“Musi ni tshi rabela, ni songo dovholola zwithu zwithihi lunzhi-lunzhi.”—Mateo 6:7.

Yehova ha ṱoḓi ri tshi dovholola thabelo dze ra tou dzi rwela ngomani kana u tou dzi vhala kha bugu. Fhedzi u ṱoḓa ri tshi amba zwi tshi bva mbiluni. Ni nga ḓipfa hani arali ḓuvha na ḓuvha khonani yaṋu i tshi ni vhudza maipfi mathihi e ya tou a rwela ngomani? Vha re khonani dza vhukuma vha amba vho vhofholowa nahone zwi tshi bva mbiluni. Musi ri tshi rabela Khotsi ashu wa ṱaḓulu nga maipfi ashu a bvaho mbiluni zwi sumbedza uri ri mu dzhia sa khonani.

“Musi ni tshi humbela, a ni wani tshithu, ngauri ni humbela ni na zwiitisi zwi si zwavhuḓi.”—Yakobo 4:3.

Ri nga si lavhelele uri Mudzimu a fhindule thabelo dzashu arali ri tshi humbela zwithu zwine ra zwi ḓivha uri Mudzimu ha ṱoḓi ri tshi zwi ita kana ri tshi vha nazwo. Sa tsumbo, arali muthu ane a betsha a rabela Mudzimu uri a mu fhe mashudu mavhuya uri a wane tshelede kha zwenezwo, naa Mudzimu a nga fhindula yeneyo thabelo? O ri vhudza uri ri songo vha na tseḓa na uri ri songo tenda zwithu zwi siho, zwi ngaho mashudu mavhuya. (Yesaya 65:11; Luka 12:15) Ri nga si lavhelele uri Yehova a fhindule thabelo dzo raloho. Uri Mudzimu a fhindule thabelo dzashu, ri tea u vha na vhungoho ha uri zwine ra humbela zwi tshimbidzana na zwine a ri vhudza zwone Bivhilini.

 “Ane a hana u thetshelesa mulayo, na thabelo yawe i a nengisa.”—Mirero 28:9.

Tshifhingani tsha Bivhili, Mudzimu o vha a sa fhinduli thabelo dza vhe vha vha vha sa thetshelesi milayo yawe yo lugaho. (Yesaya 1:15, 16) Mudzimu ho ngo shanduka. (Maḽeaxi 3:6) Arali ri tshi ṱoḓa uri Mudzimu a fhindule thabelo dzashu, ri tea u ita zwoṱhe zwine ra nga kona uri ri tevhedze milayo yawe. Fhedzi hu pfi mini arali ro ita vhukhakhi tshifhingani tsho fhiraho? Naa zwi amba uri Yehova ha nga vuwi o ri thetshelesa? U ḓo ri thetshelesa. Mudzimu u ḓo ri hangwela arali ra rembuluwa nahone ra ita zwoṱhe zwine ra nga kona uri ri ite zwine zwa mu takadza.—Mishumo 3:19.