NAHO u konyolela matansda nḓevheni ha Adamu na Eva ho ḓisela vhathu vhoṱhe lufu, a zwo ngo shandula zwine Mudzimu a ṱoḓa u zwi itela vhathu. Mudzimu o amba lunzhi-lunzhi Ipfini ḽawe ḽine ḽa vha Bivhili uri zwine a ṱoḓa u zwi ita zwi kha ḓi vha zwenezwiḽa, a zwo ngo shanduka.

• “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo lini na lini.”—Psalme ya 37:29.

• “Lufu u ḓo lu lozwa tshoṱhe; Muṋe wa vhoṱhe Yehova u ḓo fhuluṱa maṱodzi kha zwoṱhe zwifhaṱuwo.”—Yesaya 25:8.

• “Lufu ndi swina ḽa u fhedza ḽine a ḓo ḽi fhelisa.”—1 Vhakorinta 15:26.

• “Lufu a lu tsha ḓo vha hone, na u ṱungufhala na u lila na vhuṱungu a zwi tsha ḓo vha hone.”—Nzumbululo 21:4.

Mudzimu u ḓo “lozwa” hani lufu kana u lu fhelisa? Samusi ro zwi vhona, Bivhili i ri “vhavhuya” vha ḓo tshila “lini na lini.” Fhedzi i dovha ya amba uri “fhano shangoni a hu na muthu muvhuya, ane a ḓi ita zwavhuḓi a si vhuye a tshinya.” (Muhuweleli 7:20) Naa zwenezwi zwi amba uri Mudzimu u ḓo ita zwi songo ṅwaliwaho Bivhilini nga u tendela vhathu uri vha tshile tshoṱhe naho vha sa tevhedzi milayo yawe? A nga si vhuye a ita nga u ralo ngauri ndi “Mudzimu a sa zwifhi.” (Tito 1:2) Mudzimu u ḓo ita hani zwe a fhulufhedzisa vhathu?

Yehova Mudzimu o ita ndugiselelo dza u rengulula vhathu kha lufu a tshi shumisa tshirengululi. Tshirengululi ndi tshithu tshine tsha bviswa musi hu tshi lifhiwa tshinyalelo. Tshi fanela u vha tshi tshi lingana na zwe zwa tshinywa uri tshi kone u badela zwine zwa ṱoḓea. Samusi roṱhe ri vhaitazwivhi, ri a zhakiwa nga lufu, ndi ngazwo Bivhili i tshi ri: “Huufha mukomana a sa koni u tshidza murathu, hu si na muthu ane a pfumedzanya muthu muṅwe na Mudzimu! A huna tshipfumelelo tsho eḓanaho u rengulula” vhutshilo hawe, “ndi zwine a zwi litsha tshoṱhe.”—Psalme ya 49:7, 8.

Samusi ri songo fhelela, musi ri tshi fa, ri lifha milandu ya zwivhi zwashu fhedzi. A ri koni u ḓirengulula kana u lifha milandu ya zwivhi zwa vhaṅwe. (Vharoma 6:7) Ndi ngazwo ho vha hu tshi ṱoḓea muthu o fhelelaho a si na tshivhi uri a ri rengulule nga vhutshilo hawe a tshi itela zwivhi zwashu, hu si zwawe.—Vhaheberu 10:1-4.

Ndi zwe Mudzimu a ita. O rumela murwa wawe Yesu Kristo kha ḽifhasi we a vha o fhelela, e si na tshivhi. (1 Petro 2:22) Yesu o amba uri o ḓa u “ṋekedza vhutshilo hawe uri vhu vhe tshirengululi a tshi itela vhanzhi.” (Marko 10:45) O fa uri a fhelise lufu uri riṋe ri kone u tshila.—Yohane 3:16.

Ṋamusi ri khou vhona mboni nahone zwenezwi zwi sumbedza uri ri khou tshila “maḓuvhani a vhufhelo” ane a vha “zwifhinga zwi lemelaho zwi konḓaho u sedzana nazwo,” sa zwe Bivhili ya amba. (2 Timotheo 3:1) Maḓuvha a vhufhelo a ḓo guma nga “ḓuvha ḽa khaṱulo na u lozwiwa ha vhathu vha sa ofhi Mudzimu.” (2 Petro 3:3, 7) Fhedzi vhathu vha funaho Mudzimu vha ḓo ponyoka vha fhaṱutshedzwa nga “vhutshilo vhu sa fheli.”—Mateo 25:46.

Vhanzhi vha ḓo vha na tshibuli tsha u wana vhutshilo vhu sa fheli musi vha tshi vuswa. Musi Yesu e muḓini wa Naini, o “pfela vhuṱungu” tshilikadzi  ye ya vha yo lovhelwa nga ṅwana wayo muthihi nahone a mu vusa. (Luka 7:11-15) Muapostola Paulo o ṅwala u ri: “Fulufhelo ḽine nda vha naḽo kha Mudzimu . . . ndi ḽa uri hu ḓo vha na mvuwo ya vho lugaho na vha songo lugaho.” Ḽeneḽi fhulufhelo ḽi sumbedza uri Mudzimu u a ri funa.—Mishumo 24:15.

Vhathu vha dzibilioni vha nga lavhelela u tshila tshoṱhe. Bivhili i ri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo lini na lini.” (Psalme ya 37:29) Nga tshenetsho tshifhinga, vha ḓo vhona nga maṱo zwi rudzaho mbilu zwe zwa ṅwaliwa nga muapostola Paulo miṅwahani i ṱoḓaho u vha 2 000 yo fhiraho, a tshi ri: “Lufu, gundo ḽau ḽi ngafhi? Lufu, luvholela lwau lu ngafhi?” (1 Vhakorinta 15:55) Lufu lune lwa vha thaidzo khulwane lu ḓo vha lwo fheliswa!