Murahunyana ro guda nga zwe Yesu a ri zwi ḓo sumbedza uri Muvhuso wa Mudzimu wo no thoma u vhusa ṱaḓulu. Khosi yawo ndi Yesu Kristo.

Bivhili i amba uri musi Yesu a tshi thoma u vhusa ṱaḓulu, o pandela Saṱhane na madimoni awe. Vho poselwa kha ḽifhasi, ndi ngazwo u bva tsha 1914 ho vhilingana.—Nzumbululo 12:7, 9.

Naho zwithu zwi tshi khou ṋaṋa u vhifha zwi tshi ya, Yesu a re Khosi ya Muvhuso wa Mudzimu u dzulela u thusa vhathu u mona na shango ḽoṱhe. Vhathu vhanzhi u mona na shango ḽoṱhe vha khou gudiswa Bivhili na u gudiswa u shumisa zwine vha zwi wana khayo, zwenezwo zwi khou konadzea nga nṱhani ha uri hu khou huwelelwa mafhungo maḓifha sa zwe Yesu a dzula o amba. (Yesaya 2:2-4) Vhanzhi vho guda zwine zwa nga ita uri muṱa wavho u takale na u sa tendela mushumo kana zwithu zwine vha vha nazwo zwi tshi vha zwone zwa ndeme vhutshiloni havho. Zwine vhenevha vhathu vha khou zwi guda, zwi ita uri vha tshile vhutshilo ha khwine nahone zwi khou vha lugiselela shango ḽiswa Muvhusoni wa Mudzimu hune vha ḓo tshila hone.

Naho Yesu o no thoma u vhusa ṱaḓulu, ha athu u thoma u vhusa fhano kha ḽifhasi, nṱhani hazwo hu khou vhusa vhathu. Fhedzi Mudzimu o vhudza Yesu uri: “Iya u kunde maswina au.” (Phisalema 110:2) Hu si kale Yesu u ḓo kunda maswina awe tshoṱhe nahone u ḓo ita uri vhane vha ṱoḓa u vhuswa nga Muvhuso wa Mudzimu vha si tsha vha na tshine vha lila ngatsho.

Musi hu tshi itea zwenezwo, Muvhuso wa Mudzimu u ḓo ita zwi tevhelaho:

• U ḓo fhelisa vhurereli ha mazwifhi. Vhurereli vhune ha fhura vhathu na u vha konḓisela vhu nga si tsha vha hone. Bivhili i vhidza vhurereli ha mazwifhi uri ndi mufumakadzi ane a rengisa muvhili. Musi vhurereli ha mazwifhi vhu tshi fheliswa, vhanzhi vha ḓo sala vho aṱama milomo.—Nzumbululo 17:15, 16.

• U ḓo ita uri hu si tsha vhusa vhathu. Muvhuso wa Mudzimu u ḓo fhelisa mivhuso ya vhathu.—Nzumbululo 19:15, 17, 18.

• U ḓo ita uri hu si tsha vha na vhathu vhavhi. Hu ḓo itea mini kha vhathu vha sa ṱoḓi u litsha u ita zwithu zwivhi na vha sa ṱoḓi u vhuswa nga Mudzimu? Bivhili i ri: “Vhavhi vha ḓo fheliswa kha ḽifhasi.”—Mirero 2:22.

• U ḓo fhelisa Saṱhane na madimoni awe. Saṱhane na madimoni a vha tsha ḓo kona “u xedza dzitshaka.”—Nzumbululo 20:3, 10.

Hu ḓo itea mini kha vhane vha ṱoḓa u vhuswa nga Muvhuso wa Mudzimu?

Yesu ane a ḓo vha a tshi khou vhusa e ṱaḓulu u ḓo ita zwithu zwinzhi zwo balelaho vhathu vhe vha vhusa. Hu na vhathu vha 144000 vhe vha khethiwa uri vha vhuse nae. (Nzumbululo 5:9, 10; 14:1, 3) U ḓo ita uri zwi funwaho nga Mudzimu zwi itwe fhano kha ḽifhasi. Muvhuso wa Mudzimu u ḓo itela mini vhathu?

• U ḓo ita uri vhathu vha si tsha lwala, u vha vhalala na u fa. Bivhili i ri: “A hu na mudzulapo ane a ḓo ri: ‘Ndi a lwala,’” ya dovha ya ri: “Lufu a lu tsha ḓo vha hone.”—Yesaya 33:24; Nzumbululo 21:4.

• U ḓo ita uri hu vhe na mulalo na uri vhathu vha tsireledzee. Bivhili i ri: “Mulalo wa vharwa vhau u ḓo vha muhulu,” ya dovha ya ri: “Vhoṱhe vha ḓo dzula fhasi ha minḓirivhe na mihuyu yavho, a hu na ane a ḓo vha tshuwisa.”—Yesaya 54:13; Mika 4:4.

• U ḓo ṋea vhathu mushumo une wa ita uri vha takale. Bivhili i ri: “Vhanangiwa vhanga vha ḓo takalela tshoṱhe mushumo wa zwanḓa zwavho. A vha nga shumeli mahala.”—Yesaya 65:22, 23.

• U ḓo lugisa thaidzo dza mupo. Bivhili i ri: “Hu ḓo takala soga na shango, na midavhi ya soga i ḓo takala ya ḓala maluvha.”—Yesaya 35:1.

• U ḓo gudisa vhathu zwine vha tea u ita uri vha tshile tshoṱhe. Bivhili i ri: “Vha ḓo wana vhutshilo vhu sa fheli, arali vha ḓivha iwe Mudzimu wa ngoho u woṱhe na u ḓivha Yesu Kristo we wa mu ruma.”—Yohane 17:3.

Mudzimu u ṱoḓa uri ni vhuyelwe nga zwine Muvhuso wawe wa ḓo zwi ita. (Yesaya 48:18) Thero i tevhelaho i ḓo amba nga ha zwine na nga ita uri ni vhuyelwe nga zwe Mudzimu a zwi fhulufhedzisa.