Vhubvo ha mafhungo vhu sumbedza uri muapostola Paulo o vha a tshi khou ambela kha mulaedza kana maipfi ane a amba nga ha ndivho ya Mudzimu i re Bivhilini.

Kanzhi khandiso dzashu dzi redza Vhaheberu 4:12 u sumbedza uri Bivhili i na maanḓa a u shandula vhutshilo nahone zwenezwo zwo tea. Naho zwo ralo, zwi a thusa u ṱolisisa nga ho ṱanḓavhuwaho vhubvo ha maipfi a re kha Vhaheberu 4:12. Paulo o vha a tshi khou ṱuṱuwedza Vhakriste vha Vhaheberu uri vha ite zwithu u tendelana na ndivho dza Mudzimu. Vhunzhi ha dzenedzo ndivho dzo vha dzi kha maṅwalwa makhethwa. Tsumbo ye Paulo a i shumisa yo vha i ya Vhaisiraele vhe vha bviswa vhupulini ha Egipita. Vho vha vhe na tshilavhelelwa tsha u dzhena shangoni ḽo fulufhedziswaho “ḽine ḽa ela mukhaha na ṋotshi,” he vha vha vha tshi ḓo awela ngangoho.—Ek. 3:8; Doit. 12:9, 10.

Yeneyo yo vha i ndivho ya Mudzimu. Fhedzi nga murahu Vhaisiraele vho rindidza mbilu dzavho nahone vha si vhe na lutendo, zwenezwo zwa ita uri vhunzhi havho vha si dzhene kha honoho vhuawelo. (Num. 14:30; Yosh. 14:6-10) Naho zwo ralo, Paulo o engedza nga ḽa uri hu kha ḓi vha na “fulufhelo ḽa u dzhena vhuaweloni [ha Mudzimu].” (Vhaheb. 3:16-19; 4:1) Zwi khagala uri ḽeneḽo “fulufhelo” ndi tshipiḓa tsha ndivho ya Mudzimu. U fana na Vhakriste vha Vhaheberu, ri nga vhala nga ha yeneyo ndivho na u ita zwithu u tendelana nayo. U itela u ombedzela uri ḽeneḽi fulufhelo ḽo thewa kha Maṅwalo, Paulo o redza zwipiḓa zwa Genesi 2:2 na Psalme ya 95:11.

Ndi zwa vhukuma uri zwi tea u ri kwama uri hu “kha ḓi vha na fulufhelo ḽa u dzhena vhuaweloni [ha Mudzimu].” Ri fulufhela uri zwi kha ḓi konadzea u dzhena vhuaweloni ha Mudzimu samusi Bivhili yo zwi amba nahone ro dzhia vhukando uri ri dzhene. A ro ngo zwi ita nga u lwela u tevhela Mulayo wa Mushe kana nga u ita zwithu zwavhuḓi hu u itela uri ri tondwe nga Yehova. Nṱhani hazwo, nga ṅwambo wa uri ri na lutendo kha Mudzimu, ri tshimbidzana na ndivho yawe yo dzumbululwaho nahone ri bvela phanḓa ri tshi ita nga u ralo. Zwiṅwe hafhu, samusi zwo ambiwa afho nṱha, vhathu vhanzhi shangoni ḽoṱhe vho thoma u guda Bivhili na zwe ya zwi dzumbulula nga ha ndivho yawe. Vhunzhi havho vha sudzuluselwa u shandula matshilele avho, vha vha na lutendo na u lovhedzwa vha vha Vhakriste. Nḓila ine vha kwamea ngayo ndi vhuṱanzi vhu pfalaho ha uri “ipfi ḽa Mudzimu ḽi a tshila nahone ḽi na maanḓa.” Ndivho ya Mudzimu yo ambiwaho Bivhilini, yo no kwama vhutshilo ha vhathu nahone i ḓo bvela phanḓa u vha na maanḓa vhutshiloni hashu.