BIVHILI i tshee hone. Nga zwenezwo, ni nga kona u i renga na u i vhala ṋamusi. Nahone musi ni tshi khetha Bivhili yo ṱalutshedzelwaho zwavhuḓi, ni nga vha na vhungoho ha uri ni khou vhala Bivhili i fanaho na ya u thoma. * Fhedzi ndi ngani Bivhili yo kona u ponyoka u tshinyadzwa nga mupo, vhathu vhe vha vha vha tshi lwisana nayo na vhathu vhe vha vha vha tshi ṱoḓa u shandula mulaedza wayo? Ndi mini zwo khetheaho vhukuma nga ha yeneyi bugu?

Vhagudi vhanzhi vha Bivhili vho phetha nga nḓila i fanaho na ya muapostola Paulo we a ṅwala uri: “Maṅwalo oṱhe o hevhedzwa nga Mudzimu.” (2 Timotheo 3:16) Vha tenda uri Bivhili a yo ngo kona u fheliswa ngauri ndi Ipfi ḽa Mudzimu ḽo khetheaho na uri Mudzimu o i tsireledza u swika zwino. Faizal we a bulwa mathomoni a ino thero, mafheleloni o dzhia phetho ya u sengulusa zwenezwo nga u guda Bivhili. Zwe a zwi tumbula zwo mu mangadza. O guda uri Bivhili a i na pfunzo nnzhi dzine dza gudiswa dzikerekeni. Zwiṅwe hafhu, o kwamea vhukuma nga zwine Mudzimu a ḓo zwi ita kha ḽifhasi samusi zwi tshi sumbedzwa Bivhilini.

Faizal o ri: “Zwino ndi na vhungoho ha uri Bivhili ine nda vha nayo ndi tshifhiwa tshi bvaho ha Mudzimu. Naho zwo ralo, arali Mudzimu a tshi kona u sika fhethu hoṱhe, naa a nga kundelwa u vha na maanḓa a u ri ṋea bugu na u ri vhulungela yone? U hanedza zwenezwo zwi nga vha zwi u nyadza maanḓa a Mudzimu Ramaanḓaoṱhe! Nahone ndi nṋe nnyi ane nda nga nyadza maanḓa a Mudzimu.”—Yesaya 40:8.