THERO I GUDWAHO 32
Ḓiṱukufhadzeni Na U Ḓivha Uri A Ni Vhomakonazwoṱhe
“Tshimbila nga u ḓiṱukufhadza na Mudzimu wau!”—MIKA 6:8.
LUIMBO 31 Tshimbilani Na Mudzimu!
MANWELEDZO *
1. Davida o amba mini nga ha u ḓiṱukufhadza ha Yehova?
NAA Yehova u a ḓiṱukufhadza? Ee! Davida o ri: “U ntsireledza nga tshiṱangu tshau, ndi huliswa nga u ḓiṱukufhadza hau.” (2 Sam. 22:36; Ps. 18:35) Musi Davida a tshi amba zwenezwi, khamusi o vha a tshi khou humbula nga ha ḓuvha ḽe muporofita Samuele a ḓa ha hawe u itela u ḓodza khosi ya Isiraele i tevhelaho. Davida o vha e ene ṅwana muṱukusa kha vharwa vha Isai, fhedzi Yehova o nanga ene uri a vhe khosi vhudzuloni ha Khosi Saulo.—1 Sam. 16:1, 10-13.
2. Ri ḓo guda mini kha ino thero?
2 Zwi tou pfala uri Davida a nga tendelana na maipfi ane a vha kha Phisalema 113 ane a ri: “[Yehova] u a kwatama a sedza ḽiṱaḓulu na ḽifhasi, u vusa a si na zwawe buseni, u vusa mushai . . . uri a mu dzudze na vharangaphanḓa.” (Ps. 113:6-8) Kha ino thero, ri ḓo thoma nga u vhona uri ri nga guda mini kha nḓila ine Yehova a ḓiṱukufhadza ngayo. Nga murahu ri ḓo vhona zwine ra nga zwi guda nga ha u ḓiṱukufhadza kha Khosi Saulo, muporofita Daniele na Yesu.
RI NGA GUDA MINI KHA TSUMBO YA YEHOVA?
3. Yehova u shumisana hani na riṋe nahone zwenezwo zwi sumbedza mini?
3 Yehova o sumbedza uri u a ḓiṱukufhadza nga nḓila ine a shumisana ngayo na vhashumeli vhawe vha re na tshivhi. Ha ṱanganedzi fhedzi nḓila ine ra mu gwadamela ngayo, fhedzi u dovha a ri dzhia ri khonani dzawe. (Ps. 25:14) Yehova o sumbedza uri u ṱoḓa u vha khonani dzashu nga u ṋekedza Murwa wawe sa tshiṱhavhelo uri a fele zwivhi zwashu. U a khathutshela nahone u a pfela vhuṱungu.
4. Yehova o ri ṋea mini nahone ndi ngani?
4 Kha ri ambe nga ha iṅwe nḓila ine Yehova a sumbedza ngayo uri u a ḓiṱukufhadza. Samusi Yehova e Musiki, o vha a tshi nga ri sika ri si na mbofholowo ya u ḓikhethela. Fhedzi ho ngo zwi ita. Yehova o ri sika a tshi ḓifanyisa nahone o ri fha mbofholowo ya u ḓikhethela. Naho ri si tshithu musi ri tshi vhambedzwa na Yehova, phetho dzine ra dzi ita ndi dza ndeme khae. Yehova u ṱoḓa ri tshi mu shumela zwi tshi bva mbiluni nga nṱhani ha uri ri a mu funa nahone ri a vhuyelwa musi ri tshi mu thetshelesa. (Dot. 10:12; Yes. 48:17, 18) Ri a vhuyelwa vhukuma nga u ḓiṱukufhadza ha Yehova.
Yesu u fanyiswa e ṱaḓulu. Vhane vha ḓo vhusa nae vho ima tsini hawe. Yesu na vha 144 000 vho lavhelesa vharuṅwa vhanzhi ngeno vhaṅwe vharuṅwa vho rumiwa kha ḽifhasi. Vhoṱhe vha re kha hetshi tshifanyiso Yehova o vha ṋea mushumo une vha tea u u ita (Sedzani phara 5)
5. Yehova u ri gudisa hani uri ri ḓiṱukufhadze? (Sedzani tshifanyiso tshi re kha gwati.)
5 Yehova u ri gudisa uri ri ḓiṱukufhadze nga nḓila ine a shumisana ngayo na riṋe. A hu na Muthu o ṱalifhaho u fana nae. Fhedzi u a ṱoḓa u pfa mavhonele a vhaṅwe naho o ṱalifha. Sa tsumbo, o tendela Murwa wawe a tshi mu thusa u sika zwithu zwoṱhe. (Mir. 8:27-30; Vhakol. 1:15, 16) Naho Yehova e Ramaanḓaoṱhe, u a ṋea vhaṅwe vhuḓifhinduleli. Sa tsumbo, o vhea Yesu uri a vhe Khosi ya Muvhuso wawe nahone u ḓo ṋea maanḓa vha 144 000 vhane vha ḓo vhusa na Yesu. (Luka 12:32) Yehova o gudisa Yesu u vha Khosi na u vha Tshifhe Muhulu. (Vhahev. 5:8, 9) U dovha hafhu a gudisa na vhane vha ḓo vhusa na Yesu u ita mushumo we a vha ṋea vhone, fhedzi ha lingedzi u langa nḓila ine vha ita ngayo wonoyo mushumo ngauri u a fhulufhela uri vha ḓo ita zwine Ene a funa.—Nzumb. 5:10.
Musi ri tshi gudisa vhaṅwe na u vha ṋea mushumo, ri vha ri tshi khou edzisa Yehova (Sedzani dziphara 6-7) *
6-7. Ri guda mini kha Yehova nga ha u ṋea vhaṅwe mushumo?
6 Arali Yehova ane a kona u ita tshiṅwe na tshiṅwe a tshi ṋea vhaṅwe vhuḓifhinduleli, zwi tou pfala uri na riṋe ri tea u ita zwi fanaho. Sa tsumbo, naa ni ṱhoho ya muṱa kana ni muhulwane tshivhidzoni? Edzisani tsumbo ya Yehova nga u ṋea vhaṅwe mishumo, fhedzi ni songo lingedza u langa nḓila ine vha u ita ngayo. Musi ni tshi edzisa Yehova, ni ḓo vha ni tshi khou ita uri mushumo u shavhe zwanḓa na u ita uri vhaṅwe vha kone u ḓifhulufhela. (Yes. 41:10) Ndi zwifhio zwiṅwe zwine vhane vha vha na vhuḓifhinduleli vha nga zwi guda kha Yehova?
7 Bivhili i sumbedza uri Yehova u a ṱoḓa u pfa mavhonele a vharuṅwa. (1 Dzikh. 22:19-22) Vhabebi, ni nga edzisa hani tsumbo ya Yehova? Nga zwiṅwe zwifhinga, ni nga vhudzisa vhana vhaṋu uri zwikene na zwikene ri nga zwi itisa hani. Arali zwi tshi konadzea, ni ite zwe vha amba.
8. Yehova o shumisana hani na Abrahamu na Sara?
8 Ri dovha ra vhona uri Yehova u a ḓiṱukufhadza ngauri ha fheli mbilu. Sa tsumbo, Yehova ha fheli mbilu musi vhashumeli vhawe vha tshi vhudzisa nga ṱhonifho uri ndi ngani o ita phetho yo raliho. Musi Abrahamu a tshi amba uri a zwo ngo tea uri Yehova a fhelise Sodoma na Gomora, Yehova o mu thetshelesa. (Gen. 18:22-33) Humbulani nḓila ye Yehova a shumisana ngayo na Sara mufumakadzi wa Abrahamu. Musi Sara a tshi sea nge Yehova a mu vhudza uri u ḓo vha na ṅwana naho o no kegula, Yehova ho ngo sinyuwa. (Gen. 18:10-14) Fhedzi o mu ṱhonifha.
9. Vhabebi na vhahulwane vha nga guda mini kha tsumbo ya Yehova?
9 Arali ni mubebi kana ni muhulwane, ni nga guda mini kha tsumbo ya Yehova? Sa tsumbo, ni ita mini musi vhana vhaṋu kana vhaṅwe tshivhidzoni vha sa tendelani na phetho yaṋu? Naa ni a ṱavhanya na ḓiimelela? Naa ni a lingedza u pfesesa mavhonele avho? Musi vhane vha vha na vhuḓifhinduleli vha tshi edzisa Yehova, miṱa na zwivhidzo zwi a vhuyelwa. Ro no amba nga ha uri ri nga guda mini kha tsumbo ya Yehova ya u ḓiṱukufhadza. Zwa zwino ri ḓo guda nga ha tsumbo dzi re Bivhilini nga ha u ḓiṱukufhadza.
RI NGA GUDA MINI KHA TSUMBO DZI RE BIVHILINI?
10. Yehova u ri gudisa hani a tshi shumisa tsumbo dzi re Bivhilini?
10 Yehova ‘Mufunzi washu Muhulwane’ u ri funza a tshi shumisa tsumbo dzi re Ipfini ḽawe. (Yes. 30:20, 21) Musi ri tshi vhala na u elekanya, ri guda nga ha vhashumeli vha Yehova vhe vha vha vha tshi ḓiṱukufhadza. Ri dovha ra guda kha zwe zwa itea kha vhe vha kundelwa u ḓiṱukufhadza.—Ps. 37:37; 1 Vhakor. 10:11.
11. Ri guda mini kha tsumbo ya Saulo i si yavhuḓi?
11 Humbulani nga ha zwe zwa itea kha Khosi Saulo. O thoma a tshi ḓiṱukufhadza. Musi a tshee muṱuku, o vha a tshi zwi ḓivha uri hu na zwiṅwe zwithu zwine ha fanelei u zwi ita nahone o ḓipfa a sa fanelei u ita mushumo we Yehova a mu ṋea wone. (1 Sam. 9:21; 10:20-22) Nga murahu ha tshifhinga, o mbo ḓi thoma u ḓihudza nahone a ita zwithu zwe a vha a sa fanelei u zwi ita. O sumbedza mavhala awe nga murahu ha u vha khosi. Sa tsumbo, Saulo o vha na mbilu ṱhukhu, a balelwa u lindela muporofita Samuele. Nṱhani ha u fhulufhela uri Yehova u ḓo lwela vhathu vhawe, o ṋekedza tshiṱhavhelo naho o vha a sa fanelei u ita nga u ralo. Zwenezwo zwo ita uri Yehova a sa mu takalele nahone a xelelwa nga vhuhosi hawe. (1 Sam. 13:8-14) U guda kha yeneyi tsumbo zwi ḓo ri thusa uri ri si ite zwithu zwine a ri fanelei u zwi ita.
12. Ndi ngani Daniele e tsumbo yavhuḓi?
12 Zwa zwino kha ri ambe nga ha tsumbo yavhuḓi ya muporofita Daniele. Daniele o dzula a tshi ḓiṱukufhadza na u ṱoḓa u livhiswa nga Yehova. Sa tsumbo, musi Yehova a tshi mu thusa uri a kone u ṱalutshedza muḽoro wa Nebukadanetsara, ho ngo ṱoḓa u ḓiitela dzina. Fhedzi o hulisa Yehova. (Dan. 2:26-28) Ri guda mini? Arali vhahashu vha tshi takalela u pfa nyambo dzashu kana ri na tshenzhelo dzavhuḓi tsimuni, a ro ngo tea u hangwa u hulisa Yehova. Ri tea u humbula uri ro vha ri sa ḓo kona u ita zwenezwi zwithu zwoṱhe arali ri sa khou thusiwa ngae. (Vhafil. 4:13) Musi ri tshi ita zwenezwo, ri vha ri tshi khou edzisa tsumbo ya Yesu. Nga nḓila ḓe?
13. Ri guda mini nga ha Yesu kha Yohane 5:19, 30?
13 Yesu o ḓitika nga Yehova naho o vha e si na tshivhi. (Vhalani Yohane 5:19, 30.) Ho ngo vhuya a lingedza u dzhiela Khotsi awe maanḓa. Vhafilipi 2:6 i amba uri Yesu ho ngo “[humbula] u dzhia vhuimo ha Mudzimu uri a lingane nae.” Yesu o vha a tshi ṱhonifha Yehova nahone a tshi ḓivha mikano yawe.
Yesu o vha a tshi ḓivha na u ṱhonifha mikano (Sedzani phara 14)
14. Yesu o ita mini musi a tshi humbelwa uri a ite zwithu zwine ha na maanḓa a u zwi ita?
14 Humbulani nga ha zwe Yesu a zwi ita musi Yakobo, Yohane na mme avho vha tshi mu humbela uri a ite zwithu zwe a vha a si na maanḓa a u zwi ita. Yesu o ṱavhanya a vha vhudza uri ndi Yehova fhedzi a re na maanḓa a u amba uri ndi nnyi ane a ḓo dzula kha tshanḓa tsha u ḽa na tsha monde tsha Yesu. (Mat. 20:20-23) Yesu o sumbedza uri u a ṱhonifha mikano. O vha a tshi zwi ḓivha uri hu na zwithu zwine ha fanelei u zwi ita. Ho ngo vhuya a ita zwithu zwe Yehova a si mu laedze zwone. (Yoh. 12:49) Ri nga edzisa hani tsumbo yawe?
Ndi ngani ri tshi tea u edzisa tsumbo ya Yesu ya u ḓivha uri hu na zwiṅwe zwithu zwine a ri fanelei u zwi ita? (Sedzani dziphara 15-16) *
15-16. Ri nga shumisa hani nyeletshedzo i re kha 1 Vhakorinta 4:6?
15 Ri edzisa tsumbo ya Yesu ya u ḓiṱukufhadza nga u shumisa nyeletshedzo i re kha 1 Vhakorinta 4:6. Lwonolwo luṅwalo lu ri: “Itani zwo ṅwaliwaho fhedzi.” Musi vhaṅwe vha tshi ṱoḓa nyeletshedzo yashu, a ro ngo tea u amba mavhonele ashu kana u amba ri songo thoma ra humbula nga ha eneo mafhungo. Fhedzi ri tea u vha thusa uri vha shumise nyeletshedzo i wanalaho Bivhilini kana kha khandiso dzo thewaho Bivhilini. Musi ri tshi ita zwenezwo, ri vha ri tshi khou sumbedza uri a ri ḓivhi zwithu zwoṱhe. U ita zwenezwo zwi ḓo vha zwi tshi khou sumbedza uri ri a ḓiṱukufhadza ngauri ri ḓo vha ri tshi khou sumbedza uri nyeletshedzo ya Yehova i khwine kha yashu.—Nzumb. 15:3, 4.
16 Musi ri tshi ḓiṱukufhadza, ri vha ri tshi khou sumbedza uri ri hulisa Yehova, fhedzi hu na zwiṅwe zwiitisi zwa uri ndi ngani ri tshi tea u ḓiṱukufhadza. Zwa zwino ri ḓo amba nga ha uri u ḓiṱukufhadza zwi nga ita hani uri ri takale na u ri thusa uri ri kone u shumisana na vhaṅwe.
NDI NGANI ZWI ZWA NDEME U ḒIṰUKUFHADZA?
17. Ndi ngani vhathu vhane vha ḓiṱukufhadza na u ḓivha uri a vha koni zwithu zwoṱhe vha tshi takala?
17 U ḓiṱukufhadza na u ḓivha uri hu na zwiṅwe zwithu zwine ri si zwi kone, zwi ḓo ita uri ri takale. Ndi ngani ri tshi ralo? Ndi ngauri musi ri tshi ḓivha uri hu na zwiṅwe zwithu zwine a ri koni u zwi ita, ri ḓo ṱanganedza musi vhahashu vha tshi ri thusa. Sa tsumbo, humbulani nga ha zwe zwa itea musi Yesu a tshi fhodza vhanna vha fumi vha re na mapele. Ndi munna muthihi fhedzi we a humela kha Yesu u itela u mu livhuwa nge a mu fhodza mapele samusi onoyo munna o vha a sa ḓo kona u ḓifhodza nga ene muṋe. Onoyo munna ane a ḓiṱukufhadza, o livhuwa nge Yesu a mu fhodza nahone a hulisa Mudzimu.—Luka 17:11-19.
18. U ḓiṱukufhadza na u ḓivha uri a ri vhomakonazwoṱhe zwi ri thusa hani uri ri kone u shumisana zwavhuḓi na vhaṅwe? (Vharoma 12:10)
18 Vhathu vhane vha ḓiṱukufhadza na u ḓivha uri a vha vhomakonazwoṱhe vha a shumisana zwavhuḓi na vhaṅwe na u vha na vhukonani havhuḓi na vhaṅwe. Ndi ngani? Vha a zwi ḓivha uri vhaṅwe vhathu vha a vha fhira nga zwiṅwe zwithu nahone vha fhulufhela vhenevho vhathu. Vha a takala musi vhaṅwe vha tshi ita mishumo yavhuḓi nahone vha a vha khoḓa na u vha hulisa.—Vhalani Vharoma 12:10.
19. Ndi ngani ri sa tei u ḓihudza?
19 Vhathu vhane vha ḓihudza a vha koni u khoḓa vhaṅwe nahone vha vhona u nga ndi vhone vhane vha tea u khoḓwa. Kanzhi vha a ḓivhambedza na vhaṅwe nahone vha na muya wa u ṱaṱisana. Nṱhani ha u gudisa vhaṅwe na u vha ṋea vhuḓifhinduleli, vha vhona u nga vhone vhaṋe vha tea u ḓiitela mushumo ngauri vha vhona u nga vhaṅwe vhathu a vha nga u iti nga nḓila yone. Vhathu vhane vha ḓihudza vha ḓidzhia vhe vha ndeme u fhira vhaṅwe nahone vha na vivho musi vhaṅwe vha tshi ita zwithu zwavhuḓi. (Vhagal. 5:26) Vhukonani havho na vhaṅwe a vhuyi fhethu. Arali ra vhona uri ri khou thoma u ḓihudza, ri tea u humbela Yehova uri a ri thuse uri ri ‘shandule nḓila ine ra humbula ngayo’ u itela uri zwenezwo zwithu zwi si ṱoke midzi mbiluni dzashu.—Vharoma 12:2.
20. Ndi ngani ri tshi tea u ḓiṱukufhadza na u ḓivha uri a ri vhomakonazwoṱhe?
20 Ri livhuwa vhukuma tsumbo ya Yehova ya u ḓiṱukufhadza. Ri a zwi vhona uri u a ḓiṱukufhadza kha nḓila ine a shumisana ngayo na vhashumeli vhawe nahone ri ṱoḓa u mu edzisa. Ri dovha ra ṱoḓa u edzisa tsumbo dzi re Bivhilini dza vhathu vhe vha vha vha tshi ḓiṱukufhadza vhe vha tshimbila na Mudzimu. U nga ri ri nga dzula ri tshi khoḓa Yehova na u mu hulisa tshifhinga tshoṱhe. (Nzumb. 4:11) Arali ra ita zwenezwi, ri ḓo tshimbila na Yehova ngauri u funa vhathu vhane vha ḓiṱukufhadza na u ḓivha uri a vha vhomakonazwoṱhe.
LUIMBO 123 U Ḓiṱukufhadzela Nzudzanyo Ya Ṱaḓulu
^ phar. 5 Muthu ane a ḓiṱukufhadza u a khathutshela nahone u a pfela vhuṱungu. Nga zwenezwo, ri nga vha na vhungoho ha uri Yehova u a ḓiṱukufhadza. Kha ino thero, ri ḓo amba nga ha nḓila ine tsumbo ya Yehova ya nga ri thusa ngayo u ḓiṱukufhadza. Ri ḓo dovha ra guda nga ha u ḓiṱukufhadza kha tsumbo ya Khosi Saulo, muporofita Daniele na Yesu.
^ phar. 58 ṰHALUSO YA TSHIFANYISO: Muhulwane a tshi khou gudisa wahashu a re muswa u ṱhogomela tsimu ya tshivhidzo tshawe. Nga murahu, onoyo muhulwane ha langi nḓila ine onoyo wahashu ane a kha ḓi vha muswa a khou ita ngayo wonoyo mushumo, fhedzi u mu tendela a tshi u ita.
^ phar. 62 ṰHALUSO YA TSHIFANYISO: Wahashu u khou vhudzisa muhulwane arali zwo tea uri a ye kha munyanya une wa ḓo itiwa kerekeni. Onoyo muhulwane ha mu vhudzi mavhonele awe, fhedzi u mu sumbedza zwine Bivhili ya zwi amba.
