Ndo bebwa mahayani a ngei Saxony, he nga tshenetsho tshifhinga ho vha hu tshi vhidzwa (GDR) German Democratic Republic (Riphabuliki ya Vhudemokirati ya Dzheremane). Ha hashu ho vha hu fhethu havhuḓi na hu re na lufuno nahone vhabebi vhanga vho ngudisa matshilele avhuḓi. GDR ho vha hu muvhuso wa Vhukomunisi, nga zwenezwo, vhathu vhanzhi vha ngei Saxony vho vha vha tshi dzhia vhurereli vhu si ha ndeme. Ndo vha ndi tshi humbula uri a huna Mudzimu. Lwa miṅwaha ya 18, ndo vha ndi tshi ṱuṱuwedzwa vhukuma nga pfunzothendwa: u tenda uri a huna Mudzimu na zwa Vhukomunisi.

Ndi ngani ndo vha ndi tshi takadzwa nga Vhukomunisi? Ndi nga nṱhani ha uri ndo vha ndi tshi takalela uri vha dzhia vhathu vhoṱhe vha tshi fana. Zwiṅwe hafhu, ndo vha ndi tshi tenda uri thundu dzoṱhe dzi fanela u kovhekanywa u lingana samusi zwenezwo zwo vha zwi tshi ḓo ita uri hu si vhe na vhathu vho pfumesaho na vhane vha shaya. Nga zwenezwo, ndo thoma u farakanea kha dzangano ḽa vhaswa vha Vhakomunisi. Musi ndi na miṅwaha ya 14, ndo fhedza tshifhinga tshinzhi ndi tshi khou shuma u kunakisa mupo nga u kuvhanganya mabammbiri o laṱwaho. Vhathu vhane vha dzula henefho ḓoroboni ya ngei Aue vho livhuha vhukuma vhuḓidini he nda vhu ita lwe zwa ita uri vhavhusi vha henefho vha nṋee pfufho. Naho ndo vha ndi tshee muswa, ndo vha ndi tshi ḓivha vhorapolitiki vha GDR vha vhuimo ha nṱha. Ndo vha ndi tshi vhona u nga ndi khou tovhola zwipikwa zwo teaho na uri ndi na vhumatshelo havhuḓi.

Fhedzi nga u ṱavhanya zwithu zwo shanduka. Nga 1989, musi hu tshi wa Luvhondo lwa Berlin, na tshigwada tsha Vhukomunisi ha Vhubvaḓuvha ha Yuropa tsho wa. Ho itea zwithu zwinzhi nga u tou tevhekana. Nga u ṱavhanya ndo ṱhogomela uri ho vha hu si na khaṱulokwayo kha GDR. Sa tsumbo, vhathu vhe vha vha vha sa tikedzi Vhukomunisi vho vha vha tshi dzhiiwa sa vhadzulapo vha vhuimo ha fhasi. Zwenezwo zwo konadzea hani? Naa riṋe sa Vhakomunisi ro vha ri sa tendi uri vhathu vhoṱhe vha a lingana? Naa Vhakomunisi vho vha vha tshi sokou vha vhathu vhane vha amba zwithu zwavhuḓi ngeno vha sa zwi iti? Ndo thoma u vhilaela vhukuma.

Nga zwenezwo, ndo shandula zwipikwa zwanga nahone nda thoma u livhisa ṱhogomelo kha zwa muzika na u ola. Samusi tshikoloni ndo gudela muzika—ndi na tshilavhelelwa tsha u ya yunivesithi—ndo vha ndi tshi ṱoḓa u vha muimbi na muoli. Zwiṅwe hafhu, ndo litsha vhuḓifari havhuḓi he nda gudiswa hone ndi tshee muṱuku. Zwe zwa vha zwi zwa ndeme kha nṋe nga tshenetsho tshifhinga ho vha hu u ḓiphina, zwe zwa vha zwi tshi katela u funana na vhasidzana vhanzhi nga tshifhinga tshithihi. Fhedzi  muzika, u ola na u tshila nga nḓila ine nda funa, a zwo ngo ita uri ndi si tsha vhilaela. Zwifanyiso zwe nda vha ndi tshi zwi ola zwo vha zwi tshi sumbedza nḓila ye nda vha ndi tshi ḓipfa ngayo. Vhumatshelo ho mpfarela mini? Nahone ndi ngani ri tshi khou tshila?

Mafheleloni, musi ndi tshi wana phindulo dza mbudziso dze nda vha ndi nadzo, phindulo dza hone dzo mmangadza. Vhuṅwe vhusiku musi ndi tshikoloni, ndo vha ndo dzula na tshigwada tsha vhagudiswa ri tshi khou haseledza nga ha vhumatshelo. Mandy * o vha e muṅwe wa vhenevho vhagudiswa nahone e muṅwe wa Ṱhanzi dza Yehova. O nṋea nyeletshedzo yavhuḓi vhukuma honoho vhusiku. O ri: “Andreas, arali ni tshi ṱoḓa u wana phindulo dza mbudziso dzine na vha nadzo nga ha vhutshilo na vhumatshelo, vhalani Bivhili nga vhuronwane.”

Ndo vha ndi tshi timatima, fhedzi ndo dzhia phetho ya u ṱoḓa dzenedzo phindulo Bivhilini. Mandy o mmbudza uri ndi vhale Daniele ndima ya 2 nahone zwe nda zwi vhala zwo mmangadza vhukuma. Honovhu vhuporofita vhu sumbedza mutevhe wa mivhuso ya shango na nḓila ine yeneyo mivhuso ya ḓo kwama ngayo tshifhinga tshine ra khou tshila khatsho. Mandy o ntsumbedza vhuṅwe vhuporofita vhu re Bivhilini vhune ha kwama vhumatshelo hashu. Ndo vha ndi tshi vho wana phindulo dza mbudziso dzanga! Fhedzi ndi nnyi we a ṅwala nga ha honoho vhuporofita nahone ndi nnyi ane a nga amba nga ha vhumatshelo nga nḓila i pfalaho nga u rali? Naa zwenezwi zwi amba uri hu na Mudzimu?

Mandy o rumela vhaṅwe vhavhingani vha Dziṱhanzi vhe vha vha vha tshi pfi Horst na Angelika, vhe vha nthusa u pfesesa Ipfi ḽa Mudzimu khwine. Nga u ṱavhanya, ndo ṱhogomela uri Ṱhanzi dza Yehova ndi dzangano ḽi ḽoṱhe ḽa vhurereli ḽine tshifhinga tshoṱhe ḽa shumisa na u livhisa ṱhogomelo kha dzina ḽa Mudzimu ḽine ḽa vha Yehova. (Psalme ya 83:18; Mateo 6:9) Ndo guda uri Yehova Mudzimu o ita uri vhathu vha vhe na tshilavhelelwa tsha u tshila tshoṱhe paradisoni kha ḽifhasi. Psalme ya 37:9 i ri: “Vha lindelaho Yehova ndi vhone vhaṋe vha haya.” Ndo takadzwa nga u ḓivha uri tshenetshi tshilavhelelwa tshi nga wanwa nga vhathu vhoṱhe vho ḓiimiselaho u tshila u tendelana na zwilinganyo zwa Mudzimu zwa vhuḓifari samusi Bivhili yo zwi ṱalutshedza.

Naho zwo ralo, zwo nkonḓela u shandula matshilele anga u itela uri ndi kone u tshila u tendelana na zwine Bivhili ya zwi amba. U bvelela hanga kha zwa muzika na u ola zwo ita uri ndi ḓikukumuse, nga zwenezwo, ndo vha ndi tshi fanela u thoma nda guda u ḓiṱukufhadza. Zwiṅwe hafhu, zwo vha zwi songo nndelutshela u litsha vhuḓifari vhu si havhuḓi. Ndi livhuha vhukuma uri Yehova ha fheli mbilu, u a khathutshela nahone u a pfesesa vhane vha lingedza nga nungo dzoṱhe u ita zwine Bivhili ya zwi funza!

Lwa miṅwaha ya 18, ndo vha ndi Mukomunisi nahone ndi tshi tenda uri a huna Mudzimu; fhedzi u bva tsheetsho Bivhili i khou shandula vhutshilo hanga. Zwe nda zwi guda zwo ita uri ndi si tsha vhilaela nga ha vhumatshelo nahone zwa ita uri ndi vhe na zwipikwa vhutshiloni. Nga 1993, ndo lovhedzwa sa muṅwe wa Ṱhanzi dza Yehova nahone nga 2000, nda vhinga Tabitha ane a vha Ṱhanzi i fhiseaho. Ro fhedza tshifhinga tshinzhi ri tshi khou thusa vhaṅwe uri vha ḓivhe Bivhili. Vhunzhi ha vhathu vhe ra vha ri tshi ṱangana navho, vho vha vha tshi tshila vhutshilo vhu fanaho na he nda vha ndi tshi tshila hone, vho vha vha tshi ṱuṱuwedzwa nga Vhukomunisi nahone vha tshi tenda uri a huna Mudzimu. Ndi pfa ndo fushea vhukuma musi ndi tshi vha sumbedza nḓila ine vha nga ḓivha ngayo Yehova.

Musi ndi tshi thoma u guda na Ṱhanzi dza Yehova, vhabebi vhanga vho vha vho sinyuwa. Fhedzi u bva tsheetsho, vho ṱhogomela nḓila ye u guda hanga na Ṱhanzi dza Yehova zwa shandula ngayo vhutshilo hanga. Zwine zwa ntakadza vhukuma ndi uri zwino vha khou guda Bivhili nahone vha ya miṱanganoni ya Vhukriste ya Ṱhanzi dza Yehova.

Mbingano yanga na Tabitha ndi yavhuḓi vhukuma ngauri ri lingedza u tevhela nyeletshedzo dzine ra dzi wana Bivhilini dzi ambaho nga ha vhavhingani. Sa tsumbo, u thetshelesa nyeletshedzo ya Bivhili ine ya amba nga ha u fulufhedzea mbinganoni zwi bvela phanḓa zwi tshi khwaṱhisa mbingano yashu.—Vhaheberu 13:4.

A thi tsha ofha nahone a thi tsha vhilaela nga ha vhumatshelo. Ndi ḓipfa ndi tshipiḓa tsha muṱa wa shango ḽoṱhe wa vhatendi nga nṋe, une wa vha na mulalo na vhuthihi. Kha wonoyo muṱa ri fara vhathu nga nḓila i fanaho. Zwenezwo ndi zwithu zwe nda vha ndi zwi tshi zwi tenda nahone ndi tshi ṱoḓa u zwi swikelela vhutshiloni hanga.