“NDO vha ndi na miṅwaha ya 15 musi ndi tshi lovhedzwa nahone nga murahu ha miṅwedzi ya rathi nda dzhenela tshumelo ya vhuvulanḓila ha u thusa. Nga murahu ha ṅwaha, nda ṅwalisela tshumelo ya vhuvulanḓila ha tshifhinga tshoṱhe. Musi ndi tshi ṱhaphudza tshikolo tsha murole wa nṱha, nda ita khumbelo ya u shuma hu re na ṱhoḓea khulwane ya vhahuweleli vha Muvhuso. Ndo vha ndi tshi ṱoḓa u pfuluwa muvhunduni we nda vha ndi tshi dzula khawo na u vha kule na makhulu wanga vhe nda vha ndi tshi dzula navho, vhane vha si vhe Ṱhanzi ya Yehova. Zwo nṱungufhadza lungafhani musi mulavhelesi wa ḽiisela a tshi mmbudza uri tsimu ye nda avhelwa yone ndi ḓorobo ye nda bebelwa khayo! Ndo lingedza u sa mu sumbedza nḓila ine nda ḓipfa ngayo. Ndo ṱuwa ndo ṱungufhala ndi tshi khou elekanya nga zwe a mmbudza zwone. Nda vhudza muthu ane nda shuma nae tsimu nda ri: “Ndi vhona u nga ndi fana na Yona. Fhedzi Yona o fheleledza o ya Ninive. Nga zwenezwo, na nṋe ndi ḓo ya nda shuma he nda avhelwa hone.”

“Ndo no fhedza miṅwaha miṋa ndi tshi khou vula nḓila ḓoroboni ine nda dzula khayo nahone ndi a vhona nḓila ine zwa vha vhuṱali ngayo u tevhela vhulivhisi he nda ṋewa hone. Thaidzo khulwane yo vha i mahumbulele anga o khakheaho. Zwino ndi na dakalo ḽihulwane. Ndo vha na pfunzo dza Bivhili dza 24 nga murahu ha ṅwedzi muthihi. Nga thuso ya Yehova, ndo thoma na pfunzo ya Bivhili na makhulu wanga vhe vha vha vha tshi mpikisa.”

Mugudiswa wa Bivhili o kombetshedzea u khetha vhukati ha u ya buthanoni ḽa Vhukriste na u ya kha vhuṱambo ha maḓuvha a mabebo a shaka na munna wawe. Munna wawe o tenda uri a nga ya buthanoni. Ene a vhudza munna wawe uri u ḓo tevhela nga murahu. Naho zwo ralo, musi a tshi bva buthanoni, o vhona zwi khwine u sa ḓivhea kha vhuimo vhune ha nga vha na khombo khae siani ḽa muya, nga zwenezwo a si ye kha honoho vhuṱambo.

Munna wawe a vhudza mashaka uri mufumakadzi wawe u ḓo ḓa nga murahu a tshi bva “muṱanganoni wa Dziṱhanzi,” vha mu fhindula vha ri, “A nga si ḓe, Ṱhanzi dza Yehova a vha pembeleli maḓuvha a mabebo.” *

Zwi re zwone ndi uri munna wawe o takadzwa vhukuma nge mufumakadzi wawe a imela zwine a zwi tenda na luvalo lwawe. Buḓo ḽawe ḽa u fulufhedzea ḽo mu vulela tshibuli tsha u ṱanziela kha munna wawe, kathihi na vhaṅwe. Ho vha na mvelelo dzifhio? Munna wawe o ṱanganedza pfunzo ya Bivhili nahone a thoma u ya miṱanganoni na mufumakadzi wawe.