1-2. Ndi ngani Yesu o amba maipfi a re kha Yohane 4:35, 36?

KHAMUSI Yesu o vha a tshi khou tshimbila tsimuni ya goroi ine ya kha ḓi aluwa. (Yoh. 4:3-6) Zwo vha zwi tshi ḓo dzhia miṅwedzi i ṱoḓaho u vha miṋa uri yeneyi goroi i kaṋiwe. Yesu o amba zwithu zwi vhonalaho zwi sa pfali, o ri: “Lavhelesani masimu, o no lugela u kaṋiwa.” (Vhalani Yohane 4:35, 36.) Zwenezwo zwithu zwi amba mini?

² Zwi vhonala u nga Yesu o vha a tshi khou fanyisa u kaṋiwa ha goroi na u kaṋiwa ha vhathu. Ṱhogomelani zwe zwa vha zwi tshi kha ḓi tou bva u itea. Naho Vhayuda vho vha vha sa dzuli murunzi muthihi na Vhasamaria, Yesu o huwelela kha mufumakadzi wa Musamaria nahone onoyo mufumakadzi o mu thetshelesa. Zwavhuḓi-vhuḓi, musi Yesu a tshi khou amba nga ha masimu o lugelaho u kaṋiwa, ho vha hu tshi khou ḓa Vhasamaria vhanzhi khae vhe vha pfa nga hae kha mufumakadzi wa Musamaria nahone vha tshi khou ṱoḓa u guda zwo engedzeaho khae. (Yoh. 4:9, 39-42) Muṅwe mugudi wa Bivhili o amba zwi tevhelaho nga haya mafhungo, o ri: “Ngauri vhathu vho ṱavhanya u ya kha Yesu u itela u mu thetshelesa, zwo vha zwi tshi khou sumbedza uri vha tou nga goroi yo lugelaho u kaṋiwa.”

3. Ndi mini zwine zwa ḓo sumbedza uri ni dzhia vhathu nga nḓila ine Yesu a vha dzhia ngayo?

³ Ni dzhia hani vhathu vhane na huwelela khavho? Naa ni vha dzhia sa goroi yo lugelaho u kaṋiwa? Arali ni tshi vha dzhia nga yeneyo nḓila, zwi ḓo vhonala nga hezwi zwithu zwiraru: Tsha u thoma, ni ḓo huwelela nga maanḓa ngauri ni ḓivha uri ho sala tshifhinga tshiṱuku. Tshifhinga tsha khaṋo tshi tsini, a no ngo  tea u tambisa tshifhinga. Tsha vhuvhili, ni ḓo takala musi ni tshi vhona vhathu vha tshi ni thetshelesa. Bivhili i ri: “Vhathu vha [a] takala nga tshifhinga tsha khaṋo.” (Yes. 9:3) Tsha vhuraru, ni ḓo dzhia muṅwe na muṅwe sa ane a nga vha mufunziwa wa Yesu nahone zwenezwo zwi ḓo ita uri ni ambe mafhungo ane ṋemuḓi a a takalela.

4. Ri ḓo guda mini kha muapostola Paulo?

⁴ Naho vhaṅwe vha vhatevheli vha Yesu vho vha vha tshi vhona u nga Vhasamaria vha nga si vuwe vho vha vhafunziwa vha Yesu, Yesu ho ngo vha dzhia nga yeneyo nḓila. O vha dzhia sa vhane vha nga vha vhafunziwa vhawe. Na riṋe ri tea u dzhia vhathu vha tsimuni yashu sa vhane vha nga vha vhafunziwa vhawe. Muapostola Paulo o ri vhetshela tsumbo yavhuḓi ine ra nga i tevhela. Ri nga guda mini khae? Kha ino thero ri ḓo amba nga ha (1) nḓila ye a ḓivha ngayo zwine vhathu vhane a huwelela khavho vha zwi tenda, (2) nḓila ye a vha a tshi ḓivha ngayo zwine vha zwi takalela (3) na zwe zwa mu thusa uri a vha dzhie sa vhane vha nga vha vhafunziwa vha Yesu.

5. Ndi ngani Paulo o vha a tshi pfesesa vhathu vhe a vha a tshi huwelela khavho sinagogoni?

⁵ Kanzhi Paulo o vha a tshi huwelela sinagogoni ya Vhayuda. Sa tsumbo, musi e sinagogoni ngei Thesalonika, o “amba [na Vhayuda] nga Maṅwalo nga savhatha tharu dzi tshi khou tevhekana.” (Mish. 17:1, 2) Zwi vhonala uri Paulo o ḓipfa e hayani musi e sinagogoni. O aluswa sa Muyuda. (Mish. 26:4, 5) Paulo o vha a tshi ḓivha Vhayuda, zwenezwo zwo ita uri a huwelele khavho o vhofholowa.—Vhafil. 3:4, 5.

6. Vhathu vhe Paulo a huwelela khavho makete wa Athene vho vha vho fhambana hani na vha sinagogoni?

⁶ Musi Paulo a tshi kombetshedzwa uri a pake vhuda hawe ngei Thesalonika na Berea, o ya Athene. Musi e henefho, o dovha a “funza Vhayuda ngei sinagogoni na vhathu vha gwadamelaho Mudzimu.” (Mish. 17:17) Fhedzi vhathu vhe a huwelela khavho makete, vho vha vho fhambana na vhe a huwelela khavho sinagogoni. Ho vha hu vhathu vhane vha tenda kha pfunzo dza maṱali na vhathu vhane vha si vhe Vhayuda. Vho dzhia mulaedza wa Paulo sa “zwithu zwiswa.” Vho vhudza Paulo uri: “U khou amba zwithu zwine ri si zwi ḓivhe.”—Mish. 17:18-20.

7. U ya nga Mishumo 17:22, 23, Paulo o shandula hani nḓila ine a huwelela ngayo?

⁷ Vhalani Mishumo 17:22, 23. Paulo ho ngo huwelela kha vhathu vha si Vhayuda ngei Athene nga nḓila i fanaho na ye a huwelela ngayo  kha Vhayuda ngei sinagogoni. A nga vha o ḓivhudzisa uri: ‘Vhathu vha Athene vha tenda mini?’ O sedza fhethu hune vha dzula hone, zwa mu thusa u ḓivha zwine vhathu vha zwi tenda. A kona u thoma nga u vha vhudza nga ha zwithu zwi re Maṅwaloni zwine vha zwi tenda. Muṅwe mugudi wa Bivhili u ri: “Samusi Paulo o vha e Mukriste wa Muyuda, o zwi vhona uri Vhagerika vhane vha si vhe Vhakriste a vha gwadameli Mudzimu wa ngoho wa Vhayuda, fhedzi o lingedza u vha vhudza uri Mudzimu ane a khou amba nga hae na Vhaathene vha a mu ḓivha.” Nga zwenezwo, Paulo o shandula nḓila ine a huwelela ngayo. O vhudza Vhaathene uri mulaedza une a khou amba nga hawo u khou bva kha “Mudzimu A Sa Ḓivhiwi” ane vha mu gwadamela. Naho vhathu vhane vha si vhe Vhayuda vha sa ḓivhi Maṅwalo, Paulo ho ngo vha litsha vho ralo. Fhedzi o vha dzhia sa goroi yo lugelaho u kaṋiwa nahone a shandula nḓila ine a huwelela ngayo khavho.

8. (a) Ni nga thuswa nga mini uri ni ḓivhe zwine vhathu vha tsimuni yaṋu vha tenda? (b) Arali muthu o ni vhudza uri u na vhurereli hawe, ni nga fhindula hani?

⁸ Ivhani na vhusedzi u fana na Paulo. Ṱoḓani zwithu zwine zwa ḓo ni thusa u vhona zwine vhathu vha tsimuni yaṋu vha zwi tenda. Ni nga sedza uri ṋemuḓi o khavhisa hani nnḓu yawe. Naa dzina ḽawe, zwiambaro kana nḓila ine a amba ngayo i a sumbedza uri ndi wa vhurereli vhufhio? Naa o ni vhudza uri u na vhurereli hawe? Musi ṋemuḓi a tshi amba uri u na vhurereli hawe, muṅwe muvulanḓila o khetheaho ane a pfi Flutura u mu vhudza uri: “A thi ngo ḓa u ni ita uri ni tende zwine nṋe nda tenda, ndo ḓa u amba na inwi nga ha . . . ”

9. Ndi mini zwine na nga tendelana khazwo na muthu a re na vhurereli hawe?

⁹ Ni nga amba mini na muthu a re na vhurereli hawe? Lingedzani u wana zwithu zwine na tendelana khazwo. A nga vha a tshi gwadamela Mudzimu muthihi, a tshi tenda uri Yesu ndi Mutshidzi washu kana a tshi tenda uri zwithu zwivhi zwi ḓo fhela hu si kale. Shumisani zwithu zwine na tendelana khazwo u itela u mu vhudza mulaedza u re Bivhilini nga nḓila ine ya ḓo mu takadza.

10. Ri fanela u lingedza u ita mini nahone ndi ngani?

¹⁰ Ngoho ndi ya uri vhathu vha nga vha vha sa tendi zwoṱhe zwine zwa funzwa kha vhurereli havho. Ni songo guma kha u ḓivha uri muthu u kha vhurereli vhufhio, lingedzani u ḓivha uri ene muṋe u tenda mini. Muṅwe muvulanḓila ane a pfi David wa ngei Australia u ri: “Vhunzhi ha vhathu vha ṱanganyisa pfunzo dza maṱali na zwine vha zwi guda kha vhurereli havho.” Donalta wa ngei Albania u ri: “Vhaṅwe vhathu vhane ra ṱangana navho vha amba uri vha na vhurereli havho, fhedzi nga murahu vha mbo ḓi ri a vha tendi kha Mudzimu.” Muṅwe murumiwa  wa ngei Argentina u ri vhaṅwe vha amba uri vha tenda kha Vhuraruthihi, fhedzi vha sa tendi uri Khotsi, Murwa na muya mukhethwa ndi Mudzimu muthihi. U ri: “U ḓivha uri muthu ane nda khou amba nae a nga vha a sa tendi zwoṱhe zwine zwa funzwa kha vhurereli hawe, zwi a ndelutshela uri ndi wane zwine nṋe nae ra tendelana khazwo.” Nga zwenezwo, lingedzani u ḓivha zwine muthu ene muṋe a tenda khazwo. Na ita zwenezwo, ni ḓo fana na Paulo, na vha “zwithu zwoṱhe kha vhathu vhoṱhe.”—1 Vhakor. 9:19-23.

11. U ya nga Mishumo 14:14-17, Paulo o huwelela hani nga nḓila i kungaho kha vhathu vhane vha dzula Lisitara?

¹¹ Vhalani Mishumo 14:14-17. Paulo o vha a tshi ḓivha uri vhathu vhane a huwelela khavho vha takalela mini nahone zwenezwo zwo ita uri a shandule nḓila ine a huwelela ngayo. Sa tsumbo, vhathu vhe a huwelela khavho ngei Lisitara vho vha vha sa ḓivhi Maṅwalo. Ndi ngazwo o amba nga nḓila ine vha i pfesesa musi a tshi huwelela khavho. O amba nga ha u kaṋa zwinzhi na nga zwithu zwine zwa ita uri ri takale. O shumisa maipfi na zwifanyiso zwine vhathetshelesi vhawe vha nga ṱavhanya u zwi pfesesa.

12. Ni nga ḓivha hani zwine muthu a zwi takalela zwine zwa ḓo ni thusa uri ni shandule nyambedzano yaṋu?

¹² Ḓivhani zwine vhathu vha tsimu ine na shuma khayo vha zwi takalela nahone ni shandule nḓila ine na huwelela ngayo. Ni nga ḓivha hani zwine muthu ane na khou ya u huwelela khae a zwi takalela musi ni tshi kha ḓi vha kulenyana? Ni tea u vha na vhusedzi. Khamusi u khou ita ngade, u khou vhala bugu, u khou lugisa goloi kana zwiṅwe. Khamusi ni nga thoma nga u amba nga ha zwine a khou zwi ita. (Yoh. 4:7) Na zwithu zwe muthu a zwi ambara zwi nga sumbedza uri ndi wa lushaka lufhio, u shuma gai na uri u feiva thimu ifhio. Gustavo u ri: “Ndo thoma nyambedzano na muthu wa miṅwaha ya 19 we a vha o ambara tshikipa tsho fanyiswaho muimbi o dumaho. Ndo mu vhudzisa nahone a mmbudza uri ndi ngani a tshi funa onoyo muimbi. Yeneyo nyambedzano yo ita uri ndi thome u guda nae nahone zwino ndi Ṱhanzi.”

13. Ni nga ita hani uri muthu a pfe a tshi ṱoḓa u guda Bivhili?

 ¹³ Musi ni tshi khou ṱoḓa u guda na muthu Bivhili, itani uri a takalele u guda nahone ni mu sumbedze uri u guda Bivhili zwi ḓo mu thusa hani. (Yoh. 4:13-15) Muṅwe wahashu ane a pfi Poppy o ambedzana na muṅwe mufumakadzi ane a ṱoḓa u guda. Musi a tshi dzhena nḓuni, o vhona tshiṱifikheithi tshi sumbedzaho uri onoyo mufumakadzi ndi muphurofesa we a gudela zwa vhudededzi. O mu vhudza uri na riṋe ri tou nga vhadededzi ngauri ri funza vhaṅwe ri tshi shumisa Bivhili na miṱangano ine ra vha nayo. Onoyo mufumakadzi o thoma u guda, a ya miṱanganoni nga ḓuvha ḽi tevhelaho nahone a ya na guvhanganoni ḽa ḽiisela. O lovhedzwa nga murahu ha ṅwaha. Ḓivhudziseni uri: ‘Vhathu vhane nda vhuyelela khavho vha takalela mini? Ndi nga ita hani uri muthu a pfe a tshi ṱoḓa u guda Bivhili?’

14. Ni nga lugiselela hani musi ni tshi khou ya u guda na muthu Bivhili?

¹⁴ Musi no no thoma u guda Bivhili na muthu, ni tea u lugiselela tshifhinga tshoṱhe musi ni sa athu u ya u guda nae. Musi ni tshi khou lugiselela, ni humbule nga hune a bva hone na zwine a zwi takalela. Ni dovhe ni vhone uri ni ḓo mu vhalela maṅwalo afhio, ni ḓo tamba vidio dzifhio na uri ni ḓo shumisa zwifanyiso zwifhio. Ḓivhudziseni uri: ‘Ndi zwifhio zwine a ḓo zwi takalela na zwine zwa ḓo mu kwama?’ (Mir. 16:23) Muṅwe mufumakadzi we a vha a tshi khou gudiswa nga muvulanḓila ane a pfi Flora o ri: “A thi nga vuwi ndo tenda kha mvuwo.” Flora ho ngo mu kombetshedza uri a zwi tende. O ri: “Ndo vhona uri ndi khwine a tshi thoma nga u ḓivha Mudzimu ane a fhulufhedzisa uri u ḓo vusa vhafu.” U bva nga tshenetsho tshifhinga, musi Flora a tshi guda nae o vha a tshi mu sumbedza uri Yehova u a ri funa, u na vhuṱali na maanḓa. Nga murahu, onoyo mufumakadzi o tenda uri vho faho vha ḓo vuswa. Zwino ndi Ṱhanzi i fhiseaho.

15. U ya nga Mishumo 17:16-18, ndi mini zwe Vhaathene vha zwi ita nahone ndi ngani Paulo a songo litsha u huwelela khavho?

¹⁵ Vhalani Mishumo 17:16-18. Paulo ho ngo litsha u huwelela kha Vhaathene naho vha tshi gwadamela midzimu ya zwifanyiso, vha tshi ḓifara luvhi nga zwa vhudzekani na u tenda kha pfunzo dza maṱali. Ho ngo litsha u huwelela khavho naho vho mu sema. Mathomoni Paulo o vha a “tshi semana, [e] mutovholi, [e] na vhuhali” fhedzi o fhedzisela o vha Mukriste. (1 Tim. 1:13) Samusi Yesu o dzhia Paulo sa ane a nga vha mufunziwa wawe, na Paulo o dzhia Vhaathene sa vhane vha nga vha vhafunziwa vha Yesu. Vhaathene vho mbo ḓi vha vhafunziwa vha Yesu.—Mish. 9:13-15; 17:34.

16-17. Ndi mini zwine zwa sumbedza uri muṅwe na muṅwe a nga vha mufunziwa wa Yesu? Ṋeani tsumbo.

¹⁶ Vhathu vhe vha vha vhafunziwa vha Yesu tshifhingani tsha kale, vho thoma vha sa ḓifari zwavhuḓi. Musi Paulo a tshi ṅwalela Vhakriste vha Korinta vhurifhi, o ri vhaṅwe vho vha vhe zwigevhenga, vhaṅwe vha tshi ḓifara nga nḓila i si yavhuḓi tshifhingani tsho fhiraho. A dovha a ri: “Vhaṅwe vhaṋu vho vha vha tshi ita zwenezwo. Fhedzi no ṱanzwiwa.” (1 Vhakor. 6:9-11) Naa no vha ni tshi nga humbula uri vha nga shanduka vha vha vhafunziwa vha Yesu?

¹⁷ Tshifhingani tsha zwino, vhathu vhanzhi vha khou ita tshanduko uri vha kone u vha vhafunziwa vha Yesu. Sa tsumbo, muṅwe muvulanḓila o khetheaho ane a pfi Yukina wa ngei Australia o ṱhogomela uri muṅwe na muṅwe a nga thetshelesa mulaedza u bvaho Bivhilini. Ḽiṅwe ḓuvha o ṱangana na muṅwe mufumakadzi we a vha e na dzithathuu. Yukina u ri: “Ndo thoma ndi tshi khou timatima u amba nae, fhedzi ndo  mbo ḓi amba nae. Ndo zwi ṱhogomela uri ha lwi na Bivhili ngauri dziṅwe dza thathuu dzawe dzo vha dzi vese dza Dziphisalema.” Onoyo mufumakadzi o mbo ḓi thoma u guda na u ḓa miṱanganoni. *

18. Ndi ngani ri songo tea u haṱula vhathu?

¹⁸ Naa Yesu o vha a tshi vhona uri masimu o lugela u kaṋiwa ngauri o vha a tshi lavhelela uri vhathu vhanzhi vha ḓo mu tevhela? Na khathihi! Maṅwalo o vha o dzula o amba uri a si vhathu vhoṱhe vhane vha ḓo mu tevhela. (Yoh. 12:37, 38) Nahone Yesu o vha a tshi kona u vhona zwi re mbiluni dza vhathu. (Mat. 9:4) O huwelela kha vhathu vhoṱhe naho o vha a tshi livhisa ṱhogomelo kha vhathu vhane vha tenda khae. Riṋe a ri koni u vhona zwi re mbiluni dza vhathu, ndi ngazwo zwi zwa ndeme na u fhirisisa uri ri si haṱule vhathu vha re tsimuni yashu. Ri tea u dzhia vhathu sa vhane vha nga vha vhafunziwa vha Yesu. Marc, murumiwa wa ngei Burkina Faso o ri: “Kanzhi vhathu vhane nda humbula uri vha ḓo ita mvelaphanḓa, vha mbo ḓi litsha u guda. Ngeno vhathu vhane nda vha dzhiela fhasi hu vhone vhane vha ita mvelaphanḓa. Ndo guda uri ndi khwine u tenda muya mukhethwa wa Mudzimu u tshi ri livhisa.”

19. Ri tea u dzhia hani vhathu vhane ra ṱangana navho tsimuni?

¹⁹ Ni nga vhona u nga vhunzhi ha vhathu vha tsimuni yaṋu a vha ngi goroi yo lugelaho u kaṋiwa. Fhedzi ni dzule ni tshi humbula zwe Yesu a zwi vhudza vhafunziwa vhawe. Masimu o no lugela u kaṋiwa. Vhathu vha nga shanduka vha vha vhafunziwa vha Yesu. Yehova u dzhia vhenevha vhathu vhe “madzanga” nahone vha tshi nga vha vhafunziwa vha Yesu. (Hag. 2:7) Arali ra dzhia vhathu nga nḓila ine Yehova na Yesu vha vha dzhia ngayo, ri ḓo ṱoḓa u ḓivha vhubvo havho na zwine vha zwi takalela. A ri nga ḓo vha dzhia sa vhathu phepho, fhedzi ri ḓo vha dzhia sa vhahashu vha matshelo.