Maipfi a Luheberu a ita uri ri pfesese yeneyo ndima nga nḓila dzo fhamba-fhambanaho. Nga zwenezwo, zwithu zwi tevhelaho zwi ḓo ri thusa u pfesesa nga nḓila yo teaho:

1. Humbulisisani nga ha ndima yoṱhe ya Psalme. U shumiswa ha ipfi “ú ralo” kha ndimana ya 12 zwi amba uri phaṱhutshedzo dzine ha khou ambiwa nga hadzo kha ndimana ya 12 u ya kha 14, dzi shuma kha vhathu vhavhuya—vhe vha humbela uri vha ‘lamulelwe na u tshidzwa’ kha vhavhi (ndimana ya 11). Wonoyu muhumbulo wo dovha wa ṱaluswa kha ndimana ya 15, he ha ṅwaliwa luvhili ipfi “mashudu!” ḽine ḽa shuma kha vhenevho vhathu—vhane “Mudzimu [wavho] a vha Yehova.”

2. Kwonoku kupfesesele ku tshimbidzana na dziṅwe ndimana dzi re Bivhilini dzine dza amba nga ha phaṱhutshedzo dze Mudzimu a dzi fulufhedzisa vhathu vhawe vha fulufhedzeaho. Heyi Psalme i sumbedza fulufhelo ḽo khwaṱhaho ḽe Davida a vha e naḽo ḽa uri musi Mudzimu o no vhofholola Vhaisiraele zwanḓani zwa maswina avho, u ḓo vha fhaṱutshedza nga u ita uri vha takale na u ita uri vha pfume. (Lev. 26:9, 10; Doit. 7:13; Ps. 128:1-6) Sa tsumbo, Doiteronomio 28:4 i ri: “U ḓo vha wa mashudu nga zwine zwa bebiwa muṱani wau, na masimuni au, na madangani au, nga u anda ha dzikholomo dzau na masambi a zwifuwo.” Ndi ngoho uri musi hu tshi vhusa Salomo murwa wa Davida, tshaka dzo vha na mulalo u sa athu u vhuya wa vha hone na u pfuma. Zwiṅwe hafhu, u vhusa ha Salomo zwo livhisa kha u vhusa ha Messia.—1 Dzikh. 4:20, 21; Ps. 72:1-20.

Nga zwenezwo, nḓila ye maipfi u ane a vha kha Psalme ya 144 a vhekanywa ngayo, a i shanduli nḓila ine ra pfesesa ngayo zwine Bivhili ya zwi funza. Naho zwo ralo, zwi ita uri ndima ya Psalme yoṱhe i bvisele khagala fulufhedziso ḽine vhashumeli vha Yehova vha vha naḽo—u haṱulwa ha vhathu vhavhi zwine zwa ḓo ita uri vhathu vho lugaho vha vhe na mulalo nahone vha pfume.—Ps. 37:10, 11.