1. Roṱhe ri tea u ita mini?

NAA ni nga ṱoḓa u gidima kha mbambe i konḓaho no neta kana ni tshi khou lwala? Zwi tou pfala uri ni nga si ṱoḓe u zwi ita. Naho zwo ralo, muapostola Paulo o amba uri Vhakriste vhoṱhe vha ngoho vha kha mbambe. (Vhahev. 12:1) Nahone arali ri tshi ṱoḓa u wana malamba e Yehova a ri fhulufhedzisa one, roṱhe ri tea u konḓelela hu sa londwi uri ri vhaaluwa kana a ri athu u vha vhaaluwa, ri na nungo kana a ri na nungo.—Mat. 24:13.

2. U ya nga 2 Timotheo 4:7, 8, ndi ngani Paulo o amba o vhofholowa?

² Paulo o kona u amba o vhofholowa ngauri o vha o no “ṱhaphudza mbambe.” (Vhalani 2 Timotheo 4:7, 8.) Fhedzi mbambe ye a amba nga hayo ndi ifhio?

3. Mbambe ye Paulo a amba nga hayo ndi ifhio?

³ Nga tshiṅwe tshifhinga musi Paulo a tshi gudisa o vha a tshi shumisa tsumbo dza mitambo ye ya vha i tshi tambiwa ngei Gerika ḽa kale. (1 Vhakor. 9:25-27; 2 Tim. 2:5) Kanzhi o vha a tshi fanyisa nḓila ine Mukriste a tea u tshila ngayo na mbambe ya u gidima. (1 Vhakor. 9:24; Vhagal. 5:7; Vhafil. 2:16) Muthu u thoma yeneyi mbambe musi a tshi ḓiṋekedza kha Yehova na u lovhedzwa. (1 Pet. 3:21) Nahone u i ṱhaphudza musi a tshi wana vhutshilo vhu sa fheli.—Mat. 25:31-34, 46; 2 Tim. 4:8.

4. Ri ḓo amba nga ha mini kha ino thero?

⁴ U gidima kha mbambe ndapfu zwi fana hani na nḓila ine Mukriste a tea u tshila ngayo? Kha ri ambe nga ha zwithu zwiraru fhedzi zwine zwa ita uri zwi fane. Tsha u thoma, ni  tea u gidima kha nḓila ye na vhetshelwa yone; tsha vhuvhili, ni tea u livhisa ṱhogomelo kha u ṱhaphudza mbambe; tsha vhuraru, ni tea u bvela phanḓa ni tshi khou gidima hu sa londwi zwine na sedzana nazwo.

5. Ri tea u tshila nga nḓila ifhio nahone ndi ngani?

⁵ A zwi konadzei uri vhagidimi vha wane pfufho arali vha songo gidima kha nḓila ye vha vhetshelwa yone. Nga nḓila i fanaho, arali ri tshi khou ṱoḓa u tshila nga hu sa fheli, ri tea u tshila nga nḓila ine Mukriste a tea u tshila ngayo. (Mish. 20:24; 1 Pet. 2:21) Saṱhane na vhatikedzi vhawe a vha ṱoḓi ri tshi tshila nga nḓila ine Vhakriste vha tea u tshila ngayo, fhedzi vha ṱoḓa ri tshi tshila nga nḓila ye ra vha ri tshi tshila ngayo ri sa athu u vha Vhakriste. (1 Pet. 4:4) Vha a ri kolela nahone vha amba uri nḓila ine vha tshila ngayo i khwine u fhira yashu. Fhedzi eneo ndi mazwifhi madala dala.—2 Pet. 2:19.

6. Ni guda mini kha Brian?

⁶ Vhane vha tshila vha tshi ṱuṱuwedzwa nga shango ḽa Saṱhane vha a ṱavhanya vha zwi vhona uri nḓila ye vha fara yone a i iti uri vha vhofholowe, fhedzi i ita uri vha vhe phuli. (Vharoma 6:16) Kha ri ambe nga ha Brian. Vhabebi vhawe vho mu gudisa u tshila nga nḓila ine Vhakriste vha tea u tshila ngayo. Fhedzi musi a tshi khou aluwa o thoma u timatima arali u tshila nga yeneyo nḓila zwi tshi ḓo ita uri a takale. O mbo ḓi khetha u tshila nga nḓila i fanaho na ya vhathu vhane vha ṱuṱuwedzwa nga Saṱhane. O ri: “A tho ngo zwi ṱhogomela uri u tshila nga yeneyi nḓila zwi ḓo ita uri ndi vhe na dzema ḽa zwithu zwi si zwavhuḓi. Nga u ya ha tshifhinga ndo thoma u nwesa, u shumisa zwidzidzivhadzi na u ḓifara luvhi nga zwa vhudzekani. Musi miṅwaha i tshi khou ḓi ṱanḓulukana i tshi ya, ndo thetshela zwiṅwe zwidzidzivhadzi zwi re na khombo nga maanḓa nahone nda fhedzisela ndi phuli yazwo . . . Ndo thoma na u zwi rengisa.” Brian o fhedzisela o khetha u tshila nga nḓila ine Yehova a ṱoḓa a tshi tshila ngayo. O shandula nḓila ye a vha a tshi khou tshila ngayo nahone a lovhedzwa nga 2001. Zwino o takala vhukuma ngauri u khou tshila nga nḓila ine Vhakriste vha tea u tshila ngayo. *

7. U ya nga Mateo 7:13, 14, ndi nḓila mbili dzifhio dzine ra nga gidima khadzo?

⁷ Ndi zwa ndeme u gidima kha nḓila yo teaho. Saṱhane u ṱoḓa roṱhe ri tshi litsha u gidima kha nḓila ṱhukhu “i yaho vhutshiloni,”  fhedzi u ṱoḓa ri tshi gidima kha nḓila yo aṱamaho ine vhanzhi vha gidima khayo. Yeneyo nḓila i na vhathu vhanzhi nahone zwo leluwa u gidima khayo. Fhedzi, ndi nḓila “i yaho lufuni.” (Vhalani Mateo 7:13, 14.) U itela uri ri si pambuwe, ri tea u fhulufhela Yehova na u mu thetshelesa.

8. Ndi mini zwine mugidimi a zwi ita arali o khukhulwa?

⁸ Vhagidimi vha re kha mbambe vha dzula vho livhisa ṱhogomelo kha hune vha khou gidima hone uri vha si khukhulwe. Fhedzi vha nga piringedzwa nga muṅwe mugidimi kana nga kudindi. Arali vha wa, vha a ṱavhanya vha takuwa, vha bvela phanḓa na mbambe. Vha livhisa ṱhogomelo kha u ṱhaphudza mbambe na u wana malamba nṱhani ha u i livhisa kha tshithu tshe tsha vha khukhula.

9. Ri tea u ita mini arali ra khukhulwa?

⁹ Musi ri kha mbambe, ri nga khukhulwa lunzhi na u khakha nga zwine ra zwi amba kana u zwi ita. Kana vhaṅwe vhagidimi vha nga ita vhukhakhi vhune ha ri vhaisa. A ro ngo tea u mangala musi zwenezwo zwi tshi itea. Roṱhe ri na tshivhi nahone ri khou gidima kha nḓila ṱhukhu i yaho vhutshiloni. Nga zwenezwo, zwi tou pfala uri ri ḓo ita ri tshi kuḓana. Paulo o amba uri nga zwiṅwe zwifhinga, wahashu a nga ri “khakhela.” (Vhakol. 3:13) Fhedzi ndi khwine u livhisa ṱhogomelo kha malamba nṱhani ha u i livhisa kha tshe tsha ri khukhula. Arali ra khukhulwa, ri tea u takuwa ra dovha ra bvela phanḓa na mbambe. Arali ra vhofha gwikhwi ra hana u takuwa, a ri nga ṱhaphudzi mbambe nahone a ri nga wani malamba. Nahone u vhofha gwikhwi zwi nga dovha zwa ita uri vhaṅwe vhane vha khou gidima kha yeneyi mbambe vha khukhulwe.

10. Ri nga iledza hani u vha “tshikhukhulisi”?

¹⁰ Iṅwe nḓila ine ra nga iledza ngayo u vha “tshikhukhulisi” kha vhane ra khou gidima navho, ndi nga u sa dzula ri tshi ṱoḓa uri zwithu zwi itiwe nga nḓila yashu. (Vharoma 14:13, 19-21; 1 Vhakor. 8:9, 13) Zwenezwo zwo fhambana na zwine vhagidimi kha mbambe vha zwi ita ngauri vha ṱaṱisana nga tshavho  nahone muṅwe na muṅwe u ṱoḓa uri pfufho i vhe yawe. Vhenevho vhagidimi vha humbulela vhone vhaṋe fhedzi. Nga zwenezwo, vha nga lingedza u sukumedzela vhaṅwe thungo uri vha vha fhirele. Fhedzi riṋe a ri khou ṱaṱisana. (Vhagal. 5:26; 6:4) Ri ṱoḓa uri muṅwe na muṅwe a ṱhaphudze mbambe na u wana malamba. Zwi amba uri ri ḓo ita zwe Paulo a amba musi a tshi ri: “Ni songo lavhelesa zwaṋu fhedzi, ni lavhelese na zwa vhaṅwe.”—Vhafil. 2:4.

11. Mugidimi u livhisa ṱhogomelo kha mini nahone ndi ngani?

¹¹ Mugidimi ha sedzi fhedzi hune a khou gidima hone, fhedzi u dovha a livhisa ṱhogomelo na kha u ṱhaphudza mbambe. Naho a sa khou kona u vhona hune mbambe ya ḓo fhela hone, a nga kona u ḓivhona a tshi khou i ṱhaphudza na u wana malamba. U dzula a tshi khou humbula nga ha malamba zwi ita uri a finye dzi khwaṱhe.

12. Yehova o ri fhulufhedzisa mini?

¹² Kha mbambe ine ra vha khayo, Yehova o ri fhulufhedzisa uri arali ra i ṱhaphudza, ri ḓo wana vhutshilo vhu sa fheli ṱaḓulu kana kha ḽifhasi. Bivhili i ri thusa uri ri kone u ḓivhona musi ro no wana malamba. U dzula ri tshi humbula nga zwe Yehova a ri fhulufhedzisa zwone zwi ḓo ri thusa u konḓelela.

13. Ndi mini zwine zwa ita uri ri si fane na vhagidimi vha re kha mbambe ya vhukuma?

¹³ Vhagidimi vha ngei Gerika vho vha vha tshi sedzana na thaidzo dzi ngaho u pfa vhuṱungu na u neta. Fhedzi vho vha vha tshi tea u ḓitika nga nungo dzavho na u ita zwithu nga nḓila ye vha gudiswa ngayo. Na riṋe ri fana na vhenevho vhagidimi ngauri ri gudiswa nḓila ine Vhakriste vha tea u tshila ngayo. Fhedzi riṋe a ri fani na vhenevho vhagidimi ngauri ri ḓitika nga Yehova ane a dzulela u ri thusa tshifhinga tshoṱhe. Yehova o fhulufhedzisa uri u ḓo ri gudisa na u ri thusa arali ra ḓitika ngae.—1 Pet. 5:10.

14. Luṅwalo lwa 2 Vhakorinta 12:9, 10 lu ri thusa hani u sedzana na thaidzo?

¹⁴ Paulo o sedzana na thaidzo nnzhi. O seṅwa na u tovholwa nga vhaṅwe, nga tshiṅwe tshifhinga o ḓipfa a si na nungo nahone o vha a tshi tea u konḓelela “mupfa ṋamani.” (2 Vhakor. 12:7) Fhedzi Paulo ho ngo tendela zwenezwi zwithu zwi tshi ita uri a litshe u shumela Yehova, fhedzi zwo mu ita uri a ḓitike ngae. (Vhalani 2 Vhakorinta 12:9, 10.) Nga nṱhani ha uri Paulo o ḓitika nga Yehova, Yehova o mu thusa.

15. Arali ra edzisa Paulo, ri ḓo vhona mini?

¹⁵ Na riṋe ri nga seṅwa kana u tovholwa nga nṱhani ha zwine ra tenda zwone. Ri nga lwala kana ra neta. Fhedzi arali ra edzisa Paulo, ri nga kona u vhona musi Yehova a tshi ri tikedza kha dzenedzo thaidzo.

16. Ndi mini zwine na nga zwi ita naho ni si na mutakalo wavhuḓi?

¹⁶ Naa ni khou lwala kana ni shumisa wheelchair? Naa milenzhe kana maṱo aṋu a zwi tsha shuma zwavhuḓi? Naa ni nga kona u gidima na vhaswa vhane vha kha ḓi vha na nungo ni kha honovhu vhuimo? Ee! Ni nga zwi kona! Hu na vhathu vhanzhi vha lwalaho na vhaaluwa vhane vha khou gidima kha nḓila i yaho vhutshiloni. Vha nga si kone u gidima nga nungo dzavho. Vha wana nungo nga u ṱalela miṱangano yo tou rekhodiwaho vhe mahayani avho. Nahone vha huwelela kha madokotela, manese na mashaka.

17. Yehova u ḓipfa hani nga vhane vha si vhe na mutakalo wavhuḓi?

¹⁷ Arali ni si tsha kona u ita zwithu zwoṱhe  zwine na nga takalela u zwi ita tshumeloni ya Yehova, ni songo kulea nungo na vhona u nga ni nga si tsha kona u gidima kha mbambe. Yehova u a ni funa ngauri ni na lutendo na nga nṱhani ha zwoṱhe zwe na mu itela zwone. Nahone ha nga ni ṱutsheli zwino ngauri ndi hone hune na ṱoḓa thuso yawe u fhira naho hu lini. (Ps. 9:10) U ḓo sendela tsini na inwi. Muṅwe wahashu wa tshifumakadzini ane a si vhe na mutakalo wavhuḓi o ri: “A thi tsha kona u wana zwibuli zwinzhi zwa u huwelela ngauri malwadze anga a khou engedzea. Fhedzi ndi takadzwa nga uri na zwiṱuku-ṱuku zwine nda zwi ita, Yehova u a zwi takalela.” Musi ni tshi kulea nungo, ni zwi humbule uri a ni noṱhe. Ni humbule nga ha tsumbo ya Paulo na maipfi awe musi a tshi ri: “Ndi ngazwo ndi tshi takala musi ndi si na nungo . . . ngauri ndi vha na maanḓa musi ndi si na nungo.”—2 Vhakor. 12:10.

18. Vhaṅwe vha sedzana na thaidzo ifhio i konḓaho?

¹⁸ Vhaṅwe vhathu vha re kha yeneyi mbambe vha sedzana na iṅwe thaidzo. Yeneyo thaidzo ndi ine vhaṅwe vhathu vha si kone u i vhona kana u i pfesesa. Sa tsumbo, vha nga vha vhe na vhulwadze ha u tsikeledzea kana vha tshi vhilaela nga ho kalulaho. Ndi ngani yeneyi i thaidzo khulwane vhukuma? Arali muthu o vunḓea tshanḓa kana a tshi shumisa wheelchair, vhathu vhoṱhe vha a kona u zwi vhona na u mu pfela vhuṱungu. Fhedzi kha muthu o tsikeledzeaho, zwi nga konḓela vhathu u vhona uri u na thaidzo. U pfa vhuṱungu u fana na muthu o vunḓeaho tshanḓa kana mulenzhe, fhedzi vhathu a vha koni u mu pfela vhuṱungu na u mu ṱhogomela ngauri a vha koni u zwi vhona.

19. Ri guda mini kha Mefibosete?

¹⁹ Tsumbo ya Mefibosete i nga ni khuthadza arali hu na zwinzhi zwine na si kone u zwi ita nahone vhathu vha sa ni pfesesi. (2 Sam. 4:4) Mefibosete o vha e tshihole nahone Khosi Davida ho ngo mu haṱula nga nḓila yo teaho. Zwe zwa itea khae zwo vha zwi si philiphise. Fhedzi ho ngo tenda zwi tshi mu sinyusa, o dzhiela nṱha zwithu zwavhuḓi zwe a vha e nazwo. O livhuwa nḓila yavhuḓi ye Davida a mu fara ngayo tshifhingani tsho fhiraho. (2 Sam. 9:6-10) Nga zwenezwo, musi Davida a tshi mu haṱula nga nḓila i songo teaho, Mefibosete a nga vha o humbula nga ha zwe zwa ita uri Davida a haṱule nga yeneyo nḓila. Ho ngo tendela vhukhakhi ha Davida vhu tshi mu sinyusa. Nahone ho ngo vhona Yehova mulandu nga zwe Davida a zwi ita. O humbula nga ha zwine  a nga zwi ita u itela u tikedza khosi yo vhewaho nga Yehova. (2 Sam. 16:1-4; 19:24-30) Yehova o ita uri mafhungo a Mefibosete a ṅwalwe Bivhilini u itela u ri vhuyedza.—Vharoma 15:4.

20. U vhilaela zwi nga ita uri vhaṅwe vha ḓipfe hani, fhedzi Yehova u dzhia hani vhuḓidini havho?

²⁰ U vhilaela nga ho kalulaho zwi ita uri vhaṅwe vhahashu vha ḓipfe vha songo vhofholowa musi vhe vhukati ha vhathu. Zwi nga vha konḓela u vha fhethu hu re na vhathu vhanzhi, fhedzi vha ḓi bvela phanḓa vha tshi ya miṱanganoni, maguvhanganoni na mabuthanoni. Zwi a vha konḓela u amba na vhathu vhane vha si vha ḓivhe, fhedzi vha ḓi huwelela zwo ralo. Arali ni tshi ḓipfa nga yeneyo nḓila, ḓivhani uri a ni noṱhe. Hu na vhathu vhanzhi vhane vha ḓipfa u fana na inwi. Yehova u a takala musi ni tshi mu shumela nga mbilu yaṋu yoṱhe. U kha ḓi ni fhaṱutshedza na u ni ṋea nungo, ndi ngazwo ni tshi kha ḓi gidima kha yeneyi mbambe. * (Vhafil. 4:6, 7; 1 Pet. 5:7) Arali ni tshi khou shumela Yehova ngeno ni si na mutakalo wavhuḓi, zwi ḓivheni uri Yehova u a zwi dzhiela nṱha.

21. Yehova u ḓo thusa roṱhe u ita mini?

²¹ Ndi zwavhuḓi uri mbambe ye Paulo a amba nga hayo a i fani kokotolo na mbambe ya vhukuma. Kha mbambe ya vhukuma, pfufho i waniwa nga muthu muthihi. Fhedzi kha mbambe ya Vhakriste, muṅwe na muṅwe ane a konḓelela u ḓo wana vhutshilo vhu sa fheli. (Yoh. 3:16) Kha mbambe ya vhukuma, vhagidimi vhoṱhe vha tea u vha vhe na mutakalo wavhuḓi arali vha tshi ṱoḓa u wina. Ngeno kha mbambe ine ra vha khayo, vhunzhi hashu a ri na mutakalo wavhuḓi fhedzi ri a konḓelela. (2 Vhakor. 4:16) Yehova u ḓo ri thusa roṱhe u ṱhaphudza mbambe!