Vha imela mavhuthu a re ṱaḓulu e a shela mulenzhe kha u fhelisa Yerusalema na ane a ḓo shela mulenzhe kha u fhelisa shango ḽivhi ḽa Sathane nga Haramagedo. Enea ndi mapfesesele maswa. Ndi ngani yeneyi tshanduko i tshi ṱoḓea?

Musi hu sa athu u vha 607 B.C.E., Yehova o sumbedza Hesekiele bono ḽa zwine zwa ḓo itea musi muḓi wa Yerusalema u sa athu u fheliswa. Kha ḽeneḽo bono, Hesekiele o vhona zwithu zwinzhi zwivhi zwi tshi khou itea henefho. Nga zwenezwo, a vhona vhanna vha rathi, muṅwe na muṅwe wavho e “na tshihali tsha u vhulaha.” Ho vha hu na munna we a vha e navho o “ambaraho tshena” nahone “o kungela zwa u ṅwala.” (Hesekiele 8:6-12; 9:2, 3; Bivhili Khethwa) Onoyo munna o vhudzwa uri a tshimbile muḓi woṱhe nahone “vhoṱhe vhane vha lila vha tshi vhona zwi nengisaho zwi itwaho khawo [na u] gomela, u vha vhee luswayo kha phanḓa.” Nga zwenezwo, vhanna vha rathi vha re na zwihali vho vhudzwa uri vha vhulahe vhoṱhe vha si na luswayo. (Hesekiele 9:4-7; Bivhili Khethwa) Ri nga guda mini kha ḽeneḽi bono nahone munna o kungelaho zwa u ṅwala ndi nnyi?

Hesekiele o vhona ḽeneḽi bono nga 612 B.C.E. Ho vha hu vhuporofita he ha ḓadzea lwa u thoma nga murahu ha miṅwaha miṱanu musi Yehova a tshi tendela mmbi ya Babele i tshi fhelisa muḓi wa Yerusalema. Nga yeneyi nḓila, Yehova o shumisa Vhababele u ṱarafa vhathu vhawe vha sa thetshelesi. (Yeremia 25:9, 15-18) Fhedzi hu pfi mini nga Vhayuda vho lugaho vhe vha vha vha sa tendelani na zwithu zwivhi zwe zwa vha zwi tshi khou itea kha wonoyo muḓi? Yehova o ita vhungoho ha uri vha tshidzwe.

 Kha bono, Hesekiele ho ngo swaya kana u shela mulenzhe kha u fheliswa ha wonoyo muḓi. Nṱhani hazwo, ndi vharuṅwa vhe vha vha vha tshi khou livhisa u fheliswa ha Yerusalema. Nga zwenezwo, hovhu vhuporofita vhu ri ṋea tshibuli tsha u vhona zwine zwa itea ṱaḓulu. Yehova o vhudza vharuṅwa vhawe uri vha dzudzanye ndozwo ya vhavhi na u ita vhungoho ha uri vho lugaho vha tshidzwe. *

Honovhu vhuporofita vhu ḓo dovha ha ḓadzea tshifhingani tshi ḓaho. Ro vha ri tshi tenda uri munna o kungelaho zwa u ṅwala u imela vhaḓodzwa vhane vha kha ḓi vha kha ḽifhasi. Ro dovha ra amba uri vhathu vho vha vha tshi swaiwa uri vha tshidzwe musi vha tshi thetshelesa na u ṱanganedza mafhungo maḓifha ane ra a huwelela. Naho zwo ralo, zwenezwino, zwo vha khagala uri ri fanela u shandula nḓila ine ra ṱalutshedza ngayo honovhu vhuporofita. Ro guda kha Mateo 25:31-33 uri Yesu ndi ene ane a haṱula vhathu. U ḓo ita zwenezwi tshifhingani tshi ḓaho nga maṱungu mahulu. Nga tshenetsho tshifhinga, vho haṱulwaho sa nngu vha ḓo tshidzwa nahone vho haṱulwaho sa mbudzi vha ḓo lozwiwa.

Nga zwenezwo, ri guda mini kha bono ḽa Hesekiele? Ri guda zwithu zwiṱanu zwi tevhelaho:

1.  Musi muḓi wa Yerusalema u sa athu u fheliswa, Hesekiele, Yeremia na Yesaya, vho sevha vhathu nga zwe zwa vha zwi tshi ḓo itea kha wonoyo muḓi. Vho vha vha tshi nga vhalindi. Ṋamusi, Yehova u shumisa tshigwada tshiṱuku tsha vhaḓodzwa u itela u gudisa na u sevha vhathu musi maṱungu mahulu a sa athu u thoma. Zwi re zwone ndi uri vhathu vhoṱhe vha Mudzimu, vhane vha ṱhogomelwa nga Kristo vha shela mulenzhe kha mushumo wa u sevha vhaṅwe.—Mateo 24:45-47.

2.  Hesekiele ho ngo swaya vhane vha ḓo tshidzwa. Na vhathu vha Mudzimu vha musalauno a vho ngo swaiwa. Tshavho ndi u huwelela na u sevha vhaṅwe nga ha zwine zwa ḓo itea tshifhingani tshi ḓaho. Wonoyu mushumo wa shango ḽoṱhe wa u huwelela u itwa nga thuso ya vharuṅwa.—Nzumbululo 14:6.

3.  Vhathu vhe vha tshidzwa misini ya Hesekiele, vho vha vhe si na luswayo lwa vhukuma kha phanḓa dzavho. Ano maḓuvha vhane vha ḓo tshidzwa na vhone vha ḓo vha vhe si na luswayo lwa vhukuma. Ndi mini zwine vhathu vha fanela u zwi ita u itela u tshidzwa nga maṱungu mahulu? Musi vha tshi pfa tsevho, vha fanela u guda u edzisa Kristo, u ṋekedzela vhutshilo havho kha Mudzimu nahone vha tikedze vhakomana vha Kristo kha mushumo wa u huwelela. (Mateo 25:35-40) Nga maṱungu mahulu, vhenevho vha ḓo swaiwa nga lwa pfanyisedzo zwine zwa amba uri vho nangwa sa vhane vha ḓo tshidzwa.

4.  Munna o kungelaho zwa u ṅwala u imela Yesu. Tshifhingani tsha maṱungu mahulu, Yesu u ḓo swaya vha gogo ḽihulu musi a tshi vha haṱula sa dzinngu. Nga zwenezwo, vha ḓo vha na tshibuli tsha u tshila tshoṱhe kha ḽifhasi.—Mateo 25:34, 46. *

5.  Ano maḓuvha vhanna vha rathi vha re na zwihali, vha imela mavhuthu a ṱaḓulu ane a rangwa phanḓa nga Yesu. Hu si kale a ḓo fhelisa dzitshaka na vhuvhi hoṱhe.—Hesekiele 10:2, 6, 7; Nzumbululo 19:11-21.

Zwine ra zwi guda kha ḽeneḽi bono zwi ri thusa uri ri vhe na vhungoho ha uri Yehova ha nga fhelisi vhavhuya musi a tshi fhelisa vhavhi. (2 Petro 2:9; 3:9) Ngudo ye ra i guda i dovha ya ri humbudza uri mushumo wa u huwelela misini yashu ndi wa ndeme vhukuma. Muṅwe na muṅwe u fanela u thetshelesa tsevho vhufhelo vhu sa athu u ḓa!—Mateo 24:14.