TSHIFHINGANI tsha Paulo, vhunzhi ha fhethu ho vha hu si na zwikepe zwa u ṋamedza vhaṋameli. U itela u fara lwendo nga tshikepe, vhaṋameli vho vha vha tshi fanela u vhudzisa arali hu na tshikepe tsha thundu tshine tsha khou ya hune vha khou ya hone nahone arali tshi tshi ḓo ṋamedza vhaṋameli. (Mish. 21:2, 3) Naho tshikepe tshi sa khou ya hune muṋameli a khou ya hone, o vha a tshi nga tshi ṋamela nahone musi tshi tshi ima vhuimazwikepe ho fhambanaho, o vha a tshi nga ṱoḓa tshine tsha khou ya tsini na hune a khou ya hone.—Mish. 27:1-6.

Ho vha hu na khalaṅwaha dzine zwikepe zwa tshimbila ngayo nahone ho vha hu na mbekanyamushumo fhedzi zwo vha zwi sa i tevheli tshifhinga tshoṱhe. Vhatshimbidzi vha tshikepe vho vha vha tshi nga lenga u takuwa hu si nga nṱhani ha mutsho u si wavhuḓi fhedzi, fhedzi na nga nṱhani ha uri vha tenda zwi si ho. Sa tsumbo, vho vha vha tshi nga lenga u takuwa ngauri funguvhu ḽi khou lila nga nḓila i songo ḓoweleaho musi ḽo ima kha thambo dza tshikepe kana musi vho vhona zwipiḓa zwa tshikepe tsho pwasheaho khunzi-khunzini. Vhatshimbidzi vha tshikepe vho vha vha tshi fara nyendo musi hu na mutsho wavhuḓi. Musi muṋameli a tshi wana tshikepe tshine tsha nga ṱuwa nae, o vha a tshi nga ima tsini na vhuimazwikepe e na mihwalo yawe nahone a lindela u pfa nḓivhadzo ya uri tshikepe tshi ḓo takuwa hu si kale.

Muḓivhazwakale Lionel Casson o ri: “Ḓoroboni ya Roma zwo vha zwo leluwa uri muṋameli a wane tshikepe tsha hune a khou ya hone, ene muṋe a songo tou ḓiṱoḓela. Vhuimazwikepe ha yeneyo ḓorobo ho vha hu kha Mulambo wa Tiber. Ḓorobo ya Roma yo vha i tsini na ḓorobo ya Ostia ine ya vha na mimakete mihulu yo tingwaho nga dziofisi. Vhunzhi ha dzenedzi ofisi dzo vha dzi dza vhatshimbidzi vha zwikepe vha vhuimazwikepe ho fhamba-fhambanaho: vhatshimbidzi vha zwikepe vha Narbonne [musalauno ndi Fura] vho vha vhe na ofisi na vhatshimbidzi vha zwikepe vha Carthage [musalauno ndi Tunisia] navho vho vha vhe na ofisi, . . . na vhaṅwe. We a vha a tshi ṱoḓa u fara lwendo nga tshikepe, o vha a tshi vhudzisa henefho ofisini arali hu na tshikepe tshine tsha khou ya hune a khou ya hone.”

U tshimbila nga tshikepe zwo vha zwi tshi vhulunga tshifhinga, fhedzi zwo vha zwi na khombo. Kha zwiitea zwo vhalaho, Paulo o pwashetshelwa nga tshikepe musi e kha mushumo wawe wa vhurumiwa.—2 Vhakor. 11:25.