1. Ndi ngoho ifhio ye na i wana musi ni tshi thoma u guda Bivhili?

 NAA ni kha ḓi humbula musi ni tshi thoma u guda Bivhili? Ni nga vha no mangadzwa nga u ḓivha uri Mudzimu u na dzina. Khamusi ni nga vha no takala musi ni tshi ḓivha uri Mudzimu ha tambudzi vhathu nga mulilo heleni. Nahone mbilu yaṋu i nga vha yo fhufhuma nga dakalo musi ni tshi ḓivha uri vhafunwa vhaṋu vho lovhaho ni ḓo dovha na vha vhona ḽifhasini ḽa pharadiso.

2. U engedza kha ngoho ye na guda Bivhilini, ndi mvelaphanḓa ifhio ye na i ita? (Vhaefesa 5:1, 2)

² Musi ni tshi khou bvela phanḓa ni tshi guda Ipfi ḽa Mudzimu, no funa Yehova nga ho engedzeaho. Lwonolwo lufuno lwo ni ṱuṱuwedza uri ni shumise zwe na zwi guda. No dzhia phetho dzo thewaho kha milayo ya Bivhili. No khwinisa mavhonele aṋu na nḓila ine na ḓifara ngayo ngauri no ṱoḓa u takadza Mudzimu. U tou fana na ṅwana a tshi edzisa vhabebi vhawe vha re na lufuno, no edzisa Khotsi aṋu wa ṱaḓulu.—Vhalani Vhaefesa 5:1, 2.

3. Ndi mbudziso dzifhio dzine ra nga ḓivhudzisa?

³ Ri nga ḓivhudzisa uri: ‘Naa ndi funa Yehova zwino u fhira zwiḽa ndi tshi thoma u vha Mukriste? U bva tshee nda lovhedzwa, naa nḓila ine nda humbula ngayo na nḓila ine nda ita ngayo zwithu i fana na ya Yehova, zwihuluhulu musi zwi tshi ḓa kha u sumbedza lufuno kha vhahashu?’ Naho ri tshi nga ṱhogomela uri lufuno lune ra vha nalwo kha Yehova na vhahashu a lwo ngo tsha khwaṱha nga nḓila ye lwa vha lu ngayo, a ro ngo tea u kulea nungo. Ndi zwe zwa itea kha Vhakriste vha tshifhingani tsha kale. Yesu ho ngo vha fhelela mbilu, na riṋe ha ri fheleli mbilu. (Nzumb. 2:4, 7) U a zwi ḓivha uri ri nga vusulusa lufuno lwe ra vha ri nalwo musi ri tshi thoma u guda ngoho.

4. Ndi mini zwine ra ḓo zwi haseledza kha ino thero?

 ⁴ Kha ino thero ri ḓo haseledza nga ha nḓila ine ra nga bvela phanḓa ngayo ri tshi funa Yehova na vhahashu. Ri ḓo dovha ra vhona dziṅwe phaṱhutshedzo dzine ra ḓo dzi wana musi ri tshi funa Yehova na vhahashu nga ho engedzeaho.

5-6. Ndi thaidzo dzifhio dze muapostola Paulo a sedzana nadzo tshifhingani tsha vhuḓinḓa hawe, fhedzi ndi mini tsho mu ṱuṱuwedzaho uri a bvele phanḓa a tshi shumela Yehova?

⁵ Muapostola Paulo o shumela Yehova o takala naho zwo vha zwi songo mu lelutshela tshifhinga tshoṱhe. Kanzhi Paulo o vha a tshi tea u fara nyendo ndapfu nahone u fara lwendo nga tshenetshiḽa tshifhinga zwo vha zwi songo leluwa. Musi o fara dzenedzo nyendo, nga tshiṅwe tshifhinga Paulo o vha a tshi vha e “khomboni milamboni” na “kha mavemu.” Tshiṅwe tshifhinga maswina awe o vha a tshi ita na u mu rwa. (2 Vhakor. 11:23-27) Nahone nga tshiṅwe tshifhinga, Vhakriste ngae vho vha vha sa sumbedzi u livhuwa vhuḓidini he a vhu ita u itela u vha thusa.—2 Vhakor. 10:10; Vhafil. 4:15.

⁶ Ndi mini tsho thusaho Paulo uri a kone u bvela phanḓa na u shumela Yehova? Paulo o guda zwinzhi nga ha zwine Yehova a vha zwone Maṅwaloni na kha tshenzhelo dzawe ene muṋe. Zwenezwo zwo khwaṱhisedza Paulo uri Yehova u a mu funa nga maanḓa. (Vharoma 8:38, 39; Vhaef. 2:4, 5) Zwenezwo zwa ita uri na ene a fune Yehova nga maanḓa. Paulo o sumbedza uri u funa Yehova ngauri ‘o shumela vhakhethwa, na zwino u kha ḓi vha shumela.’—Vhahev. 6:10.

7. Ri nga engedza hani lufuno lwashu kha Yehova?

⁷ Ri nga engedza lufuno lwashu kha Yehova nga u ita vhuḓidini ha u guda Ipfi ḽawe nga vhuronwane. Musi ni tshi khou guda Bivhili, lingedzani u vhona uri zwine na khou zwi vhala zwi ni gudisa mini nga ha Yehova. Ḓivhudziseni uri: ‘Enea mafhungo ane nda khou a vhala a sumbedza hani uri Yehova u a mpfuna? A nṋea zwiitisi zwifhio zwa u funa Yehova?’

8. Thabelo i nga ri thusa hani uri lufuno lwashu kha Yehova lu engedzee?

⁸ Iṅwe ndila ine ra nga ita ngayo uri lufuno lwashu kha Yehova lu engedzee ndi nga u mu vhudza zwi re mbiluni dzashu nga thabelo. (Ps. 25:4, 5) Yehova u ḓo fhindula thabelo dzashu. (1 Yoh. 3:21, 22) Muṅwe wahashu wa tshifumakadzini wa ngei Asia ane a pfi Khanh o ri: “Mathomoni lufuno lwanga kha Yehova lwo vha lwo thewa kha nḓivho, fhedzi lufuno lwanga lwo engedzea musi ndi tshi vhona nḓila ine a fhindula ngayo thabelo dzanga. Zwenezwi zwo ita uri ndi ṱoḓe u ita zwithu zwine zwa mu takadza.” b

9. Timotheo o sumbedza hani uri o vha a tshi funa vhahawe nga ho engedzeaho?

⁹ Musi ho no fhela miṅwaha minzhi Paulo o no vha Mukriste, o ṱangana na Timotheo, muṱhannga we a vha a tshi funa Yehova na u funa vhathu. Paulo o vhudza Vhafilipi uri: “A thi na muṅwe ane a nga [Timotheo], ane a ḓo ni ṱhogomela zwa vhukuma.” (Vhafil. 2:20) Paulo o vha a si khou amba nga ha vhukoni ha Timotheo ha u dzudzanya zwithu kana ha u amba khagala, fhedzi Paulo o takadzwa nga nḓila ye Timotheo a vha a tshi funa vhahawe ngayo. A zwi timatimisi uri vha zwivhidzoni zwe Timotheo a vha a tshi zwi thusa vho vha vha tshi lavhelela nga maṱo matswuku uri a ḓe a vha dalele.—1 Vhakor. 4:17.

10. Vho Anna na mukalaha wavho vho sumbedza hani uri vha funa vhahavho?

¹⁰ Na riṋe ri ṱoḓa nḓila dzine ra nga thusa ngadzo vhahashu. (Vhahev. 13:16) Ṱhogomelani tshenzhelo ya Vho Anna vhe ra amba nga havho  kha thero yo fhiraho. Nga murahu ha ḓumbu na mvula khulu, Vho Anna na mukalaha wavho vho dalela muṅwe muṱa wa Dziṱhanzi nahone vha wana uri ḽeneḽo ḓumbu ḽo tshinyadza ṱhannga ya nnḓu yavho. Vha wonoyo muṱa vho vha vha si tsheena zwiambaro zwo kunaho. Vho Anna vha ri: “Ro dzhia zwiambaro zwavho ra vha kuvhela, ra vha humisela zwone ro zwi aina nahone ro zwi peta zwavhuḓi. Kha riṋe zwo vha zwi zwithu zwi sa dini. Fhedzi zwo fhaṱa vhukonani vhune na ṋamusi vhu tshee ho khwaṱha.” Lufuno lune Vho Anna na mukalaha wavho vha vha nalwo kha vhahavho lwo vha ṱuṱuwedza uri vha vha thuse.—1 Yoh. 3:17, 18.

11. (a) Vhuḓidini hashu ha u sumbedza lufuno vhu nga kwama hani vhaṅwe? (b) U ya nga Mirero 19:17, Yehova u aravha hani musi a tshi vhona ri tshi sumbedza vhaṅwe lufuno?

¹¹ Musi ri tshi fara vhaṅwe nga nḓila ya lufuno na vhuthu, vha a kona u zwi vhona uri ri khou ita vhuḓidini ha u edzisa Yehova. Nahone vha nga livhuwa vhuthu hashu nga nḓila khulwane u fhira na ye ra vha ro lavhelela yone. Khanh we ra amba nga hae mathomoni u kha ḓi humbula zwavhuḓi vhathu vhe vha mu thusa. U ri: “Ndi livhuwa zwihulu vhahashu vhoṱhe vhe vha ṱuwa na nṋe musi ri tshi ya tsimuni. Vho vha vha tshi ḓa vha ndzhia, vha ḽa zwiḽiwa zwa nga masiari na nṋe nahone vha dovha vha nkhumisela hayani. Zwino ndi vho zwi ṱhogomela uri zwo vha zwi tshi ṱoḓa vhuḓidini vhuhulwane vhukuma. Nahone vho zwi ita nga lufuno.” Zwi tou pfala uri a si vhoṱhe vhane vha ḓo livhuwa zwe ra vha itela zwone. Musi Khanh a tshi amba nga ha vhe vha mu thusa, o ri: “Ndi tou tama ngavhe ndo vha ndi tshi vha lifhela kha zwe vha nnyitela zwone, fhedzi a thi ḓivhi hune vha dzula hone zwino. Naho zwo ralo, Yehova u a hu ḓivha. Ndi rabela uri a vha lifhele zwe vha itela nṋe.” Zwe Khanh a amba ndi ngoho. Yehova u a ṱhogomela zwithu zwiṱukuṱuku zwavhuḓi zwe ra zwi itela vhaṅwe. U zwi dzhia sa tshiṱhavhelo tsha  ndeme nahone sa tshikolodo tshine a ḓo ri badela.—Vhalani Mirero 19:17.

12. Vhahashu vha tshinnani vha nga sumbedza hani uri vha funa vhahavho tshivhidzoni? (Sedzani zwifanyiso.)

¹² Arali ni wahashu wa tshinnani, ni nga sumbedza hani uri ni a funa vhaṅwe na u vha itela zwiṅwe zwithu u itela u vha thusa? Muṅwe wahashu ane a kha ḓi vha muswa ane a pfi Jordan o vhudzisa muṅwe wa vhahulwane uri a nga ita hani zwo engedzeaho u itela u thusa tshivhidzoni. Onoyo muhulwane o khoḓa Jordan kha mvelaphanḓa ye a i ita nahone a mu ṋea nyeletshedzo ya uri a nga ita hani zwo engedzeaho. Sa tsumbo, o eletshedza Jordan uri a nga swika u ṱavhanya Holoni uri a lumelise vhaṅwe, a nga fhindula miṱanganoni, u huwelela e na tshigwada tshawe tsha tsimu na u sedza dziṅwe nḓila dzine a nga thusa ngadzo vhaṅwe. Musi Jordan a tshi tevhela yeneyi nyeletshedzo, ho ngo sokou guda fhedzi vhutsila vhuswa, o guda na u funa vhahawe nga ho engedzeaho. Jordan o guda uri musi wahashu wa tshinnani a tshi vha mushumeli, ha vhi a tshi khou thoma u thusa vhaṅwe, fhedzi u vha a tshi khou tou bvela phanḓa na u vha thusa.—1 Tim. 3:8-10, 13.

13. Lufuno lwo ṱuṱuwedza hani muṅwe wahashu ane a pfi Christian uri a dovhe a fanelee u vha muhulwane?

¹³ Hu pfi mini arali no no vhuya na vha mushumeli kana muhulwane tshifhingani tsho fhiraho? Yehova u a humbula zwe na ita na lufuno lwe lwa ni ṱuṱuwedza uri ni zwi ite. (1 Vhakor. 15:58) U a dovha hafhu a ṱhogomela na lufuno lune na khou bvela phanḓa ni tshi lu sumbedza zwino. Muṅwe wahashu ane a pfi Christian o pfa o kulea nungo musi a tshi bviswa uri a si tsha vha muhulwane. Fhedzi u ri: “Ndo phetha u shumela Yehova nga lufuno hu sa londwi uri ndi na dziṅwe ndugelo kana hai.” Nga u ya ha tshifhinga o dovha a vhuyedzedzwa sa muhulwane. Christian u ri: “Ndo pfa ndi tshi timatima u dovha hafhu nda shuma sa muhulwane. Fhedzi, ndo phetha nga uri arali Yehova a tshi  khou ntendela uri ndo dovhe hafhu ndi shume sa muhulwane, ndi ḓo zwi ita ngauri ndi funa Yehova na vhahashu.”

14. Ni guda mini kha zwe wahashu wa tshifumakadzini wa ngei Georgia a zwi amba?

¹⁴ Vhashumeli vha Yehova vha sumbedza lufuno na kha vhahura vhavho. (Mat. 22:37-39) Sa tsumbo, muṅwe wahashu wa tshifumakadzini ane a dzula ngei Georgia ane a pfi Elena u ri: “U thomani, tshithu tshe tsha nṱuṱuwedza u huwelela ndi u funa Yehova. Fhedzi musi ndi tshi funa Khotsi anga wa ṱaḓulu nga ho engedzeaho, na lufuno lwe nda vha nalwo kha vhathu lwo engedzea. Ndo thoma u humbula nga ha thaidzo dzine vha nga vha vha tshi khou ṱangana nadzo na uri ndi thero dzifhio dzine nda nga dzi shumisa u itela u kwama mbilu dzavho. Musi ndi tshi humbula nga yeneyi nḓila, zwo ita uri ndi ṱoḓe u dzula ndi tshi vha thusa.”—Vharoma 10:13-15.

15-16. Samusi zwo sumbedzwa kha zwifanyiso, ndi phaṱhutshedzo dzifhio dzine ra dzi wana musi ri tshi sumbedza u funa vhahashu?

¹⁵ Musi ri tshi sumbedza vhahashu lufuno, a zwi vhuyedzi vhone fhedzi. Musi COVID-19 i tshi thoma, Wahashu Paolo na mufumakadzi wawe vho gudisa vhahashu vha tshifumakadzini vha vhaaluwa u shumisa zwishumiswa zwavho zwa elekitironiki musi vha tshi huwelela. Muṅwe wahashu wa tshifumakadzini zwo thoma zwi tshi mu konḓela u shumisa tshishumiswa tsha elekitironiki, fhedzi a fhedza o zwi kona. O kona u shumisa tshenetsho tshishumiswa u ramba mashaka awe uri a ḓe Tshihumbudzoni.  Kha vhe a vha ramba, vhathu vha 60 vho kona u vha hone nga videoconference. Onoyo wahashu na mashaka awe oṱhe vho vhuyelwa nga vhuḓidini he Paolo na mufumakadzi wawe vha vhu ita. Nga murahu, onoyo wahashu wa tshifumakadzini o ṅwalela Paolo vhurifhi a ri: “Ndi a livhuwa uri no funḓedza riṋe vhaaluwa. A thi nga hangwi uri Yehova u na ndavha na riṋe na vhuḓidini hoṱhe he na vhu ita u ri thusa.”

¹⁶ Dzenedzi tshenzhelo dzo funza Paolo ngudo ya ndeme. Dzo mu humbudza uri lufuno ndi lwa ndeme vhukuma u fhira ndivho kana vhukoni. O ri: “Ndo vha ndi mulavhelesi wa ḽiisela. Ṋamusi ndi vho zwi vhona uri naho vhahuweleli vho hangwa nyambo dzanga, vha kha ḓi humbula nḓila ye nda vha thusa ngayo.”

17. Ndi nnyi muṅwe ane a ḓo vhuyelwa musi ri tshi sumbedza lufuno?

¹⁷ Musi ri tshi sumbedza vhaṅwe lufuno, na riṋe vhaṋe ri a vhuyelwa nga nḓila i songo lavhelelwaho. Jonathan ane a dzula ngei New Zealand o zwi khwaṱhisedza zwenezwi. Ḽiṅwe ḓuvha nga Mugivhela nga masiari ḓuvha ḽi tshi khou fhisa, o vhona muṅwe wahashu wa muvulanḓila a tshi khou huwelela e eṱhe badani. Jonathan o ita phetho ya uri u ḓo shuma na onoyo muvulanḓila nga Migivhela nga masiari. Ho ngo zwi ṱhogomela nga tshenetsho tshifhinga uri u sumbedza vhuthu nga yeneyo nḓila zwo vha zwi tshi ḓo mu vhuyedza. Jonathan u ri: “Nga tshenetsho tshifhinga ndo vha ndi sa funi tsimu. Fhedzi musi ndi tshi thetshelesa nḓila ine onoyo muvulanḓila a funza ngayo na u vhona a tshi gudisa nga nḓila i bvelelaho vhuḓinḓani, zwo ita uri ndi fune tsimu. Onoyo wahashu o mbo ḓi vha khonani yanga ya tsini nahone a nthusa uri ndi takalele tsimu na u sendela tsini na Yehova.”

18. Yehova u khou ṱoḓa ri tshi ita mini?

¹⁸ Yehova u ṱoḓa uri ri mu fune na u funa vhahashu nga ho engedzeaho. Samusi ro zwi guda kha ino thero, ri nga khwaṱhisa lufuno lwashu kha Yehova nga u vhala Ipfi ḽawe na u elekanya nga haḽo na nga u amba nae nga thabelo tshifhinga tshoṱhe. Lufuno lwashu kha vhahashu lu nga engedzea musi ri tshi vha thusa. Musi lufuno lwashu lu tshi engedzea, ri ḓo sendela tsini-tsini na Yehova na vhahashu nahone ri ḓo ḓiphiṋa nga vhukonani navho lwa tshoṱhe!