Mudzimu ha ṱaluli nahone u ṱoḓa u fhaṱutshedza vhathu vhoṱhe.

Mudzimu o fhulufhedzisa muporofita Abrahamu a ri: “Miṱa yoṱhe ya kha ḽifhasi i ḓo fhaṱutshedzwa nga nṱhani hau.”—Genesi 12:3.

Ri guda mini? Mudzimu u a ri funa nahone u ṱoḓa u fhaṱutshedza vhathu vhoṱhe vhane vha mu thetshelesa, hu sa londwi uri ndi vhanna, vhafumakadzi kana vhana.

Mudzimu u a khathutshela nahone u fhaṱutshedza vhane vha ṱoḓa u mu ḓivha.

Mudzimu o ṋea muporofita Mushe maanḓa a u ita vhuṱolo. Naho zwo ralo, Mushe o rabela a ri: “Ndi humbela uri u ite uri ndi ḓivhe nḓila dzau, uri ndi u ḓivhe u bvele phanḓa u tshi ntakalela.” (Ekisoda 33:13) Mudzimu o takalela zwe Mushe a zwi humbela nahone a mu fhaṱutshedza nga u mu fha nḓivho na u mu thusa uri a pfesese nḓila ine a vha ngayo na nḓila ine a ita ngayo zwithu. Sa tsumbo, Mushe o guda uri Musiki washu ndi “Mudzimu wa u khathutshela na u pfela vhuṱungu.”—Ekisoda 34:6, 7.

Ri guda mini? Mudzimu u ṱoḓa u fhaṱutshedza roṱhe, vhanna, vhafumakadzi na vhana vhane vha ita vhuḓidini ha u mu ḓivha khwine. Kha Maṅwalo Makhethwa, Mudzimu o ri sumbedza nḓila ine ra nga mu gwadamela ngayo na uri u ṱoḓa u ri fhaṱutshedza.

 Arali ra guda nga ha Yesu na zwe a zwi ita na u zwi amba, Mudzimu a nga ri fhaṱutshedza u ya nga hu sa fheli.

Ri nga guda zwithu zwinzhi nga ha Yesu na zwe a zwi funza kha Maṅwalo Makhethwa. Mudzimu o ṋea Yesu maanḓa a u ita vhuṱolo vhunzhi, o fhodza vha sa koni u vhona, vha sa koni u pfa na vho holefhalaho. O ita na u vusa vho faho. Yesu o vha a tshi khou sumbedza nḓila ine Mudzimu a ḓo fhaṱutshedza ngayo vhathu vhoṱhe tshifhingani tshi ḓaho. O amba uri ri tea u ita mini uri ri wane dzenedzo phaṱhutshedzo. O ri: “Vha ḓo wana vhutshilo vhu sa fheli, arali vha ḓivha iwe Mudzimu wa ngoho u woṱhe na u ḓivha Yesu Kristo we wa mu ruma.”—Yohane 17:3.

Yesu o vha e na vhuthu nahone a tshi pfela vhuṱungu. Vhathu vhanzhi, vhanna, vhafumakadzi na vhana vho ya khae musi a tshi vha ramba a ri: “[Gudani] kha nṋe, ngauri ndo vuḓa. Ndi a ḓiṱukufhadza mbiluni, ndi hone ni tshi ḓo homoloswa.” (Mateo 11:29) Yesu o vha o fhambana na vhaṅwe vha tshenetsho tshifhinga vhe vha vha vha tshi tambudza vhafumakadzi ngauri o sumbedza vhafumakadzi vhuthu na u vha ṱhonifha.

Ri guda mini? Yesu o vha a tshi funa vhathu nahone o ri sumbedza nḓila ine ra tea u farana ngayo.

Maṅwalo Makhethwa a amba uri “riṋe ri na Mudzimu muthihi fhedzi” na uri Yesu Kristo o vha o tou rumiwa nga Mudzimu. (1 Vhakorinta 8:6) Yesu ene muṋe o amba uri Mudzimu ndi muhulwane khae na uri o mu ruma uri a ḓe kha ḽifhasi.—Yohane 11:41, 42; 14:28. *