Nga 1949, khotsi anga vho pfulutshela Australia vha tshi bva Dzheremane. Vho vha vha tshi khou ṱoḓa mushumo mainini na hune ha itwa hone muḓagasi nahone vha dzula mahayani a ngei Victoria. Musi vhe henefho, vho vhinga nahone nda bebwa nga 1953.

Nga murahu ha miṅwaha i si gathi, mme anga vho thoma u guda Bivhili na Ṱhanzi dza Yehova, nga zwenezwo, ndo thoma u ḓivha nga ha Bivhili ndi tshee muṱuku. Fhedzi khotsi anga vho vha vha sa ṱoḓi u pfa tshithu nga ha vhurereli naho vhu vhufhio. Mme anga vho vha vha tshi vha ofha ngauri vho vha vha tshi vusa dzikhakhathi nahone vha tshi vha shushedza. Mme anga vho bvela phanḓa vha tshi guda Bivhili tshiphirini nahone vha thoma u funa zwe vha vha vha tshi khou zwi guda. Musi khotsi anga vhe siho, mme anga vho vha vha tshi gudisa nṋe na khaladzi anga zwe vha zwi guda. Vho ri gudisa nga ha paradiso ine ya ḓo vha kha ḽifhasi tshifhingani tshi ḓaho na nḓila ine ra nga takala ngayo arali ra tevhedza zwine Bivhili ya zwi funza.—Psalme ya 37:10, 29; Yesaya 48:17.

Musi ndi na miṅwaha ya 18, ndo shavha hayani nga nṱhani ha uri khotsi anga vho vha vha tshi vusa dzikhakhathi. Naho ndo vha ndi tshi tenda uri zwe mme anga vha mpfunza zwo vha zwi tshi bva Bivhilini, a tho ngo zwi dzhia zwi zwa ndeme. Nga zwenezwo, a tho ngo zwi tevhedza. Ndo thoma u shuma mainini wa malasha hune ha itwa muḓagasi. Ndo vhinga ndi na miṅwaha ya 20. Nga murahu ha miṅwaha miraru, ro vha na ṅwana wa tanzhe wa musidzana nahone zwo ita uri ndi ḓivhudzise uri ndi mini zwine zwa vha zwa ndeme vhutshiloni hanga. Ndo thoma u guda Bivhili na Ṱhanzi ya Yehova ngauri ndo vha ndi tshi ḓivha uri Bivhili i nga thusa muṱa wanga. Fhedzi mufumakadzi wanga o vha a sa funi Ṱhanzi dza Yehova. Musi ndi tshi thoma u ya miṱanganoni ya Ṱhanzi dza Yehova, o mbudza uri ndi fanela u litsha u guda Bivhili kana ndi bve ndi fhele. Nga nṱhani ha uri ndo vha ndo kulea nungo, ndo mbo ḓi tenda nahone nda litsha u guda na Ṱhanzi dza Yehova. Nga murahu, ndo ḓisola ngauri a tho ngo kona u ita zwo lugaho.

Ḽiṅwe ḓuvha, muthu we nda vha ndi tshi shuma nae o ntsumbedza zwifanyiso zwa vhudzekani. Zwo vha zwi tshi kunga na u ṋengisa nahone zwo ita uri ndi ḓipfe ndi na mulandu. Musi ndi tshi humbula zwe nda zwi guda Bivhilini, ndo vha ndi tshi zwi ḓivha uri Mudzimu ha zwi funi. Fhedzi musi ndi tshi bvela phanḓa na u ṱalela zwifanyiso zwa vhudzekani, ndo thoma u zwi takalela. Nga u ya ha tshifhinga, ndo thoma u vha na dzema ḽa u ṱalela zwenezwo zwifanyiso.

Nga murahu ha miṅwaha ya 20, ndo vha ndi si tsha tshila u tendelana na zwe mme anga vha mpfunza zwone. Nḓila ye nda vha ndi tshi ḓifara  ngayo yo vha i tshi sumbedza zwe zwa vha zwi muhumbuloni wanga. Ndo vha ndi tshi semana nahone ndi na miswaswo yo bvaho. Ndo thoma u vha na mahumbulele a songo teaho nga ha vhudzekani. Naho ndo vha ndi tshi kha ḓi dzula na mufumakadzi wanga, ndo vha ndi tshi funana na vhaṅwe vhafumakadzi. Ḽiṅwe ḓuvha ndo ḓisedza kha tshivhoni nahone nda ri: ‘A thi u funi.’ Ndo vha ndi tshi ḓiṋengwa.

Mbingano yanga yo pwashea nahone mufumakadzi wanga o vha o vhaisala vhukuma. Nga zwenezwo, ndo rabela Yehova Mudzimu zwi tshi bva mbiluni. Ndo dovha nda guda Bivhili naho ho fhela miṅwaha ya 20 ndi sa i gudi. Nga tshenetsho tshifhinga, khotsi anga vho vha vho no lovha nahone mme anga vho vha vho no vha Ṱhanzi ya Yehova.

Nḓila ye nda vha ndi tshi tshila ngayo yo vha yo fhambana vhukuma na zwine Bivhili ya zwi funza. Fhedzi ndo vha ndo ḓiimisela u ita uri ndi vhe na mulalo wa muhumbulo une ha ambiwa nga hawo Bivhilini. Ndo thoma u litsha nḓila ye nda vha ndi tshi amba ngayo nahone nda langa mbiti dzanga. Ndo dovha nda dzhia tsheo ya u litsha vhuḓifari hanga vhu si havhuḓi, u gembula, u nwesa na u tswela mutholi wanga.

Vhe nda vha ndi tshi shuma navho vho vha vha sa pfesesei uri ndi ngani ndo vha ndi tshi ṱoḓa u ita dzenedzo tshanduko khulwane. Lwa miṅwaha miraru, vho vha vha tshi dzulela u nṱuṱuwedza uri ndi humele kha matshilele anga a kale. Arali nda sinyuwa kana nda semana, vho vha vha tshi takala nahone vha ri: “Khezwo! Hoyu ndi ene Joe ane ra mu ḓivha.” Eneo maipfi o vha a tshi nṱhavha vhukuma! Kanzhi ndo vha ndi tshi kulea nungo.

He nda vha ndi tshi shuma hone ho vha ho ḓala zwifanyiso zwa vhudzekani kha khomphuyutha, dzifounu na zwo phirinthiwaho. Vhathu vhe nda vha ndi tshi shuma navho vho vha vha tshi rumelana zwifanyiso zwi songo kunaho nga khomphyutha, samusi na nṋe ndo vha ndi tshi ita nga u ralo tshifhingani tsho fhiraho. Ndo vha ndi tshi khou lingedza u litsha dzema ḽanga, fhedzi vho vha vho ḓiimisela u nthivhela uri ndi si ḽi kunde. Ndo humbela nyeletshedzo kha muthu we a vha a tshi khou ngudisa Bivhili. O nthetshelesa a sa fheli mbilu musi ndi tshi mu tevhulela zwa mbiluni yanga. A tshi shumisa Bivhili, o ntsumbedza nḓila ine nda nga kunda ngayo dzema ḽanga nahone a nṱuṱuwedza uri ndi dzule ndi tshi humbela Yehova nga thabelo tshifhinga tshoṱhe uri a nthuse.—Psalme ya 119:37.

Ḽiṅwe ḓuvha ndo kuvhanganya vhathu vhe nda vha ndi tshi shuma navho. Musi vho no kuvhangana, ndo vha vhudza uri vha ṋee vhanna vhavhili halwa vhe vha vha vhe na thaidzo ya u nwesa. Vhenevho vhathu vha hana nahone vha ri: “Ni songo vhuya na ita hezwo! Havha vhanna vha khou lwisana na dzema ḽa u nwesa!” Ndo fhindula nda ri: “Ni khou amba ngoho, na nṋe ndi fana navho.” U bva ḽeneḽo ḓuvha, vhenevho vhathu vho ṱhogomela uri ndi khou lwisana na dzema ḽa u ṱalela zwifanyiso zwa vhudzekani nahone vha si tsha nkombetshedza uri ndi humele kha matshilele anga a kale.

Nga u ya ha tshifhinga, ndo kona u kunda dzema ḽa u ṱalela zwifanyiso zwa vhudzekani ndi tshi thuswa nga Yehova. Nga 1999, ndo lovhedzwa nahone nda vha Ṱhanzi ya Yehova. Ndi a livhuha uri ndo ṋewa tshibuli tsha u dovha nda tshila vhutshilo ho kunaho na vhu takadzaho.

Zwino ndi vho pfesesa uri ndi ngani Yehova a tshi vhenga zwithu zwe nda vha ndi tshi zwi funa u bva kale. U fana na Khotsi, Yehova o vha a tshi ṱoḓa u ntsireledza kha khombo ine ya vhangwa nga u ṱalela zwifanyiso zwa vhudzekani. Maipfi a re kha Mirero 3:5, 6 ndi a ngoho! Eneo maipfi a ri: “Fulufhedza Mudzimu nga mbilu yau yoṱhe; U songo ḓi-tika nga u ri: Ndi a ṱalukanya. Dzinḓilani dzau dzoṱhe ḓivha Ene, u ḓo U lugisela hune wa tshimbila.” Milayo i bvaho Bivhilini a i sokou vha tsireledzo, fhedzi i a shuma.—Psalme ya 1:1-3.

Tshifhingani tsho fhiraho, ndo vha ndi tshi ḓiṋengwa, fhedzi zwino ndi a ḓiṱhonifha nahone ndi na mulalo. Ndi ḓifara nga nḓila yo kunaho nahone ndi a kona u vhona thikhedzo ya Yehova na uri o nkhangwela. Nga 2000, ndo vhinga Karolin, mufumakadzi ane a funa Yehova u fana na nṋe. Muḓini washu hu na mulalo. Ri pfa hu ndugelo khulwane u vha tshipiḓa tsha Vhakriste vho kunaho na vha re na lufuno u mona na shango ḽoṱhe.