Ro Sikelwa U Tshila Tshoṱhe
ROṰHE ri ṱoḓa u tshila tshoṱhe ro takala, mapfene o tsitsa vhana. Zwo vha zwi tshi nga takadza hani arali ro vha ri tshi tshila tshoṱhe, ro takala hu si na dinani! Ro vha ri tshi ḓo kona u fhedza tshifhinga na vhane ra vha funa, u endela mashango na u guda u ita zwine ra zwi takalela.
Ndi ngani ri tshi ṱoḓa u tshila tshoṱhe? Bivhili i amba uri Mudzimu o zwi vhea mbilu dzashu. (Muhuweleli 3:11) I dovha ya amba uri “Mudzimu ndi lufuno.” (1 Yohane 4:8) Ngauri Mudzimu u a ri funa, a nga si ite uri ri tame u tshila tshoṱhe ngeno zwi sa konadzei.
A hu na ane a ṱoḓa u fa. Ndi ngazwo Bivhili i tshi amba uri lufu ndi “swina.” (1 Vhakorinta 15:26) Vhaṅwe vha fa vha tshee vhaṱuku, ngeno vhaṅwe vha tshi fa vho no vha vhalala. Fhedzi vhuiwa ndi vhuthihi. Musi vhaṅwe vha tshi humbula nga ha lufu vha dzhenwa nga nyofho. Naa zwi nga konadzea uri lufu lu fheliswe?
HU NA FHULUFHELO
Khamusi zwi nga ni mangadza uri Mudzimu ho ngo sika vhathu uri vha fe. Bugu ya Genesi i ri ṋea vhuṱanzi ha uri Mudzimu u ṱoḓa vhathu vha tshi tshila tshoṱhe kha ḽifhasi. Yehova Mudzimu o sika ḽifhasi ḽi na zwithu zwoṱhe zwine vhathu vha zwi ṱoḓa uri vha tshile tshoṱhe, vho takala. A kona u sika Adamu muthu wa u thoma, a mu vhea tsimuni ya Edeni, hune ha vha paradiso. Nga murahu ha zwenezwo, “Mudzimu a lavhelesa zwoṱhe zwe a ita a wana zwo naka nga ngoho.”—Genesi 1:26, 31.
Mudzimu o sika Adamu o fhelela. (Doiteronomio 32:4) Na Eva mufumakadzi wa Adamu o sikwa o fhelela. Yehova o vha vhudza uri: “Bebani ni ande ni ḓadze shango, ni ḽi kunde, ni vhuse dzikhovhe dza lwanzhe na zwiṋoni zwa ṱaḓulu na dzoṱhe dziphukha dzi tshatshamaho kha ḽifhasi.”—Genesi 1:28.
Zwo vha zwi tshi ḓo dzhia tshifhinga tshilapfu uri Adamu na Eva vha ḓadze shango. Eva o vha a tshi ḓo beba vhana, na vhenevho vhana vha beba-vho u swika ḽifhasi ḽi tshi ḓala sa zwe Mudzimu a vha a tshi ṱoḓa. (Yesaya 45:18) A zwi pfali uri Yehova a vhudze Adamu na Eva uri vha ḓadze shango, ngeno vha tshi ḓo kona u vhona vhana vhavho, khamusi na vhaḓuhulu vhavho fhedzi nahone vha sa vhone shango ḽi tshi ḓala.
Zwiṅwe hafhu, vho vhudzwa uri vha vhuse zwipuka. Adamu o vhudzwa uri a ire zwipuka madzina, zwenezwo zwo vha zwi tshi ḓo dzhia tshifhinga tshilapfu. (Genesi 2:19) Fhedzi o vha a tshi tea u guda nga hazwo o tou fombe na u ḓivha nḓila ine a tea u zwi ṱhogomela ngayo uri a kone u zwi vhusa. Zwenezwi zwo vha zwi tshi ḓo dzhia miṅwaha minzhisa.
Zwenezwi zwi sumbedza uri Adamu na Eva vho vha vho sikelwa u tshila tshoṱhe ngauri Mudzimu o vha vhudza uri vha ḓadze ḽifhasi na u vhusa zwipuka. Ndi ngazwo Adamu o tshila miṅwaha minzhi.
MUDZIMU U ṰOḒA URI VHATHU VHA TSHILE TSHOṰHE PARADISONI KHA ḼIFHASI
VHO TSHILA MIṄWAHA MINZHI
Adamu o tshila miṅwaha ya 930
Methusala o tshila miṅwaha ya 969
Noaxe o tshila miṅwaha ya 950
Ṋamusi ri tshila miṅwaha ya 70-80
Bivhili i amba uri vhathu vha tshifhingani tsha kale vho tshila miṅwaha minzhi u ri fhira. I ri: “Maḓuvha oṱhe a vhutshilo hawe [Adamu] ya vha miṅwaha i na maḓana maṱanu-na-maṋa na mahumi mararu [930].” I dovha ya amba nga ha vhanna vha rathi vho tshilaho miṅwaha i fhiraho 900! Vhenevho ndi Sethe, Enosi, Kenani, Yarede, Methusala na Noaxe. Vhoṱhe vho tshila Maḓi Mahulu a sa athu ḓa nahone nga tshenetsho tshifhinga, Noaxe o vha o no vha na miṅwaha ya 600. (Genesi 5:5-27; 7:6; 9:29) Zwo ḓa hani uri vha tshile miṅwaha minzhi nga u rali?
Vhenevho vhanna vho tshila tshifhingani tsha musi Adamu na Eva vha tshi kha ḓi bva u xelelwa nga vhutshilo ho fhelelaho. Khamusi ndi ngazwo vho lalama. Fhedzi u fhelela zwi tshimbidzana hani na u tshila tshifhinga tshilapfu? Lufu lu ḓo fheliswa hani? Uri ri kone u wana phindulo dza dzenedzi mbudziso, ri fanela u thoma ra pfesesa uri ndi ngani ri tshi vha vhalala ra fa.