THERO I GUDWAHO 34
Ni Wa Ndeme Tshivhidzoni Tsha Yehova!
“Muvhili u na miraḓo minzhi. Naho miraḓo yoṱhe ya muvhili i minzhi, ndi muvhili muthihi, na muvhili wa Kristo wo tou ralo.”—1 VHAKOR. 12:12.
LUIMBO 101 U Shuma Roṱhe Nga Vhuthihi
MANWELEDZO *
1. Ndi ndugelo ifhio ine ra vha nayo?
NDI ndugelo khulwane u vha muraḓo wa tshivhidzo tsha Yehova. Samusi ri tshi gwadamela Yehova na vhahashu ri na mulalo nahone ro takala, ri ḓipfa ri pharadisoni ya pfanyisedzo. Inwi ni wa ndeme lungafhani tshivhidzoni?
2. Muapostola Paulo o shumisa tshifanyiso tshifhio kha vhunzhi ha marifhi awe?
2 Ri nga guda zwinzhi nga ha enea mafhungo kha tshifanyiso tshe muapostola Paulo a tshi shumisa kha vhunzhi ha marifhi awe. Kha eneo marifhi, Paulo o fanyisa tshivhidzo na muvhili. Nahone a fanyisa muthu muṅwe na muṅwe tshivhidzoni na miraḓo ya muvhili.—Vharoma 12:4-8; 1 Vhakor. 12:12-27; Vhaef. 4:16.
3. Ndi zwithu zwifhio zwiraru zwine ra ḓo amba nga hazwo kha ino thero?
3 Kha ino thero ri ḓo amba nga ha zwithu zwiraru zwine ra nga zwi guda kha tshifanyiso tsha Paulo. Tsha u thoma, ri ḓo guda uri muṅwe na muṅwe ndi wa ndeme * tshivhidzoni tsha Yehova. Tsha vhuvhili, ri ḓo amba nga ha zwine ra nga zwi ita arali ri tshi ḓipfa ri si vha ndeme tshivhidzoni. Tsha vhuraru, ra amba nga ha uri ndi ngani muṅwe na muṅwe washu a tshi tea u dzula o farakanea a tshi khou ita mushumo we Yehova a mu ṋea wone tshivhidzoni.
MUṄWE NA MUṄWE WASHU NDI WA NDEME TSHIVHIDZONI TSHA YEHOVA
4. Ri guda mini kha Vharoma 12:4, 5?
4 Tshithu tsha u thoma tshine ra tshi guda kha tshifanyiso tsha Paulo ndi uri muṅwe na muṅwe washu ndi wa ndeme tshivhidzoni tsha Yehova. Musi Paulo a tshi ita tshenetshi tshifanyiso o thoma nga uri: “Vhunga kha muvhili muthihi hu na miraḓo minzhi, fhedzi yeneyo miraḓo yoṱhe a i shumi mishumo i fanaho, naho ri vhanzhi, ri muvhili muthihi ngauri ri na vhuthihi na Kristo, ri miraḓo ine ya shumisana.” (Vharoma 12:4, 5) Paulo o vha a khou ṱoḓa u ri gudisa mini? O vha a tshi khou ṱoḓa u ri gudisa uri muṅwe na muṅwe ndi wa ndeme tshivhidzoni naho ri tshi ita mishumo i sa fani.
Ri na mishumo i sa fani tshivhidzoni, fhedzi muṅwe na muṅwe washu ndi wa ndeme (Sedzani dziphara 5-12) *
5. Yehova o ṋea tshivhidzo “zwifhiwa” zwifhio?
5 Musi ri tshi ri roṱhe ri vha ndeme tshivhidzoni, hu ḓa vhonnyi muhumbuloni waṋu? Khamusi ni humbula nga ha vhane vha ranga phanḓa. (1 Vhathes. 5:12; Vhahev. 13:17) Ndi ngoho uri Yehova u shumisa Kristo uri a ri fhe vhanna uri vha vhe “zwifhiwa” tshivhidzoni tshawe. (Vhaef. 4:8) Vhenevho vhanna vha re “zwifhiwa” vha katela Tshigwada tshi Langaho, vhane vha thusa Tshigwada tshi Langaho, miraḓo ya Komiti ya Davhi, vhalavhelesi, vhane vha gudisa kha zwikolo zwa ndangulo, vhahulwane na vhashumeli. Vhenevho vhahashu vho nangwa nga muya mukhethwa uri vha ṱhogomele nngu dza Yehova na u khwaṱhisa tshivhidzo.—1 Pet. 5:2, 3.
6. U ya nga 1 Vhathesalonika 2:6-8, vhahashu vho nangwaho nga muya mukhethwa vha lingedza u ita mini?
6 Vhahashu vha vhewa nga muya mukhethwa uri vha ṱhogomele mishumo yo fhambanaho ndanguloni. U fana na musi milenzhe na zwanḓa zwi tshi shuma nga maanḓa u vhuyedza muvhili woṱhe, na vhahashu vho nangwaho nga muya mukhethwa vha shuma nga maanḓa uri vha vhuyedze tshivhidzo tshoṱhe. A vha zwi iteli u ḓiṱoḓela bvumo. Fhedzi vha zwi itela u fhaṱa na u khwaṱhisa vhahashu tshivhidzoni. (Vhalani 1 Vhathesalonika 2:6-8.) Ri livhuwa Yehova nge a ri fha vhenevha vhahashu vha sa ḓiṱoḓeli zwavho.
7. Vhane vha shumela Yehova lwa tshifhinga tshoṱhe vha wana phaṱhutshedzo dzifhio?
7 Vhaṅwe tshivhidzoni vha shuma sa vharumiwa, vhavulanḓila vho khetheaho kana vhavulanḓila vha tshifhinga tshoṱhe. Vhahashu u mona na shango ḽoṱhe vho ita phetho ya uri u huwelela na u ita vhafunziwa zwi vhe mushumo wavho vhutshilo havho hoṱhe. Nga nṱhani ha yeneyo phetho vho no thusa vhanzhi uri vha vhe vhafunziwa. Naho vhunzhi vhathu vhane vha shumela Yehova tshifhinga tshoṱhe vha si na tshelede kana thundu nnzhi, Yehova u vha fhaṱutshedza nga zwithu zwinzhi. (Marko 10:29, 30) Ri a vha funa vhenevha vhahashu nahone zwi a ri takadza uri vha muraḓo wa tshivhidzo.
8. Ndi ngani muhuweleli muṅwe na muṅwe e wa ndeme kha Yehova?
8 Naa vho nangwaho nga muya mukhethwa na vhane vha shumela Yehova lwa tshifhinga tshoṱhe ndi vhone fhedzi vhane vha vha vha ndeme tshivhidzoni? A zwo ngo ralo! Muhuweleli muṅwe na muṅwe ndi wa ndeme kha Yehova na kha tshivhidzo. (Vharoma 10:15; 1 Vhakor. 3:6-9) Mushumo wa ndeme tshivhidzoni ndi u ita uri vhathu vha vhe vhafunziwa vha Yesu Kristo. (Mat. 28:19, 20; 1 Tim. 2:4) Vhahuweleli vhoṱhe hu sa londwi uri vho lovhedzwa kana a vho ngo lovhedzwa vha dzhia wonoyu mushumo u wa ndeme khavho.—Mat. 24:14.
9. Ndi ngani ri tshi dzhiela nṱha vhahashu vha tshifumakadzini?
9 Yehova u sumbedza uri u hulisa vhahashu vha tshifumakadzini nga u vha ṋea mushumo wa ndeme tshivhidzoni. U funa vhenevho vhafumakadzi vho vhingwaho, vhomme, dzitshilikadzi na vha songo vhingwaho vhane vha mu shumela nga u fhulufhedzea. Bivhili i amba nga vhafumakadzi vhanzhi vhe vha takadza Yehova. Vha khoḓwa sa tsumbo dzavhuḓi musi zwi tshi ḓa kha vhuṱali, lutendo, u fhisea, tshivhindi, mafunda na mishumo yavhuḓi. (Luka 8:2, 3; Mish. 16:14, 15; Vharoma 16:3, 6; Vhafil. 4:3; Vhahev. 11:11, 31, 35) Ri livhuwa Yehova uri na riṋe tshivhidzoni ri na vhahashu vha tshifumakadzini vhane vha fana na vhenevha vhafumakadzi vha kale.
10. Ndi ngani vhaaluwa vhe vha ndeme tshivhidzoni?
10 Ri dovha ra takadzwa nga uri ri na vhaaluwa vhanzhi tshivhidzoni. Zwiṅwe zwivhidzo zwi na vhaaluwa vhe vha shumela Yehova vhutshilo havho hoṱhe nga u fhulufhedzea. Vhaṅwe vhaaluwa hu nga vha hu si kale vho wana ngoho. Vhunzhi havho vha na mutakalo u si wavhuḓi ngauri vha khou aluwa vha tshi ya. Zwenezwo zwi nga ita uri vha si kone u shuma nga ho engedzeaho tshivhidzoni na tsimuni. Naho zwo ralo, vha ita zwoṱhe zwine vha nga kona tsimuni, vha shumisa nungo dzavho dzoṱhe u khuthadza na u gudisa vhaṅwe. Ri a vhuyelwa nga tshenzhelo dzavho. Nahone ndi vha ndeme vhukuma kha Yehova na kha riṋe.—Mir. 16:31.
11-12. No ṱuṱuwedzwa hani nga vhaswa tshivhidzoni tshaṋu?
11 Vhaswa na vhone ndi vha ndeme kha Yehova. Vha ṱangana na thaidzo nnzhi ngauri vha khou aluwa kha shango ḽine ḽa vhuswa na u ṱuṱuwedzwa nga Saṱhane. (1 Yoh. 5:19) Ri a ṱuṱuwedzea musi ri tshi vhona vhaswa vha tshi fhindula miṱanganoni, vha tshi ya tsimuni na u imelela ngoho nga tshivhindi. Vhaswa, ni vha ndeme tshivhidzoni tsha Yehova.—Ps. 8:2.
12 Zwi a konḓela vhaṅwe vhahashu u ḓipfa vhe vha ndeme tshivhidzoni. Ndi mini tshine tsha nga thusa muṅwe na muṅwe washu uri a pfe e wa ndeme tshivhidzoni? Kha ri vhone.
NI WA NDEME TSHIVHIDZONI
13-14. Ndi ngani vhaṅwe vha tshi nga ḓipfa vhe si vha ndeme tshivhidzoni?
13 Kha ri ambe nga ha tshithu tsha vhuvhili tshine ra nga tshi guda kha tshifanyiso tsha Paulo. U amba nga thaidzo ine vhanzhi vha vha nayo ya uri zwi a vha konḓela u ḓipfa vhe vha ndeme tshivhidzoni. O ṅwala uri: “Arali mulenzhe wa ri, ‘A thi muraḓo wa muvhili ngauri a thi tshanḓa,’ zwenezwo a zwi ambi uri a si muraḓo wa muvhili. Arali nḓevhe ya ri, ‘A thi muraḓo wa muvhili ngauri a thi ḽiṱo,’ zwenezwo a zwi ambi uri a si muraḓo wa muvhili.” (1 Vhakor. 12:15, 16) O vha a khou ri gudisa mini?
14 Arali na ḓivhambedza na vhaṅwe tshivhidzoni, zwi nga ni konḓela u ḓipfa ni wa ndeme. Vhaṅwe tshivhidzoni vha nga vha vha tshi kona u funza, u dzudzanya kana u khuthadza na u ṱuṱuwedza vhaṅwe. Khamusi ni ḓipfa u nga a ni na vhukoni vhu fanaho na havho. Zwenezwo zwi sumbedza uri ni a ḓiṱukufhadza. (Vhafil. 2:3) Fhedzi ni ṱhogomele. Arali na dzula ni khou tshi ḓivhambedza na vhomakone ni ḓo kulea nungo. Ni nga kha ḓi ḓipfa ni si wa ndeme tshivhidzoni. Ndi mini zwine zwa nga ni thusa uri ni ḓipfe ni wa ndeme tshivhidzoni?
15. U ya nga 1 Vhakorinta 12:4-11, ri tea u humbula mini nga vhukoni vhune ra nga vha ri naho?
15 Humbulani uri Yehova o ṋea Vhakriste vha kale muya mukhethwa uri vha vhe na zwifhiwa zwi sa fani. (Vhalani 1 Vhakorinta 12:4-11.) Yehova o vha ṋea vhukoni vhu sa fani, fhedzi muṅwe na muṅwe wavho o vha e wa ndeme. Ṋamusi muya mukhethwa a u iti uri ri vhe na vhukoni nga lwa vhuṱolo. Na ṋamusi, ri na vhukoni vhu sa fani, fhedzi roṱhe ri vha ndeme kha Yehova.
16. Muapostola Paulo o ri eletshedza uri ri ite mini?
16 Nṱhani ha u ḓivhambedza na vhaṅwe, ri nga shumisa nyeletshedzo ya Paulo ine ya ri: “Muthu nga a ṱolisise mishumo yawe, ndi hone a tshi ḓo takalela zwe a shuma, a sa ḓivhambedzi na muṅwe muthu.”—Vhagal. 6:4.
17. Ri ḓo vhuyelwa hani arali ra shumisa nyeletshedzo ya Paulo?
17 Ra shumisa nyeletshedzo ya Paulo ya uri muṅwe na muṅwe a ṱolisise mishumo yawe, ri nga kona u vhona uri ri na vhukoni vhune vhaṅwe vha si vhe naho. Sa tsumbo, muhulwane a nga vha e si na vhukoni ha u ṋekedza nyambo dzi nyanyulaho, fhedzi a tshi tou vha makone kha u ita vhafunziwa. Kana a nga vha a songo dzudzanyea u fana na vhaṅwe vhahulwane tshivhidzoni, fhedzi a vha e na lufuno na vhulenda lune vhaṅwe tshivhidzoni vha pfa vho vhofholowa u mu humbela nyeletshedzo i bvaho Maṅwaloni. Kana a tshi ḓivhelwa u ṱanganedza vhaeni. (Vhahev. 13:2, 16) Ra livhisa ṱhogomelo kha vhukoni hashu ri ḓo takadzwa nga zwine ra zwi ita tshivhidzoni. A ri nga vhi na vivho kha vhahashu vhane vha vha na vhukoni vhu sa fani na hashu.
18. Ri nga khwinisa hani vhukoni hashu?
18 Roṱhe ri tea u vha na lutamo lwa u khwinisa vhukoni hashu hu sa londwi mushumo une ra u ita tshivhidzoni. Yehova u ri thusa uri ri khwinise vhukoni hashu a tshi shumisa ndangulo yawe. Sa tsumbo, miṱangano yashu ya vhukati ha vhege i ri gudisa nḓila ine ra nga khwinisa ngayo musi ri tsimuni. Naa ni a lingedza u shumisa zwine na zwi guda kha yeneyo miṱangano?
19. Ni nga thuswa nga mini uri ni kone u swikelela tshipikwa tsha u ya tshikoloni tsha SKE?
19 Yehova u dovha a ri gudisa a tshi shumisa Tshikolo tsha Vhahuweleli vha Muvhuso kana SKE. Vhahashu vhane vha vha kha tshumelo ya tshifhinga tshoṱhe vha re na miṅwaha ya 23 u ya kha 65 vha nga ya kha tshenetshi tshikolo. Khamusi ni nga vhona u nga ni nga si kone u swikelela tshenetshi tshipikwa tsha u ya tshikoloni tsha SKE. Fhedzi nṱhani ha u humbula uri ndi mini tshine tsha nga ni thivhela u ya, humbulani uri ndi ngani ni tshi ṱoḓa u ya kha tshenetsho tshikolo. Nga murahu, ni ite nzudzanyo ine ya ḓo ni thusa uri ni kone u fanelea u ya kha tshenetsho tshikolo. Yehova a nga ni thusa uri ni ite zwithu zwe na vha ni tshi vhona u nga ni nga si kone u zwi ita.
SHUMISANI VHUKONI HAṊU U ITELA U KHWAṰHISA TSHIVHIDZO
20. Ri guda mini kha Vharoma 12:6-8?
20 Tshithu tsha vhuraru tshine ra tshi guda kha tshifanyiso tsha Paulo tshi wanala kha Vharoma 12:6-8. (Vhalani.) Kha lwonolo luṅwalo Paulo o dovha a sumbedza uri vhathu vhoṱhe tshivhidzoni vha na vhukoni vhu sa fani. Fhedzi o ri ṱuṱuwedza uri ri shumise vhukoni hashu u itela u khwaṱhisa tshivhidzo.
21-22. Ri nga guda mini kha Robert na Vho Episcopo?
21 Kha ri ambe nga tsumbo ya wahashu Robert. * Onoyo wahashu o vha a khou shuma kha ḽiṅwe shango nahone nga murahu o humbelwa uri a ye u shuma Bethele ya shango ḽine a bva khaḽo. Naho vhahashu vho mu vhudza uri a hu na tshe a khakha, fhedzi ene o ri: “Lwa miṅwedzi minzhi ndo vha ndi songo takala ngauri ndo vha ndi tshi khou humbula uri ndo kundelwa u ita mushumo wanga zwavhuḓi. Nga zwiṅwe zwifhinga ndo vha ndi tshi humbula uri ndi khwine u litsha u shuma Bethele.” O thuswa nga mini uri a dovhe a takale? Muhulwane ngae o mu humbudza uri kha mushumo wo fhiraho, Yehova o vha a tshi khou mu gudisa na u mu lugisela uri a kone u ita mushumo une a vha nawo zwino nga nḓila i bvelelaho. Robert o zwi vhona uri ndi khwine uri a litshe zwithu zwi re murahu nahone a livhise ṱhogomelo kha zwine a khou zwi ita zwino.
22 Wahashu Vho Felice Episcopo vho ṱangana na zwithu zwi fanaho. Wahashu Vho Episcopo na mufumakadzi wavho vho graduweitha tshikoloni tsha Gilead nga 1956 nahone vha shuma sa mulavhelesi ngei Bolivia. Nga 1964 vho mbo ḓi vha na ṅwana. Vho Episcopo vho ri: “Zwo ri konḓela u litsha mushumo we ra vha ri tshi u funa. Ndo ḓipfa ndo kulea nungo lwa ṅwaha woṱhe. Fhedzi Yehova o nthusa uri ndi shandule mavhonele anga nahone ndi livhise ṱhogomelo kha u vha mubebi.” Naa na inwi ni ḓipfa u fana na wahashu Robert kana Vho Episcopo? Naa ni ḓipfa no kulea nungo nga nṱhani ha uri a ni tsha ita mushumo we na vha ni tshi u ita tshifhingani tsho fhiraho? Arali zwo ralo, ni ḓo takala arali na nga livhisa ṱhogomelo kha zwine na zwi itela Yehova na vhahashu zwino. Dzulani no farakanea nga u shumisa vhukoni haṋu u itela u thusa vhaṅwe, zwenezwo zwi ḓo ita uri ni takale musi ni tshi khwaṱhisa tshivhidzo.
23. Ri tea u ita mini nahone ri ḓo amba nga ha mini kha thero i tevhelaho?
23 Muṅwe na muṅwe washu ndi wa ndeme kha Yehova. Yehova u ṱoḓa ri tshi vha tshipiḓa tsha muṱa wawe. Arali ra elekanya nga zwine ra nga zwi ita u itela u khwaṱhisa vhahashu nahone ra ita zwoṱhe zwine ra nga kona u itela u zwi ita, ri nga si humbule uri a ri vha ndeme tshivhidzoni. Fhedzi hu pfi mini nga nḓila ine ra dzhia ngayo vhaṅwe tshivhidzoni? Ri nga sumbedza hani uri ri a vha funa na u vha ṱhonifha? Thero i tevhelaho i ḓo amba nga ha zwenezwo.
LUIMBO 24 Iḓani Thavhani Ya Yehova
^ phar. 5 Roṱhe ri a ṱoḓa u ḓipfa ri vha ndeme kha Yehova. Fhedzi nga tshiṅwe tshifhinga ri nga ḓivhudzisa uri: Naa ri vha ndeme khae? Ino thero i ḓo ri thusa u vhona uri muṅwe na muṅwe washu ndi wa ndeme tshivhidzoni.
^ phar. 3 ṰHALUTSHEDZELO YA MAIPFI: Musi ri tshi ri muṅwe na muṅwe washu ndi wa ndeme tshivhidzoni, ri vha ri tshi khou amba uri hu na zwine muṅwe na muṅwe a zwi ita u itela u khwaṱhisa na u ṱuṱuwedza tshivhidzo. Ri nga kona u khwaṱhisa tshivhidzo hu sa londwi muvhala wa lukanda, uri ri na tshelede nngafhani, vhubvo hashu, mvelele yashu kana uri ro funzea u swika ngafhi.
^ phar. 21 Maṅwe madzina o shandulwa.
^ phar. 63 ṰHALUSO YA TSHIFANYISO: Hezwi zwifanyiso zwiraru zwi khou sumbedza zwine zwa itea musi miṱangano i sa athu u thoma, musi i kati na musi yo no fhela. Tshifanyiso 1: Muhulwane u khou ṱanganedza mueni, wahashu ane a kha ḓi vha muswa u khou lugisa maikhi nahone wahashu wa tshifumakadzini u khou amba na mualuwa. Tshifanyiso 2: Vhahashu vha miṅwaha yo fhambanaho vho imisa zwanḓa u itela u fhindula kha Pfunzo ya Tshiingamo. Tshifanyiso 3: Vhavhingani vha khou kunakisa Holo. Mme u khou thusa ṅwana wawe uri a ṋeele kha bogisi. Wahashu a re muswa u khou ṱhogomela khandiso nahone muṅwe wahashu u khou ṱuṱuwedza mualuwa.
