Kha thero yo fhiraho, ro haseledza nga ha nḓila ye Croesus a xedzwa ngayo nga mufunzi wa ngei Delphi zwe zwa ita uri a kundwe nga khosi ya Peresia. Kha ḽiṅwe sia, Bivhili i na vhuporofita vhu swayeaho vhu ambaho nga ha khosi ya Peresia he ha ḓadzea u ya nga nḓila ye zwa vha zwo porofitwa ngayo.

Miṅwahani i ṱoḓaho u vha 200 hu tshe nga phanḓa, hu sa athu u bebwa khosi Korese, muporofita wa Muheberu ane a pfi Yesaya o amba nga hae nahone a ṱalutshedza nḓila ye a vha a tshi ḓo kunda ngayo muḓi muhulu wa Babele.

Yesaya 44:24, 27, 28 i ri: “Yehova u ri, . . . ndi Nṋe ndi vhudzaho tivha ḽa lwanzhe nda ri: Ixá! ndi xisa milambo yau. Ndi Nṋe we nda amba Korese nda ri ndi mulisa wanga; u ḓo vuledza zwoṱhe zwine nda zwi funa nga u vhudza Yerusalema a ri: Nga u fhaṱiwe! na nga u amba nnḓu-khethwa a ri: Nga i tewe!”

Muḓivhazwakale wa Mugerika ane a pfi Herodotus o amba uri maswole a Korese o xisa Mulambo wa Furata we wa vha u tshi elela thungo dza Babele. Zwe Korese a zwi ita zwo ita uri maswole awe a kone u pfuka nga muedzini u itela u dzhena muḓini wa Babele. Nga murahu ha u kunda muḓi wa Babele, Korese o vhofholola Vhayuda vhe vha vha vho thubiwa, a vha tendela vha tshi humela Yerusalema he ha vha ho no fhedza miṅwaha ya 70 ho fheliswa.

Yesaya 45:1 i ri: “Yehova o amba na Korese muḓodzwa wawe, we nda mu fara nga tshanḓa uri ndi zhake dzitshakha phanḓa hawe, uri ndi vhofholole migwarelo ya mahosi, uri a tshi swika ndi vule mahothi, na dzikhoro dzi si tsha valwa.”

Maswole a Peresia o dzhena nga miṋango mivhili mihulu ya luvhondo lwa Babele ye ya vha i songo valwa nga nṱhani ha u sa vha na vhulondi. Arali vhathu vha Babele vho vha vha tshi ḓivha zwe Korese a vha a tshi ṱoḓa u zwi ita, vho vha vha tshi ḓo vala magethe e a vha a tshi thivha mulambo uri u si elele. Fhedzi nga nṱhani ha uri magethe o vha o vulwa, vhenevho vhathu a vho ngo kona u ḓilwela.

Honovhu vhuporofita vhu swayeaho, ndi vhuṅwe ha vhuporofita vhune ha wanala Bivhilini he ha ḓadzea. a Kanzhi zwine vhathu vha zwi porofita zwi bva kha midzimu yavho ya mazwifhi, fhedzi vhuporofita vhu re Bivhilini vhu bva kha Mudzimu we a amba uri: “Ndo ḓi ni vhudza kale zwine zwa ḓo ḓa; ndo ni vhudza misi iḽa zwi sathu u itea.”—Yesaya 46:10.

Ndi Mudzimu wa ngoho fhedzi ane dzina ḽawe ḽa vha Yehova ane a nga amba zwo bulwaho afho nṱha. Ḽeneḽo dzina ḽi amba uri “U Ita Uri Zwi Vhe Hone.” Zwenezwi zwi amba uri u a kona u ḓivha zwa matshelo  na u ita uri zwiitea zwa tshifhingani tshi ḓaho zwi tshimbidzane na zwine a zwi funa. Zwenezwi zwi ita uri ri vhe na vhungoho ha uri u ḓo ita zwoṱhe zwe a zwi fulufhedzisa.

Naa ni nga takalela u ḓivha zwe Bivhili ya zwi amba nga ha tshifhinga tshine ra khou tshila khatsho? Miṅwahani i ṱoḓaho u vha 2 000 yo fhiraho, Bivhili yo dzula yo amba uri “maḓuvhani a vhufhelo” hu ḓo vha na “zwifhinga zwi lemelaho zwi konḓaho u sedzana nazwo.” Hu ḓo fheliswa mini? A hu nga fheliswi ḽifhasi kana vhathu, fhedzi hu ḓo fheliswa dzikhakhathi, u tsikeledzwa na tshengelo, zwine ndi kale zwi tshi khou tambudza vhathu. Kha ri haseledze vhuporofita vhu si gathi vhune ha amba nga ha “maḓuvha a vhufhelo.”

2 Timotheo 3:1-5 i ri: “Maḓuvhani a vhufhelo . . . , vhathu vha ḓo funa vhone vhaṋe fhedzi, vha ḓo vha vhafuni vha tshelede, vhazuwi, vhadzia-u-ḓihudza, vhadzia-maṱamba, vha sa thetshelesi vhabebi, vha sa livhuhi, vha sa fulufhedzei, vha si na lufuno, vha songo ḓiimiselaho u vhofha thendelano naho i ifhio, vhadzia-zwitshele, vha sa koni u ḓifara, vhadzia-khakhathi, vha sa funi zwivhuya, vhafheṱi, vhadzia-swili, vhane vha ḓikukumusa, vhane vha funa miḓifho u fhira Mudzimu, vhane vha ḓiita u nga vho ḓikumedza kha Mudzimu, fhedzi vha sa fulufheli maanḓa awe.”

Naa no no zwi ṱhogomela uri yeneyi ndi nḓila ine vhathu vha ḓifara ngayo ṋamusi? Naa no no zwi ṱhogomela uri ho ḓala vhathu vhane vha funa vhone vhaṋe fhedzi, u funesa tshelede na u ḓikukumusa? Naa no no zwi ṱhogomela uri vhathu a vha fushei nahone a vho ngo ḓiimisela u tendelana na vhaṅwe? A zwi timatimisi uri u sa thetshelesa vhabebi zwo no phaḓalala nahone vhathu vha funesa miḓifho u fhira u funa Mudzimu. Nahone zwithu zwi khou ṋaṋa u vhifha.

Mateo 24:6, 7 i ri: “Ni ḓo pfa nga ha dzinndwa. . . . Lushaka lu ḓo lwa na luṅwe lushaka; muvhuso wa lwa na muṅwe muvhuso.”

Vhaṅwe vha amba uri u bva nga 1914, vhathu vha fhiraho miḽioni dza 100 vho fela nndwani. Tshenetshi ndi tshivhalo tshi fhiraho tshivhalo tsha vhadzulapo vha tshaka nnzhi. Edzani u humbula makhaulambilu e a ḓiswa nga zwenezwo zwithu. Naa vhathu vho guda kha vhukhakhi havho nahone vha litsha dzinndwa?

Mateo 24:7 i ri: “Zwiḽiwa zwi ḓo ṱahela.”

Dzangano ḽa The World Food Programme ḽo amba uri shangoni ḽine ḽa vha na zwiḽiwa zwo eḓanaho vhathu vhoṱhe, kha vhathu vha miḽioni dza 815, hu na vhathu vhane vha kha ḓi eḓela na nḓala ḓuvha ḽiṅwe na ḽiṅwe. Zwiṅwe hafhu, hu na vhaṅwe vhane vha ḽa zwiḽiwa zwi si na pfushi. Ḽeneḽo dzangano ḽi anganyela uri ṅwaha muṅwe na muṅwe, hu fa vhana vha miḽioni dzi ṱoḓaho u vha tharu nga nṱhani ha nḓala.

Luka 21:11 i ri: “Hu ḓo vha na midzinginyo mihulu.”

Ṅwaha muṅwe na muṅwe, hu vha na midzinginyo i ṱoḓaho u vha 50 000 ine ya vha mihulwane lune na vhathu vha kone u ipfa. Midzinginyo i ṱoḓaho u vha 100 i tshinyadza zwifhaṱo nahone hu vha na mudzinginyo muhulwane ṅwaha muṅwe na muṅwe. Vhukati ha ṅwaha wa 1975 na 2000, hu anganyelwa uri midzinginyo yo vhulaya vhathu vha 471 000.

Mateo 24:14 i ri: “Huno mafhungo maḓifha aya a Muvhuso a ḓo ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe, nga murahu ndi hone vhufhelo vhu tshi ḓo ḓa.”

Ṱhanzi dza Yehova dzi fhiraho miḽioni dza malo, dzi huwelela na u phaḓaladza mafhungo maḓifha a Muvhuso wa Mudzimu u mona na shango ḽoṱhe kha mashango a ṱoḓaho u vha 240. Vha huwelela mafhungo maḓifha fhethu hoṱhe hune ha vha na vhathu. Vhuporofita ho dzula ho amba uri musi ri tshi khunyeledza wonoyo mushumo u ya nga nḓila ine Mudzimu a ṱoḓa ngayo “ndi hone vhufhelo vhu tshi ḓo ḓa.” Zwenezwo zwi amba mini? Zwi amba uri mivhuso ya vhathu i ḓo fheliswa nahone ha thoma u vhusa Muvhuso wa Mudzimu. Ndi afhio mafulufhedziso ane a ḓo ḓadzea nga fhasi ha Muvhuso wa Mudzimu? Kha ri vhone.