RI NGA ITA MINI URI RI SI TSHA VHENGA VHAṄWE?
3 | Litshani U Humbula Nga Ha Zwithu Zwine Zwa Nga Ita Uri Ni Vhenge Vhaṅwe
Bivhili I Ri:
“Shandulani nḓila ine na humbula ngayo, uri ni kone u ṱalukanya zwine Mudzimu a zwi funa, zwine zwa vha zwavhuḓi, zwo fhelelaho na zwine zwa mu takadza.”—VHAROMA 12:2.
Zwi Amba Mini?
Mudzimu u na ndavha na zwine ra zwi humbula. (Yeremia 17:10) A ro ngo tea u iledza fhedzi u amba na u ita zwithu zwine zwa sumbedza uri ri vhenga vhaṅwe. U vhenga vhaṅwe zwi thoma mbiluni yashu na kha zwine ra zwi humbula. Ndi ngazwo ri tshi tea u litsha u humbula nga ha zwithu zwine zwa nga ita uri ri vhenge vhaṅwe. Musi ri tshi ita zwenezwo ri ḓo ‘shanduka’ ra litsha u vhenga vhaṅwe.
Zwine Na Nga Zwi Ita:
Ni humbulisise nga ha uri ni ḓipfa hani nga ha vhathu vha muvhala kana lushaka lu sa fani na lwaṋu. Ḓivhudziseni uri: ‘Ndi vha dzhia hani? Naa nḓila ine nda vha dzhia ngayo i ṱuṱuwedzwa nga zwine nda zwi ḓivha nga havho kana nga tshiṱalula?’ Iledzani social media, mimuvi kana u ḓimvumvusa hune ha ṱuṱuwedza u vhenga vhaṅwe na dzikhakhathi.
Ipfi ḽa Mudzimu ḽi nga ri thusa uri ri si tsha vhenga vhaṅwe
A zwo ngo leluwa u ṱolisisa nḓila ine ra humbula ngayo kana u ḓipfa ngayo. Fhedzi Ipfi ḽa Mudzimu ḽi nga ri thusa u ‘khethekanya zwine ra zwi humbula na zwe ra ḓiimisela u zwi ita.’ (Vhahevheru 4:12) Ni dzule ni tshi guda Bivhili. Ni vhambedze zwine ya zwi funza na zwine na zwi humbula nahone ni ḓigudise u humbula nga nḓila ine ya takadza Mudzimu. Ipfi ḽa Mudzimu ḽi nga ri thusa uri ri si vhenge vhaṅwe, naho zwenezwo zwo goḓombela mbiluni dzashu na mihumbuloni yashu zwi tshi nga “zwithu zwo khwaṱhaho sa mutsheṱo.”—2 Vhakorinta 10:4, 5.
