Bere nṋa dzi tshi khou gidima, hu tshi khou pfala mitsindo ya khwanḓa dzayo! Musi ri tshi khou vhala nga ha dzenedzo bere nṋa na vhaṋameli vhadzo, zwi vhonala dzi tshi nga ndi dza vhukuma lune dza nga bva kha masiaṱari a Bivhili! Bere ya u thoma ndi tshena—muṋameli wayo u na vhugala nahone u kha ḓi tou bva u ambadzwa khare ya vhuhosi. Murahu hawe ho vha hu tshi khou ḓa bere ine ya vha na muvhala mutswuku u ngaho mulilo, muṋameli wayo u khou dzhia mulalo kha ḽifhasi. Ha tevhela bere ya vhuraru yo swifhalaho sa swiswi, muṋameli wayo o vha o fara tshikalo tshine tsha nga tshi na mulaedza une wa amba nga ha uri hu ḓo vha na ṱhahelelo ya zwiḽiwa. Bere ya vhuṋa i na muvhala wo tshenuluwaho, yo vha i tshi nga i na vhulwadze na zwiṅwe zwi ofhisaho nahone muṋameli wayo o vha a tshi pfi Lufu. Nahone Vhudzulavhafu vhune ha vha vhiḓa ḽo ḓoweleaho ḽa vhathu, vhu tshi khou mu tevhela vhu tsini-tsini nae vhu tshi khou vhulaya vhathu!—Nzumbululo 6:1-8.

“Musi ndi tshi tou thoma u vhala nga ha vhaṋameli vhaṋa vha dzibere ndo vha ndo tshuwa. Ndo vha ndi tshi vhona u nga Ḓuvha ḽa Khaṱulo ḽi khou ḓa, samusi ndo vha ndi songo ḽi lindela ndo vha ndi nga si ponye.”—Crystal.

“Ndo takadzwa vhukuma nga vhaṋameli vha dzenedzo bere dza mivhala yo fhamba-fhambanaho. Musi ndi tshi vho pfesesa zwine ḽeneḽo bono ḽa amba zwone, zwoṱhe zwo pfala khwine.”—Ed.

Naa ni ḓipfa nga nḓila ye Crystal a ḓipfa ngayo nga vhaṋameli vhaṋa vha dzibere vho ṅwalwaho Bivhilini? Kana naa ni ḓipfa nga nḓila i fanaho na ya Ed? Hu sa londwi nḓila ine na ḓipfa ngayo, eneo mafhungo a vhaṋameli vha dzibere ndi mafhungo a ḓivheaho vhukuma a wanalaho kha Nzumbululo ine ya vha bugu ya u fhedza ya Bivhili. Naa no vha ni tshi zwi ḓivha uri ni nga vhuyelwa nga u pfesesa ḽeneḽi bono? Nga nḓila-ḓe? Mudzimu u fulufhedzisa uri ni nga wana dakalo ḽa vhukuma nga u vhala, u guda na u tshila u tendelana na zwithu zwo ṅwalwaho kha yeneyo bugu ya vhuporofita.—Nzumbululo 1:1-3.

Samusi vhaṅwe vha tshi tshuwiswa nga bono ḽa vhaṋameli vhaṋa vha dzibere, ḽeneḽo bono a ḽo ngo ṅwalelwa u ni tshuwisa. Zwi re zwone ndi uri vhathu vhanzhi vha wana ḽeneḽo bono ḽi tshi khwaṱhisa lutendo lwavho nahone ḽi ita uri vha vhe na fulufhelo ḽa vhumatshelo havhuḓi. Na inwi ni nga vha na fulufhelo ḽo raloho! Nga khumbelo vhalani zwi tevhelaho.