi tshithu na tshithihi.” (Yakobo 1:4) U konḓelela hu nga khunyeledza hani “mushumo” kha riṋe? Musi ri tshi sedzana na mulingo, ri nga zwi ṱhogomela uri ri fanela u vha na mbilu ndapfu, u livhuha kana u vha na lufuno. Musi ri tshi konḓelela mulingo, ri ḓo kona u sumbedza dzenedzo pfaneleo nga ho engedzeaho, nahone zwenezwo zwi ḓo ita uri ri khwinise vhumuthu hashu ha Vhukriste.

¹⁶ A ri ṱoḓi u pfuka mulayo wa Yehova u itela uri mulingo u fhele, nga nṱhani ha uri u konḓelela zwi ita uri ri vhe Vhakriste vhavhuḓi. Sa tsumbo, arali ni na vhuleme ha u vha na mihumbulo i songo kunaho, ni songo tendela naho tshi tshini tshine tsha ḓo ni linga! Humbelani Yehova uri a ni thuse u landula mahumbulele a songo kunaho. Naa hu na muraḓo wa muṱa ane a khou ni pikisa? Ni songo laṱela thaula! Ḓiimiseleni u bvela phanḓa ni tshi khou shumela Yehova. Zwenezwo zwi ḓo ita uri ni fulufhela Yehova no khwaṱha. Ni songo hangwa: Ni fanela u konḓelela u itela u ṱanganedzwa nga Mudzimu.—Vharoma 5:3-5; Yakobo 1:12.

17, 18. (a) Fanyisani ndeme ya u konḓelela u swika vhufheloni. (b) Samusi vhufhelo vhu tshi khou sendela, ndi vhufhio vhungoho vhune ra vha naho ?

¹⁷ Ri fanela u konḓelela u swika vhufheloni, hu si lwa tshifhinganyana. Humbulani nga ha tshikepe tshine tsha khou ṋupela. Vhaṋameli vhatsho vha fanela u bammbela u swikela vha tshi bva maḓini u itela uri vha tshile. Muthu ane a laṱela thaula musi a tshi tou thoma u bammbela u ḓo nwela khothe. Nga hu fanaho, na muthu ane a laṱela thaula a sa athu u bva maḓini u ḓo nwela khothe. Arali ri tshi ṱoḓa u tshila shangoni ḽiswa ri fanela u bvela phanḓa ri tshi khou konḓelela. Kha ri fane na muapostola Paulo we a ri: “A ri neti.”—2 Vhakorinta 4:1, 16.

¹⁸ U fana na Paulo, ri na vhungoho ho khwaṱhaho ha uri Yehova u ḓo ri thusa u konḓelela u swika vhufheloni. Paulo o ṅwala uri: “Ri a kunda kha zwithu zwoṱhe nga nṱhani ha we a ri funa. Ngauri ndi a tenda uri lufu, vhutshilo, vharuṅwa, mivhuso, zwithu zwa zwino na zwa tshifhinga tshi ḓaho kana maanḓa vhulapfu, vhudzivha kana tsiko naho i ifhio zwi nga si kone u ri fhandekanya na lufuno lwa Mudzimu lu re kha Kristo Yesu Murena washu.” (Vharoma 8:37-39) Ngoho ndi ya uri nga zwiṅwe zwifhinga ri ḓo neta. Fhedzi kha ri edzise Gideoni na mmbi yawe. Vho vha vho neta, fhedzi a vho ngo laṱela thaula. Vho “bvela phanḓa vha tshi vha pandamedza”!—Vhahaṱuli 8:4. NW.