RI NGA ITA MINI URI RI SI TSHA VHENGA VHAṄWE?
2 | Ni Songo Ḓilifhedzela
Bivhili I Ri:
‘Ni songo lifhedza vhuvhi nga vhuvhi. Itani zwoṱhe zwine na nga kona uri ni vhe na mulalo na vhathu vhoṱhe. Ni songo ḓilifhedzela, ngauri ho ṅwaliwa u pfi: “Ndifhedzo ndi yanga; ndi ḓo lifhedza,” u ralo Yehova.’—VHAROMA 12:17-19.
Zwi Amba Mini?
Zwo ḓowelea uri ri sinyuwe musi muṅwe muthu o ri fara nga nḓila i si yavhuḓi. Fhedzi Mudzimu ha ṱoḓi ri tshi ḓilifhedzela. Nṱhani hazwo, u ṱoḓa uri ri si fhele mbilu ngauri u fhulufhedzisa uri u ḓo zwi lugisa hu si kale.—Phisalema 37:7, 10.
Zwine Na Nga Zwi Ita:
Samusi ri na tshivhi, arali ra ḓilifhedzela zwi nga ita uri ri ṋaṋe u vhenga vhaṅwe. Nga zwenezwo, arali muṅwe muthu a ni fara nga nḓila i si yavhuḓi, ni songo lifhedza. Lingedzani u ḓifara na u ita uri hu vhe na mulalo. Kha vhuṅwe vhuimo, zwi nga vha khwine uri ni tsinye iṱo. (Mirero 19:11) Nga zwiṅwe zwifhinga, zwi nga vha zwavhuḓi u amba nga ha zwe zwa itea. Sa tsumbo, arali no ṱangana na vhugevhenga ni nga pota mapholisani kana kha vhavhusi.
U ḓilifhedzela zwi vhaisa iwe muṋe
Ni nga ita mini arali thaidzo ine na vha nayo i sa khou tandululea kana no ita zwoṱhe zwine na nga kona uri hu vhe na mulalo? Ni songo lifhedza ngauri zwi nga ṋaṋisa mafhungo. Musi ni tshi ita nga u ralo, zwi ḓo ita uri ni litshe u vhenga vhaṅwe. Ni nga guda u fhulufhela nḓila ine Mudzimu a tandulula ngayo thaidzo. ‘Fhulufhelani ene, u ḓo ni thusa.’—Phisalema 37:3-5.
You May Also Like
BIVHILI I SHANDULA VHUTSHILO
Ndo Lwela Uri Hu Si Vhe Na Tshiṱalula
Rafika o vha e kha tshigwada tshe tsha vha tshi tshi khou lwela uri shangoni hu vhe na vhuthihi na u haṱula nga nḓila yo teaho. Fhedzi o mbo ḓi zwi ṱhogomela uri ndi Muvhuso wa Mudzimu fhedzi une wa ḓo ita uri shangoni hu vhe na mulalo.
