U Dzhiela Nṱha Yehova Sa Muvhumbi Washu
“Iwe Yehova, . . . ndi Iwe we wa ri vhumba, roṱhe ri zwiitiwa zwa zwanḓa zwau.”—YESAYA 64:8.
NYIMBO: 89, 26
1. Ndi ngani Yehova e Muvhumbi muhulwane?
NGA November 2010, vasi ya Tshaina ya kale vhukuma yo itwaho nga vumba yo rengiswa nga dolara dzi ṱoḓaho u vha milioni dza 70 ngei England. Zwi a mangadza uri muvhumbi a nga vhumba vasi ya u naka na i ḓuraho a tshi shumisa vumba. Yehova Muvhumbi washu u fhira vhavhumbi vhoṱhe vha vhathu. Bivhili i amba uri Yehova o vhumba muthu o fhelelaho nga “buse ḽa mavuni” ḽine ḽa vha vumba. (Genesi 2:7) Onoyo muthu ndi Adamu “murwa wa Mudzimu” nahone o sikwa e na vhukoni ha u edzisa Mudzimu.—Luka 3:38.
2, 3. Ri nga edzisa hani mavhonele a Vhaisiraele vho rembuluwaho?
2 Musi Adamu a tshi shandukela Mudzimu ane a vha Musiki wawe, ho ngo tsha vha murwa wawe. Fhedzi vhaḓuhulu vhanzhi vha Adamu vho khetha Yehova sa Muvhusi wavho. (Vhaheberu 12:1) Nga u thetshelesa Musiki wavho, vho sumbedza uri vha ṱoḓa uri a vhe Khotsi na Muvhumbi wavho hu si Sathane. (Yohane 8:44) U fulufhedzea havho kha Mudzimu zwi ri humbudza zwe Vhaisiraele vho rembuluwaho vha zwi amba: “Iwe Yehova, Khotsi-ashu ndi Iwe, Muvhumbi washu ndi Iwe; vumba ndi vho-riṋe. Ndi Iwe we wa ri vhumba, roṱhe ri zwiitiwa zwa zwanḓa zwau.”—Yesaya 64:8.
3 Vhagwadameli vha Yehova vha ngoho ṋamusi na vhone vha lingedza nga nungo dzoṱhe u ḓiṱukufhadza na u thetshelesa. Vha zwi dzhia zwi ndugelo u vhidza Yehova Khotsi avho nahone vha ṱoḓa uri a vhe Muvhumbi wavho. Naa ro ḓiimisela u vha vumba ḽavhuḓi ḽine Mudzimu a nga vhumba ngaḽo mudzio wavhuḓi? Naa ri dzhia vhahashu sa vhathu vhane vha kha ḓi bvela phanḓa vha tshi vhumbwa nga Mudzimu? U itela u ri thusa u vha na mavhonele avhuḓi, ri ḓo haseledza nḓila ine Yehova a khetha ngayo vhane a vha vhumba, zwi itaho uri a vha vhumbe na nḓila ine a zwi ita ngayo.
YEHOVA U KHETHA VHANE A VHA VHUMBA
4. Yehova u khetha hani vhane a vha kokodzela khae? Ṋeani tsumbo.
4 Yehova ha dzhii vhathu nga nḓila ine ra vha dzhia ngayo. Nṱhani hazwo, u ṱolisisa mbilu na u vhona zwine muṅwe na muṅwe a vha zwone zwa vhukuma. (Vhalani 1 Samuele 16:7b.) Yehova o sumbedza zwenezwi musi a tshi thoma tshivhidzo tsha Vhukriste. O kokodzela vhathu vhanzhi khae na kha Murwa wawe ngauri vhaṅwe vho vha vha tshi vha dzhia vhe si vha ndeme. (Yohane 6:44) Sa tsumbo, muṅwe wa vhenevho vhathu o vha e Saulo wa Mufarisei we a vha a tshi ‘semana, e mutovholi nahone e na vhuhali.’ (1 Timotheo 1:13) Fhedzi Yehova o ṱolisisa mbilu ya Saulo nahone ho ngo mu dzhia e vumba ḽi si na mushumo. (Mirero 17:3) Nṱhani hazwo, Yehova o vhona uri Saulo a nga vhumbea a vha ‘mudzio wo nangwaho’ une wa ḓo huwelela “kha dzitshaka khathihi na kha mahosi na kha Vhaisiraele.” (Mishumo 9:15) Yehova o dovha a khetha vhaṅwe vhane vha ḓo vhumbiwa sa “madzanga,” u katela na vhe vha vha vhe zwidakwa, vha ḓifaraho luvhi na dzimbava. (Vharoma 9:21; 1 Vhakorinta 6:9-11) Musi vha tshi guda Maṅwalo, vho vha na lutendo lwo khwaṱhaho kha Yehova nahone vha mu tendela a tshi vha vhumba.
A ro ngo fanela u haṱula vhaṅwe musi ri vhuḓinḓani kana tshivhidzoni
5, 6. U fulufhela hashu Yehova sa Muvhumbi washu zwi kwama hani mavhonele ashu kha (a) vhathu vha tsimuni yashu? (b) vhahashu?
5 Ri fulufhela uri Yehova u a kona u khetha na u kokodza vhathu vho lugaho. Ndi ngazwo ri songo fanela u haṱula vhaṅwe musi ri vhuḓinḓani kana tshivhidzoni. Sa tsumbo, ṱhogomelani nḓila ye Michael a aravha ngayo musi Ṱhanzi dza Yehova dzi tshi mu dalela. O ri: “Ndo vha ndi tshi vha rwisa nga muya. Ndo vha ndi tshi vha ṱhavha nga maipfi! Nga murahu, ndo ṱangana na muṱa we nda vha ndi tshi u takalela nga nṱhani ha vhuḓifari hawo havhuḓi. Nga zwenezwo, ḽiṅwe ḓuvha ndo mangala musi ndi tshi pfa uri ndi Ṱhanzi dza Yehova! Vhuḓifari havho ho ita uri ndi ṱolisise uri ndi ngani ndi na luvhengelambiluni. Nga u
ṱavhanya, ndo ṱhogomela uri mavhonele anga o vha o thewa kha u shaya nḓivho na u pfa mavhari-vhari, hu si kha ngoho.” Michael o vha a tshi ṱoḓa u guda zwo engedzeaho nahone o tenda u guda Bivhili. Nga murahu, o lovhedzwa nahone a vha kha tshumelo ya tshifhinga tsho ḓalaho.6 Musi ri tshi dzhia Yehova sa Muvhumbi washu, na riṋe ri ḓo shandula nḓila ine ra dzhia ngayo vhahashu. Ri ḓo vha vhona sa vhane vha kha ḓi ita mvelaphanḓa. Ndi nḓila ine Yehova a vha vhona ngayo. U vhona zwine vha vha zwone zwa vhukuma nahone u ḓivha uri u sa fhelela havho ndi ha tshifhinganyana. U dovha a ḓivha zwine muṅwe na muṅwe wavho a nga vha zwone. (Psalme ya 130:3) Ri nga edzisa Yehova arali na riṋe ra nga vha na mavhonele avhuḓi kha vhahashu. Ri nga dovha ra shuma na Muvhumbi washu u itela u thusa vhahashu uri vha ite mvelaphanḓa. (1 Vhathesalonika 5:14, 15) Vhahulwane vha tshivhidzo vha fanela u vha tsumbo yavhuḓi kha u ita zwenezwo.—Vhaefesa 4:8, 11-13.
NDI NGANI YEHOVA A TSHI RI VHUMBA?
7. Ndi ngani ni tshi takalela u kaidzwa nga Yehova?
7 Vhaṅwe vha nga amba uri: ‘Ndo vha ndi sa pfesesi musi vhabebi vhanga vha tshi nkaidza, fhedzi ndo thoma u zwi pfesesa musi ndi tshi vha na vhana.’ Musi ri tshi aluwa, ri nga pfesesa uri u kaidzwa ndi zwa ndeme ngauri ri a zwi ḓivha uri ndi nḓila ya u sumbedza lufuno. (Vhalani Vhaheberu 12:5, 6, 11.) Vhukuma, Yehova u ri funa sa vhana vhawe, ndi ngazwo a tshi ri kaidza kana u ri vhumba a sa ri fheleli mbilu. U ṱoḓa ri tshi ṱalifha, u takala na u mu funa sa Khotsi ashu. (Mirero 23:15) Ha tami u ri vhona ri tshi shengela na u fa sa vhaitazwivhi vha songo rembuluwaho.—Vhaefesa 2:2, 3.
Yehova uri funa sa vhana vhawe, ndi ngazwo a tshi ri kaidza kana u ri vhumba a sa ri fheleli mbilu
8, 9. Yehova u khou ri gudisa hani ṋamusi, nahone yeneyi pfunzo i ḓo bvela hani phanda tshifhingani tshi ḓaho?
8 Musi ri sa athu u ḓivha Yehova, khamusi ro vha ri na pfaneleo nnzhi dzi si dzavhuḓi. Fhedzi Yehova o ri vhumba na u ri thusa u shanduka, nga zwenezwo, zwino ri na pfaneleo dzavhuḓi. (Yesaya 11:6-8; Vhakolosa 3:9, 10) Ri tshila paradisoni ya lwa muya. Ndi fhethu ho khetheaho hune Yehova a khou hu ita misini yashu u itela u ri thusa uri a ri vhumbe. Henefho, ri ḓipfa ro tsireledzea na u vhofholowa naho ro tangwa nga shango ḽivhi. Vhe vha aluwa hu si na lufuno muṱani wa havho, zwino vha ḓipfa vha tshi khou funwa nga vhahashu paradiso ya lwa muya. (Yohane 13:35) Nahone ro guda u funa vhaṅwe. Fhedzi zwa ndeme vhukuma, ri vho ḓivha Yehova na u vhona nḓila ine a ri funa ngayo sa khotsi.—Yakobo 4:8.
9 Shangoni ḽiswa, ri ḓo vhuyelwa nga vhuḓalo nga paradiso ya lwa muya. Ri Yesaya 11:9) Yehova u ḓo dovha a ita uri ri vhe vho fhelelaho. Zwenezwi zwi ḓo ita uri zwi ri lelutshele u pfesesa na u thetshelesa vhulivhisi hawe. Nga zwenezwo, kha ri bvele phanḓa ri tshi tenda u vhumbwa nga Yehova nahone ri mu sumbedze uri ri a mu funa.—Mirero 3:11, 12.
ḓo dovha ra ḓiphina nga u tshila paradisoni i vhuswaho nga Muvhuso wa Mudzimu. Nga tshenetsho tshifhinga, Yehova u ḓo bvela phanḓa a tshi ri vhumba na u ri funza nga nḓila khulwane vhukuma. (NḒILA INE YEHOVA A RI VHUMBA NGAYO
10. Yesu o edzisa hani u sa fhela mbilu na vhutsila ha Muvhumbi Muhulwane?
10 U fana na muvhumbi ane a ḓivha vumba ḽawe, Yehova u a ri ḓivha zwavhuḓi. U a ḓivha vhushanungo hashu, zwine ri si kone u zwi ita, na mvelaphanḓa ye ra i ita nahone u vhumba muṅwe na muṅwe washu e na zwenezwo muhumbuloni. (Vhalani Psalme ya 103:10-14.) Ri nga guda nḓila ine Yehova a ri dzhia ngayo nga u vhona nḓila ye Yesu a aravha ngayo kha u sa fhelela ha vhaapostola vhawe. Nga zwiṅwe zwifhinga, vhaapostola vho vusa khani ya uri ndi nnyi we a vha a tshi vhonala e muhulwane khavho. Arali no vha ni henefho, no vha ni tshi ḓo dzhia hani vhuḓifari ha vhaapostola? Khamusi no vha ni tshi ḓo vhona u nga vho vha vhe si vumba ḽavhuḓi. Naho zwo ralo, Yesu o vha a tshi zwi ḓivha uri vha nga vhumbea arali vha thetshelesa nyeletshedzo yawe ya vhuthu na u konḓelela musi vha tshi edzisa u ḓiṱukufhadza hawe. (Marko 9:33-37; 10:37, 41-45; Luka 22:24-27) Musi Yesu o no vuswa, vhaapostola vho wana muya wa Mudzimu nahone vha si tsha livhisa ṱhogomelo kha uri ndi nnyi ane a vha muhulwane khavho. Nṱhani hazwo, vho livhisa ṱhogomelo kha mushumo we Yesu a vha ṋea wone.—Mishumo 5:42.
11. Davida o sumbedza hani u vha vumba ḽavhuḓi, nahone ri nga edzisa hani tsumbo yawe?
11 Ṋamusi, Yehova u shumisa Bivhili, muya wawe mukhethwa na tshivhidzo u itela u ri vhumba. Bivhili i nga ri vhumba hani? Ri fanela u i vhala, u elekanya nga ha zwe ra zwi vhala na u humbela Yehova uri a ri thuse u shumisa zwe ra zwi guda. Khosi Davida o ṅwala uri: “Ndi elelwa Iwe ndi tshi yo’ lala, ndi humbula Iwe ndi tshi karuwa.” (Psalme ya 63:6) O dovha a ri: “Ndi khoḓa Yehova we a ndaya; na luvalo lwanga lu lala lu tshi nkwengweledza vhusiku.” (Psalme ya 16:7) Vhukuma, Davida o elekanya nga ha nyeletshedzo ya Yehova nahone o tenda i tshi vhumba nḓila ye a vha a tshi humbula ngayo na maḓipfele awe na musi zwi tshi konḓa u ṱanganedza nyeletshedzo. (2 Samuele 12:1-13) Davida o ri vhetshela tsumbo yavhuḓi ya u ḓiṱukufhadza na u thetshelesa. Nga zwenezwo, ḓivhudziseni uri: ‘Musi ndi tshi vhala Bivhili, naa ndi a elekanya nga ha zwine nda zwi vhala na u tendela nyeletshedzo ya Mudzimu i tshi kwama nḓila ine nda humbula ngayo na nḓila ine nda ḓipfa ngayo? Naa ndi nga ita zwenezwo nga ho engedzeaho?’—Psalme ya 1:2, 3.
12, 13. Yehova u ri vhumba hani a tshi shumisa muya mukhethwa na tshivhidzo tsha Vhukriste?
12 Muya mukhethwa u nga ri vhumba nga nḓila nnzhi. Sa tsumbo, u nga ri thusa u edzisa vhumuthu ha Yesu na u sumbedza masia o fhamba-fhambanaho a Vhagalata 5:22, 23) Tshiṅwe tsha zwenezwo zwiaṋwiwa ndi lufuno. Ri funa Mudzimu nahone ri ṱoḓa u mu thetshelesa na u vhumbiwa ngae ngauri ri a zwi ḓivha uri ndaela dzawe dzi a ri vhuyedza. Zwiṅwe hafhu, muya mukhethwa u nga ri ṋea nungo dza u iledza u vhumbiwa nga ḽino shango ḽivhi. (Vhaefesa 2:2) Musi muapostola Paulo a tshee muswa, o vha a tshi ṱuṱuwedzwa nga vharangaphanḓa vha vhurereli ha Tshiyuda vha ḓikukumusaho. Fhedzi muya mukhethwa wo mu thusa uri a shanduke. Nga murahu o ṅwala uri: “Ngauri zwithu zwoṱhe ndi zwi koniswa nga ane a nṋea maanḓa.” (Vhafilipi 4:13) Na riṋe ri fanela u humbela muya mukhethwa, ri tshi ḓivha uri Yehova u ḓo fhindula thabelo dzashu dzi bvaho mbiluni.—Psalme ya 10:17.
zwiaṋwiwa nga muya. (Yehova u ri vhumba a tshi shumisa vhahulwane vha Vhakriste nahone ri fanela u shumisa nyeletshedzo yavho (Sedzani dziphara 12, 13)
13 Yehova u dovha a shumisa tshivhidzo na vhahulwane u vhumba muṅwe na muṅwe washu. Sa tsumbo, arali vhahulwane vha ṱhogomela uri ri na vhushayanungo, vha lingedza u ri thusa. Naho zwo ralo, a vha ṋei nyeletshedzo u ya nga mavhonele avho. (Vhagalata 6:1) Nṱhani hazwo, vha rabela Yehova zwi tshi bva mbiluni uri a vha thuse u pfesesa na u vha na vhuṱali. Nga zwenezwo, vha ita ṱhoḓisiso vha tshi shumisa Bivhili na khandiso dza Vhukriste u itela u wana zwine zwa nga ri thusa. Arali vhahulwane vha ḓa kha inwi nahone vha ni eletshedza, khamusi nga ha nḓila ine na ambara ngayo, humbulani uri zwenezwi zwi sumbedza uri Mudzimu u a ni funa. Musi ni tshi shumisa nyeletshedzo, ni ḓo fana na vumba ḽavhuḓi ḽine Yehova a ḓo ḽi vhumba nahone ni ḓo vhuyelwa.
14. Naho Yehova e na ndugelo ya u ri vhumba, u sumbedza hani u ṱhonifha mbofholowo yashu ya u ḓikhethela?
14 Musi ri tshi pfesesa nḓila ine Yehova
a ri vhumba ngayo, zwi nga ri thusa u vha na vhushaka havhuḓi na vhahashu. Zwiṅwe hafhu, ri ḓo vha na mavhonele avhuḓi nga ha vhathu vha vhuḓinḓani hashu, u katela pfunzo dzashu dza Bivhili. Zwifhingani zwa Bivhili, muvhumbi o vha a tshi fanela u kunakisa vumba, u ḽi bvisa matombo na zwiṅwe zwithu musi a sa athu u thoma u vhumba. Yehova Muvhumbi Muhulwane u thusa vhathu vhane vha ṱoḓa u vhumbiwa. Ha vha kombetshedzi u shanduka, fhedzi u vha sumbedza zwilinganyo zwawe. Nga zwenezwo, vha fanela u khetha arali vha tshi ḓo ita tshanduko dzine dza ṱoḓea.15, 16. Vhagudi vha Bivhili vha sumbedza hani uri vha ṱoḓa u vhumbwa nga Yehova? Fanyisani.
15 Ṱhogomelani zwe zwa itea kha wahashu Tessie wa ngei Australia. Zwo vha zwo mu lelutshela vhukuma u guda zwine Bivhili ya amba. Naho zwo ralo, ho ngo ita mvelaphanḓa nahone ho ngo ya miṱanganoni ya Vhukriste. Wahashu we a mu gudisa Bivhili, o zwi vhudza Yehova nga thabelo nahone o vha o no dzhia phetho ya u litsha u guda nae. Fhedzi ho itea zwithu zwi mangadzaho. Musi vha tshi khou guda, Tessie o vhudza mugudisi wawe zwe zwa ita uri a sa ite mvelaphanḓa. O amba uri u ḓipfa e mudzia-muhoyo ngauri o vha a tshi funesa u gembula. Zwino o dzhia phetho ya u litsha u gembula.
16 Nga u ṱavhanya, Tessie o thoma u ya miṱanganoni na u tshila sa Mukriste naho khonani dzawe dza kale dzo vha dzi tshi mu kolela. Nga u ya ha tshifhinga, Tessie o lovhedzwa nahone a vha muvulanḓila wa tshifhinga tshoṱhe naho o vha e na vhana. Zwi tou vha khagala uri musi vhagudi vha Bivhili vha tshi thoma u ita tshanduko u itela u takadza Mudzimu, u ḓo sendela tsini navho na u vha vhumba uri vha vhe midzio ya ndeme.
17. (a) Ndi mini zwine zwa ni takadza nga ha Yehova sa Muvhumbi waṋu? (b) Ndi mbudziso dzifhio dzine ra ḓo dzi ṱolisisa kha thero i tevhelaho?
17 Ano maḓuvha, vhaṅwe vhavhumbi vha vhumba mudzio wo nakaho nga vhuronwane. Nga nḓila i fanaho, Yehova uri vhumba a sa fheli mbilu, a tshi shumisa nyeletshedzo yawe nahone u lavhelesa nga vhuronwane nḓila ine ra ḓo aravha ngayo. (Vhalani Psalme ya 32:8.) Naa ni a kona u vhona uri Yehova u na dzangalelo kha inwi? Naa ni khou vhona nḓila ine Yehova a khou ni vhumba ngayo nga vhuronwane? Arali zwo ralo, ndi pfaneleo dzifhio dzine dza nga ni thusa uri ni vhe vumba ḽavhuḓi ḽine Yehova a nga kona u ḽi vhumba? Ndi zwithu zwifhio zwine na fanela u zwi iledza u itela uri ni si vhe vumba ḽi sa vhumbei? Nahone vhabebi vha nga shumisana hani na Yehova kha u vhumba vhana vhavho? Thero i tevhelaho i ḓo fhindula dzenedzi mbudziso.