U vhala nga ha vhaṋameli vhaṋa vha dzibere zwi nga vhonala zwo serekana nahone zwi tshi tshuwisa, fhedzi a zwo ngo fanela u vha nga yeneyo nḓila. Ndi ngani? Nga nṱhani ha uri Bivhili na zwiitea zwa musalauno zwi ri thusa uri ri kone u vhona zwavhuḓi zwine muṋameli muṅwe na muṅwe wa bere a imela zwone. Naho vhaṋameli vha dzenedzo bere vha tshi sumbedza khombo ine ya vha kha ḽifhasi, zwi nga dovha zwa vha mafhungo maḓifha kha inwi na muṱa waṋu. Nga nḓila-ḓe? Tsha u thoma, kha ri ṱolisise zwine muṋameli muṅwe na muṅwe wa bere a imela zwone.

Bono ḽi thoma nga nḓila i tevhelaho: “Nda lavhelesa, nda vhona bere tshena; we a vha o i ṋamela o vha o fara vhura; a ṋewa khare, a bvela phanḓa a tshi kunda na u khunyeledza gundo ḽawe.”—Nzumbululo 6:2.

Ndi nnyi muṋameli wa bere tshena? Onoyo muṋameli o ṱaluswa Bivhilini kha bugu ya Nzumbululo nahone nga murahu yo ṱalusa onoyo muṋameli a re ṱaḓulu sa “Ipfi ḽa Mudzimu.” (Nzumbululo 19:11-13) Ḽeneḽo dzina ḽine ḽa ri Ipfi, ndi Yesu Kristo ngauri ndi ene muambeli wa Mudzimu. (Yohane 1:1, 14) Zwiṅwe hafhu, u dovha a vhidzwa “Khosi ya mahosi na Murena wa marena” nahone u ṱaluswa sa “A Fulufhedzeaho na Wa Ngoho.” (Nzumbululo 19:16) Zwi khagala uri u na maanḓa sa khosi ya muhali nahone ha shumisi luvhi maanḓa awe kana u shengedza vhaṅwe. Naho zwo ralo, hu takuwa dziṅwe mbudziso.

Ndi nnyi we a ṋea Yesu maanḓa a u kunda? (Nzumbululo 6:2) Muporofita Daniele o vhona bono ḽe khaḽo Messia a fanyiswa na “murwa-muthu” nahone o ṋewa “maanḓa, na vhurena, na vhuhosi” nga “Wa-Kale Wa-Maḓuvha” ane a vha Yehova Mudzimu. * (Daniele 7:13, 14) Nga zwenezwo, ndi Mudzimu Ramaanḓaoṱhe we a ṋea Yesu maanḓa na ndugelo ya u vhusa na u haṱula. Bere tshena i imela nndwa ine ya ḓo ḓiswa nga Murwa wa Mudzimu nahone kanzhi Maṅwalo a shumisa muvhala mutshena une wa imela u luga.—Nzumbululo 3:4; 7:9, 13, 14.

Vhaṋameli vha bere vho thoma lini u ṋamela dzenedzo bere? Ṱhogomelani uri muṋameli wa u thoma ane a vha Yesu o thoma u ṋamela yeneyo bere musi a tshi ṋewa khare. (Nzumbululo 6:2) Yesu o vhewa lini sa Khosi ṱaḓulu? Ho ngo vhewa sa Khosi musi a tshi humela ṱaḓulu nga murahu ha lufu lwawe. Bivhili i sumbedza uri nga tshenetsho tshifhinga o thoma a lindela uri a vhewe sa khosi. (Vhaheberu 10:12, 13) Yesu o vhudza vhatevheli vhawe nḓila ine vha ḓo vhona ngayo uri honoho u lindela ho no swika magumoni na tshifhinga tshine a ḓo thoma ngatsho u vhusa ngei ṱaḓulu. O amba uri mathomoni a vhuvhusi hawe, vhuimo ha shango vhu ḓo ṋaṋa u vhifha. Hu ḓo vha na dzinndwa, ṱhahelelo ya zwiḽiwa na malwadze. (Mateo 24:3, 7; Luka 21:10, 11) Nga u ṱavhanya musi ho no thoma Nndwa ya Shango ya u Thoma nga 1914, zwo vha khagala uri tshenetsho tshifhinga tsho swika, tshifhinga tshi konḓaho kha ḽifhasi tshine Bivhili ya tshi vhidza ‘maḓuvha a vhufhelo.’—2 Timotheo 3:1-5.

Fhedzi ndi ngani ro vhona vhuimo ha shango vhu tshi khou ṋaṋa u vhifha nṱhani ha uri vhu vhe khwine u bva tshee Yesu a ambadzwa khare ya vhuhosi nga 1914? Ndi ngauri nga tshenetsho tshifhinga, Yesu o thoma u vhusa ngei ṱaḓulu hu si kha ḽifhasi. Ho vha na nndwa ngei ṱaḓulu nahone Yesu Khosi ye ya vha i tshi kha ḓi tou bva u vhewa ine ya vhidzwa Mikaele, o posa Sathane na madimoni awe kha ḽifhasi. (Nzumbululo 12:7-9, 12) U bva tsheetsho, Sathane u na mbiti khulu ngauri u a zwi ḓivha uri o salelwa nga tshifhinga tshiṱuku. Ngoho ndi ya uri hu si kale Mudzimu u ḓo fhelisa Sathane kha ḽifhasi samusi o zwi fulufhedzisa. (Mateo 6:10) Zwino, kha ri vhone nḓila ine dziṅwe bere tharu dza ri thusa ngayo u vhona arali zwa vhukuma ri tshi khou tshila “maḓuvhani a vhufhelo.” U fhambana na muṋameli wa bere ya u thoma ane a imela Yesu,  vhaṋameli vhararu vha imela vhuimo ha shango he ha phaḓalala ḽifhasini ḽoṱhe.

“Ha bvelela bere tswuku; we a vha o i ṋamela a tendelwa uri a dzhie mulalo kha ḽifhasi uri vha vhulahane nga tshavho; a ṋewa banga ḽihulu.”—Nzumbululo 6:4.

Onoyo muṋameli wa bere u imela nndwa. Ṱhogomelani uri onoyo muṋameli u dzhia mulalo kha ḽifhasi ḽoṱhe hu si kha tshaka dzi si gathi fhedzi. Lwa u tou thoma kha ḓivhazwakale, ho thoma nndwa ya shango ḽoṱhe nga 1914. Ho tevhela nndwa ya shango ya vhuvhili, ye ya vhulaha vhathu vhanzhi. Vhaṅwe vha anganyela uri u bva nga 1914, ho vhulahwa vhathu vha fhiraho milioni dza 100 nga nṱhani ha nndwa na dzikhakhathi! Zwiṅwe hafhu, vhathu vhanzhi vho huvhala vhukuma.

Nndwa dzi sumbedza hani tshifhinga tshine ra vha khatsho ṋamusi? Lwa u tou thoma kha ḓivhazwakale, zwi vhonala u nga vhathu vha na vhukoni ha u vhulaha vhathu. Na madzangano ane a vhidzwa vhadzia-mulalo a ngaho Yuno, ho ngo kona u thivhela muṋameli wa bere tswuku.

“Nda lavhelesa, nda vhona bere ntswu; we a vha o i ṋamela o vha o fara tshikalo tshanḓani tshawe. Nda pfa zwine zwa nga ipfi vhukati ha zwivhumbwa zwiṋa zwi tshilaho ḽi tshi ri: ‘Khilogiramu ya goroi ndi dinari, khilogiramu tharu dza baḽi ndi dinari; u songo tshinya mapfura a muṱwari na waini.’”—Nzumbululo 6:5, 6.

Onoyo muṋameli wa bere u imela nḓala. Ḓanani ḽa u thoma ḽa miṅwaha, zwiḽiwa zwo vha zwi tshi ḓura vhukuma ngauri goroi i linganaho khilogiramu dza 0.7 yo vha i tshi rengwa nga dinari nthihi ye ya vha i tshi holwa nga ḓuvha! (Mateo 20:2) Yeneyo dinari nthihi yo vha i tshi nga renga bali i linganaho khilogiramu dza 2.1, musi bali i tshi vhambedzwa na goroi yo vha i tshi dzhiiwa i ya vhuimo ha fhasi. Naa zwenezwo zwiḽiwa zwo vha zwi tshi nga fusha muṱa muhulwane? Vhathu vho vha vho sevhiwa uri vha shumise zwavhuḓi zwiḽiwa zwa ḓuvha ḽiṅwe na ḽiṅwe, zwiḽiwa zwe zwa vha zwi zwa ndeme nga tshenetsho tshifhinga na kha mvelele yavho, zwithu zwi ngaho mapfura a muṱwari na waini.

U bva nga 1914, naa ro no vhona vhuṱanzi ha uri yeneyo bere ntswu i khou gidima? Ee! Ḓanani ḽa vhu-20 ḽa miṅwaha, vhathu vha ṱoḓaho u vha milioni dza 70 vho fa nga nḓala. Muṅwe muvhigo wo anganyela uri u bva “nga ṅwaha wa 2012 u swika nga 2014 vhathu vha milioni dza 805 vho wanwa vhe si na pfushi, zwine zwa vha muthu muthihi kha vhathu vha ṱahe shangoni ḽoṱhe.” Muṅwe muvhigo wo ri: “Ṅwaha muṅwe na muṅwe, nḓala i vhulaha vhathu vhanzhi u fhira AIDS, malaria na TB.” Bere ntswu i khou bvela phanḓa na u gidima, hu sa londwi vhuḓidini vhune ha itwa u itela u fhelisa nḓala.

“Nda lavhelesa, nda vhona bere yo tshenuluwaho; we a vha o i ṋamela o vha a tshi pfi Lufu. Vhudzulavhafu ho vha vhu tshi khou mu tevhela vhu tsini-tsini nae. Zwo vha zwo ṋewa maanḓa a u vhusa tshipiḓa tsha vhuṋa tsha ḽifhasi, na u vhulaha nga banga ḽilapfu na nga u ṱahela ha zwiḽiwa na nga dwadze na nga zwivhanda zwa ḽifhasi.”—Nzumbululo 6:8.

Muṋameli wa bere ya vhuṋa u imela lufu lu vhangwaho nga malwadze na zwiṅwe zwithu. Nga murahu ha 1914, mukhushwane muhulu wa Spain wo vhulaha vhathu vha dzimilioni. Khamusi vhathu vha ṱoḓaho u vha milioni dza 500 vho kavhiwa nga ḽeneḽo dwadze nahone kha vhathu vhararu ho ponya muthu muthihi!

Fhedzi wonoyo mukhushwane wo vha u tshi tou vha mathomo. Vhaḓivhi vha anganyela uri vhathu vhanzhi vho vhulahwa nga vhulwadze ha smallpox ḓanani ḽa vhu-20 ḽa miṅwaha. U swika na ṋamusi, vhathu vha dzimilioni vha vhulahwa nga malwadze a ngaho AIDS, TB na malaria hu sa londwi ṱhoḓisiso dze dza itwa nga zwa ngalafho.

Masiandoitwa ndi mathihi, vhathu vha a fa hu sa londwi uri vha vhulahwa nga nndwa, nḓala kana malwadze. Mavhiḓa a dzula o aṱama o lindela vhathu nahone a huna fulufhelo, ndi Yehova fhedzi ane a ri ṋea fulufhelo.

Zwithu zwivhi zwine zwa khou itea zwino zwi ḓo fhela hu si kale. Humbulani zwi tevhelaho: Yesu o “bvela phanḓa a tshi kunda” nga 1914, a posa Sathane kha ḽifhasi, fhedzi ho ngo khunyeledza gundo ḽawe. (Nzumbululo 6:2; 12:9, 12) Hu si kale nga Haramagedo, Yesu u ḓo fhelisa ṱhuṱhuwedzo ya Sathane Diabolo nahone u ḓo fhelisa na vhathu vhane vha mu tikedza. (Nzumbululo 20:1-3) Yesu u ḓo fhelisa vhaṋameli vhararu vha bere nahone u ḓo dovha a lugisa zwe vha zwi tshinya. Nga nḓila-ḓe? Ṱhogomelani zwine Bivhili ya zwi fulufhedzisa.

Nṱhani ha uri hu vhe na nndwa, hu ḓo vha na mulalo. Yehova “u dzivhisa dzinndwa migumoni ya ḽifhasi, u vunḓa mara, u gomadza mafumo.” (Psalme ya 46:9) Vhathu vhane vha funa mulalo, ‘vha ḓo takalela muḓalo wa mulalo.’—Psalme ya 37:11.

Nṱhani ha uri hu vhe na nḓala, hu ḓo vha na zwiḽiwa zwinzhi. “Shangoni hu ḓo vha na muḓalo wa mavhele; dziṱhohoni dza dzithavha hu ḓo guma maḓaka.”—Psalme ya 72:16.

Nṱhani ha uri hu vhe na malwadze na lufu, vhathu vhoṱhe vha ḓo takalela u vha na mutakalo wavhuḓi nahone vha ḓo tshila tshoṱhe. Mudzimu “u ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone.”—Nzumbululo 21:4.

Musi Yesu a tshee kha ḽifhasi, o vhetshela vhathu tsumbo ya zwine zwa ḓo itea tshifhingani tshi ḓaho musi a tshi vhusa. O ṱuṱuwedza uri hu vhe na mulalo, a kanzwa vhathu vhanzhi nga lwa vhuṱolo, a fhodza vhathu nahone a vusa vho faho.—Mateo 12:15; 14:19-21; 26:52; Yohane 11:43, 44.

Ṱhanzi dza Yehova dzi ḓo takalela u ni sumbedza Bivhilini yaṋu nḓila ine na nga dzula no ḓilugisela ngayo musi dzenedzo bere dzi si tsha gidima. Naa ni nga takalela u guda zwo engedzeaho??