Bivhili i ri muruṅwa we a ḓo vhidzwa Saṱhane Diabolo, o mbo ḓi thoma u lwisana na u vhusa ha Mudzimu. O ri vhathu vha nga tshila vho takala arali vha sa khou vhuswa nga Mudzimu. Zwi vhavhaho ndi uri Adamu na Eva vho tenda eneo mazwifhi a Saṱhane, na vhone vha si tsha ṱoḓa u vhuswa nga Mudzimu.—Genesi 3:1-6; Nzumbululo 12:9.

Adamu na Eva vho sumbedza uri a vha tsha ṱoḓa u vhuswa nga Mudzimu, zwenezwo zwa ita uri vha si tsha tshila tshoṱhe Pharadisoni. (Genesi 3:17-19) Phetho ye vha i ita yo vha na masiandoitwa a si avhuḓi na kha vhana vhavho. Bivhili i amba uri “tshivhi tsho dzhena shangoni nga muthu muthihi, tshenetsho tshivhi tsha ḓisa lufu.” Tshenetsho tshivhi tsho itwa nga Adamu. (Vharoma 5:12) Tshi ita uri musi ‘muthu a tshi vhusa muṅwe a mu huvhadze.’ (Muhuweleli 8:9) Zwenezwo zwi amba uri musi ri tshi vhusiwa nga vhathu, ri ḓo dzula ro fara ludongo nga hu fhisaho.

Muthu wa u thoma we a vhusa vhathu we ha ambiwa nga hae Bivhilini o vha e Nimirodo. O hana u vhuswa nga Yehova. Na ṋamusi hu kha ḓi vha na vhathu vhane vha si vhuse nga nḓila yavhuḓi. Miṅwahani i ṱodaho u vha 3 000 yo fhiraho, Khosi Salomo o ri: “Nda vhona miṱodzi yoṱhe ya vho tsikeledzwaho, hu si na ane a vha khuthadza. Vhatsikeledzi vhavho vho vha vhe na maanḓa.”—Muhuweleli 4:1.

Na zwino zwithu zwi tshee zwo tou ralo. Muṅwe muvhigo wa United Nations wo itwaho nga 2009, wo amba uri u sa vha na vhavhusi vhavhuḓi “ndi zwiṅwe zwa zwithu zwine zwa ita uri hu vhe na thaidzo nnzhi.”

Hu khou ṱoḓea muvhuso na vhavhusi vha khwine. Nahone Musiki washu o fhulufhedzisa uri ri ḓo zwi wana.

Mudzimu u na Muvhuso une wa ḓo fhelisa mivhuso yoṱhe ya vhathu nahone “wa ima u woṱhe lini na lini.” (Daniele 2:44) Ndi wone Muvhuso une roṱhe ra rabela uri u ḓe. (Mateo 6:9, 10) Fhedzi hu na muthu we Mudzimu a mu vhea uri a vhe Khosi kha wonoyo muvhuso. Onoyo muthu o vhuya a tshila kha ḽifhasi. Ndi nnyi onoyo muthu?