Vhathu vhanzhi vha humbula uri vhathu vho funzeaho na vho pfumaho vha vha na vhumatshelo havhuḓi. Vha tenda uri dzikhampani, miṱa na tshitshavha zwi nga vhuyelwa arali vhathu vha wana pfunzo ya yunivesithi. Vha nga dovha vha vhona u nga pfunzo ya nṱha i ḓo ita uri vha wane mushumo u holelaho tshelede nnzhi na uri vhane vha vha na tshelede nnzhi vha ḓo takala.

Kha ri vhone zwe Zhang Chen wa China a zwi amba. U ri: “Ndo vha ndi tshi tenda uri ndi tea u vha na digirii ya yunivesithi uri ndi bve vhusiwanani na uri mushumo une wa holela tshelede nnzhi u ḓo ita uri ndi takale na u vha na vhutshilo vhu fushaho.”

Vhathu vhanzhi vha ṱoḓa u dzhena yunivesithi dza vhuimo ha nṱha, khamusi dzi re kha maṅwe mashango uri vha kone u tshila khwine. Zwenezwi zwo vha zwo ḓowelea u swika musi COVID-19 i tshi ita uri vhathu vha si tsha kona u dalela maṅwe mashango. Miṅwaha i ṱoḓaho u vha 10 yo fhiraho, ḽiṅwe dzangano ḽo ita ṱhoḓisiso ḽa wana uri kha matshudeni oṱhe ane a dzhena yunivesithi kha maṅwe mashango, vha fhiraho hafu vha vha vha tshi khou bva Asia.

Kanzhi vhabebi vha shuma nga maanḓa uri vha kone u isa vhana vhavho kha yunivesithi dzi re kha maṅwe mashango. Qixiang wa Taiwan u ri: “Vhabebi vhanga vho vha vha songo pfuma, fhedzi vho ri isa khoḽidzhini Amerika roṱhe vhuṋa hashu.” U fana na miṅwe miṱa, wonoyu muṱa wo phirimela zwikolodoni uri u badelele yeneyi pfunzo.

Naho pfunzo ya nṱha i tshi nga khwinisa vhutshilo, vhagudiswa vho wana uri a i dzuleli u vha ḓisela zwe vha vha vho zwi lavhelela. Sa tsumbo, vhathu vhanzhi a vha wani mushumo we vha vha vha tshi khou u ṱoḓa naho vho fhedza miṅwaha minzhi-minzhi vha tshi khou shuma vhukuma tshikoloni, vho koloda na tshelede i si na vhukono ya u badelela tshenetsho tshikolo. Rachel Mui o vhiga zwi tevhelaho kha Business Times ya Singapore. O ri: “Vhathu vho ṱhaphudzaho yunivesithi vhane vha sa khou wana mushumo, vha khou ḓi engedzea vha tshi ya.” Jianjie wa Taiwan, a re na digirii dzo vhalaho dza yunivesithi u ri: “Vhanzhi vha shuma mushumo u sa tshimbidzani na zwe vha zwi gudela ngauri a hu na zwine vha nga ita.”

Vhane vha wana mushumo u tshimbidzanaho na zwe vha zwi gudela, vha nga wana uri vhutshilo a vhu vhi nga nḓila ye vha vhu lavhelela ngayo. Musi Niran wa ngei Thailand a tshi fhedza yunivesithi ngei United Kingdom, o wana mushumo u tshimbidzanaho na zwe a zwi gudela. U ri: “Yeneyo digirii yo ita uri ndi wane mushumo u holelaho tshelede nnzhi sa zwe nda vha ndo zwi lavhelela. Fhedzi wonoyo mushumo wo vha u tshi ṱoḓa uri ndi shume nga maanḓa na u fhedza tshifhinga tshinzhi ndi tshi khou shuma. Nga u ya ha tshifhinga, nṋe na vhaṅwe vhashumi ro mbo ḓi pandelwa kha yeneyo khamphani. Nda zwi ṱhogomela uri a hu na mushumo une wa nga ita uri u vhe na vhumatshelo havhuḓi.”

Na vhathu vha re na tshelede nnzhi na vhane zwa vhonala u nga vha khou tshila zwavhuḓi, vha ḓi vha na dzithaidzo muṱani, vha a lwala nahone vha a vhilaela nga ha tshelede. Katsutoshi wa Dzhapani u ri: “Ndo vha ndi na tshelede nnzhi, fhedzi ndo vha ndi songo takala ngauri vhaṅwe vho vha vha tshi nnyitela vivho nahone vhaṅwe vha tshi mpfara nga nḓila i si yavhuḓi.” Lam wa Vietnam u ri: “Vhathu vhanzhi vha lingedza u vha na tshelede nnzhi-nnzhi ngauri vha vhona u nga i ḓo ita uri vha tshile vhutshilo havhuḓi, fhedzi ngoho ndi ya uri i ita uri vha vhilaele nga ho engedzeaho, vha lwale na u tsikeledzea.”

Vhathu vhanzhi u fana na Franklin, vho zwi vhona uri hu na zwithu zwa ndeme vhutshiloni zwi fhiraho u wana pfunzo ya nṱha na lupfumo. Vhaṅwe vha vhenevha vhathu vha lingedza u vha vhathu vhavhuḓi na u itela vhaṅwe zwithu zwavhuḓi, vha tshi vhona u nga zwenezwi zwi ḓo ita uri vha vhe na vhumatshelo havhuḓi. Naa u ita zwenezwo zwi ḓo ita uri vha vhe na vhumatshelo havhuḓi? Thero i tevhelaho i ḓo fhindula yeneyo mbudziso.