DOREEN o vha o tshuwa musi munna wawe Wesley ane a vha na miṅwaha ya 54 a tshi bva bundu ḽa khentsara kha vhuluvhi. * Madokotela o mu vhudza uri o salelwa nga miṅwedzi i si gathi ya u tshila. Doreen o ri: “Ndo vha ndi sa kholwi zwe nda vha ndi tshi khou zwi pfa. Ndo vha ndo tsikeledzea vhukuma lwa dzivhege. Ndo vha ndi tshi vhona u nga zwi khou itea kha muṅwe muthu, hu si kha riṋe. Ndo vha ndi songo zwi lavhelela.”

Zwi ṱungufhadzaho ndi uri, nḓila ye Doreen a ḓipfa ngayo yo ḓowelea. Vhulwadze vhu sa lafhei vhu nga fara muṅwe na muṅwe nga tshifhinga tshiṅwe na tshiṅwe. Zwi a khoḓea uri vhanzhi vho ḓiimisela u ṱhogomela vhathu vhane vha vha funa vho farwaho nga vhulwadze vhu sa lafhei. Naho zwo ralo, a zwo ngo leluwa u ṱhogomela muthu ane a khou lwala. Miraḓo ya muṱa i nga khuthadza na u ṱhogomela hani muthu o farwaho nga vhulwadze vhu sa lafhei? Vhaṱhogomeli vha nga sedzana hani na vhuṱungu vhune vha nga vhu pfa musi vha tshi khou ṱhogomela mulwadze? Ndi mini zwine zwa nga lavhelelwa musi mulwadze e tsini na u fa? Tsha u thoma, kha ri ṱhogomele zwithu zwi itaho uri zwi vhe khaedu u ṱhogomela mulwadze a re tsini na u fa ṋamusi.

Saintsi ya zwa ngalafho yo shandula maalafhele. Ḓanani ḽa miṅwaha ḽo fhiraho, tshifhinga tsha u tshila tsho vha tshi tshipfufhi na kha mashango o no itaho mvelaphanḓa. Vhathu vho vha vha tshi ṱavhanya u fa nga nṱhani ha malwadze a fhirelaho kana khombo. Zwo vha zwi songo leluwa u ya vhuongeloni, vhathu vhanzhi vho vha vha tshi ṱhogomelwa nga miṱa yavho nahone vha tshi fela hayani.

Ṋamusi, mvelaphanḓa ya zwa ngalafho yo ita uri madokotela a kone u lwisana na malwadze uri muthu a si ṱavhanye u fa. Malwadze e a vha a tshi nga ita uri muthu a ṱavhanye u fa tshifhingani tsho fhiraho, zwino a nga tshila na eneo malwadze lwa miṅwaha  minzhi. Naho zwo ralo, honoho u tshila lwa miṅwaha yo engedzeaho a zwi ambi uri muthu u ḓo fhola. Kanzhi vhathu vho farwaho nga eneo malwadze a vha tsha kona u ḓiṱhogomela. U ṱhogomela vhenevho vhathu zwi nga konḓa vhukuma nahone zwi nga ṱoḓa tshifhinga.

Zwenezwo zwo ita uri vhathu vhanzhi vha si tsha fela mahayani, fhedzi vha fele vhuongeloni. Vhathu vhanzhi a vha ḓivhi nḓila ine muthu a fa ngayo nahone ndi vha si gathi fhedzi vho no vhonaho muthu a tshi fa. Nga zwenezwo, u sa ḓivha zwine zwa ḓo itea zwi nga konḓela kana u kula nungo dza muthu ane a khou ṱhogomela muraḓo wa muṱa ane a khou lwala. Ndi mini zwine zwa nga thusa?

Samusi ro zwi vhona kha tsumbo ya Doreen, vhathu vhanzhi vha pfa vho hanganea musi muthu ane vha mu funa a tshi farwa nga vhulwadze vhu sa lafhei. Samusi ni tshi khou pfa vhuṱungu nahone ni tshi khou ofha, ndi mini zwine zwa nga ni thusa uri ni dzule no ḓilugiselela zwine zwa ḓo itea? Mushumeli wa Mudzimu a fulufhedzeaho o rabela a ri: “Ri funze kuvhalele kwa u vhala maḓuvha ashu, uri ri wane mbilu yo ṱalifhaho.” (Psalme ya 90:12) Vhukuma, rabelani Yehova Mudzimu zwi tshi bva mbiluni uri a ni sumbedze nḓila ine na nga ‘vhala ngayo maḓuvha aṋu’ nga vhuṱali u itela uri ni kone u shumisa maḓuvha o salaho na ane na mu funa nga hune zwa nga konadzea ngaho.

Zwenezwo zwi ṱoḓa uri ni dzudzanye zwavhuḓi. Arali muthu ane a khou lwala a tshi kha ḓi kona u amba nahone a tshi ṱoḓa u amba nga ha mafhungo a ndeme, zwi nga vha vhuṱali u mu vhudzisa nga ha muthu ane a ṱoḓa a tshi mu dzhiela phetho musi vhulwadze vhu tshi ṋaṋa. U haseledza zwavhuḓi na mulwadze nga ha zwine a zwi ṱoḓa zwi ngaho u iswa vhuongeloni, u tshila nga mutshini kana u alafhiwa nga iṅwe nḓila, zwenezwo zwi nga ita uri hu si vhe na khuḓano na u ḓisola kha miraḓo ya muṱa ye ya kombetshedzwa uri i dzhie phetho. U haseledza hu tshee nga phanḓa nahone vhathu vho vhofholowa zwi ita uri muṱa u livhise ṱhogomelo kha u ṱhogomela mulwadze. Bivhili i ri: “Maano o kunda nga u litsha u langana.”—Mirero 15:22.

Kanzhi mushumo muhulwane wa muthu ane a ṱhogomela mulwadze ndi u khuthadza. Muthu ane a khou fa u ṱoḓa u khwaṱhisedzwa uri u a funwa nahone ha eṱhe. Zwenezwi zwi nga itwa hani? Khethani khandiso dzi khwaṱhisaho dzine na nga vhalela mulwadze nahone ni mu imbele nyimbo dzine a dzi takalela. Vhathu vhanzhi vha a khuthadzea musi muraḓo wa muṱa a tshi vha fara tshanḓa na u amba navho zwavhuḓi.

Kanzhi zwi a thusa u ḓivha vhathu vhane vha dalela mulwadze. Muṅwe muvhigo wo ri: “Naho muthu  a tshi khou lwalesa lune a si tsha kona tshithu, u vha a tshi kha ḓi kona u pfa. Naho zwi tshi vhonala u nga mulwadze o eḓela lune a si tsha pfa tshithu, ni songo vhuya na amba zwithu zwine na sa ḓo kona u zwi amba musi o vuwa.”

Arali zwi tshi konadzea, rabelani noṱhe. Bivhili i sumbedza uri kha tshiṅwe tshiitea, muapostola Paulo na khonani dzawe vho vha vho tsikeledzea vhukuma nahone vho vha vhe si na vhuṱanzi ha uri vha ḓo tshila. Vho vha vha tshi ṱoḓa thuso ifhio? Paulo o humbela khonani dzawe a ri: “Ni nga dovha na thusa nga u ri rabelela.” (2 Vhakorinta 1:8-11) Ndi zwa ndeme u rabela zwi tshi bva mbiluni musi no tsikeledzea na musi ni tshi khou lwala vhukuma.

Kanzhi u vhona muthu ane na mu funa a tshi khou lwala lwa u fa, zwi a tsikeledza. Ndi ngazwo lufu lu songo ḓowelea. A ro ngo sikwa ri tshi kona u ṱanganedza uri u fa ndi tshipiḓa tsho ḓoweleaho tsha vhutshilo. (Vharoma 5:12) Nga zwenezwo, Ipfi ḽa Mudzimu ḽi amba uri lufu ndi “swina.” (1 Vhakorinta 15:26) Nga u ralo, zwi a pfesesea nahone zwo ḓowelea u sa ṱanganedza lufu lwa ane na mu funa.

Naho zwo ralo, u dzula wo lavhelela zwine zwa nga itea, zwi nga thusa miraḓo ya muṱa u fhungudza nyofho na u livhisa ṱhogomelo kha u ita uri vha ḓipfe vho khuthadzea nga hune zwa nga konadzea ngaho. Zwiṅwe zwiitea zwine zwa nga itea zwo ṅwalwa kha bogisi “ Vhege Dza U Fhedza Dza U Tshila.” Ndi ngoho uri a si mulwadze muṅwe na muṅwe ane a sedzana na honoho vhuimo nahone a vhu itei nga nḓila i fanaho. Naho zwo ralo, vhalwadze vhanzhi vha sedzana na dziṅwe dza dzenedzi tshanduko.

Musi mulwadze a tshi lovha, zwi nga vha zwavhuḓi uri ni kwamane na khonani ya tsini ye ya tenda tshifhingani tsho fhiraho uri i ḓo ni thusa. Vhathu vhe vha vha vha tshi khou ṱhogomela mulwadze na miraḓo ya muṱa vha fanela u khwaṱhisedzwa uri mufu ha tsha pfa vhuṱungu he a vha a tshi khou vhu pfa. Musiki wa vhathu u ri khwaṱhisedza uri “vho faho a vha na tshine vha tshi ḓivha.”—Muhuweleli 9:5.

Ndi zwa ndeme u ḓitika nga Mudzimu—musi muraḓo wa muṱa a tshi khou lwala lwa u fa na musi ri tshi pfa vhuṱungu musi o no lovha. Mudzimu a nga ni thusa a tshi shumisa vhathu nga zwine vha zwi amba na zwine vha zwi ita. Doreen o ri: “Ndo guda u ṱanganedza thuso ya muṅwe na muṅwe. Zwi re zwone ndi uri, thuso ine ra i wana i a kwama vhukuma. Nṋe na munna wanga ro vha ri tshi zwi ḓivha zwavhuḓi uri ndi Yehova ane a khou ri, ‘Ndi na inwi u itela u ni thusa.’ Ndi nga si vhuye nda zwi hangwa.”

Vhukuma, Yehova Mudzimu ndi Muṱhogomeli muhulwane. Sa Musiki washu, u a pfesesa vhuṱungu na zwililo zwashu. U a kona nahone o ḓiimisela u ri thusa na u ri ṱuṱuwedza uri ri kone u konḓelela. Zwi fhiraho zwenezwo, o fulufhedzisa uri hu si kale u ḓo fhelisa lufu lwa tshoṱhe nahone u ḓo vusa vhathu vha dzibilioni vha re mavhiḓani. (Yohane 5:28, 29; Nzumbululo 21:3, 4) Nga zwenezwo, vhoṱhe vha ḓo amba maipfi a muapostola Paulo ane a ri: “Lufu, gundo ḽau ḽi ngafhi? Lufu, luvholela lwau lu ngafhi?”—1 Vhakorinta 15:55.