Hu na vhuṱanzi vhu sumbedzaho uri Yesu o vha Tshifhe Muhulu musi a tshi lovhedzwa nga 29 C.E. Ndi vhuṱanzi vhufhio? Musi Yesu a tshi lovhedzwa, o vha a tshi khou sumbedza uri u khou ṱoḓa u ṋekedza vhutshilo hawe sa tshiṱhavhelo kha aḽeṱare ya pfanyisedzo ine ya vha i khou fanyisela u ita “zwine Mudzimu a zwi funa.” (Vhagal. 1:4; Vhahev. 10:5-10) Samusi aḽeṱare i ya ndeme vhukuma kha thembele, thembele ya pfanyisedzo i nga vha yo thoma u vha hone musi Yesu a tshi lovhedzwa. Thembele ya pfanyisedzo ya Yehova ndi nḓila yo teaho ine Yehova a ṱoḓa ri tshi mu gwadamela ngayo yo thewaho kha tshiṱhavhelo tsha Yesu Kristo.—Mat. 3:16, 17; Vhahev. 5:4-6.

Ho vha hu tshi ṱoḓea tshifhe muhulu kha thembele ya pfanyisedzo. Yehova o ḓodza Yesu “nga muya mukhethwa na u mu ṋea maanḓa” uri a vhe Tshifhe Muhulu. (Mish. 10:37, 38; Marko 1:9-11) Fhedzi ri nga vha hani na vhuṱanzi ha uri Yesu o vhewa uri a vhe Tshifhe Muhulu musi a sa athu u fa na u vuswa? Tsumbo ya Aroni na vhaṅwe vhe vha vha vhotshifhe vhahulu musi Aroni o no fa, i ḓo ri thusa u fhindula yeneyo mbudziso.

U ya nga Mulayo we Yehova a u ṋea Mushe, musi hu tshi shumiswa dennde ḽikhethwa, tshifhe muhulu ho vha hu ene fhedzi we a vha a tshi dzhena fhethu Hukhethwa-khethwa. Na musi hu tshi shumiswa thembele, tshifhe muhulu ho vha hu ene fhedzi we a vha a tshi dzhena fhethu Hukhethwa-khethwa. Fhethu Hukhethwa-khethwa ho vha ho khethekanywa na fhethu hukhethwa nga khetheni. Tshifhe muhulu o vha a tshi fhira ḽeneḽo khetheni a ya fhethu Hukhethwa-khethwa nga Ḓuvha ḽa u Pfumelelwa fhedzi. (Vhahev. 9:1-3, 6, 7) Aroni na vhe vha vha tshifhe muhulu musi o no fa, vho vhewa uri vha vhe tshifhe muhulu musi vha sa athu u dzhena fhethu Hukhethwa-khethwa. Nga zwenezwo, na Yesu o ḓodzwa uri a vhe Tshifhe Muhulu wa thembele ya pfanyisedzo musi a sa athu u fa. Musi a tshi fa, o “pfuka labi [kana khetheni]” a ya fhethu Hukhethwa-khethwa hune ha vha ṱaḓulu, “ḽeneḽo labi [kana khetheni] ndi muvhili wawe.” (Vhahev. 10:20) Ndi ngazwo Paulo o amba uri Yesu o “ḓa sa tshifhe muhulu,” a dzhena “denndeni ḽa ndeme vhukuma na ḽa khwine, ḽi songo itwaho nga zwanḓa,” a dzhena “ṱaḓulu.”—Vhahev. 9:11, 24.

Mulanga muswa wo thoma u shuma na u khwaṱhisedzwa nga tshifhinga tshithihi. Ndi ngani ri tshi ralo? Musi Yesu a tshi ya ṱaḓulu nahone a ṋekedza tshiṱhavhelo tsha vhutshilo hawe a tshi itela riṋe, o vha a tshi khou ita tshithu tsha u thoma kha zwiraru zwine zwa tea u itwa u itela uri mulanga muswa u kone u khwaṱhisedzwa. Zwenezwo zwithu zwiraru zwo dovha zwa itwa u itela uri mulanga muswa u kone u thoma u shuma. Ndi zwifhio zwenezwo zwithu zwiraru?

Tsha u thoma, o ya kha Yehova, tsha vhuvhili o ṋekedza tshiṱhavhelo kha Yehova. Tsha vhuraru, Yehova o ṱanganedza tshenetsho tshiṱhavhelo. Mulanga muswa wo vha u sa khou shuma musi zwenezwo zwithu zwiraru zwi sa athu u itea.

Bivhili a i ri vhudzi uri Yehova o ṱanganedza lini tshiṱhavhelo tsha Yesu. Nga zwenezwo a ri nga si ambe uri mulanga muswa wo khwaṱhisedzwa na u thoma u shuma lini. Fhedzi ri a zwi ḓivha uri Yesu o ya ṱaḓulu musi ho sala maḓuvha a 10 uri pentekoste i thome. (Mish. 1:3) Kha eneo maḓuvha maṱuku-ṱuku, Yesu o ṋekedza tshiṱhavhelo tshawe kha Yehova nahone Yehova a tshi ṱanganedza. (Vhahev. 9:12) Vhuṱanzi ha uri mulanga muswa wo thoma u shuma ho vhonala nga Pentekoste. (Mish. 2:1-4, 32, 33) Zwi tou vha khagala uri mulanga muswa wo vha wo no thoma u shuma.

Nga u tou pfufhifhadza, mulanga muswa wo khwaṱhisedzwa na u thoma u shuma musi Yehova a tshi ṱanganedza tshiṱhavhelo tsha Yesu na u ita uri vhaḓodzwa vha vhe tshipiḓa tshawo. Tshifhe Muhulu Yesu o shuma sa Mupfumedzanyi musi wonoyu mulanga muswa u tshi thoma u shuma.—Vhahev. 7:25; 8:1-3, 6; 9:13-15.