Mudzimu o vhudza Adamu uri: “Ḓuvha ḽine wa ḓo ḽa wonoyo [muri], U ḓo vha wa u fa.” (Genesi 2:17) O vha a sa ḓo vhudza Adamu zwenezwo arali o mu sikela uri a vhe mulala a fe. Adamu o vha a tshi zwi ḓivha uri a nga si fe arali a thetshelesa Mudzimu.   

Mitshelo yo vha i phamu-phamu tsimuni ya Edeni lwe zwa vha zwi sa ṱoḓei uri Adamu na Eva vha ḽe mitshelo ya wonoyo muri. (Genesi 2:9) Vho vha vha tshi ḓo sumbedza uri vha thetshelesa Mudzimu nga u sa ḽa mitshelo ya wonoyo muri. Zwo vha zwi tshi ḓo dovha zwa sumbedza uri vha tenda u livhiswa nga Mudzimu.

Uri ri pfesese zwo itaho uri Adamu na Eva vha fe, ri fanela u ṱolisisa zwe zwa itea tsimuni ya Edeni ngauri zwi a ri kwama. Sathane Diabolo o amba mazwifhi madala-dala a tshi shumisa ṋowa. Bivhili i ri: “Ṋowa yone nga u thanya yo vha i tshi fhira phukha dzoṱhe dza shango dze Yehova Mudzimu a dzi ita. Ya amba na musadzi ya ri: Nangoho Mudzimu o amba a ri: miri yoṱhe ya tsimuni ni songo i ḽa?”—Genesi 3:1.

Eva o fhindula a ri: “Mitshelo ya miri ya tsimu ri a i ḽa, hone mitshelo ya muri u re vhukati ha tsimu, Mudzimu o ri: Ni songo ḽa wone, ni songo u kwama, uri ni sa ḓo fa.” Ṋowa ya ri: “A ni nga fi. Mudzimu a tshi ralo u ḓivha zwauri musi no ḽa wone, maṱo aṋu a ḓo bonyolowa, na ḓo nga Mudzimu, na ḓo ḓivha vhuḓi na vhuvhi.” Sathane o vha a tshi khou amba uri Yehova u a zwifha nahone u khou dzivhisa Adamu na Eva zwithu zwavhuḓi.—Genesi 3:2-5.

Eva o fhurwa nga murunzi wa ningo. O lavhelesa muri. Wo vha u tshi tamisa, u tshi takadza maṱo! A ka mutshelo wa wonoyo muri a ḽa. Bivhili i ri: “A ṋea na munna wawe, na ene a ḽa.”—Genesi 3:6.

Mudzimu a nga vha o ṱungufhala vhukuma musi a tshi vhona vhana vhawe vha tshi konyolela matanda nḓevheni! O ita mini? Yehova o vhudza Adamu uri: “U . . . ḓo vhuyelela mavuni; ngauri wo bviswa mavuni; U buse; tshau ndi u vhuyelela buseni.” (Genesi 3:17-19) Nga nṱhani ha zwe a zwi ita, “maḓuvha oṱhe a vhutshilo hawe ya vha miṅwaha i na maḓana maṱanu-na-maṋa na mahumi mararu [930], a kona u fa.” (Genesi 5:5) Musi Adamu a tshi fa, ho ngo ya ṱaḓulu kana huṅwe fhethu. Musi Yehova a sa athu mu sika nga buse, o vha e siho huṅwe fhethu. O dovha a vha buse musi a tshi fa. Zwa vha zwo fhela ngae. Ha vha u dzhena ha maḓi bakoni!

Nga nṱhani ha uri Adamu na Eva vho konyolela matanda nḓevheni, a vho ngo tsha vha vhathu vho fhelelaho, vha si tsha vha na fhulufhelo ḽa u tshila tshoṱhe. Vho thoma u ḽa muṱodzi u shamani; ngauri vho vha vha songo tsha fhelela, vhe na tshivhi. Fhedzi u sa pfa havho a zwo ngo ṱunya mavhudzi avho fhedzi. Vho zwi fhirisela na kha vhana vhavho. Vharoma 5:12 i ri: “Ndi ngazwo tshivhi tsho dzhena shangoni nga muthu muthihi [Adamu] nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.”

Bivhili i ri tshivhi na lufu zwi nga “sila ḽo tsiraho tshakha dzoṱhe, na nguvho ye ya fukedza vha-nnḓa vhoṱhe.” (Yesaya 25:7) Ḽeneḽi sila ḽi nga tshithu tsho ri nambetelaho tshine hu si vhe na ane a nga kona u sutuka khatsho. Roṱhe ri a “fa nga mulandu wa Adamu.” (1 Vhakorinta 15:22) U fana na muapostola Paulo, ri nga ḓivhudzisa uri: “Ndi nnyi ane a ḓo mponyokisa kha wonoyu muvhili une wa ita uri ndi fe?” Zwi ḓo konwa nga nnyi?—Vharoma 7:24.