“NNDWA dzoṱhe dza tshifhingani tsho fhiraho dzo vha dzi tshi vhonala dzi ṱhukhu musi dzi tshi vhambedzwa na zwine zwa khou itea Yuropa.” Nga zwenezwo, Tshiingamo tsha ḽa 1 September, 1915 nga Luisimane, tsho ṱalusa nndwa ya shango ya u thoma ye ya ṱanganya mashango a ṱoḓaho u vha 30. Nga nṱhani ha dzinndwa, Tshiingamo tsho vhiga uri: “Mushumo wa [Muvhuso] wo vha wo thivhelwa zwihuluhulu ngei Dzheremane na Fura.”

Nga nṱhani ha u ṋaṋa ha dzinndwa shangoni ḽoṱhe, Vhagudi vha Bivhili a vho ngo pfesesa nga ho fhelelaho maitele a Vhukriste a u sa dzhia sia. Naho zwo ralo, vho vha vho ḓiimisela u ḓivhadza mafhungo maḓifha. Wilhelm Hildebrandt o humbela kopi dza bugwana The Bible Students Monthly nga Lufura ngauri o vha a tshi ṱoḓa u shela mulenzhe kha tshumelo ya Muvhuso. O vha a songo ya Fura u itela u vha muhuweleli wa tshifhinga tshoṱhe, fhedzi o vha e ḽiswole ḽa Dzheremane. O vha a tshi dzhiiwa sa swina, o ambara zwiambaro zwa maswole nahone a tshi khou amba nga ha mulalo na vhafhiri vha Vhafura.

Tshiingamo tsho vha tshi tshi amba uri vhaṅwe vhagudi vha Bivhili vha Dzheremane vho pfa vha tshi ṱuṱuwedzea u amba nga ha mafhungo maḓifha a Muvhuso musi vhe vhuswoleni. Wahashu Lemke we a vha e swole ḽa maḓini, o amba uri kha vhathu vhe a vha a tshi shuma navho, ho vha na vhaṱanu vhe vha takalela mafhungo maḓifha. O ri: “Na kha tshenetshi tshikepe, u renda hanga Yehova zwo ita uri ndi kaṋe mitshelo.”

Georg Kayser o ya nndwani e ḽiswole, a vhuya hayani e mushumeli wa Mudzimu. Zwo itea hani? O wana khandiso kha Vhagudi vha Bivhili, a ṱanganedza ngoho ya Muvhuso nga mbilu tshena nahone a vhea fhasi zwihali. O shuma mushumo u sa tshimbidzani na dzinndwa. Nga murahu ha nndwa, o vha muvulanḓila a fhiseaho lwa miṅwaha minzhi.

Naho Vhagudi vha Bivhili vho vha vha sa pfesesi nga vhuḓalo mafhungo a u sa dzhia sia, mavhonele avho na vhuḓifari havho zwo vha zwi sa fani na zwa vhathu vhe vha vha vha tshi takalela nndwa. Naho vhorapolitiki na vharangaphanḓa vha kereke vho vha vha tshi tikedza nndwa, Vhagudi vha Bivhili vho vha vha tshi  tikedza “Ṋe-mulalo.” (Yes. 9:5) Naho vhaṅwe Vhagudi vha Bivhili vho vha vha sa dzhii sia nga ho fhelelaho, fhedzi vho vha vhe na khwaṱhisedzo i fanaho na ya Mugudi wa Bivhili Konrad Mörtter we a ri: “Ndo vha ndi tshi zwi ḓivha zwavhuḓi uri Bivhili i amba uri Mukriste ho ngo fanela u vhulaha.”—Ek. 20:13. *

Ngei Dzheremane, mulayo wo vha u tshi kombetshedza vhathu vhoṱhe uri vha dzhenele nndwa, fhedzi Vhagudi vha Bivhili vha fhiraho 20 vho hana u dzhia sia. Vhaṅwe vho vha vha tshi vha dzhia u nga vho ṱangana ṱhoho u fana na Gustav Kujath we a iswa vhuongeloni ha vhathu vha lwalaho muhumbulo nahone vha mu ṱhavha. Hans Hölterhoff we na ene a hana u dzhenela nndwa, o iswa dzhele nahone a hana u shuma mishumo yoṱhe ine ya tshimbidzana na nndwa. Vhalindi vha dzhele vho mu hunga u swika miraḓo ya muvhili wawe i si tsha shuma. Musi zwenezwo zwi sa shumi, vhalindi vho mu shushedza nga u mu vhudza uri vha ḓo mu vhulaha. Naho zwo ralo, Hans ho ngo dzhia sia u swika nndwa i tshi fhela.

Vhaṅwe vhahashu vho hana u fara zwihali nahone vho humbela uri vha ṋewe muṅwe mushumo u sa tshimbidzani na nndwa. * Johannes Rauthe o ita zwenezwo nahone ha pfi a ye u shuma zwidimelani. Konrad Mörtter o ṋewa mushumo u tshimbidzanaho na zwa ngalafho nahone Reinhold Weber o shuma sa muongi. August Krafzig o vha o takala ngauri mushumo we a ṋewa wone wo vha u sa tshimbidzani na dzinndwa. Vhenevho Vhagudi vha Bivhili na vhaṅwe vha fanaho navho, vho vha vho ḓiimisela u shumela Yehova ngauri vho vha vha tshi pfesesa zwine u funa Yehova na u fulufhedzea khae zwa amba zwone.

Nga nṱhani ha u sa dzhia havho sia kha zwa dzinndwa, Vhagudi vha Bivhili vho vha vho vhewa iṱo nga mapholisa. Kha miṅwaha i tevhelaho, Vhagudi vha Bivhili vha ngei Dzheremane vho iswa khothe lunzhi nga nṱhani ha mushumo wavho wa u huwelela. Ofisi ya davhi ya ngei Dzheremane, yo vula muhasho wa zwa mulayo Bethele ya Magdeburg u itela u vha thusa.

Ṱhanzi dza Yehova dzo khwinisa nḓila ye dza vha dzi tshi pfesesa ngayo u sa dzhia sia ha Vhakriste. Musi nndwa ya shango ya vhuvhili i tshi thoma, a vho ngo dzhia sia na luthihi kha zwa dzinndwa. Nga zwenezwo, Shango ḽa Dzheremane ḽo vha ḽi tshi vha dzhia sa maswina nahone vha tshi tovholwa. Zwenezwo zwi ḓo haseledzwa tshifhingani tshi ḓaho kha “Zwe Ra Zwi Vhulunga.”—Zwe Ra Zwi Vhulunga ngei Yuropa-Kati.