Mudzimu o sika mivhili yashu nga nḓila i mangadzaho lune i a kona u ḓifhodza. Arali muthu a re na mutakalo wavhuḓi a huvhala kana u tsheyeya, hu vha na zwithu zwine zwa itea muvhilini u itela uri fhethu ho huvhalaho hu fhole. (Johns Hopkins Medicine) Muvhili u ṱavhanyedza u ita zwiṅwe zwithu u itela uri hu si tsha bva malofha nahone blood vessels i vala fhethu ho vhaisalaho.

ṰHOGOMELANI HEZWI: Arali Mudzimu o sika mivhili yashu i tshi kona u ḓifhodza, ri nga vha na fulufhelo ḽa uri u ḓo ri thusa uri ri si tsha ḽa mbilu. Mupsalme o ṅwala uri, “U fhodza vha dzimbilu dzo vunḓekanaho, u phupha maṱungu avho.” (Psalme ya 147:3) Arali ni tshi khou ḽa mbilu nga zwithu zwo iteaho tshifhingani tsho fhiraho kana zwine na khou sedzana nazwo zwino, ni nga vha hani na vhungoho ha uri Yehova u ḓo ni thusa zwino na tshifhingani tshi ḓaho?

Mudzimu o fulufhedzisa uri: “U songo ofha; ngauri a re na iwe ndi Nṋe. U songo tshenuwa; ngauri Mudzimu wau ndi Nṋe. Ndi ḓo U khwaṱhisa, ndi ḓo U farisa.” (Yesaya 41:10) Muthu ane a ḓivha uri Yehova u na ndavha nae u a vha na mulalo na nungo dza u bvela phanḓa a tshi konḓelela milingo yoṱhe ine a sedzana nayo. Muapostola Paulo u vhidza wonoyo mulalo uri ndi “mulalo wa Mudzimu une wa fhira u ṱalukanya hoṱhe.” O dovha a ri: “Ngauri zwithu zwoṱhe ndi zwi koniswa nga ane a nṋea maanḓa.”—Vhafilipi 4:4-7, 9, 13.

Bivhili i ri thusa uri ri vhe na lutendo lwo khwaṱhaho kha mafulufhedziso e Yehova a a fulufhedzisa vhathu tshifhingani tshiḓaho. Sa tsumbo, Nzumbululo 21:4, 5 i ri vhudza zwine a ḓo zwi ita na uri ndi ngani ri tshi nga fulufhela uri u ḓo zwi ita:

• “U ḓo phumula miṱodzi” maṱoni a vhathu. Yehova u ḓo fhelisa zwithu zwoṱhe zwine zwa ri vhilaedzisa na uri dina, na zwine vhaṅwe vha vhona u nga a si zwa ndeme.

• Khosi Ramaanḓaoṱhe “o dzulaho kha khuluṋoni” ngei ṱaḓulu ene we a sika zwithu zwoṱhe u ḓo shumisa maanḓa awe na vhuhosi hawe u itela u fhelisa tshengelo na uri thusa.

• Mafulufhedziso a Yehova ndi a “fulufhedzeaho a dovha a vha a ngoho.” Yehova o zwi khwaṱhisedza nga dzina ḽawe uri u ḓo ita zwe a zwi fulufhedzisa.

“U ḓo phumula miṱodzi yoṱhe maṱoni avho, lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone. Zwithu zwa kale zwo fhira.” O dzulaho kha khuluṋoni a ri: “Vhonani! Zwoṱhe ndi zwi ita zwiswa.” A dovha a ri: “Ṅwala, ngauri haya maipfi ndi a fulufhedzeaho a dovha a vha a ngoho.”—Nzumbululo 21:4, 5.

Bivhili na tsiko zwi dzumbulula zwine Khotsi ashu wa ṱaḓulu a vha zwone. Samusi tsiko i tshi ni ṱuṱuwedza uri ni vhe khonani ya Mudzimu, Bivhili i ni ramba uri ni ‘sendele tsini ha Mudzimu, na ene u ḓo sendela tsini haṋu.’ (Yakobo 4:8) Mishumo 17:27 i ri: “Samusi e si kule na muṅwe na muṅwe washu.”

Musi ni tshi fhedza tshifhinga u itela u ḓivha Mudzimu ni ḓovha na vhu ngoho ha uri “u a ni ṱhogomela.” (1 Petro 5:7) Ni ḓo vhuyelwa hani nga u fulufhela Yehova?

Ṱhogomelani tsumbo ya Toru wa ngei Dzhapani. O aluswa nga mme wa Mukriste, fhedzi o ḓi dzhenisa kha tshigwada tsha yakuza tsha Japanese Mafia tshi re na dzi khakhathi. O ri, “Ndo vha ndi tshi tenda uri Mudzimu u a mmbenga nahone ndi tshi vhona u nga u lovhelwa nga vhathu vhane nda vha funa ho vha hu u ṱarafelwa zwivhi zwanga.” O dovha a amba uri zwithu zwe zwa vha zwi khou itea, zwo mu ita uri “a si tsha pfela vhuṱungu.” O amba uri, “Musi ndi tshi vhulaya muṅwe muthu we a vha e na bvumo u mphira u itela u ḓiitela dzina, na nṋe ndo ṱoḓa u ḓivhulaya.”

Naho zwo ralo, musi Toru na mufumakadzi wawe Hannah vha tshi thoma u guda Bivhili, Toru o ita  tshanduko khulwane vhukuma vhutshiloni hawe. Hannah o ri, “Ndo vhona mukalaha wanga a tshi ita tshanduko.” Toru o ri: “Zwino ndi a tenda uri hu na Mudzimu ane a vha na ndavha na muṅwe na muṅwe washu. Ha ṱoḓi muthu na muthihi a tshi lovha nahone o ḓiimisela u hangwela vhane vha rembuluwa zwi tshi bva mbiluni. U thetshelesa zwithu zwine ri nga si kone u zwi vhudza muṅwe muthu na zwine hu sa vhe na muthu na muthihi ane a nga kona u zwi pfesesa. Yehova u ḓo fhelisa thaidzo dzoṱhe, tshengelo na vhuṱungu hoṱhe tshifhingani tshiḓaho. Mudzimu u a kona u ri thusa nga nḓila dzi songo lavhelelwaho zwino. U na ndavha na riṋe nahone u ḓo ri thusa musi muya washu u fhasi.”—Psalme ya 136:23.

Samusi tsumbo ya Toru yo zwi sumbedza, u ḓivha uri hu si kale Mudzimu u ḓo fhelisa makhaulambilu oṱhe na u phumula miṱodzi yoṱhe a zwi iti uri ri vhe na fulufhelo nga ha vhu matshelo fhedzi, fhedzi zwi ri thusa uri ri tshile vhutshilo ha khwine zwino. Ndi ngoho uri naho hu na tshengelo nnzhi kha ḽino shango, ni nga vhuyelwa nga nḓila ine Mudzimu a ni funa ngayo.