María, Raúl, Arne na vhaṅwe vha dzhia thabelo i tshithu tsho khetheaho. Vha vhona u nga i vha thusa u amba na Mudzimu, u mu livhuwa na u mu humbela thuso. Bivhili i ri: “Ri fhulufhela uri arali ra humbela zwine zwa tshimbidzana na zwine a zwi funa, u ḓo ri pfa.” Vhenevha vhathu vha tenda uri zwenezwo ndi ngoho.—1 Yohane 5:14.

Fhedzi vhunzhi ha vhathu a vha tendi zwine Bivhili ya zwi amba nga ha thabelo. Steve u ri vhudza nḓila ye a vha a tshi ḓipfa ngayo nga ha u rabela. U ri: “Musi ndi na miṅwaha ya 17, khonani yanga nthihi yo vha kha khombo ya goloi ya mbo ḓi fa nahone mbili dza nwela khothe lwanzheni.” Steve o ita mini? U ri: “Ndo rabela kha Mudzimu ndi tshi ṱoḓa u ḓivha uri ndi ngani zwenezwo zwithu zwo itea, fhedzi a si  mphindule. Zwenezwo zwo ita uri ndi ḓivhudzise uri: ‘Zwi nthusa ngani u rabela?’” Vhathu vhanzhi vha vhona u nga thabelo dzavho a dzi fhinduliwi, ndi ngazwo vha tshi ḓivhudzisa uri u rabela zwi thusa ngani.

Hu na zwiṅwe zwithu zwine zwa ita uri vhathu vha ḓivhudzise uri u rabela zwi vha thusa ngani. Vhaṅwe vha amba uri samusi Mudzimu a tshi ḓivha zwoṱhe, a zwi ṱoḓei uri ri mu vhudze thaidzo dzine ra vha nadzo na zwine ra zwi ṱoḓa ngauri u vha a tshi vho zwi ḓivha.

Vhaṅwe vha amba uri Mudzimu a nga si thetshelese thabelo dzavho nga nṱhani ha uri vho ita vhukhakhi tshifhingani tsho fhiraho. Jenny u ri: “Thaidzo yanga ndi uri ndi ḓivhona ndi si tshithu. Ndo no ita vhukhakhi vhunzhi, zwenezwi zwi ita uri ndi pfe u nga a thi fanelei uri Mudzimu a pfe thabelo dzanga.”

Naa ni vhona u nga u rabela zwi a thusa? Arali na inwi no vha ni tshi timatima uri thabelo i a thusa, ni nga takadzwa nga u ḓivha uri Bivhili i fhindula mbudziso nnzhi nga ha thabelo. Ri nga fhulufhela zwine Bivhili ya zwi amba nga ha thabelo; * i nga ni thusa u fhindula mbudziso dzi ngaho:

• Naa Mudzimu u a pfa thabelo dzashu?

• Ndi ngani Mudzimu a sa fhinduli dziṅwe thabelo?

• Ni nga rabela hani uri Mudzimu a pfe thabelo yaṋu?

• Thabelo i nga ni thusa hani?