Bivhili i sumbedza uri nga zwiṅwe zwifhinga, vharuṅwa vho tsireledza vhagwadameli vha ngoho u itela u khunyeledza zwine Mudzimu a zwi funa. (Psalme ya 34:7) Sa tsumbo:

• Musi Yehova a tshi fhelisa vhathu vhavhi ngei Sodoma na Gomora, vharuṅwa vho thusa Loto na muṱa wawe uri vha shavhe.—Genesi 19:1, 15-26.

• Musi vhaswa vhararu vha Vhaheberu vha tshi kudzwa ṋanḓoni ya mulilo u dugaho ngei Babele ḽa kale, Mudzimu o “ruma Muruṅwa wawe a lamulela vhaḓinḓa vhawe.”—Daniele 3:19-28.

• Musi Daniele munna wa u luga o fhedza vhusiku hoṱhe e bakoni ḽa dzindau dze dza vha dzi na nḓala, o amba uri o tshidzwa nga nṱhani ha uri “Mudzimu . . . o ruma muḓinḓa wawe, a fara milomo ya dzindau.”—Daniele 6:16, 22.

Nga zwiṅwe zwifhinga, vharuṅwa vho dzhenelela tshivhidzoni tsha Vhakriste vha u thoma musi zwi tshi ṱoḓea u itela u ḓadzisa tshipikwa tsha Yehova. Sa tsumbo:

• Muruṅwa o vula miṋango ya dzhele, a bvisa vhaapostola vhe vha vha vho valelwa henefho nahone a vha vhudza uri vha bvele phanḓa vha tshi huwelela thembeleni.—Mishumo 5:17-21.

• Muruṅwa o vhudza muevangeli Filipo uri a tshimbile nga nḓila i re sogani i bvaho Yerusalema i tshi ya Gaza u itela uri a huwelele kha munna wa Muetiopia we a vha o ya Yerusalema u rabela.—Mishumo 8:26-33.

• Musi tshifhinga tsha Mudzimu tsho swika tsha uri vhathu vhe vha vha vhe si Vhayuda vha vhe Vhakriste, mulangammbi wa Muroma ane a pfi Koronelio o vhona bono ḽe khaḽo muruṅwa wa Mudzimu a mu vhudza uri a vhidze muapostola Petro uri a ḓe muḓini wawe.—Mishumo 10:3-5.

• Musi muapostola Petro o valelwa dzhele, ho bvelela muruṅwa nahone a mu bvisa henefho.—Mishumo 12:1-11.

A huna vhuṱanzi vhu sumbedzaho uri zwino Mudzimu u khou shumisa vharuṅwa u thusa vhathu nga lwa vhuṱolo u fana na nḓila ye zwa ṱaluswa ngayo Bivhilini. Naho zwo ralo, malugana na tshifhinga tshine ra khou tshila khatsho, Yesu o ri: “Mafhungo maḓifha aya a Muvhuso a ḓo ḓivhadzwa ḽifhasini ḽoṱhe uri zwi vhe vhuṱanzi kha tshaka dzoṱhe, nga murahu ndi hone vhufhelo vhu tshi ḓo ḓa.” (Mateo 24:14) Naa ni a zwi ḓivha uri vhafunziwa vha Kristo vha khou ita wonoyu mushumo vha tshi khou livhiswa nga vharuṅwa?

Bugu ya Nzumbululo i sumbedza uri vharuṅwa vha khou shuma vhukuma kha u thusa vhathu u mona na ḽifhasi ḽoṱhe uri vha gude nga ha Yehova Mudzimu na zwine a zwi ṱoḓa. Muapostola Yohane o ṅwala uri: “Nda vhona muṅwe muruṅwa a tshi khou fhufha a tshi buḓekanya ḽiṱaḓulu, e na mafhungo maḓifha a lini na lini ane a fanela u a ḓivhadza vhane vha dzula kha ḽifhasi, kha tshaka dzoṱhe, mirafho yoṱhe, na ndimi dzoṱhe na vhathu vhoṱhe, a amba nga ipfi ḽihulu a ri: ‘Ofhani Mudzimu ni mu ṋee vhugala, ngauri tshifhinga tsha khaṱulo yawe tsho swika, rabelani we a sika ḽiṱaḓulu na ḽifhasi na lwanzhe na zwisima zwa maḓi.’” (Nzumbululo 14:6, 7) Tshenzhelo nnzhi dza musalauno dzi sumbedza uri vharuṅwa vha khou tikedza mushumo wa shango ḽoṱhe wa u huwelela nga ha Muvhuso. Vhukuma, musi muitazwivhi a tshi rembuluwa nahone a humela kha Yehova, “vharuṅwa vha Mudzimu vha a takala zwihulu.”—Luka 15:10.

Hu ḓo itea mini musi mushumo wa u huwelela wo no khunyeledzwa? Vharuṅwa vhane vha vha “mavhuthu a ṱaḓulu” vha ḓo tikedza Yesu Kristo ane a vha Khosi ya mahosi “nndwani ya ḓuvha ḽihulu ḽa Mudzimu Ramaanḓaoṱhe” nga Haramagedo. (Nzumbululo 16:14-16; 19:14-16) Vharuṅwa vha re na maanḓa vha ḓo vhulaha vhathu vhane vha ḓo vha vho haṱulwa nga Mudzimu musi Murena Yesu “a tshi ḓa u lifhedza vhane vha si . . . thetshelese mafhungo maḓifha a ambaho nga ha Murena washu Yesu.”—2 Vhathesalonika 1:7, 8.

Nga zwenezwo, ivhani na vhungoho ha uri vharuṅwa vha na dzangalelo kha inwi. Vha ṱhogomela vhathu vhane vha ṱoḓa u shumela Yehova Mudzimu nahone Yehova o vha shumisa lunzhi-lunzhi u itela u khwaṱhisa na u tsireledza vhashumeli vhawe vha fulufhedzeaho kha ḽifhasi.—Vhaheberu 1:14.

Muṅwe na muṅwe washu u fanela u dzhia phetho ya ndeme. Naa ri ḓo thetshelesa mafhungo maḓifha ane a khou ḓivhadzwa ḽifhasini ḽoṱhe? Ṱhanzi dza Yehova vha hune na dzula hone, vha ḓo takalela u ni thusa uri ni vhuyelwe nga nḓila ine vharuṅwa vha Mudzimu vha nga ni thusa ngayo.