1-2. Ndi ngani Yesu o vha o tsikeledzea?

NGA ḓuvha ḽawe ḽa u fhedza musi Yesu a sa athu fa, o vha o tsikeledzea. Tshifhinga tsha uri a vhulawe lu vhavhaho nga vhanna vhavhi tsho vha tshi tsini. Yesu o vha a sa khou vhilaedziswa fhedzi ngauri u ḓo fa hu si kale. O vha a tshi funa na u ṱoḓa u takadza Khotsi awe. Yesu o vha a tshi zwi ḓivha uri arali a fulufhedzea musi a tshi lingwa lwa u fhedzisela, zwo vha zwi tshi ḓo rendisa dzina ḽa Yehova ḽo tshinyiwaho. Zwiṅwe hafhu, Yesu o vha a tshi funa vhathu nahone o vha a tshi zwi ḓivha uri fulufhelo ḽavho ḽa uri vha tshile lwa tshoṱhe ḽo vha ḽo ḓitika nga uri a fulufhedzee u swika a tshi fa.

² Yesu o vha e na mulalo naho o vha e nga fhasi ha mutsiko muhulwane. O vhudza vhaapostola vhawe uri: “Ndi ni ṋea mulalo wanga.” (Yoh. 14:27) O vha e na “mulalo wa Mudzimu,” u dzika hune ha vha hone nga nṱhani ha vhushaka havhuḓi vhune muthu a vha naho na Yehova. Wonoyo mulalo wo thusa Yesu uri a sa vhilaele.—Vhafil. 4:6, 7.

3. Ri ḓo ṱolisisa mini kha ino thero?

³ A ri nga sedzani na vhuimo vhu konḓaho u fana na he Yesu a sedzana naho, fhedzi vhoṱhe vhane vha tevhela Yesu vha ḓo sedzana na vhuimo vhu konḓaho. (Mat. 16:24, 25; Yoh. 15:20) Ri ḓo tsikeledzea nga zwiṅwe zwifhinga u fana na Yesu. Ndi mini zwine ra nga zwi ita uri ri si vhilaele nga ho kalulaho lune ra xelelwa nga mulalo? Kha ri ṱolisise zwithu zwiraru zwe Yesu a zwi ita musi e kha vhuḓinḓa hawe ha kha ḽifhasi na nḓila ine ra nga mu edzisa ngayo musi ro sedzana na vhuimo vhu konḓaho.

4. U ya nga 1 Vhathesalonika 5:17, ndi dzifhio dziṅwe tsumbo dzine dza sumbedza uri Yesu o rabela lunzhi nga ḓuvha ḽawe ḽa u fhedza e kha ḽifhasi?

⁴ Vhalani 1 Vhathesalonika 5:17. Yesu o rabela lunzhi nga ḓuvha ḽawe ḽa u fhedza musi e kha ḽifhasi. Musi a tshi sumbedza vhafunziwa  vhawe nḓila ine vha fanela u humbula ngayo lufu lwawe, o rabelela tshinkwa na tshinwelo. (1 Vhakor. 11:23-25) O rabela na vhafunziwa vhawe musi a sa athu ṱuwa fhethu he vha vha vho farela hone Paseka. (Yoh. 17:1-26) Musi ene na vhafunziwa vhawe vha tshi swika Thavhani ya Miṱwari nga honoho vhusiku, o rabela lunzhi. (Mat. 26:36-39, 42, 44) Maipfi a u fhedzisela e a a amba o vha e thabelo. (Luka 23:46) Nga thabelo, Yesu o vhudza Yehova zwoṱhe zwe zwa itea nga ḓuvha ḽawe ḽa u fhedza musi e kha ḽifhasi.

5. Ndi ngani tshivhindi tsha vhaapostola tsho fhungudzea?

⁵ Tshiṅwe tsha zwiitisi tshe tsha ita uri Yesu a konḓelele musi o sedzana na vhuimo vhu konḓaho ndi u fulufhela Yehova nahone zwenezwo o zwi sumbedza nga u dzula a tshi rabela. Fhedzi vhaapostola vho kundelwa u dzula vha tshi rabela honoho vhusiku. Nga nṱhani ha zwenezwo musi vha tshi lingwa, tshivhindi tshavho tsho fhungudzea. (Mat. 26:40, 41, 43, 45, 56) Musi ro sedzana na milingo, ri nga dzula ri tshi fulufhedzea arali ra tevhela tsumbo ya Yesu na u ‘rabela misi yoṱhe.’ Ndi mini zwine ra nga rabela nga hazwo?

6. Lutendo lu ḓo ri thusa hani uri ri dzule ri na mulalo?

⁶ Ri nga rabela kha Yehova uri a ri “ṋee lutendo lwo engedzeaho.” (Luka 17:5; Yoh. 14:1) Ri fanela u vha na lutendo ngauri Sathane u ḓo linga vhoṱhe vhane vha tevhela Yesu. (Luka 22:31) Lutendo lu ḓo ri thusa hani uri ri dzule ri na mulalo naho ra sedzana na thaidzo dzi khou tou tevhekana? Musi ro ita zwoṱhe zwine ra nga kona u itela u sedzana na vhuimo vhu konḓaho, u vha na lutendo zwi ḓo ri thusa uri ri litshele zwithu zwoṱhe zwanḓani zwa Yehova. Ri a vha na mulalo nga nṱhani ha uri ri fulufhela uri Yehova ha balelwi nga tshithu.—1 Pet. 5:6, 7.

7. No guda mini kha zwe Robert a zwi amba?

 ⁷ U rabela zwi ri thusa uri ri vhe na mulalo hu sa londwi vhuimo vhune ra khou sedzana naho. Ṱhogomelani tsumbo ya Robert, muhulwane a fulufhedzeaho a re miṅwahani ya vhu 80. O ri: “Maipfi ane a wanala kha Vhafilipi 4:6, 7 o nthusa uri ndi kone u sedzana na vhuimo vhu konḓaho vhutshiloni. Ndo vhuya nda sedzana na thaidzo dza masheleni. Nahone ndo vhuya nda xelelwa nga ndugelo ya u shuma sa muhulwane.” Ndi mini zwe zwa thusa Robert uri a dzule e na mulalo? O ri: “Musi ndi tshi thoma u vhilaela ndi mbo ḓi rabela nga u ṱavhanya. Ndi tenda uri musi ndi tshi rabela lunzhi zwi tshi bva mbiluni zwi ita uri ndi vhe na mulalo.”

8. U ya nga Yohane 8:29, ndi tshifhio tshiṅwe tshiitisi tshe tsha ita uri Yesu a vhe na mulalo?

⁸ Vhalani Yohane 8:29. Naho Yesu o vha a tshi khou tovholwa, o dzula e na mulalo ngauri o vha a tshi ḓivha uri u khou takadza Khotsi awe. O dzula a tshi thetshelesa na musi zwi tshi konḓa u ita nga u ralo. O vha a tshi funa Khotsi awe nahone u shumela Yehova zwo vha zwi tshi ḓa u thoma vhutshiloni hawe. O shuma sa “muḓinḓa” wa Mudzimu musi a sa athu ḓa kha ḽifhasi. (Mir. 8:30) Musi e kha ḽifhasi o funza vhaṅwe nga ha Khotsi awe. (Mat. 6:9; Yoh. 5:17) Wonoyo mushumo wo ḓisela Yesu dakalo ḽihulwane.—Yoh. 4:34-36.

9. U farekanea vhuḓinḓani zwi nga ri thusa hani uri ri dzule ri na mulalo?

⁹ Ri nga edzisa Yesu nga u thetshelesa Yehova na nga u ita uri ‘tshifhinga tshoṱhe ri vhe na zwinzhi zwine ra zwi ita mushumoni wa Murena.’ (1 Vhakor. 15:58) Musi ro “farekanea vhukuma” nga mushumo wa u huwelela, zwi ri thusa uri ri vhe na mavhonele o teaho nga ha  thaidzo dzashu. (Mish. 18:5) Sa tsumbo, vhathu vhane ra ṱangana navho tsimuni kanzhi vha sedzana na thaidzo dzo no fhira dzashu. Fhedzi musi vha tshi guda u funa Yehova na u tevhela nyeletshedzo dzawe, vhutshilo havho vhu vha khwine nahone vha a takala. Musi ri tshi vhona zwenezwo zwi tshi itea, ri vha na vhungoho ha uri Yehova u ḓo ri ṱhogomela. Nahone u tenda zwenezwo zwi ita uri ri vhe na mulalo. Wahashu wa tshifumakadzini we vhutshilo hawe hoṱhe a vha a tshi ḓipfa a si tshithu nahone o tsikeledzea, o vhona vhungoho ha eneo mafhungo. O ri: “Musi ndo farekanea vhuḓinḓani, ndi a kona u langa nḓila ine nda ḓipfa ngayo nahone ndi a takala. Ndi humbula uri ndi ngauri ndi ḓipfa ndi tsini-tsini na Yehova musi ndi vhuḓinḓani.”

10. No guda mini kha zwe Brenda a zwi amba?

¹⁰ Ṱhogomelani iṅwe tsumbo ya wahashu wa tshifumakadzini ane a pfi Brenda. Ene na ṅwananyana wawe vha khou vhaisala vhukuma. Brenda u tshimbila nga wheelchair nahone ha na nungo. Nga zwiṅwe zwifhinga, u huwelela nnḓu nga nnḓu, fhedzi kanzhi u shumisa marifhi. O ri: “Ndo kona u livhisa ṱhogomelo kha vhuḓinḓa hanga, musi ndi tshi ṱhogomela na u ṱanganedza uri ndi nga si fhole kha ano maitele a zwithu. Ngoho ndi ya uri, musi ndi tshi huwelela zwi a nthusa uri ndi sa livhise ṱhogomelo kha thaidzo dzanga. Nṱhani hazwo, ndi livhisa ṱhogomelo kha u huwelela tsimuni ya tshivhidzoni tshashu. Nahone musi ndi tshi huwelela, ndi dzulela u humbula nga fulufhelo ḽine nda vha naḽo ḽa vhumatshelo.”

11-13. (a) Vhaapostola na vhaṅwe vho sumbedza hani uri vha khonani dza Yesu dza vhukuma? (b) Khonani dza Yesu dzo ita uri a ḓipfe hani?

¹¹ Musi Yesu e kha vhuḓinḓa hawe vhu konḓaho ha kha ḽifhasi, vhaapostola vha fulufhedzeaho vho vha vhe khonani dzawe dza vhukuma. Dzo vha dzi khonani dzine Bivhili ya dzi ṱalusa nga uri ndi “ṱhama i sá ṱali, ine ya vhuya ya fhira wa hau.” (Mir. 18:24) Yesu o vha a tshi dzhiela nṱha khonani dzo raloho. Vharathu vha Yesu vha malofhani vho vha vhe si na lutendo khae musi e kha vhuḓinḓa hawe. (Yoh. 7:3-5) Kha tshiṅwe tshiitea, mashaka awe vho amba uri u khou penga. (Marko 3:21) Zwo fhambanaho na zwenezwo, vhusikuni ha musi Yesu a sa athu fa o vhudza vhaapostola vha fulufhedzeaho uri: “Ndi inwi no konḓelelaho na nṋe milingoni.”—Luka 22:28.

¹² Nga zwiṅwe zwifhinga, vhaapostola vho ita zwithu zwe zwa sa takadze Yesu, fhedzi o vha a sa livhisi ṱhogomelo kha vhukhakhi havho, nṱhani hazwo o vhona lutendo lwe vha lu sumbedza khae. (Mat. 26:40; Marko 10:13, 14; Yoh. 6:66-69) Vhusikuni hawe ha u fhedzisela a sa athu vhulawa, Yesu o vhudza vhenevho vhanna vha fulufhedzeaho uri: “Ndo ni vhidza dzikhonani, ngauri zwithu zwoṱhe zwe nda zwi pfa kha Khotsi anga ndo ni vhudza zwone.” (Yoh. 15:15) A zwi timatimisi uri khonani dza Yesu dzo vha dzi tshi mu ṱuṱuwedza vhukuma. Nḓila ye dze mu thusa ngayo kha vhuḓinḓa hawe yo ita uri a takale vhukuma.—Luka 10:17, 21.

¹³ Nga nnḓa ha vhaapostola, Yesu o vha e na dziṅwe khonani dza vhanna na vhafumakadzi, dze dza mu thusa kha mushumo wa u huwelela na kha zwiṅwe. Vhaṅwe vho mu ṱanganedza nḓuni dzavho uri a kone u vha na hune a ḓo ḽa hone. (Luka 10:38-42; Yoh. 12:1, 2) Vhaṅwe vho vha vha tshi tshimbila nae na u mu kovhela thundu dzavho. (Luka 8:3) Yesu o vha e na khonani dzavhuḓi ngauri nae o vha e khonani yavhuḓi. O vha itela zwithu zwavhuḓi nahone o vha a sa lavheleli uri vha ite zwine vha sa kone u zwi ita. Naho Yesu o vha o fhelela, o vha a tshi dzhiela nṱha thikhedzo ya khonani dzawe  dzi songo fhelelaho. Nahone a zwi timatimisi uri dzo mu thusa uri a dzule e na mulalo.

14-15. Ri nga vha hani na khonani dzavhuḓi nahone dzi nga ri thusa hani?

¹⁴ Khonani dzavhuḓi dzi ḓo ri thusa uri ri dzule ri tshi fulufhedzea kha Yehova. Nahone nḓila ya khwine ya u vha na khonani dzavhuḓi ndi u vha khonani yavhuḓi. (Mat. 7:12) Sa tsumbo, Bivhili i ri ṱuṱuwedza uri ri shumise tshifhinga na nungo dzashu u itela u thusa vhaṅwe, zwihuluhulu vhane vha “shaya.” (Vhaef. 4:28) Naa ni nga humbula nga ha muthu ane na nga mu thusa tshivhidzoni tshaṋu? Naa ni nga ya mavhengeleni u itela u rengela muhuweleli a sa koni u bva nḓuni nga nṱhani ha vhulala kana mutakalo u si wavhuḓi? Naa ni nga ṋea zwiḽiwa muṱa une wa khou ṱahelelwa nga masheleni? Arali ni tshi kona u shumisa website ya jw.org^® na JW Library^®, naa ni nga sumbedza vhaṅwe tshivhidzoni nḓila ine zwa shumiswa ngayo? Musi ri tshi livhisa ṱhogomela kha u thusa vhaṅwe, zwenezwo zwi ḓo ita uri ri takale.—Mish. 20:35.

¹⁵ Khonani dzashu dzi ḓo ri tikedza musi ro sedzana na vhuimo vhu konḓaho na uri thusa uri ri dzule ri na mulalo. U fana na nḓila ye Elihu a thetshelesa ngayo Yobo musi a tshi mu vhudza thaidzo dzawe, na riṋe khonani dzashu dzi ḓo ri thetshelesa musi ri tshi dzi vhudza nḓila ine ra ḓipfa ngayo. (Yobo 32:4) A ri faneli u lavhelela uri khonani dzashu dzi ri dzhiele phetho, fhedzi ndi vhuṱali u thetshelesa nyeletshedzo dzavho dzi bvaho Bivhilini. (Mir. 15:22) U fana na nḓila ye Khosi Davida a sumbedza u ḓiṱukufhadza musi a tshi tenda u thusiwa nga khonani dzawe, na riṋe ri fanela u tenda khonani dzashu dzi tshi ri thusa. (2 Sam. 17:27-29)  Khonani dzo raloho ndi tshifhiwa tshi bvaho kha Yehova.—Yak. 1:17.

16. U ya nga Vhafilipi 4:6, 7, ndi ifhio nḓila i yoṱhe ya u vha na mulalo? Ṱalutshedzani.

¹⁶ Vhalani Vhafilipi 4:6, 7. Ndi ngani Yehova a tshi ri vhudza uri ri nga kona u vha na mulalo une a u ṋea “nga Kristo Yesu”? Ndi ngauri ri nga kona u sa ḽa mbilu na u vha na mulalo arali ri tshi pfesesa tshipiḓa tshine Yesu a tshi tamba kha tshipikwa tsha Yehova na u vha na lutendo kha zwenezwo. Sa tsumbo, zwivhi zwashu zwoṱhe zwi nga hangwelwa nga nṱhani ha tshiṱhavhelo tsha Yesu tshi rengululaho. (1 Yoh. 2:12) Zwenezwi zwi ri khuthadza lungafhani! Sa Khosi ya Muvhuso wa Mudzimu, Yesu u ḓo fhelisa zwithu zwoṱhe zwivhi zwe zwa vhangwa nga Sathane. (Yes. 65:17; 1 Yoh. 3:8; Nzumb. 21:3, 4) Zwenezwo zwi ita uri ri lavhelele fulufhelo ḽashu nga maṱo matswuku. Naho Yesu o ri ṋea mushumo u konḓaho, u na riṋe kha wonoyu mushumo nahone u ḓo ri tikedza u swika vhufheloni ha ano maitele a zwithu. (Mat. 28:19, 20) Zwenezwo zwi ri ṋea tshivhindi. Zwithu zwa ndeme zwine zwa ita uri ri vhe na mulalo ndi khuthadzo, fulufhelo na tshivhindi.

17. (a) Mukriste a nga dzula hani e na mulalo? (b) Samusi zwo fulufhedziswa kha Yohane 16:33, ndi mini zwine ra ḓo kona u zwi ita?

¹⁷ Ni nga dzula hani ni na mulalo hu sa londwi vhuimo vhu konḓaho vhune ha nga ni tsikeledza? Ni nga ita zwenezwo nga u edzisa zwe Yesu a zwi ita. Tsha u thoma, dzulani ni tshi rabela hu sa londwi zwine zwa nga itea. Tsha vhuvhili, thetshelesani Yehova nahone ni huwelele nga u fhisea na musi zwi tshi konḓa u ita nga u ralo. Tsha vhuraru, ni tende u thusiwa nga khonani dzaṋu musi no sedzana na vhuimo vhu konḓaho. Nga u ita zwenezwo, mulalo wa Mudzimu u ḓo tsireledza muhumbulo waṋu na mbilu yaṋu. Nahone ni ḓo kona u kunda mulingo muṅwe na muṅwe u fana na Yesu.—Vhalani Yohane 16:33.