Yehova u ri ramba uri ri ambe nae nga tshiṅwe na tshiṅwe tshine tsha lemedza mbilu na mihumbulo yashu. (Phisalema 55:22) A hu na thaidzo ine ya vha ṱhukhusa kana ine ya vha khulwanesa ine ri nga si rabele nga hayo. Arali thaidzo i tshi ri kwama, na Yehova i a mu kwama. Zwenezwo ndi nga nṱhani ha uri Yehova u na ndavha na nḓila ine ra ḓipfa ngayo. U rabela kha Yehova ndi ḽiga ḽa ndeme ḽine ḽa ni thusa uri ni wane mulalo.​—Vhafilipi 4:6, 7.

Musi ri tshi khou lwisana na vhuleme ha vhulwadze ha muhumbulo, ri nga ḓipfa ri roṱhe. Vhaṅwe vhathu vha nga kha ḓi vha vha sa pfesesi zwine ra khou ṱangana nazwo. (Mirero 14:10) Musi ri tshi amba na Yehova nga thabelo, u a ri thetshelesa nga vhuthu nahone u a ri pfesesa. Yehova u a ri vhona nahone u a ḓivha vhuṱungu na zwithu zwoṱhe zwine zwa khou ri shengedza. U ṱoḓa uri ri rabele khae nga tshiṅwe na tshiṅwe tshine tsha ri vhilaedzisa.​—2 Koronika 6:29, 30.

U amba na Yehova nga thabelo zwi ita uri ri vhe na fhulufhelo ḽo khwaṱhaho ḽa uri u na ndavha na riṋe. Ri nga ḓipfa u fana na nḓila ye muphisalema a ḓipfa ngayo musi a tshi rabela a ri: “Wo vhona u tambula hanga; u a zwi ḓivha uri ndo tsikeledzea nga maanḓa.” (Phisalema 31:7) U ḓivha uri Yehova u a vhona zwine ra khou ṱangana nazwo, zwi nga ri thusa u bvela phanḓa naho ri tshi khou sedzana na vhuleme. Fhedzi u ita zwo engedzeaho u fhira u sokou ḓivha nga ha u tsikeledzea hashu. U a pfesesa vhuleme hashu na zwine ra khou ṱangana nazwo u fhira naho e nnyi nahone u a ri khuthadza na u ri ṱuṱuwedza a tshi shumisa Bivhili.