Muṅwe muhuweleli a songo lovhedzwaho ane a pfi Haykanush wa ngei Armenia, o wana ḽiṅwalwa ḽa vhuendi tsini na hayani hawe. Nga ngomu ha ḽeneḽo ḽiṅwalwa ho vha hu na garaṱa dza banngani na tshelede nnzhi. O vhudza munna wawe ane na ene a vha muhuweleli a songo lovhedzwaho zwe a zwi wana.

Vhenevho vhavhingani vho vha vhe na thaidzo dza tshelede nahone vhe na zwikolodo. Fhedzi vho dzhia phetho ya u isa tshelede kha ḓiresi yo ṅwalwaho kha ḽiṅwalwa ḽa vhuendi. Zwenezwo zwo mangadza onoyo munna o xelelwaho na muṱa wawe. Haykanush na munna wawe vho amba uri vha a fulufhedzea nga nṱhani ha zwe vha vha vha tshi khou zwi guda Bivhilini. Nga zwenezwo, vho shumisa tshibuli tsha u amba nga ha Ṱhanzi dza Yehova na u ṋea wonoyo muṱa dziṅwe khandiso.

Wonoyo muṱa wo vha u tshi ṱoḓa u livhuha Haykanush nga tshelede, fhedzi ho ngo i ṱanganedza. Nga ḓuvha ḽi tevhelaho, Haykanush na munna wawe vho dalelwa nga mufumakadzi wa munna we a vha o xelelwa hayani havho, a kombetshedza u ṋea Haykanush rinngi ya daimane u itela u sumbedza nḓila ine a livhuha ngayo.

U fana na wonoyo muṱa, vhathu vhanzhi vha nga mangala u vhona nḓila ye Haykanush na munna wawe vha fulufhedzea ngayo. Fhedzi naa Yehova o vha o mangala? O dzhia hani honoho u fulufhedzea? Naa zwo vha zwo tea uri vha fulufhedzee?

Phindulo dza dzenedzo mbudziso a dzi konḓi. Ndi ngani? Ngauri vhashumeli vha Mudzimu vha a ḓivha uri u edzisa pfaneleo dza Yehova ndi zwa ndeme vhukuma khae u fhira dzidaimane, musuku kana zwiṅwe zwithu zwi vhonalaho. Vhukuma, zwine Yehova a zwi dzhia zwi zwa ndeme a zwi fani na zwine vhathu vhanzhi vha zwi dzhia zwi zwa ndeme. (Yesaya 55:8, 9) Nahone vhashumeli vhawe vha vhona u nga vhuḓidini havho ha u edzisa pfaneleo dza Yehova ndi zwa ndeme vhukuma.

Ri vhona zwenezwi kha zwine Bivhili ya zwi amba nga ha u vha na ṱhalukanyo na vhuṱali. Mirero 3:13-15 i ri: “Muthu wa mashudu ndi we a wana vhuṱali, muthu we a pfuma ṱhalukanyo. Ngauri ndi bindu ḽine ḽa fhira ḽa mali, ndi u pfuma u fhirisa nga musuku. Vhuṱali ho naka u fhirisa núngu, madzanga oṱhe ha lingani naho.” Vhukuma, Yehova u dzhiela nṱha dzenedzo pfaneleo u fhira lupfumo naho lu lufhio.

Hu pfi mini nga ha u fulufhedzea?

Yehova u a fulufhedzea. Ha “zwifhi.” (Tito 1:2) Nahone o hevhedza muapostola Paulo uri a ṅwalele Vhakriste vha Vhaheberu vha ḓanani ḽa u thoma uri: “Bvelani phanḓa ni tshi ri rabelela, ngauri ri fulufhela uri ri na luvalo lwo ṱambaho, samusi ri tshi tama u ḓifara nga nḓila i fulufhedzeaho kha zwithu zwoṱhe.”—Vhaheberu 13:18.

Yesu Kristo o vhea tsumbo yavhuḓi ya u fulufhedzea. Sa tsumbo, musi Kayafa Tshifhe Muhulu a tshi ri: “Ndi a u anisa nga Mudzimu a tshilaho, ri vhudze arali u Kristo Murwa wa Mudzimu!,” Yesu o fulufhedzea nahone a ḓiṱalusa sa Messia. O amba ngoho naho o vha a tshi zwi ḓivha uri Sanhedrini ine ya vha khoro khulwane ya Vhayuda i nga mu pomoka uri ndi mudzia-maṱamba nahone zwenezwi zwo vha zwi tshi nga ita uri a vhulahwe.—Mateo 26:63-67.

Hu pfi mini nga riṋe? Arali ri kha vhuimo vhune ra nga vhuyelwa nga zwithu zwi vhonalaho nga nṱhani ha u sa amba ngoho yo fhelelaho kana nga u xedza vhuṅwe vhuṱala, naa ri ḓo dzula ri tshi fulufhedzea?

Zwi nga konḓa u fulufhedzea kha ano maḓuvha a vhufhelo ane vhanzhi vha ‘funa vhone vhaṋe fhedzi na u vha vhafuni vha tshelede.’ (2 Timothy 3:2) Musi hu na thaidzo dza zwa masheleni kana musi zwi tshi konḓa u wana mushumo, vhanzhi vha vhona zwi songo khakhea u tswa, u fhura kana u sa fulufhedzea. Enea mahumbulele o ḓowelea vhukuma lune vhanzhi vha vhona uri u sa fulufhedzea ndi yone nḓila i yoṱhe ya u ḓivhuyedza nga zwithu zwi vhonalaho. Na vhaṅwe Vhakriste vho xelelwa nga bvumo ḽavhuḓi tshivhidzoni nga nṱhani ha u dzhia phetho dzi si dzavhuḓi vha tshi itela u “ḓivhuyedza nga nḓila dza vhupangwa.”—1 Timotheo 3:8; Tito 1:7.

Naho zwo ralo, Vhakriste vhanzhi vha edzisa Yesu. Vha ṱhogomela uri u vha na pfaneleo dzi fanaho na dza Mudzimu ndi zwa ndeme u fhira u pfuma kana mbuyelo naho dzi dzifhio. Ndi ngazwo vhaswa vha Vhakriste vha sa tsweli u itela u phasa tshikoloni. (Mirero 20:23) U fulufhedzea zwi nga si ite uri ri vhuyelwe tshifhinga tshoṱhe, samusi zwo itea kha Haykanush. Naho zwo ralo, u fulufhedzea ndi zwine Mudzimu a amba uri zwo tea  nahone zwi ita uri ri vhe na luvalo lwo kunaho, zwine zwa vha zwa ndeme vhukuma.

Tsumbo ya Gagik i sumbedza zwenezwo. O amba uri: “Musi ndi sa athu u vha Mukriste, ndo vha ndi tshi shuma kha khamphani khulwane ye muṋe wayo a vha a tshi vhiga uri khamphani yawe i ita nzwalelo ṱhukhu ngauri o vha a sa ṱoḓi u badela muthelo. Sa mulanguli, ho vha hu tshi lavhelelwa uri ndi ite ‘thendelano’ na muthelisi nga u mu ṋea tshanḓanguvhoni uri a tsinye iṱo kha vhufhura he ha vha vhu tshi khou itwa khamphanini. Nga zwenezwo, ndo vha ndi tshi ḓivhelwa u sa fulufhedzea. Musi ndi tshi guda ngoho, ndo laṱa danda na ṋowa naho mushumo wo vha u tshi holela vhukuma. Nṱhani hazwo, ndo vula bindu ḽanga. Nahone u bva mathomoni, ndo ṅwalisa khamphani yanga nga lwa mulayo nahone nda badela mithelo yoṱhe.”—2 Vhakorinta 8:21.

Gagik o ri: “Ndo vha ndi tshi wana hafu ya tshelede ye nda vha ndi tshi i hola, nga zwenezwo, zwo nkonḓela u ṱunḓela muṱa wanga. Naho zwo ralo, zwino ndo takala vhukuma. Ndi na luvalo lwo kunaho phanḓa ha Yehova. Ndi tsumbo yavhuḓi kha vharwa vhanga vhavhili nahone ndi a fanelea u vha na ndugelo tshivhidzoni. Zwino vhaṱoli vha mithelo na vhaṅwe vhane nda ita navho zwa mabindu vha nḓivha sa muthu a fulufhedzeaho.”

Yehova u funa vhane vha mu hulisa nga u edzisa pfaneleo dzawe dzi katelaho u fulufhedzea. (Tito 2:10) Nahone musi ri tshi ita zwenezwi, u fulufhedzisa u ri thusa. O hevhedza Khosi Davida uri a ṅwale uri: “Tshee nda bebwa nda vhuya nda kalaha, a thi athu u vhona muvhuya ó laṱiwa, a tho ngo vhona vhana vhawe vhó tshinyala.”—Psalme ya 37:25.

Tshenzhelo ya Ruthe a fulufhedzeaho ndi vhuṱanzi ha zwenezwo. Ho ngo ṱutshela mazwale wawe Naomi nga nṱhani ha uri vho kegula, fhedzi o dzula navho nga u fulufhedzea. Ruthe o pfulutshela Isiraele he a kona u gwadamela Mudzimu wa ngoho. (Ruthe 1:16, 17) O vha a tshi fulufhedzea nahone e mushumi wa biko kha u ṱala ṱhalane a tshi tevhela nzudzanyo ya Mulayo wo itelwaho vhashai. Yehova ho ngo vhuya a ṱutshela Ruthe na Naomi u fana na zwe zwa itea kha Davida nga murahu. (Ruthe 2:2-18) Ho ngo sokou ṋea Ruthe zwithu zwi vhonalaho fhedzi o ita zwi fhiraho zwenezwo. O mu khetha uri a vhe tshipiḓa tsha mutevhe wa lushaka lwa Khosi Davida na lwa Messia o fulufhedziswaho!—Ruthe 4:13-17; Mateo 1:5, 16.

Zwi nga vha zwi tshi konḓela vhaṅwe vhashumeli vha Yehova u wana tshelede yo eḓanaho ya u ṱhogomela zwishaiwa zwavho. Fhedzi nṱhani ha u lingedza u tandulula thaidzo dzavho nga u ita zwa vhufhura, ndi vhashumi vha biko. Nga u ita zwenezwi, vha sumbedza uri pfaneleo dza Mudzimu dzi katelaho u fulufhedzea, ndi dza ndeme vhukuma khavho u fhira zwithu naho zwi zwifhio zwi vhonalaho.—Mirero 12:24; Vhaefesa 4:28.

U fana na Ruthe, shangoni ḽoṱhe Vhakriste vha na lutendo lwa uri maanḓa a Yehova a ḓo vha thusa. Vha fulufhela nga ho fhelelaho we a fulufhedzisa uri: “Ndi nga si vhuye nda u ṱutshela nahone ndi nga si vhuye nda u laṱa.” (Vhaheberu 13:5) Yehova u dzula a tshi sumbedza uri a nga ri thusa nahone u ḓo thusa vhane vha fulufhedzea tshifhinga tshoṱhe. U dzula a tshi ita zwe a zwi fulufhedzisa u itela u ṱhogomela zwishaiwa zwa vhashumeli vhawe.—Mateo 6:33.

Vhukuma, vhathu vha nga dzhiela nṱha dzidaimane na zwiṅwe zwithu zwi vhonalaho. Fhedzi ri nga vha na vhungoho ha uri Khotsi ashu wa ṱaḓulu u dzhiela nṱha u fulufhedzea hashu na dziṅwe pfaneleo dzavhuḓi u fhira zwiṅwe zwithu naho zwi zwifhio zwa ndeme!