NGA hu fanaho, vhagudi vha Bivhili vha fana na vhaṱoḓi vha musuku. Vhenevho vhagudi vha fanela u vha vhashumi vha biko nahone vha fanela u bvela phanḓa vha tshi guda Maṅwalo u itela u vha na vhuṱali. Sa vhagudi vha Bivhili, ri nga guda mini nga u ṱolisisa nḓila tharu dzine musuku wa waniwa ngadzo?

Edzani u humbula ni tshi khou tshimbila khunzi-khunzini ya mulambo nahone ni vhona kutombo kune kwa khou penya. Ni a kwatama nahone ni a takalela uri no doba musuku. Ndi kuṱuku-ṱuku nahone ku a konḓa u wanala. A zwi timatimisi uri ni a sedza-sedza arali hu na zwiṅwe zwitombo.

Tshifhingani tsho fhiraho, Ṱhanzi ya Yehova i nga vha yo ḓa u haseledza na inwi mulaedza u bvaho Bivhilini. Khamusi ni kha ḓi humbula musi ni tshi thoma u pfa wonoyo mulaedza, zwo vha zwi tshi tou nga ndi kutombo kwa musuku. Khamusi zwo itea musi ni tshi thoma u pfa dzina ḽa Mudzimu Yehova Bivhilini. (Ps. 83:18) Khamusi no guda na uri ni nga kona u vha khonani ya Yehova. (Yak. 2:23) No ṱavhanya na zwi ḓivha uri no wana zwithu zwi fhiraho musuku. Nahone no vha ni tshi ṱoḓa u bvela phanḓa ni tshi ḓivha zwo engedzeaho.

Nga zwiṅwe zwifhinga, zwitombo zwiṱuku zwa musuku zwi wanala kha matombo a re mulamboni. Kha khalaṅwaha nthihi, vhaṱoḓi vha musuku vha shumaho nga nungo dzoṱhe vha nga wana zwitombo zwinzhi zwa musuku kha eneo matombo. Wonoyo musuku u nga vhidza dolara nnzhi.

Musi ni tshi thoma u guda Bivhili na Ṱhanzi ya Yehova, ni nga vha no ḓipfa sa muṱoḓi wa musuku we a tumbula musuku munzhi. U elekanya nga ha ndimana dza Bivhili zwi nga vha zwo ita uri ni vhe na nḓivho, zwe zwa ita uri ni aluwe nga lwa muya. Musi ni tshi elekanya nga ha ngoho ye na vha ni tshi khou i guda Bivhilini, no guda nḓila ine na nga sendela ngayo tsini na Yehova na u dzula ni tshi ita zwithu zwine zwa ḓo ita uri a ni fune ni na tshilavhelelwa tsha vhutshilo vhu sa fheli.—Yak. 4:8; Yuda 20, 21.

U fana na muṱoḓi wa musuku, ni nga vha no vha no ḓiimisela u ṱoḓa nḓivho yo engedzeaho ya  Bivhili. Musi no no guda ngoho dza mutheo dza Bivhili, khamusi no ṱuṱuwedzea uri ni dzhie vhukando ha u ḓiṋekedzela na u lovhedzwa.—Mat. 28:19, 20.

Muṱoḓi wa musuku a nga wana zwitombo zwiṱuku zwa musuku kha matombo. Zwiṅwe zwipiḓa zwa eneo matombo zwi vha zwi na musuku munzhi lune zwa nga bwiwa na u pwashiwa u itela u wana musuku. Musi ni tshi tou thoma u lavhelesa ḽeneḽo tombo, ni nga si kone u vhona musuku. Ndi ngani? Ngauri tombo ḽithihi ḽi nga vha ḽi na musuku u eḓanaho gireme dza fumi (10g). Naho zwo ralo, muṱoḓi wa musuku u a ḓivha uri ndi zwa ndeme u kwasha ḽeneḽo tombo uri a wane musuku.

Musi muthu o no guda “pfunzo dza mutheo dza Kristo,” u fanela u bvela phanḓa a tshi ita vhuḓidini. (Vhaheb. 6:1, 2) Ni fanela u shuma nga nungo dzoṱhe u itela u guda zwithu zwiswa na zwi shumaho kha ngudo yaṋu ya Bivhili. Nga zwenezwo, ni nga ita mini uri ni dzule ni tshi vhuyelwa kha ngudo ya muthu nga eṱhe naho no no fhedza miṅwaha minzhi ni tshi khou guda Bivhili?

Bvelani phanḓa ni tshi ḓiimisela u guda. Livhisani ṱhogomelo kha zwine na khou zwi guda. Bvelani phanḓa ni tshi ita vhuḓidini nahone ni ḓo wana vhuṱali na vhulivhisi zwi bvaho ha Mudzimu. (Vharoma 11:33) U itela u vha na nḓivho yo engedzeaho ya Bivhili, shumisani zwishumiswa zwa u ita ṱhoḓisiso nga luambo lwaṋu. Ṱoḓani phindulo dza mbudziso dzaṋu dza Bivhili ni sa fheli mbilu. Vhudzisani vhaṅwe uri ndi maṅwalo na thero dzifhio dze vha wana dzi tshi thusa na u ṱuṱuwedza. Vhudzani vhaṅwe zwe na zwi guda musi ni tshi khou guda Bivhili.

Ndi ngoho uri tshipikwa tshaṋu a si u sokou engedza nḓivho. Muapostola Paulo o sevha uri “nḓivho i nga ita uri ri ḓikukumuse.” (1 Vhakor. 8:1) Nga zwenezwo, shumani no ḓifunga u itela uri ni dzule ni tshi ḓiṱukufhadza na u vha na lutendo lwo khwaṱhaho. U vha na vhurabeli ha muṱa na ngudo ya muthu nga eṱhe tshifhinga tshoṱhe, zwi ḓo ni thusa uri ni dzule ni tshi tshila u tendelana na zwine Yehova a zwi funa nahone zwi ḓo ni ṱuṱuwedza uri ni thuse vhaṅwe. Zwi fhiraho zwenezwo, ni ḓo takala vhukuma ngauri no wana zwi fhiraho musuku.—Mir. 3:13, 14.