1, 2. Ndi ngani ri tshi fanela u gudisa vhaṅwe uri vha dzhenele tshumelo ya lwa ṱaḓulu?

U HUWELELA mafhungo maḓifha a Muvhuso zwo vha zwi mushumo wa ndeme vhukuma kha Yesu. Naho zwo ralo, o ḓiṋea tshifhinga tsha u gudisa vhaṅwe u vha vhalisa na vhagudisi. (Mat. 10:5-7) Naho Filipo o vha o farakanea nga u huwelela mafhungo maḓifha, o ḓiṋea tshifhinga tsha u thusa vhananyana vhawe vhaṋa uri vha kone u huwelela mafhungo maḓifha nga nḓila i bvelelaho. (Mish. 21:8, 9) U gudisa ho raloho ndi ha ndeme na ṋamusi.

² Shangoni ḽoṱhe, tshivhalo tsha vhathu vhane vha khou ṱanganedza mafhungo maḓifha tshi khou engedzea. Vhahuweleli vha sa athu u lovhedzwa vha fanela u pfesesa uri ndi zwa ndeme u vha na pfunzo ya Bivhili ya muthu nga eṱhe. Vha fanela u dovha vha gudiswa u huwelela mafhungo maḓifha na u gudisa vhaṅwe ngoho. Zwivhidzoni zwashu, vhahashu vha fanela u ṱuṱuwedzwa u shuma nga nungo dzoṱhe u itela uri vha fanelee u vha vhashumeli na vhahulwane vha tshivhidzo. Vha tshi shumisa “nyeletshedzo dzavhuḓi,” Vhakriste vho vhibvaho vha nga thusa vhaswa ngohoni uri vha ite mvelaphanḓa ya lwa muya.—Mir. 4:2.

3, 4. (a) Paulo o sumbedza hani uri u guda Bivhili zwi tshimbidzana na vhuḓinḓa vhu bvelelaho? (b) Musi ri sa athu u ṱuṱuwedza vhagudiswa vhashu u vha na pfunzo ya Bivhili ya muthu nga eṱhe, ri fanela u vha ri tshi khou ita mini?

³ Ndi ngani zwi zwa ndeme u vha na pfunzo ya Bivhili ya muthu nga eṱhe? Ri wana phindulo ya zwenezwi kha maipfi e Paulo a a ṅwalela Vhakriste vha Kolosa. O ri: “[A ro ngo] litsha u ni rabelela na u humbela uri ni ḓadzwe nga nḓivho yo teaho ya zwine a zwi funa nga vhuṱali hoṱhe na nga u ṱalukanya ha lwa muya, uri ni tshimbile nga nḓila yo fanelaho Yehova uri ni kone u mu takadza nga vhuḓalo musi ni tshi khou bvela phanḓa na u aṋwa mitshelo kha mushumo muṅwe na muṅwe wavhuḓi na u engedza nḓivho yo teaho ya Mudzimu.” (Vhakol. 1:9, 10) Vhakriste vha Kolosa vho vha vha tshi nga kona u ‘tshimbila nga nḓila yo fanelaho Yehova uri vha kone u mu takadza nga vhuḓalo’ ngauri vho vha vhe na yeneyo nḓivho yo teaho. Zwenezwi zwo vha zwi tshi ḓo ita uri vha bvele phanḓa vha tshi “aṋwa mitshelo kha mushumo muṅwe na muṅwe wavhuḓi,” zwihuluhulu kha mushumo wa u huwelela mafhungo maḓifha. Mushumeli wa Yehova u fanela u vha na pfunzo ya Bivhili ya muthu nga eṱhe u itela uri tshumelo yawe i vhe i bvelelaho. Ri ita zwavhuḓi musi ri tshi thusa vhagudiswa vha Bivhili uri vha pfesese zwenezwo.

⁴ Musi ri sa athu u thusa vhaṅwe u vhona uri ndi zwa ndeme u vha na pfunzo ya Bivhili ya muthu nga eṱhe, i fanela u vha i ya ndeme kha riṋe. Zwi re zwone ndi uri ri fanela u ḓiḓowedza u guda Bivhili tshifhinga tshoṱhe. Nga zwenezwo, ni nga ḓivhudzisa uri: ‘Musi ṋemuḓi a tshi amba zwi sa tshimbidzani na pfunzo ya Bivhili kana a tshi vhudzisa mbudziso dzi konḓaho, naa ndi a kona u mu fhindula zwi tshi bva Bivhilini? Musi ndi tshi vhala nga ha nḓila ye Yesu, Paulo na vhaṅwe vha konḓelela ngayo vhuḓinḓani, naa ndi a elekanya nga ha nḓila ine u konḓelela havho zwa kwama ngayo tshumelo yanga kha Yehova?’ Roṱhe ri ṱoḓa nḓivho na nyeletshedzo i bvaho Bivhilini. Nahone arali ra vhudza vhaṅwe nga ha nḓila ye ra vhuyelwa ngayo nga pfunzo ya Bivhili ya muthu nga eṱhe, ri nga vha ṱuṱuwedza uri na vhone vha kone u vhuyelwa nga u vha vhagudi vha Bivhili.

5. Ṋeani nyeletshedzo ya nḓila ine na nga thusa ngayo vhaswa ngohoni u vha na pfunzo ya Bivhili ya muthu nga eṱhe tshifhinga tshoṱhe.

⁵ Ni nga ḓivhudzisa uri: ‘Ndi nga gudisa hani mugudiswa wanga u guda Bivhili tshifhinga tshoṱhe?’ Nḓila yavhuḓi ndi u thoma na mu sumbedza nḓila ya u lugiselela khandiso ine na khou i guda nae. Ni nga mu eletshedza uri a vhale tshipiḓa tsha ṱhumetshedzo ya bugu Bivhili I Funza Mini Zwa Vhukuma? nahone a vhale Maṅwalo o redzwaho. Mu thuseni uri a lugiselele miṱangano e na tshipikwa tsha u shela mulenzhe. Mu ṱuṱuwedzeni uri a vhale thero dzoṱhe dza Tshiingamo na Awake! Arali Watchtower Library kana Watchtower ONLINE  LIBRARY i hone nga luambo lwawe, ni nga mu sumbedza nḓila ya u i shumisa u itela u wana phindulo dza mbudziso dzawe Bivhilini. Nga nṱhani ha thuso ye na mu ṋea yone, nga u ṱavhanya mugudiswa waṋu a nga thoma u takalela u vha na pfunzo ya Bivhili ya muthu nga eṱhe.

6. (a) Ni nga thusa hani mugudiswa waṋu u ṱahulela u funa Bivhili? (b) Ndi mini zwine mugudiswa waṋu a nga zwi ita arali a thoma u funa Bivhili?

⁶ Ndi ngoho uri a ro ngo fanela u kombetshedza muthu u vhala na u guda Bivhili. Nṱhani hazwo, kha ri shumise zwishumiswa zwine ra zwi wana ndanguloni ya Yehova u itela u thusa vhagudiswa vhashu u funa Bivhili. Nga u ya ha tshifhinga, mugudiswa wa Bivhili a nga ḓipfa nga nḓila i fanaho na ya mupsalme we a imba a ri: “Ndi ḓifhelwa nga u vha tsini na Mudzimu; vhushavhelo hanga ndi ḓivha Iwe Muṋe wanga Yehova.” (Ps. 73:28) Muya wa Yehova u ḓo thusa onoyo mugudiswa ane a ṱoḓa u sendela tsini nae.

7. Yesu o gudisa hani vhahuweleli vha mafhungo maḓifha? (Sedzani tshifanyiso tsha u thoma.)

⁷ Kha Mateo ndima ya 10, ri wana nyeletshedzo dze Yesu a dzi ṋea vhaapostola vhawe vha 12. Nṱhani ha u sokou amba, o vha vhudza zwine vha fanela u zwi ita. ^[1] Vhaapostola vho thetshelesa musi Yesu a tshi vha gudisa nḓila ya u huwelela nga hu bvelelaho. Nahone vha takutshedza vha ya u huwelela. Musi vha tshi vhona nḓila ine Yesu a huwelela ngayo, nga u ṱavhanya vho vha vhagudisi vhavhuḓi vha Bivhili. (Mat. 11:1) Ri nga gudisa vhagudiswa vhashu vha Bivhili uri vha vhe vhahuweleli vha bvelelaho vha mafhungo maḓifha. Kha ri ṱhogomele nḓila mbili dzine ra nga vha thusa ngadzo.

8, 9. (a) Yesu o amba hani na vhathu vhuḓinḓani? (b) Ri nga thusa hani vhahuweleli vhaswa ngohoni u amba na vhathu u fana na Yesu?

⁸ Ambani na vhathu. Kanzhi Yesu o vha a tshi amba na vhathu nga ha Muvhuso. Sa tsumbo, o vha na nyambedzano yavhuḓi na muṅwe mufumakadzi tshisimani tsha Yakobo tsini na muḓi wa Sikara. (Yoh. 4:5-30) O dovha a amba na Mateo wa Mulevi we a vha e muthelisi. Evangeli a dzi ambi zwinzhi nga ha yeneyo nyambedzano, fhedzi Mateo o tenda u rambiwa nga Yesu a vha mutevheli wawe. Mateo na vhaṅwe vho pfa Yesu a tshi amba musi vhe tshimimani muḓini wa Mateo.—Mat. 9:9; Luka 5:27-39.

⁹ Kha tshiṅwe tshiitea, Yesu o amba zwavhuḓi na Nathanaele we a vha e na mavhonele a si avhuḓi nga ha vhathu vhane vha bva Nazareta. Nga nṱhani ha zwenezwo, Nathanaele o ṱuṱuwedzea uri a shandule mavhonele awe. O dzhia tsheo ya u guda zwo engedzeaho nga ha zwe zwa vha zwi tshi khou funzwa nga Yesu munna a bvaho Nazareta. (Yoh. 1:46-51) Nga zwenezwo, ri na zwiitisi zwi pfalaho zwa u gudisa vhahuweleli vhaswa ngohoni u amba na vhathu nga nḓila yavhuḓi nahone vho dzika. ^[2] Vhane ra vha thusa nga yeneyi nḓila vha ḓo takala musi vha tshi vhona vhathu vha mbilu dzavhuḓi vha tshi thetshelesa zwine vha amba.

10-12. (a) Yesu o ṱahulela hani dzangalelo ḽa vhe vha sumbedza u takalela mafhungo maḓifha? (b) Ri nga thusa hani vhahuweleli vhaswa ngohoni u khwinisa vhutsila havho sa vhagudisi vha Bivhili?

¹⁰ Gudisani vho ḓiimiselaho u thetshelesa. Yesu o vha e na tshifhinga tshiṱuku tsha u huwelela. Naho zwo ralo, o ḓiṋea tshifhinga tsha u gudisa vhathu vhane vha takalela u pfa mafhungo maḓifha. Sa tsumbo, Yesu o funza vhathu e tshikepeni. Kha tshenetsho tshiitea, o ita uri Petro a fashe khovhe nnzhi nga lwa vhuṱolo nahone a mu vhudza uri: “U bva zwino u ḓo vha murei wa vhathu.” Ho vha na mvelelo dzifhio kha zwe Yesu a zwi amba na u zwi ita? Petro na khonani dzawe vho ‘humisela zwikepe khunzi-khunzini, vha ṱutshela zwithu zwoṱhe vha tevhela Yesu.’—Luka 5:1-11.

¹¹ Nikodemo we a vha e muraḓo wa khoro  ya Sanhedrini o takalela zwe Yesu a vha a tshi zwi funza. O vha a tshi ṱoḓa u guda zwo engedzeaho, fhedzi o vha a tshi ofha vhathu uri vha ḓo ri mini arali a amba na Yesu vha tshi khou mu vhona. Yesu o vha a tshi tendelana na zwiimo nahone a tshi ṋea vhathu tshifhinga, nga zwenezwo, o ṱangana na Nikodemo vhusiku he ha vha hu si na vhathu. (Yoh. 3:1, 2) Ri nga guda mini kha enea mafhungo? Murwa wa Mudzimu o ḓiṋea tshifhinga tsha u fhaṱa lutendo lwa vhaṅwe. Naa a ro ngo fanela u ita zwi fanaho musi ri tshi ita nyendo dza u vhuyelela na u fara pfunzo dza Bivhili na vha re na dzangalelo?

¹² Khamusi vhahuweleli vhaswa ngohoni vha nga khwinisa vhutsila havho sa vhagudisi vha Bivhili arali ri tshi shuma navho vhuḓinḓani. Ri nga vha thusa uri vha humele kha vhe vha sumbedza u vha na dzangalelo. Ri nga humbela vhenevho vhahuweleli vhaswa uri vha ṱuwe na riṋe musi ri tshi ita nyendo dza u vhuyelela na u fara pfunzo dza Bivhili. Musi vhenevho vhahuweleli vhaswa ngohoni vha tshi gudiswa na u ṱuṱuwedzwa nga yeneyo nḓila, vha ḓo ṱoḓa u ṱahulela uri na vhaṅwe vha vhe na dzangalelo na u fara pfunzo dza Bivhili nga vhone vhaṋe. Vha ḓo dovha vha guda uri a vho ngo fanela u ṱavhanya u laṱela thaula, fhedzi vha fanela u sa fhela mbilu na u konḓelela musi vhe vhuḓinḓani.—Vhagal. 5:22; sedzani bogisi “ U Konḓelela Ndi Zwa Ndeme.”

13, 14. (a) Ni humbula mini nga ha tsumbo dzi re Bivhilini dza vhathu vhe vha thusa vhaṅwe? (b) Ndi dzifhio dziṅwe nḓila dzine na nga thusa ngadzo vhahuweleli vhaswa ngohoni na vhaswa u itela u sumbedza uri vha funa vhahavho?

¹³ Mafhungo a Bivhili a ombedzela ndugelo ine ra vha nayo ya u sumbedza “lufuno lwa vhurathu na vhukomana” na u shumelana. (Vhalani 1 Petro 1:22; Luka 22:24-27.) Murwa wa Mudzimu o ṋekedza zwoṱhe u katela na vhutshilo hawe a tshi itela u shumela vhaṅwe. (Mateo 20:28) Doroka “o vha a tshi ita mishumo mivhuya na u thusa vhashai.” (Mish. 9:36, 39) Maria wa ngei Roma o ‘shuma nga maanḓa’ a tshi itela vhahawe tshivhidzoni. (Vharoma 16:6) Ri nga thusa hani vhaswa ngohoni u pfesesa uri ndi zwa ndeme u shumela vhahavho?

¹⁴ Vhakriste vho vhibvaho vha nga humbela vhaswa ngohoni uri vha ṱuwe navho musi vha tshi dalela vhane vha khou lwala na vhalala. Arali zwo tea, vhabebi vha nga ṱuwa na vhana vhavho musi vha tshi dalela vhathu vho raloho. Vhahulwane vha tshivhidzo vha nga shuma na vhaṅwe u itela u vha na vhungoho ha uri vhalala vha na zwiḽiwa na u ṱhogomela mahaya avho. Vhaswa na vhahuweleli vhaswa ngohoni vha guda u sumbedza vhaṅwe vhuthu nga dzenedzo nḓila. Musi a tshi khou huwelela, muṅwe muhulwane o vha a tshi ya u ṱolela Ṱhanzi dze dza vha dzi tshi dzula mahayani a tsimu ye a vha a tshi shuma khayo. Muswa we a vha a tshi anzela u tshimbila nae o guda uri vhathu ndi mapfura vha a ḓoliwa.—Vharoma 12:10.

15. Ndi ngani zwi zwa ndeme uri vhahulwane tshivhidzoni vha vhe na dzangalelo kha vhanna vhane vha ṱoḓa u ita mvelaphanḓa?

¹⁵ Samusi Yehova a tshi shumisa vhanna u gudisa tshivhidzoni, ndi zwa ndeme uri vhahashu vha tshinnani vha vhe na vhukoni ha u funza. Sa muhulwane, naa ni nga thetshelesa mushumeli a tshi khou lugiselela nyambo? Ni nga kona u mu thusa uri a khwinise vhutsila hawe ha u funza Bivhili.—Neh. 8:8. ^[3]

16, 17. (a) Paulo o sumbedza hani dzangalelo kha mvelaphanḓa ya Timotheo? (b) Vhahulwane vha nga gudisa hani nga hu bvelelaho vhalisa vha tshivhidzo vha tshifhingani tshi ḓaho?

¹⁶ Tshivhidzoni tsha Vhakriste hu na ṱhoḓea khulwane ya vhalisa nahone vhane vha ḓo ita wonoyo mushumo tshifhingani tshi ḓaho vha fanela u bvela phanḓa vha tshi khou gudiswa. Paulo o sumbedza nḓila ya u gudisa musi a tshi amba na Timotheo uri: “Iwe ṅwana’nga bvela phanḓa u tshi wana maanḓa  kha vhuthu vhuhulu vhune ha ḓiswa nga u vha na vhuthihi na Kristo Yesu, na kha zwithu zwe wa vhudzwa nga nṋe zwe zwa khwaṱhisedzwa nga ṱhanzi nnzhi, zwenezwi zwithu u zwi kumedzele vhanna vha fulufhedzeaho, uri na vhone vha kone u funza vhaṅwe.” (2 Tim. 2:1, 2) Timotheo o guda zwenezwi nga u shuma na muapostola Paulo we a vha e muhulwane khae. Timotheo o shumisa maitele a Paulo vhuḓinḓani na kha iṅwe tshumelo khethwa.—2 Tim. 3:10-12.

¹⁷ Paulo o ita vhungoho ha uri u gudisa Timotheo. Vho vha vha tshi tshimbila vhoṱhe. (Mish. 16:1-5) Vhahulwane vha nga edzisa tsumbo ya Paulo musi vha tshi ṱuwa na vhashumeli nyendoni dza vhulisa musi zwo tea. Vhahulwane vha ṋea vhenevho vhahashu tshibuli tsha u vhona nḓila ya u gudisa, u vha na lutendo, u sa fhela mbilu na lufuno zwine vhahulwane vha tshivhidzo vha fanela u vha nazwo. Yeneyi nḓila i vha thusa uri vha vhe vhalisa vhavhuḓi vha “sambi ḽa Mudzimu” tshifhingani tshi ḓaho.—1 Pet. 5:2.

18. Ndi ngani zwi zwa ndeme u gudisa vhaṅwe tshumeloni ya Yehova?

¹⁸ U gudisa vhaṅwe ndi zwa ndeme ngauri hu na ṱhoḓea khulwane na zwibuli zwinzhi zwa u shumela Yehova. Tsumbo dza u gudisa dze Yesu na muapostola Paulo vha dzi sumbedza dzi kha ḓi shuma na ṋamusi. Yehova u ṱoḓa vhashumeli vhawe vha musalauno vha tshi gudiswa zwavhuḓi kha tshumelo ya lwa ṱaḓulu. Mudzimu u ri ṋea ndugelo ya u thusa vhaswa ngohoni uri vha vhe na vhukoni ha u shuma tshivhidzoni. Samusi vhuimo ha shango vhu tshi khou ṋaṋa, zwibuli zwiswa zwa u huwelela zwi khou bvela phanḓa zwi tshi vulea. U gudiswa ha vhahuweleli vhaswa ngohoni ndi ha ndeme nahone ho ṱavhanyiswa.

19. Ndi ngani ri tshi nga vha na vhungoho ha uri vhuḓidini ha u gudisa vhaṅwe tshumeloni ya Yehova vhu ḓo vha vhu bvelelaho?

¹⁹ Ndi ngoho uri u gudisa vhaṅwe zwi ṱoḓa tshifhinga na vhuḓidini. Fhedzi Yehova na Murwa wawe vha ḓo ri tikedza na u ri ṋea vhuṱali u itela uri ri kone u gudisa vhaṅwe. Ri ḓo takala musi ri tshi vhona vhe ra vha gudisa vha tshi bvela phanḓa vha tshi “shuma nga maanḓa na u ḓidina.” (1 Tim. 4:10) U nga ri na riṋe ri nga bvela phanḓa ri tshi ita mvelaphanḓa ya lwa muya tshumeloni khethwa ya Yehova.