Zwenezwo zwo vha zwi zwiṅwe zwa zwithu zwe maswina a Yesu a vha a tshi zwi shumisa u itela u mu vhona mulandu na vhafunziwa vhawe. Mulayo wa Mushe wo vha u tshi katela ndaela dzo vhalaho nga ha u ḓikunakisa kha zwithu zwi ngaho, u rothisa luḓi, mapele na u fara zwitumbu zwa vhathu na zwipuka. Wo dovha wa ṋea vhulivhisi nga ha nḓila ya u ḓikunakisa. Zwenezwi zwo vha zwi tshi itwa nga u ita tshiṱhavhelo, u ṱamba kana u hasha maḓi.—Lev., ndima. dza 11-15; Num., ndima. 19.

Vhafunzi vha Vhayuda vho ṱalutshedza yeneyo milayo nga vhuḓalo. Muṅwe muḓivhi o amba uri vho vha vha tshi nga “vhudzisa uri no wana ngafhi tshika, i nga shata hani vhaṅwe, na uri ni nga shata hani zwiṅwe zwithu na nḓila ine na nga kunakiswa ngayo.”

Maswina a Yesu o mu vhudzisa uri: “Ndi ngani vhafunziwa vhau vha sa tevheli sialala ḽa vhomakhulukuku washu, vha tshi ḽa vha songo ṱamba zwanḓa?” (Marko 7:5) Eneo maswina o vha a sa khou amba uri u ḽa u songo ṱamba zwanḓa zwi a lwadza. U ya nga sialala, vhafunzi vho vha tshi amba uri muthu u fanela u thoma a ṱulukedziwa a sa athu u ḽa. Muḓivhi we a bulwa mathomoni o dovha a ri: “A zwi tou vha khagala uri ho vha hu tshi shumiswa mvuvhelo ifhio, maḓi e a vha a tshi fanela u shumiswa, muthu we a vha a tshi shela maḓi na uri hu ṱulukedzwa maḓi mangafhani u itela u ṱamba zwanḓa.”

Nḓila ye Yesu a aravha ngayo kha yeneyo milayo yo itwaho nga vhathu yo vha yo leluwa. O vhudza vharangaphanḓa vha vhurereli ha Vhayuda vha ḓanani ḽa u thoma ḽa miṅwaha a ri: “Vhadzia-muhoyo ndi inwi, Yesaya o porofita nga ho teaho nga ha inwi, samusi zwo ṅwalwa ha pfi: ‘Vhathu avha vha nkhulisa nga milomo, ngeno mbilu dzavho dzi kule na [Yehova]. U ngwadamela havho ndi ha mahandana, ngauri vha funza ndaela dza vhathu.’ Ni pfuka mulayo wa Mudzimu na tevhela sialala ḽa vhathu.”—Marko 7:6-8.