1. Ndi ngani Yehova o ri sika?

HU NA tshifhinga tshee Yehova a vha e eṱhe, fhedzi o vha e si na vhuludu. Naho Yehova o vha e eṱhe, o vha o takala. Fhedzi o sika vhathu na u ita uri vha takale. O ri sika ngauri u a ri funa.—Ps. 36:9; 1 Yoh. 4:19.

2. Yesu na vharuṅwa vho ḓipfa hani nga zwithu zwe Yehova a zwi sika?

² Yehova o thoma nga u sika Murwa wawe Yesu Kristo. O shumisana na Murwa wawe u itela “u sika zwoṱhe”, u katela na vharuṅwa vha dzimiḽioni. (Vhakol. 1:16) Yesu o vha o takala musi a tshi khou shuma na Khotsi awe. (Mir. 8:30) Na vharuṅwa na vhone vho vha vho takala. Vho vhona Yehova na Yesu ane a vha Mushumi a re na Vhutsila vha tshi ita ḽiṱaḓulu na ḽifhasi. Vharuṅwa vho ita mini? Vho “huwelela nga dakalo” musi vha tshi vhona a tshi sika ḽifhasi. A zwi timatimisi uri vho takala musi vha tshi vhona zwoṱhe zwe Yehova a zwi sika, zwihuluhulu musi vha tshi vhona uri o sika na vhathu. (Yobo 38:7; Mir. 8:31) Zwithu zwoṱhe zwe Yehova a zwi sika zwi sumbedza uri u na lufuno nahone o ṱalifha.—Ps. 104:24; Vharoma 1:20.

3. U ya nga 1 Vhakorinta 15:21, 22, ndi mini zwine tshiṱhavhelo tsha Yesu tsha ita uri zwi konadzee?

³ Yehova o vha a tshi ṱoḓa uri vhathu vha tshile kha shango ḽa manaka-naka ḽe a ḽi sika. Adamu na Eva vho khakhela Yehova nahone vha si tsha tshila tshoṱhe. Zwo ita uri vhone na vhaḓuhulu vhavho vha fe. (Vharoma 5:12) Yehova o ita mini? Nga u  ṱavhanya o amba nga ha nḓila ine a ḓo ri tshidza ngayo. (Gen. 3:15) O amba uri o vha a tshi ḓo ṋekedza Murwa wawe Yesu Kristo sa tshiṱhavhelo u itela uri ri kone u vhofhololwa kha tshivhi na lufu. Zwenezwo zwo vha zwi tshi ḓo ri ṋea tshibuli tsha u khetha u mu shumela na u wana vhutshilo vhu sa fheli.—Yoh. 3:16; Vharoma 6:23; vhalani 1 Vhakorinta 15:21, 22.

4. Ri ḓo amba nga ha mbudziso dzifhio kha ino thero?

⁴ Samusi Yehova o fhulufhedzisa uri u ḓo vusa vhafu, hu na mbudziso nnzhi dzine ra nga ḓivhudzisa dzone. Sa tsumbo, ri nga ḓivhudzisa uri vhafu vha ḓo vuswa hani? Naa ri ḓo kona u vha ḓivha musi vha tshi vuswa? U vuswa ha vhafu zwi ḓo ita hani uri riṋe ri takale? U vuswa ha vhafu zwi ri gudisa mini nga ha nḓila ine Yehova a ri funa ngayo, a vha ngayo na vhuṱali na u sa fhela mbilu? Kha ri ambe nga ha dzenedzi mbudziso.

5. Ndi ngani ri sa lavheleli uri vhafu vha vuswe nga tshifhinga tshithihi?

⁵ Ri nga si lavhelele uri vhafu vhoṱhe vha vuswe nga tshifhinga tshithihi. Ndi ngani? Ndi ngauri hu nga vuwa bonyongo, ha ṱanganana, arali vhafu vha vuswa nga tshifhinga tshithihi. Fhedzi ri a zwi ḓivha uri Yehova o dzudzanyea. U a zwi ḓivha uri u itela uri hu dzule hu na mulalo, zwithu zwi tea u itwa nga nḓila yo dzudzanyeaho. (1 Vhakor. 14:33) Musi Yehova a tshi khou shuma na Yesu u itela uri ḽifhasi ḽi kone u dzulwa nga vhathu, o shumisa vhuṱali nahone ho ngo fhela mbilu. Samusi Yehova a tshi ḓo shumisa Yesu u itela u vusa vhafu, na Yesu u ḓo shumisa vhuṱali nahone ha nga fheli mbilu musi a tshi vhusa lwa Miṅwaha ya Tshigidi. U ḓo dovha a ita nga u ralo musi a tshi khou shumisana na vhathu vho ponyokaho Haramagedo u itela u dzudzanya ḽifhasi uri ḽi  kone u dzulwa nga vhathu vhane vha ḓo vuswa.

6. U ya nga Mishumo 24:15, ndi vhafhio vhaṅwe vhane vha ḓo vuswa?

⁶ Nḓila khulwanesa ine vhathu vho ponyokaho Haramagedo vha ḓo thusa ngayo vho vuswaho, ndi nga u vha funza nga ha Muvhuso wa Mudzimu na zwine Yehova a zwi ṱoḓa. Ndi ngani? Ndi ngauri vhunzhi ha vhathu vhane vha ḓo vuswa, vha ḓo vha vhe vhathu “vha songo lugaho.” (Vhalani Mishumo 24:15.) Vha ḓo tea u ita tshanduko nnzhi uri vha kone u wana phaṱhutshedzo dza tshiṱhavhelo tsha Kristo na u tshila nga hu sa fheli. Edzani u humbula uri ri ḓo vha ri tshi khou shuma hani u itela u thusa vhenevha vhathu vhanzhi-vhanzhi u ḓivha Yehova! Naa muthu muṅwe na muṅwe u ḓo vha e na muthu ane a guda nae u fana na zwine ra zwi ita ṋamusi? Naa hu ḓo vha na zwivhidzo zwine vha ḓo iswa khazwo u itela u gudiswa uri vha kone u gudisa vhane vha ḓo vuswa nga murahu havho? Ri ḓo tea u lindela ra vhona uri hu ḓo itea mini. Fhedzi zwine ra zwi ḓivha ndi uri nga murahu ha Miṅwaha ya Tshigidi Kristo a tshi khou vhusa, “ḽifhasi ḽi ḓo vha ḽo ḓala nga nḓivho ya Yehova.” (Yes. 11:9) Mushumo u ḓo vha u munzhi, fhedzi ri ḓo ḓiphina nga u u ita kha yeneyo Miṅwaha ya Tshigidi.

7. Ndi ngani vhathu vha Mudzimu vha tshi ḓo tea u pfela vhuṱungu vho vuswaho musi vha tshi vha gudisa?

⁷ Nga Miṅwaha ya Tshigidi, vhashumeli vhoṱhe vha Yehova vha ḓo tea u bvela phanḓa vha tshi ita tshanduko u itela u mu takadza. Nga zwenezwo, vha ḓo pfela vhuṱungu vho vuswaho, vha vha thusa uri vha ite tshanduko kha zwine vha zwi humbula na zwine vha zwi tama u itela uri vha kone u ita zwine Yehova a zwi funa. (1 Pet. 3:8) Vhathu vho vuswaho vha ḓo zwi vhona uri vhathu vha Yehova vha a ḓiṱukufhadza nahone vha kha ḓi ita tshanduko u itela u takadza Yehova. Zwenezwo zwi ḓo ita uri na vhone vha ṱoḓe u shumela Yehova navho.—Vhafil. 2:12.

8. Ndi ngani ri tshi lavhelela uri ri ḓo kona u ḓivha mashaka na khonani dzashu vhane vha ḓo vuswa?

⁸ Ri nga lavhelela uri vhane vha ḓo ṱanganedza vhathu vho vuswaho vha ḓo kona u vha ḓivha. Ndi ngani? Hu na zwiitisi zwinzhi. Sa tsumbo, nga nṱhani ha nḓila ye Yehova a vusa ngayo vhathu vha tshifhingani tsho fhiraho, ri nga lavhelela uri u ḓo dovha a sika vhathu nga nḓila ye vha vha vhe ngayo musi vha sa athu u fa. Zwenezwo zwi katela mbonalo yavho, nḓila ine vha amba ngayo na nḓila ine vha humbula ngayo. Humbulani uri Yesu o amba uri musi muthu o fa, zwi fana na musi o eḓela, musi a tshi vuswa, zwi fana na musi a tshi khou vuswa khofheni. (Mat. 9:18, 24; Yoh. 11:11-13) Musi muthu a tshi vuwa khofheni, u vha a tshi kha ḓi vha onouḽa, muhumbulo wawe na zwine a zwi ḓivha zwi vha zwi songo shanduka. Kha ri ambe nga ha tsumbo ya Lazaro. O vha o fa lwa maḓuvha maṋa, a tshi vho sina. Fhedzi musi a tshi vuswa, khaladzi dzawe dzo mu ḓivha, na ene a vha ḓivha.—Yoh. 11:38-44; 12:1, 2.

9. Ndi ngani vhafu vha sa ḓo vuswa vho fhelela?

⁹ Yehova o fhulufhedzisa uri musi ri Pharadisoni, a hu na muthu ane a ḓo ri: “Ndi a lwala.” (Yes. 33:24; Vharoma 6:7) Nga zwenezwo, vhane vha ḓo vuswa vha ḓo vuswa vha songo holefhala nahone vha si tsha lwala. Fhedzi a vha nga ṱavhanyi vho vha vhathu vho fhelelaho. Arali vha vuswa vho fhelela, mashaka na khonani vhane vha ḓo vha ṱanganedza vha nga si kone u vha ḓivha. Zwi vhonala u nga a ri nga ḓo fhelela nga khathihi, fhedzi zwi ḓo itea nga zwiṱuku nga zwiṱuku nga tshifhinga tsha Miṅwaha ya Tshigidi. Nga murahu ha Miṅwaha  ya Tshigidi, Yesu u ḓo vhuisela Muvhuso kha Khotsi awe. Nga tshenetsho tshifhinga, Muvhuso u ḓo vha wo no ita zwoṱhe zwine Yehova a ṱoḓa, u katela na u ita uri vhathu vha vhe vho fhelelaho.—1 Vhakor. 15:24-28; Nzumb. 20:1-3.

10. Ni ḓo ḓipfa hani musi vhafu vha tshi vuswa?

¹⁰ Ḓivhoneni ni tshi khou ṱanganedza mashaka na dzikhonani musi vha tshi vuswa. Naa ni ḓo takala lune na vhuya na bva na miṱodzi? Naa ni ḓo takala lune na ḓo renda Yehova nga nyimbo? Zwine ra zwi ḓivha ndi uri ri ḓo funa Yehova na Murwa wawe nga ho engedzeaho ngauri ndi vhone vhe vha ita uri zwi konadzee uri vhafu vha vuswe.

11. U ya nga Yohane 5:28, 29, hu ḓo itea mini kha vhane vha ḓo tshila nga nḓila ine Mudzimu a i takalela?

¹¹ Humbulani nga ha dakalo ḽine vho vuswaho vha ḓo vha naḽo musi vha tshi bvula vhumuthu ha kale nahone vha tshila nga nḓila ine ya takadza Yehova. Vhane vha ḓo ita tshanduko dzenedzo, vha ḓo tshila Pharadisoni nga hu sa fheli. Fhedzi vhane vha sa ḓo shanduka, Yehova ha nga ḓo vha tendela vha tshi ita uri hu si vhe na mulalo Pharadisoni.—Yes. 65:20; Vhalani Yohane 5:28, 29.

12. Vhoṱhe vhane vha ḓo tshila kha ḽifhasi vha ḓo fhaṱutshedzwa hani nga Yehova?

¹² Nga tshifhinga tshine Muvhuso wa ḓo vha u tshi khou vhusa, vhathu vhoṱhe vha Mudzimu vha ḓo kona u vhona uri maipfi a re kha Mirero 10:22 ndi ngoho. Lwonolwo luṅwalo lu ri: “Phaṱhutshedzo dza Yehova dzi ita uri muthu a pfume, ha dzi engedzi nga vhuṱungu.” Muya mukhethwa wa Yehova u ḓo vha thusa uri vha nge Kristo nga zwiṱuku nga zwiṱuku, na u lindela u vhuya u swika vha tshi vha vhathu vho fhelelaho. (Yoh. 13:15-17; Vhaef. 4:23, 24) Musi maḓuvha a tshi khou ḓi ya, vha ḓo vha na nungo na mutakalo wavhuḓi nahone vha ḓo vha vhathu vha khwine. Edzani u vhona uri vhutshilo vhu ḓo vha vhu tshi khou takadza hani! (Yobo 33:25) Fhedzi u elekanya nga ha u vuswa ha vhafu zwi nga ni thusa hani zwino?

13. U ya nga Phisalema 139:1-4, u vuswa ha vhafu zwi ḓo sumbedza hani uri Yehova u a ri ḓivha?

¹³ Samusi ro no zwi amba, musi Yehova a tshi vusa vhathu, vha ḓo vha vha tshi kha ḓi fana na kale nahone muhumbulo wavho na zwine vha zwi ḓivha zwi ḓo vha zwi songo shanduka. Zwenezwi zwi amba uri Yehova u a ni funa lune a ḓivha na u humbula zwine na zwi humbula, nḓila ine na ḓipfa ngayo, zwine na zwi amba na u zwi ita. Ngauralo, arali a nga ni vusa, a nga kona u ni vusa nga nḓila ye na vha ni ngayo. Khosi Davida o vha a tshi zwi ḓivha uri Yehova u a ri ḓivha zwavhuḓi. (Vhalani Phisalema 139:1-4.) Ri ḓipfa hani musi ri tshi humbula nḓila ine Yehova a ri ḓivha ngayo?

14. Ri tea u ḓipfa hani musi ri tshi humbula nga ha nḓila ine Yehova a ri ḓivha ngayo?

¹⁴ A ri tei u vhilaela musi ri tshi humbula nga ha nḓila ine Yehova a ri ḓivha ngayo. Ndi ngani? Humbulani uri Yehova u na ndavha na riṋe. U vhona muṅwe na muṅwe washu e wa ndeme khae. U a humbula zwithu zwoṱhe zwo iteaho vhutshiloni hashu zwine zwa ita uri ri vhe nga nḓila ine ra vha ngayo. Hezwi zwi a khuthadza vhukuma. A ri tei u pfa u nga ri roṱhe. Yehova u dzula e na riṋe nahone u a ṱoḓa u ri thusa.—2 Koron. 16:9.

15. U vuswa ha vhafu zwi sumbedza hani uri Yehova o ṱalifha?

¹⁵ Vhathu vha nga ita zwithu zwine vha sa ṱoḓe u zwi ita musi vho shushedzwa nga u vhudzwa uri vha ḓo vhulawa. Vhathu vhane vha  langiwa nga Saṱhane vha shushedza vhathu uri vha ḓo vha vhulaya arali vha sa rengisa khonani dzavho kana u ita zwithu zwo khakheaho. Fhedzi zwenezwo zwi nga si shume kha riṋe. Ri a ḓivha uri naho vha ri vhulaya, Yehova u ḓo ri vusa. (Nzumb. 2:10) Ri na vhungoho ha uri a hu na zwine vha nga zwi ita zwine zwa nga ita uri ri si tsha shumela Yehova. (Vharoma 8:35-39) Yehova o sumbedza uri o ṱalifha vhukuma nga u ita uri ri vhe na fhulufhelo ḽa uri vhafu vha ḓo vuswa. Ḽeneḽo fhulufhelo ḽi ita uri ri si ofhe musi vhatevheli vha Saṱhane vha tshi ri shushedza uri vha ḓo ri vhulaya arali ra sa ita zwine vha amba. Ḽi dovha ḽa ri fha tshivhindi uri ri dzule ri tshi fhulufhedzea kha Yehova.

16. Ni nga ḓivhudzisa mbudziso dzifhio nahone phindulo dza hone dzi ḓo sumbedza hani uri ni fhulufhela Yehova?

¹⁶ Arali maswina a Yehova a ni shushedza uri a ḓo ni vhulaya, naa ni ḓo fhulufhela uri Yehova u ḓo ni vusa? Ni nga zwi ḓivha hani? Iṅwe nḓila ndi nga u ḓivhudzisa uri: ‘Naa phetho dzine nda dzi ita ḓuvha na ḓuvha dzi sumbedza uri ndi a fhulufhela Yehova?’ (Luka 16:10) Ni nga dovha na ḓivhudza uri: ‘Naa nḓila ine nda tshila ngayo i sumbedza uri ndi a fhulufhela uri Yehova u ḓo nṱhogomela arali nda vhea Muvhuso wawe u thoma?’ (Mat. 6:31-33) Arali na nga fhindula dzenedzo mbudziso nga Ee! ni ḓo vha ni tshi khou sumbedza uri ni a fhulufhela Yehova nahone zwi ḓo ni lugiselela u sedzana na milingo yoṱhe ine ya nga ḓa.—Mir. 3:5, 6.

17. (a) U vuswa ha vhafu zwi sumbedza hani uri Yehova ha fheli mbilu? (b) Ri nga sumbedza hani uri ri a livhuwa u sa fhela mbilu ha Yehova?

¹⁷ Yehova u a ḓivha ḓuvha ḽine a ḓo fhelisa ngaḽo shango ḽa Saṱhane. (Mat. 24:36) Ha nga ḓo fhela mbili nahone a fhelisa shango ḽeneḽo ḓuvha ḽi sa athu u swika. U khou ṱoḓa u vusa vhafu, fhedzi ha khou fhela mbilu. (Yobo 14:14, 15) O lindela tshifhinga tshone-tshone tshi tshi swika uri a vha vuse. (Yoh. 5:28) Ri na zwiitisi zwinzhi zwa u livhuwa u sa fhela mbilu ha Yehova. Humbulani uri vhathu vhanzhi, u katela na riṋe, vho vha na tshifhinga tsha u “rembuluwa” ngauri Yehova ha fheli mbilu. (2 Pet. 3:9) Yehova u ṱoḓa vhathu vhanzhi nga hune zwa konadzea ngaho vha tshi tshila nga hu sa fheli. Ngauralo, kha ri sumbedze uri ri a livhuwa u sa fhela mbilu hawe. Ri nga zwi ita hani? Nga u ita zwoṱhe zwine ra nga kona u wana vhathu “vho ḓiimiselaho u wana vhutshilo vhu sa fheli” na u vha thusa uri vha kone u funa Yehova na u mu shumela. (Mish. 13:48)  Nga zwenezwo, vha ḓo vhuyelwa nga u sa fhela mbilu ha Yehova, u fana na riṋe.

18. Ndi ngani ri sa tei u fhelela vhaṅwe mbilu?

¹⁸ Ngauri Yehova ha fheli mbilu, a nga si lavhelele uri ri vhe vhathu vho fhelelaho musi Miṅwaha ya Tshigidi i sa athu u fhela. Musi tshenetsho tshifhinga tshi sa athu u swika, Yehova o ḓiimisela u ri hangwela zwivhi. Ngauralo, na riṋe ri fanela u mu edzisa nga u sedza zwithu zwavhuḓi kha vhaṅwe na u sa vha fhelela mbilu. Kha ri ambe nga tsumbo ya muṅwe wahashu we munna wawe a thoma u vhilaela nga ho kalulaho na u litsha u ḓa miṱanganoni. O ri: “Hezwi zwithu zwo mmbaisa vhukuma. Vhutshilo hashu ho shanduka nahone ri si tsha kona u ita zwoṱhe zwe ra vha ro amba uri ri ḓo zwi ita.” Onoyo wahashu ho ngo fhelela munna wawe mbilu. O ḓitika nga Yehova, a sa nete. O edzisa Yehova nga u sedza zwithu zwavhuḓi kha munna wawe. O ri: “Munna wanga ndi muthu wavhuḓi nahone u khou ita zwoṱhe zwine a nga kona uri a vhe khwine.” Ndi zwa ndeme uri ri sa fhelele mbilu mashaka kana vhahashu tshivhidzoni vhane vha khou sedzana na milingo.

19. Ri tea u ḓiimisela u ita mini?

¹⁹ Yesu na vharuṅwa vho vha vho takala vhukuma musi ḽifhasi ḽi tshi sikwa. Fhedzi humbulani uri vha ḓo takala hani musi vha tshi vhona ḽifhasi ḽo ḓala nga vhathu vhane vha funa Yehova na u mu shumela. Humbulani uri vhane vha ḓo ya ṱaḓulu vha ḓo takala hani musi vha tshi vhona vhathu vha tshi khou vhuyelwa nga mishumo yavho. (Nzumb. 4:4, 9-11; 5:9, 10) Dovhani ni humbule musi ri tshi vho tou lila miṱodzi ya dakalo fhedzi, ri si tsha lwala, u ṱungufhala na u fa. (Nzumb. 21:4) Musi zwenezwo zwi sa athu u itea, ḓiimiseleni u edzisa Khotsi ane a vha na lufuno, vhuṱali na a sa fheli mbilu. Arali na ita zwenezwo, ni ḓo takala vhukuma hu sa londwi uri ni khou sedzana na milingo ifhio. (Yak. 1:2-4) Ri a takala nge Mudzimu a ri fhulufhedzisa uri “u ḓo vusa [vhathu].”—Mish. 24:15.