Khwaṱhisani Lutendo Lwaṋu Kha Zwe Zwa Fulufhelwa
“Lutendo ndi u lavhelela nga ho khwaṱhaho zwe zwa fulufhelwa.”—VHAHEB. 11:1.
NYIMBO: 81, 134
1, 2. (a) Fulufhelo ḽine Vhakriste vha ngoho vha vha naḽo ḽo fhambana hani na ḽa vhathu vha shango ḽa Sathane? (b) Ndi mbudziso dzifhio dza ndeme dzine ra ḓo dzi ṱolisisa?
VHAKRISTE vha vhudza vhaṅwe nga ha fulufhelo ḽavhuḓi. Roṱhe, hu sa londwi uri ri vhaḓodzwa kana vha “dziṅwe nngu,” ri na fulufhelo ḽa u vhona musi ndivho ya u thoma ya Mudzimu i tshi ḓadzea na u ita uri dzina Yehova ḽi vhe ḽikhethwa. (Yoh. 10:16; Mat. 6:9, 10) Zwenezwo ndi zwithu zwa ndeme zwe muṅwe na muṅwe a zwi lavhelela. Ri dovha ra lavhelela fulufhedziso ḽa u tshila tshoṱhe kha “maṱaḓulu maswa” kana “ḽifhasi ḽiswa.” (2 Pet. 3:13) Nahone ro lavhelela u vhona nḓila ine Yehova a ḓo bvela ngayo phanḓa a tshi livhisa na u tikedza vhathu vhawe kha ano maḓuvha a vhufhelo.
2 Vhane vha vha tshipiḓa tsha shango ḽa Sathane na vhone vha na fulufhelo, fhedzi vha nga timatima arali fulufhedziso ḽavho ḽi tshi ḓo ḓadzea. Sa tsumbo, vhathu vhanzhi vhane vha gembula vha na fulufhelo ḽa u wina lotto, fhedzi a vha na vhungoho ha uri vha ḓo i wina. Kha ḽiṅwe sia, lutendo lwa vhukuma lwa Vhakriste “ndi u lavhelela nga ho khwaṱhaho zwe zwa fulufhelwa.” (Vhaheb. 11:1) Nga zwenezwo, ni nga ḓivhudzisa uri, naa zwe nda zwi lavhelela zwi ḓo ḓadzea? Nahone hu ḓo vha na mbuyelo dzifhio arali ri na lutendo lwo khwaṱhaho kha zwe zwa fulufhelwa?
3. Lutendo lwa Mukriste wa ngoho lwo thewa kha mini?
3 Lutendo a si pfaneleo ine muthu a songo fhelelaho a bebwa e nayo; nahone a lu ḓi nga lwa nzulele. U itela u vha na lutendo, Mukriste u fanela u tendela muya mukhethwa wa Mudzimu u tshi mu livhisa. (Vhagal. 5:22) Bivhili a i ambi uri Yehova u na lutendo kana u ṱoḓa lutendo. Ngauri Yehova ndi ramaanḓaoṱhe nahone u na vhuṱali, a huna tshine tsha nga mu thivhela u ḓadzisa ndivho yawe. Khotsi ashu wa ṱaḓulu u na vhungoho ha uri u ḓo ḓadzisa zwe a zwi fulufhedzisa nahone u zwi dzhia zwo no itea. Nga zwenezwo, o ri: “Zwo khunyelela!” (Vhalani Nzumbululo 21:3-6.) Lutendo lwa Mukriste lwo thewa kha ngoho ya uri Yehova ndi “Mudzimu ane a fulufhedzea,” ane tshifhinga tshoṱhe a ita zwe a fulufhedzisa.—Doit. 7:9.
U GUDA KHA TSUMBO DZA VHATHU VHA KALE VHE VHA VHA VHE NA LUTENDO
4. Vhanna na vhafumakadzi vha fulufhedzeaho vha tshifhingani tsho fhiraho vho vha vhe na fulufhelo ḽifhio?
4 Kha ndima ya 11 ya bugu ya Vhaheberu, hu na mutevhe wa madzina a 16 a vhanna na vhafumakadzi vhe vha vha vhe na lutendo. Lwonolo luṅwalo lu amba uri vhenevho vhathu na vhaṅwe vhanzhi “vho ṱanzielwa zwavhuḓi nga nṱhani ha lutendo lwavho.” (Vhaheb. 11:39) Vhoṱhe vho vha vha tshi “lavhelela nga ho khwaṱhaho” uri Mudzimu u ḓo ḓisa “mbeu” ye a i fulufhedzisa uri i pwashe maswina oṱhe a Mudzimu na u ita uri ḽifhasi ḽi vhe paradiso. (Gen. 3:15) Nahone vhenevha vhashumeli vha Mudzimu vho vha vhe na khwaṱhisedzo ya uri Yehova u ḓo vha vusa, fhedzi vho vha vha songo lavhelela u vuselwa ṱaḓulu samusi Yesu o vha a sa athu u ita uri zwenezwo zwi konadzee. (Vhagal. 3:16) Naho zwo ralo, ri livhuha uri Yehova ha kundwi u ita zwe a zwi fulufhedzisa, vhenevho vhathu vha ḓo vuselwa u tshila kha ḽifhasi ḽa paradiso.—Ps. 37:11; Yes. 26:19; Hos. 13:14.
5, 6. Abrahamu na vha muṱa wawe vho livhisa hani ṱhogomelo kha fulufhelo ḽavho, nahone vho dzula hani vhe na lutendo lwo khwaṱhaho? (Sedzani tshifanyiso tsha u thoma.)
5 Vhaheberu 11:13 i amba zwi tevhelaho nga ha Vhakriste vha tshifhingani tsho fhiraho: “Vhoṱhe vho fa vhe na lutendo, naho vha songo vhona u ḓadzea ha mafulufhedziso, fhedzi vho a vhona a tshee kule nahone vha a ṱanganedza.” Muṅwe wavho o vha e Abrahamu. Naa o dzula a tshi humbula nga ha fulufhedziso ḽi takadzaho ḽa u ḓa ha “mbeu” yo fulufhedziswaho? Yesu o ṋea phindulo i pfalaho kha yeneyo mbudziso musi a tshi fhindula vhahanedzi vhawe: “Abrahamu khotsi aṋu o vha o takala vhukuma musi o lavhelela u vhona ḓuvha ḽanga, nahone o ḽi vhona a takala.” (Yoh. 8:56) U fana na Sara, Isaka, Yakobo na vhaṅwe vhanzhi, vho livhisa ṱhogomelo kha u ḓa ha Muvhuso “une muoli na mufhaṱi [wawo] a vha Mudzimu.”—Vhaheb. 11:8-11.
6 Abrahamu na vha muṱa wawe vho dzula hani vhe na lutendo lwo khwaṱhaho? Khamusi vho bvela phanḓa vha tshi guda nga ha Mudzimu nga u thetshelesa vhathu vhahulwane kana maṅwalwa a kale, kana Mudzimu o amba navho a tshi shumisa vharuṅwa, bono kana miloro. Zwa ndeme vhukuma, a vho ngo hangwa zwe vha zwi guda, fhedzi vho takadzwa nga mafulufhedziso a Mudzimu na zwine a zwi ṱoḓa na u elekanya nga hazwo. Ngauri vho vha vhe na fulufhelo ḽo khwaṱhaho, vhenevha vhanna na vhafumakadzi vho vha vho ḓiimisela u konḓelela vhuimo vhuṅwe na vhuṅwe u itela uri vha dzule vha tshi fulufhedzea kha Mudzimu.
7. Yehova o ri ṋea mini u itela uri ri vhe na lutendo lwo khwaṱhaho, nahone ri fanela u ita mini nga hazwo?
7 U itela uri lutendo lwashu lu dzule lwo khwaṱha, Yehova o ri ṋea Ipfi ḽawe ḽine ḽa vha Bivhili. Uri ri takale na uri ri bvelele, ri fanela u vhala Ipfi ḽa Mudzimu ḓuvha ḽiṅwe na ḽiṅwe arali zwi tshi konadzea. (Ps. 1:1-3; vhalani Mishumo 17:11.) Nga zwenezwo, u fana na vhagwadameli vha Yehova vha tshifhingani tsho fhiraho, ri fanela u dzula ri tshi elekanya nga ha mafulufhedziso awe na u thetshelesa zwine a zwi ṱoḓa. Yehova o dovha a ri fhaṱutshedza nga u ri ṋea zwiḽiwa zwinzhi zwa lwa muya a tshi shumisa “mulanda a fulufhedzeaho na wa vhuṱali.” (Mat. 24:45) Nga zwenezwo, musi ri tshi dzhiela nṱha zwiḽiwa zwe ra ṋewa nga Yehova, ri ḓo fana na vhashumeli vha Mudzimu vha kale vhe vha vha vhe na lutendo nahone vha tshi “lavhelela nga ho khwaṱhaho” uri Muvhuso wa Mudzimu u ḓo vhusa hu si kale.
8. Thabelo i nga khwaṱhisa hani lutendo lwashu?
8 Thabelo yo dovha ya thusa Vhakriste vha tshifhingani tsho fhiraho uri vha dzule vhe na lutendo lwo khwaṱhaho. Lutendo lwavho lwo khwaṱha musi Mudzimu a tshi fhindula thabelo dzavho. (Neh. 1:4, 11; Ps. 34:4, 15, 17; Dan. 9:19-21) Na riṋe ri fanela u laṱela dzimbilaelo dzashu kha Yehova, ri na vhungoho ha uri u ḓo ri pfa na u ri khwaṱhisa u itela uri ri konḓelele ro takala. Musi thabelo dzashu dzi tshi fhindulwa, lutendo lwashu lu a khwaṱha nga ho engedzeaho. (Vhalani 1 Yohane 5:14, 15.) Samusi lutendo lu tshiaṋwiwa nga muya, ri fanela u ‘dzula ri tshi humbela’ muya mukhethwa wa Mudzimu, samusi Yesu o ri ṱuṱuwedza u ita nga u ralo.—Luka 11:9, 13.
9. Nga nnḓa ha u ḓirabelela, ndi vhafhio vhaṅwe vhane ra fanela u vha rabelela?
9 Naho zwo ralo, musi ri tshi rabela kha Mudzimu a ro ngo fanela u humbulela riṋe vhaṋe fhedzi. Ri fanela u mu livhuwa na u mu renda tshifhinga tshoṱhe ngauri o ri itela zwithu zwavhuḓi. (Ps. 40:5) Zwiṅwe hafhu, kha thabelo dzashu ri fanela u dzula ri tshi “humbula vha re dzhele zwa tou nga na [riṋe ro] valelwa navho.” Nahone ri fanela u rabelela vhahashu u mona na shango ḽoṱhe, zwihuluhulu “vhane vha ranga phanḓa vhukati [hashu].” Ri a kwamea musi ri tshi vhona nḓila ine Yehova a fhindula ngayo thabelo dzashu.—Vhaheb. 13:3, 7.
VHO DZULA VHA TSHI FULUFHEDZEA
10. Ndi tsumbo dzifhio dza vhashumeli vha Mudzimu vhe vha dzula vha tshi fulufhedzea, nahone ndi nnyi o vha ṋeaho maanḓa a u ita nga u ralo?
10 Kha Vhaheberu ndima ya 11, muapostola Paulo o amba nga ha milingo ye vhashumeli vha Mudzimu vha songo bulwaho nga madzina vha sedzana nayo. Sa tsumbo, muapostola o amba nga ha vhafumakadzi vha fulufhedzeaho vhe vha felwa nga vharwa vhavho nahone nga murahu vha vuswa. Nahone o amba nga ha vhaṅwe vhe vha hana “u vhofhololwa nga tshiṅwe tshirengululi, uri vha wane mvuwo ya khwine.” (Vhaheb. 11:35) Naho ri si na vhungoho ha uri Paulo o vha a tshi khou humbula nga vhafhio, vhathu vha ngaho Nabothe na Sakaria vho kanḓwa nga matombo u swika vha tshi fa nga nṱhani ha uri vho thetshelesa Mudzimu na u ita zwine a funa. (1 Dzikh. 21:3, 15; 2 Koron. 24:20, 21) U itela uri Daniele na khonani dzawe vha si fe, vho vha vha tshi nga litsha u fulufhedzea nahone vha “tenda u vhofhololwa.” Fhedzi a vho ngo ita nga u ralo ngauri vho vha vhe na lutendo lwa uri Yehova u ḓo vha ṋea muya wawe mukhethwa u itela uri vha kone u “thivha milomo ya dzindau” na u “dzima maanḓa a mulilo.”—Vhaheb. 11:33, 34; Dan. 3:16-18, 20, 28; 6:13, 16, 21-23.
11. Vhaṅwe vhaporofita vho sedzana na milingo ifhio nga nṱhani ha lutendo lwavho?
11 Nga nṱhani ha lutendo lwavho, muporofita Mixa na Yeremia “vho lingwa nga u hoiwa . . . na u valelwa dzidzhele.” Vhaṅwe vha ngaho Elia, “vho mona-mona masogani na dzithavhani na mapakoni na milindini ya ḽifhasi.” Vhoṱhe vho konḓelela ngauri vho “lavhelela nga ho khwaṱhaho zwe zwa fulufhelwa.”—Vhaheb. 11:1, 36-38; 1 Dzikh. 18:13; 22:24-27; Yer. 20:1, 2; 28:10, 11; 32:2.
12. Ndi nnyi o ri vhetshelaho tsumbo ya u konḓelela, nahone o thuswa nga mini u ita nga u ralo?
12 Nga murahu ha u amba nga ha vhanna na vhafumakadzi vha re na lutendo, Paulo o dovha a amba nga ha tsumbo yavhuḓi ya Murena washu Yesu Kristo. Vhaheberu 12:2 i ri: “Nga nṱhani ha dakalo ḽe a vha o vhetshelwa ḽone, o konḓelela danda ḽa tshengedzo, a si londe musi a tshi shoniswa, nahone o dzula thungo ya tshanḓa tsha u ḽa tsha khuluṋoni ya Mudzimu.” Vhukuma, ri fanela u ‘ṱhogomela nga vhuronwane’ tsumbo ya Yesu ya lutendo musi ro sedzana na milingo i konḓaho. (Vhalani Vhaheberu 12:3.) U fana na Yesu, Vhakriste vhanzhi vha u thomani vhe vha sedzana na zwiimo zwi konḓaho, vha ngaho mufunziwa Antipa, a vho ngo litsha u fulufhedzea. (Nzumb. 2:13) Vhenevho Vhakriste vho wana malamba a u tshila ṱaḓulu, a vha fani na vhaṅwe vhashumeli vha Mudzimu vhe vha vha vhe na tshilavhelelwa tsha u tshila kha ḽifhasi. (Vhaheb. 11:35) Musi Yesu o no vhewa sa khosi nga 1914, vhaḓodzwa vhoṱhe vha fulufhedzeaho vhe vha vha vho fa, vho vuselwa ṱaḓulu vhe kha tshivhumbeo tsha muya uri vha vhuse vhathu na Yesu.—Nzumb. 20:4.
TSUMBO DZA ṊAMUSI DZA LUTENDO
13, 14. Rudolf Graichen o sedzana na milingo ifhio, nahone ndi mini zwe zwa mu thusa u konḓelela?
13 Vhagwadameli vhanzhi vha Mudzimu ṋamusi vha khou tevhela tsumbo ya Yesu nga u dzula vhe na fulufhelo na u sa tendela milingo i tshi thenga-thengisa lutendo lwavho. Ṱhogomelani tsumbo ya Rudolf Graichen, we a bebwa ngei Dzheremane nga 1925. U humbula nga ha zwifanyiso zwa zwiitea zwa Bivhilini zwe zwa vha zwi kha luvhondo lwa hawe. O ṅwala a ri: “Tshiṅwe tshifanyiso tsho vha tsho sumbedza phele na ngwana, mutukana muṱuku na nngwe, ṋamana na ndawana, zwoṱhe zwo dzula nga mulalo nahone zwi tshi khou liswa nga mutukana muṱuku. . . . Zwenezwo zwifanyiso zwo ita uri ndi dzule ndo takala.” (Yes. 11:6-9) Rudolf o dzula e na lutendo lwo khwaṱhaho lwa paradiso ya kha ḽifhasi, hu sa londwi u tovholwa lwa miṅwaha minzhi u thoma nga Vhanazi Gestapo nahone nga murahu nga Vhakomunisi vha Stasi vha ngei Vhubvaḓuvha ha Dzheremane.
14 Muṅwe mulingo muhulwane we Rudolf a sedzana nawo ndi musi mme awe vha tshi lovha vhe gammbani ya tshengelo ya ngei Ravensbrück nga nṱhani ha vhulwadze ha typhus, na musi a tshi vhona lutendo lwa khotsi awe lu tshi khou thenga-thenga lwe zwa ita uri vha saine bammbiri ḽa u sumbedza uri a vha tsha vha muṅwe wa Ṱhanzi dza Yehova. Musi o no bva dzhele, Rudolf o ḓiphina nga ndugelo ya u shuma sa mulavhelesi wa ḽiisela nahone a rambiwa Tshikoloni tsha Gilead. O rumelwa ngei Chile u itela u shuma sa murumiwa nahone o dovha a ṋewa mushumo sa mulavhelesi wa ḽiisela. Fhedzi makhaulambilu a Rudolf o vha a sa athu u fhela. Nga murahu ha ṅwaha Rudolf o no vhinga Patsy, we a vha e murumiwa, ṅwananyana wavho a lovha. Nga murahu, mufumakadzi wawe we a vha e na miṅwaha ya 43, na ene a lovha. Rudolf o konḓelela yeneyi milingo yoṱhe, naho o no kalaha nahone e na thaidzo dza mutakalo, o vha a tshi shuma sa muhulwane nahone e muvulanḓila wa tshifhinga tshoṱhe musi nganeavhutshilo yawe i tshi ṅwalwa kha Tshiingamo tsha ḽa 1 August, 1997, masiaṱari 20-25. [1]
15. Ṋeani tsumbo dza vhahashu vhe vha shumela Yehova vho takala naho vha tshi khou tovholwa.
15 Ṱhanzi dza Yehova dzi bvela phanḓa dzo takala hu sa londwi u tovholwa hune dza sedzana naho. Sa tsumbo, vhahashu vhanzhi vho farwa, nga nṱhani ha u tevhela maipfi a Yesu a u sa fara banga nahone vho valelwa dzhele dza ngei Eritrea, Singapore, na Korea Tshipembe. (Mat. 26:52) Isaac, Negede na Paulos vho valelwa dzhele ya ngei Eritrea lwa miṅwaha i fhiraho 20. Kha yeneyo miṅwaha yoṱhe, a vho ngo kona u vhinga kana u ṱhogomela vhabebi vhavho vha vhalala, vhenevha vhahashu vho dzula vha tshi fulufhedzea hu sa londwi u farwa nga nḓila i si yavhuḓi. Musi ri tshi sedza kha website yashu ya jw.org, zwifhaṱuwo zwavho zwo tshaho zwi sumbedza uri vha na lutendo lwo khwaṱhaho. Na vhalindi vha dzhele vha a vha ṱhonifha.
Vhahaṋu vha tshivhidzoni tshaṋu, vho dzula hani vhe na lutendo lwo khwaṱhaho? (Sedzani dziphara 15, 16)
16. Lutendo lwo khwaṱhaho lu nga ni tsireledza hani?
16 Ṱhanzi dza Yehova nnzhi a dzi athu u valelwa dzhele kana u farwa nga nḓila i si yavhuḓi. Fhedzi lutendo lwavho lwo lingwa nga nḓila i sa fani. Vhanzhi vha pfa vhuṱungu nga nṱhani ha uri vha a tambula, u sedzana na dzinndwa na khombo dza mupo. Vhaṅwe vha fana na Mushe na vhasimulalushaka ngauri vho vha vha tshi fanela u litsha vhutshilo ha vhuphuvhe-phuvhe kana u vha vhaḓivhalea. Vha lwa nga nungo dzoṱhe u itela uri vha sa funese zwithu zwi vhonalaho na u ḓihumbulela vhone vhaṋe fhedzi. Ndi mini zwe zwa vha ṱuṱuwedza u ita nga u ralo? Vho zwi ita ngauri vha funa Yehova nahone vha na lutendo lwo khwaṱhaho kha fulufhedziso ḽa uri u ḓo fhelisa u shayea ha khaṱulokwayo nahone u ḓo ṋea vhashumeli vhawe vha fulufhedzeaho vhutshilo vhu sa fheli shangoni ḽiswa ḽa vhathu vho lugaho.—Vhalani Psalme ya 37:5, 7, 9, 29.
17. No ḓiimisela u ita mini, nahone thero i tevhelaho i ḓo haseledza nga ha mini?
17 Kha ino thero, ro kona u vhona nḓila ine u rabela tshifhinga tshoṱhe na u elekanya nga ha mafulufhedziso a Mudzimu zwa ita ngayo uri lutendo lwashu lu dzule lwo khwaṱha. Zwenezwo zwi ḓo ita uri ri konḓelele musi lutendo lwashu lu tshi lingwa samusi ro “lavhelela nga ho khwaṱhaho zwe zwa fulufhelwa.” Thero i tevhelaho i ḓo haseledza nga ho engedzeaho zwine u vha na lutendo zwa amba zwone.
^ [1] (phara 14) Dovhani ni sedze thero ine ya ri “Despite Trials, My Hope Has Remained Bright” kha Awake! ya ḽa 22 April, 2002, ine ya vha na nganeavhutshilo ya Andrej Hanák wa ngei Slovakia.
