Zwi A Konadzea U Tshila Ro Takala Zwino
ḼI ḒO ḓa ḓuvha ḽine na sa tsha ḓo lwala, u vha mulala kana u fa. Fhedzi zwino ho ḓala zwililo na u shenganya maṋo. Naa hu na zwine zwa nga ni thusa? Bivhili i nga ni thusa uri ni fushee na u tshila no takala zwino. Kha ri haseledze nga ha dziṅwe thaidzo dzine ra vha nadzo na nḓila ine Bivhili ya nga ri thusa ngayo.
U FUSHEA
Bivhili i ri: “Nḓila ine na tshila ngayo i songo vha ya u funa tshelede, ni fushee nga zwine zwa vha hone.”—Vhaheberu 13:5.
Ṋamusi vharengisi vha dzula vha tshi ri ṱuṱuwedza uri ri renge tshino na tshiḽa. Fhedzi Bivhili i ri vhudza uri ri nga ‘fushea nga zwine zwa vha hone.’ Ri nga fushea hani?
Ni songo “funesa tshelede.” Nga nṱhani ha u “funesa tshelede,” vhathu vha nga ita zwiṅwe na zwiṅwe naho zwi tshi nga tshinya mutakalo wavho, muṱa wavho, vhukonani na nḓila ine vha tshila ngayo. (1 Timotheo 6:10) Zwenezwi a zwi vhuyedzi nga tshithu ngauri ane a funesa tshelede ha “furi” kana ha fushei ngayo.—Muhuweleli 5:9.
Vhathu ndi mapfura vha a ḓoliwa. Thundu dzine ra vha nadzo dzi nga ri thusa, fhedzi dzi nga si kone u ri funa kana u ri dzhiela nṱha. Ndi vhathu fhedzi vhane vha nga kona u ita zwenezwo. U vha na “khonani” zwi ri thusa uri ri fushee vhutshiloni.—Mirero 17:17.
U TEVHEDZA VHULIVHISI VHU RE BIVHILINI, ZWI NGA ITA URI RI TAKALE ZWINO
U KONḒELELA NI TSHI KHOU LWALA
Bivhili i ri: “Mbilu yo takala, ndi dzilafho ḽone-ḽone.”—Mirero 17:22.
U takala zwi nga ita uri ri kone u konḓelela ri tshi khou lwala, zwi tou nga “dzilafho ḽone-ḽone.” Fhedzi ri nga takala hani ri tshi khou lwala?
Livhuwani. Arali ra dzula ri tshi humbula nga thaidzo dzashu, zwi ḓo ita uri ‘maḓuvha ashu oṱhe’ a nge ndi mavhi. (Mirero 15:15) Bivhili i ri: “Ni vhe vhane vha livhuha.” (Vhakolosa 3:15) Sumbedzani uri ni livhuwa zwithu zwoṱhe naho zwi zwiṱuku. Musi ri tshi vhona tsiko na vhane ra vha funa vha tshi khou ṅwethuwa, zwi nga ita uri ri takale.
Thusani vhaṅwe. “U ṋea zwi ḓisa dakalo ḽihulu u fhira u ṋewa” naho ri na mutakalo u si wavhuḓi. (Mishumo 20:35) Musi vhaṅwe vha tshi livhuwa zwine ra vha itela zwone, zwi ita uri ri takale nahone a ri humbulesi nga ha thaidzo dzashu. Musi ri tshi thusa vhaṅwe, zwi ita uri ri takale.
U KHWAṰHISA MBINGANO YAṊU
Bivhili i ri: “Ni ṱhogomele zwithu zwa ndeme vhukuma.”—Vhafilipi 1:10.
Vhavhingani vha sa fhedziho tshifhinga vhoṱhe vha nga tshinya mbingano yavho. Munna na mufumakadzi vha fanela u dzhia mbingano yavho i ya ndeme.
Itani mutingati. Zwi nga vha zwavhuḓi uri ni ite zwithu noṱhe. Bivhili i ri: “Khwine ndi misi vhe vhavhili, e si muthihi.” (Muhuweleli 4:9) Ni nga bika noṱhe, u ita nyonyoloso, u fhedza tshifhinga noṱhe, u ḓibvisa na u ita zwoṱhe zwine na zwi takalela.
Sumbedzani uri ni funa mufarisi waṋu. Bivhili i ṱuṱuwedza munna na mufumakadzi uri vha funane na u ṱhonifhana. (Vhaefesa 5:28, 33) U ṅwethuwa, u ita zwithu zwine zwa sumbedza uri ni a funana kana u rengelana zwifhiwa, zwi nga ita uri ni takale mbinganoni. Muthu u fanela u ita zwa vhudzekani na we a vhingana nae fhedzi.—Vhaheberu 13:4.
You May Also Like
NI NGA VHA NA DAKALO MUṰANI
Ḓitikeni Nga Mudzimu Uri Ni Vhe Na Dakalo Mbinganoni
U shumisa mbudziso mbili dzi leluwaho zwi nga ni thusa uri ni khwinise mbingano yaṋu.
