THERO I GUDWAHO 17
Yehova U A Ni Funa Nga Maanḓa!
“Yehova u takalela vhathu vhawe.”—PS. 149:4.
LUIMBO 108 Lufuno Lwa Mudzimu Lu Fulufhedzeaho
MANWELEDZO *
Khotsi ashu wa ṱaḓulu u “takalela” muṅwe na muṅwe washu (Sedzani phara 1)
1. Yehova u sedza mini kha vhathu vhawe?
YEHOVA u “takalela vhathu vhawe.” (Ps. 149:4) Zwenezwi zwi ita uri ri takale. Yehova u vhona zwithu zwavhuḓi kha riṋe, u vhona vhukoni hashu ha u vha vhathu vhavhuḓi nahone u dovha a ri thusa uri ri vhe khonani dzawe. Arali ra dzula ri tshi fhulufhedzea khae, u ḓo dzula e tsini hashu lini na lini.—Yoh. 6:44.
2. Ndi ngani vhaṅwe zwi tshi vha konḓela u tenda uri Yehova u a vha funa?
2 Vhaṅwe vha nga kha ḓi ri: ‘Ndi a zwi ḓivha uri Yehova u funa vhathu vhawe nga u angaredza, fhedzi ndi nga vha hani na vhuṱanzi ha uri nṋe u a mpfuna?’ Ndi mini zwine zwa nga ita uri muthu a ḓivhudzise yeneyo mbudziso? Muṅwe wahashu wa tshifumakadzini we a aluswa nga nḓila i si yavhuḓi ane a pfi Oksana * u ri: “Ndo vha ndo takala vhukuma musi ndi tshi lovhedzwa nahone nda thoma u vha muvulanḓila. Fhedzi nga murahu ha miṅwaha ya 15, nda thoma u humbula zwithu zwivhi zwe zwa itea kha nṋe musi ndi tshee ṅwana. Nda humbula uri Yehova ha tsha ntakalela nahone a nga si mpfune.” Wahashu wa tshifumakadzini a re muvulanḓila ane a pfi Yua we na ene a vha na dzithaidzo musi a tshi kha ḓi vha ṅwana, u ri: “Ndo ḓiṋekedza kha Yehova ngauri ndo vha ndi tshi ṱoḓa u mu takadza. Fhedzi ndo vha ndi na vhuṱanzi ha uri a nga si vhuye a mpfuna.”
3. Ri ḓo amba nga ha mini kha ino thero?
3 Na inwi ni nga vha ni tshi funa Yehova nga mbilu yaṋu yoṱhe u fana na vhahashu vha tshifumakadzini vha fhulufhedzeaho vhe ra amba nga havho, fhedzi ni tshi timatima uri u a ni funa. Ndi ngani ni tshi tea u vha na vhungoho ha uri u na ndavha na inwi? Nahone ni nga thuswa nga mini musi ni tshi humbula uri Yehova ha ni funi? Ri ḓo fhindula dzenedzo mbudziso.
U TIMATIMA URI YEHOVA U A RI FUNA ZWI NA KHOMBO
4. Ndi ngani u timatima uri Yehova u a ri funa zwi na khombo?
4 Arali ri na vhuṱanzi ha uri Yehova u a ri funa, ri ḓo ṱoḓa u mu shumela nga mbilu yoṱhe naho vhutshilo vhu tshi khou konḓa. Fhedzi arali ra timatima uri Mudzimu u a ri funa, “nungo [dzashu] dzi ḓo fhungudzea.” (Mir. 24:10) Musi ri tshi kulea nungo nahone ra thoma u humbula uri Mudzimu ha ri funi, a ri nga koni u lwa na Saṱhane.—Vhaef. 6:16.
5. Ho itea mini kha vhaṅwe vhahashu vhe vha timatima uri Mudzimu u a vha funa?
5 Lutendo lwa vhaṅwe Vhakriste lwo thoma u thenga-thenga nge vha thoma u humbula uri Yehova ha vha funi nahone ha na ndavha navho. Muṅwe muhulwane ane a pfi James u ri: “Naho ndo vha ndi tshi khou shuma Bethele nahone ndi tshi khou ḓiphiṋa nga tsimu ndi tshivhidzoni tsha luambo lwa ḽiṅwe shango, ndo vha ndi tshi timatima uri Yehova u a takalela zwine nda khou mu itela. Ndo thoma na u timatima uri Yehova u a nthetshelesa musi ndi tshi rabela.” Wahashu wa tshifumakadzini ane a pfi Eva ane na ene a vha kha tshumelo ya tshifhinga tshoṱhe u ri: “Ndo zwi vhona uri u timatima uri Yehova u a ri funa zwi na khombo ngauri zwi kwama nḓila ine ra mu shumela ngayo. Zwi ita uri ri si tsha takalela u mu shumela.” Michael ane a vha muvulanḓila a dovha a vha muhulwane u ri: “Arali ni tshi timatima uri Mudzimu u a ni funa, ni ḓo fhedza no mu ṱutshela.”
6. Ri tea u ita mini musi ri tshi vha na mahumbulele a uri Mudzimu ha ri funi?
6 Dzenedzi tshenzhelo dzi ri sumbedza uri u timatima uri Yehova u a ri funa zwi nga ita uri ri fhelelwe nga lutendo. Fhedzi ri tea u ita mini musi ri tshi thoma u humbula uri Mudzimu ha ri funi? Ri fanela u ṱavhanya u litsha u humbula nga yeneyo nḓila. Humbelani Yehova uri a ni thuse ni bvise zwithu ‘zwine zwa ni vhilaedzisa’ muhumbuloni waṋu na uri a ni fhe ‘mulalo une vhathu vha si kone u u pfesesa uri u tsireledze mbilu yaṋu na mihumbulo yaṋu’. (Ps. 139:23; Vhafil. 4:6, 7) Ni zwi humbule uri a si inwi fhedzi a re na mahumbulele o raloho. Hu na vhaṅwe vhahashu vha fhulufhedzeaho vhane vha khou lwa na eneo mavhonele a si avhuḓi. Na vhaṅwe vhashumeli vha Yehova vha tshifhingani tsho fhelaho vho tea u lwa na enea mavhonele. Kha ri vhone zwine ra nga zwi guda kha tsumbo ya muapostola Paulo.
ZWINE RA ZWI GUDA KHA PAULO
7. Paulo o vha e na thaidzo dzifhio?
7 Naa nga zwiṅwe zwifhinga ni pfa ni tshi lemelwa nga mishumo ine na vha nayo ndanguloni nahone ni tshi konḓelwa u i ita yoṱhe? Arali zwo ralo, ni ḓo pfesesa zwe Paulo a vha a tshi khou ṱangana nazwo. O vha a tshi vhilaela nga ha “zwivhidzo zwoṱhe,” hu si tshivhidzo tshithihi fhedzi. (2 Vhakor. 11:23-28) Naa ni na vhulwadze vhu sa fholi vhune ha ita uri ni si takale? Paulo o vha a tshi tambudzwa nga “mupfa ṋamani.” Khamusi wo vha u vhulwadze he a vha e naho he a vha a tshi ṱoḓa uri vhu fhole. (2 Vhakor. 12:7-10) Naa nga zwiṅwe zwifhinga ni pfa ni tshi kulea nungo nga nṱhani ha vhushayanungo haṋu? Na Paulo o vha a tshi ita a tshi kulea nungo. O ri: “Ndi muthu a ṱungufhadzaho.” O amba zwenezwo ngauri o vha a tshi dzulela u lwa uri a ite zwo lugaho.—Vharoma 7:21-24.
8. Paulo o thusiwa nga mini uri a konḓelele thaidzo dze a vha e nadzo?
8 Naho Paulo o livhana na milingo minzhi na zwiimo zwi kulaho nungo, o bvela phanḓa a tshi shumela Yehova. Ndi mini zwe zwa mu fha maanḓa? Naho o vha a tshi zwi ḓivha uri u na vhushayanungo, o vha e na lutendo lwo khwaṱhaho kha tshirengululi. O vha a tshi ḓivha zwe Yesu a fhulufhedzisa musi a tshi ri ‘ane a ntenda u ḓo wana vhutshilo vhu sa fheli.’ (Yoh. 3:16; Vharoma 6:23) Zwi tou pfala uri Paulo na ene o vha e na lutendo kha tshirengululi. O vha e na vhuṱanzi ha uri Yehova o ḓiimisela u hangwela na vho itaho zwivhi zwihulwane arali vho rembuluwa.—Ps. 86:5.
9. Ri guda mini kha maipfi a Paulo a re kha Vhagalata 2:20?
9 Paulo o vha e na lutendo lwa uri Mudzimu u a mu funa nga maanḓa ngauri o vha a tshi zwi ḓivha uri o rumela murwa wawe uri a mu fele. (Vhalani Vhagalata 2:20.) Ṱhogomelani maipfi a khuthadzaho a re mafheloni a yeneyo ndimana. Paulo o ri: “Murwa wa Mudzimu [o] mpfuna na u ḓiṋekedzela a tshi itela nṋe.” Paulo ho ngo ḓivhona e muthu muvhi lune a si funiwe nga Mudzimu. Ho ngo vhona u nga Yehova u funa vhahawe fhedzi ngeno ene a sa mu funi. Paulo o humbudza Vharoma a ri: “Musi ri tshi kha ḓi vha vhaitazwivhi, Kristo o ri fela.” (Vharoma 5:8) A hu na tshine tsha nga ita uri Mudzimu a sa ri fune.
10. Ri guda mini kha Vharoma 8:38, 39?
10 Vhalani Vharoma 8:38, 39. Paulo o vha e na vhuṱanzi ho fhelelaho ha uri Mudzimu u mu funa nga maanḓa. O ṅwala uri a hu na ‘tshine tsha nga ita uri Mudzimu a si ri fune.’ Paulo o vha a tshi zwi ḓivha uri Yehova ho ngo fhelela Vhaisiraele mbilu. O vha a tshi ḓivha na nḓila ye Yehova a mu khathutshela ngayo. Nga maṅwe maipfi, ri nga ri Paulo o ri: ‘Samusi Yehova o ruma Murwa wawe uri a fele nṋe, a thi na tshiitisi tsha u timatima uri u a mpfuna.’—Vharoma 8:32.
Zwa ndeme kha Mudzimu ndi zwine ra ita zwino na tshifhingani tshi ḓaho, hu si vhukhakhi he ra vhu ita tshifhingani tsho fhiraho (Sedzani phara 11) *
11. Ndi ngani Paulo o vha e na vhungoho ha uri Mudzimu u a mu funa naho o ita zwivhi zwo bulwaho kha 1 Timotheo 1:12-15?
11 Vhalani 1 Timotheo 1:12-15. Khamusi Paulo o vha a tshi ita a tshi ṱungufhala musi a tshi humbula zwe a ita musi a sa athu u vha Mukriste. A zwi mangadzi uri o vha a tshi ḓiamba uri u muvhi “u fhira vhaitazwivhi vhoṱhe.” Musi Paulo a sa athu u ḓivha ngoho, o vha a tshi tovhola Vhakriste. O vha a tshi tou vha zwima miḓini yoṱhe, vhaṅwe a vha valela dzhele nahone o vha a tshi tikedza tsheo ya vhe khothe ya ri vha vhulawe. (Mish. 26:10, 11) Zwi tou pfala uri Paulo o vha a tshi pfa vhuṱungu arali o ṱangana na Mukriste we ene a vhulayisa vhabebi vhawe. Paulo o ḓisola nga vhukhakhi he a ita, fhedzi zwo vha zwi sa konadzei uri a vhu shandule. O vha a tshi tenda uri Kristo o mu fela nahone o ṅwala a ri: “Ndi kona u ita wonoyu mushumo nga nṱhani ha vhuthu vhuhulu ha Mudzimu.” (1 Vhakor. 15:3, 10) Ri guda mini? Ni fanela u vha na vhungoho ha uri Yesu o fela inwi nahone a ni vulela nḓila ya uri ni vhe na vhushaka ha tsini-tsini na Yehova. (Mish. 3:19) Zwa ndeme kha Mudzimu ndi zwine ra ita zwino na tshifhingani tshi ḓaho hu si vhukhakhi he ra vhu ita tshifhingani tsho fhiraho, hu sa londwi uri honoho vhukhakhi ro vhu ita ro no vha Ṱhanzi dza Yehova kana ri sa athu u vha Ṱhanzi dza Yehova.—Yes. 1:18.
12. Maipfi a re kha 1 Yohane 3:19, 20 a nga ri thusa hani musi ri tshi ḓipfa ri si vha ndeme kana ri sa funiwi?
12 Musi ni tshi humbula uri Yesu o fela zwivhi zwaṋu, ni nga humbula uri: ‘A thi fanelei u fhiwa tshifhiwa tsha ndeme nga u ralo.’ Ndi ngani ni tshi nga ḓipfa nga yeneyo nḓila? Mbilu yashu i re na tshivhi i nga ri fhura, ya ri ita uri ri ḓipfe ri si vha ndeme kana ri sa funiwi. (Vhalani 1 Yohane 3:19, 20.) Musi ri tshi thoma u ḓipfa nga yeneyo nḓila, ri zwi humbule uri “Mudzimu ndi muhulwane u fhira mbilu dzashu.” Arali ra ḓelwa nga muhumbulo wa uri Yehova ha ri funi kana ha nga ri hangweli, ri zwi humbule uri Khotsi ashu wa ṱaḓulu u a ri funa nahone u ḓo ri hangwela. Ri fanela u ita vhuḓidini ha u tenda uri Yehova u a ri funa. Ri nga zwi kona nga u dzula ri tshi guda Ipfi ḽawe, nga u dzula ri tshi amba nae nga thabelo, na nga u konana na vhathu vhane vha mu shumela. Ndi ngani u ita zwenezwi zwithu zwi zwa ndeme?
U GUDA BIVHILI, THABELO NA KHONANI DZI FHULUFHEDZEAHO ZWI NGA RI THUSA HANI?
13. U guda Ipfi ḽa Mudzimu zwi nga ri thusa hani? (Sedzani na bogisi “ Ipfi Ḽa Mudzimu Ḽi Vha Thusa Hani?”)
13 Arali na guda Ipfi ḽa Mudzimu ḓuvha na ḓuvha, ni ḓo ya ni tshi pfesesa zwine Yehova a vha zwone. Ni ḓo pfesesa nḓila ine a ni funa ngayo. U elekanya nga ha maṅwe mafhungo a re Bivhilini zwi nga ni thusa uri ni vhe na mahumbulele avhuḓi, zwa “khakhulula” zwi re muhumbuloni waṋu na mbiluni. (2 Tim. 3:16) Muṅwe muhulwane ane a pfi Kevin we a ḓipfa e si wa ndeme u ri: “U vhala Phisalema 103 na u elekanya nga hayo, zwo nthusa u khakhulula mahumbulele anga nahone nda pfesesa nḓila ine Yehova a ndzhia ngayo.” Eva we ra amba nga hae u ri: “Nga madekwana ndi ḓifha tshifhinga tsha u elekanya nga ha nḓila ine Yehova a ḓipfa ngayo nga ha nṋe. Zwi ita uri ndi rudze mbilu nahone zwi nkhwaṱhisa lutendo.”
14. Thabelo i nga ri thusa hani?
14 Dzulani ni tshi rabela. (1 Vhathes. 5:17) Vhathu vha vha khonani dza vhukuma nga u dzula vha tshi davhidzana na nga u somolelana zwa haṋwani. Zwo tou ralo na nga vhukonani hashu na Yehova. Musi ri tshi mu vhudza nga thabelo nḓila ine ra ḓipfa ngayo, nḓila ine ra humbula ngayo na zwine zwa ri vhilaedzisa, ri sumbedza uri ri a mu fhulufhela na uri ri ḓivha uri u a ri funa. (Ps. 94:17-19; 1 Yoh. 5:14, 15) Yua we ra amba nga hae u ri: “Musi ndi tshi rabela, a thi vhudzi Yehova zwe nda ṱangana nazwo fhedzi nga ḽeneḽo ḓuvha. Ndi mu vhudza zwine nda khou zwi humbula na nḓila ine nda khou ḓipfa ngayo. Ndi vho dzhia Yehova sa Khotsi ane a funa vhana vhawe, hu si mulanguli wa khamphani.”—Sedzani bogisi “ Naa No No I Vhala?”
15. Yehova u sumbedza hani uri u na ndavha na riṋe?
15 Ni ḓikonanye na khonani dzi fhulufhedzeaho ngauri vha tshifhiwa tshi bvaho kha Yehova. (Yak. 1:17) Khotsi ashu wa ṱaḓulu u sumbedza uri u na ndavha na riṋe nga u ri fha vhahashu vhane vha ri sumbedza “lufuno tshifhinga tshoṱhe.” (Mir. 17:17) Kha vhurifhi ha Paulo vhu yaho kha Vhakolosa, o bula vhaṅwe Vhakriste vhe vha mu tikedza. O amba uri vho mu ‘khuthadza vhukuma.’ (Vhakol. 4:10, 11) Na Yesu Kristo o ṱoḓa u tikedzwa nahone o zwi dzhiela nṱha musi a tshi tikedzwa nga khonani dzawe. O tikedzwa nga vharuṅwa na nga vhathu.—Luka 22:28, 43.
16. Khonani dza tsini dzi nga ri thusa hani uri ri sendele tsini na Yehova?
16 Naa ri a humbela thuso ya dzikhonani dzi re tshivhidzoni na u i ṱanganedza? Musi ri tshi vhudza khonani dzashu dzi re na vhushaka havhuḓi na Yehova nga ha zwine zwa ri vhilaedzisa, a zwi ambi uri a ri na lutendo. Nṱhani hazwo, zwi nga ri tsireledza. James we ra amba nga hae u ri: “U vha na khonani dzi re na vhushaka havhuḓi na Yehova zwo nthusa. Musi ndi tshi vha na mahumbulele a si avhuḓi, dzenedzi khonani dzanga dzavhuḓi dzi a nthetshelesa dzi sa mpheleli mbilu, dza mmbudza uri dzi a mpfuna. Musi dzi tshi ita zwenezwo, ndi a zwi ṱhogomela uri Yehova u a mpfuna nahone u na ndavha na nṋe.” Ndi zwa ndeme uri ri vhe na vhukonani ha tsini na vhahashu vha funaho Yehova.
YEHOVA U ḒO DZULA A TSHI NI FUNA
17-18. Ndi nnyi ane ra tea u mu thetshelesa nahone ndi ngani?
17 Saṱhane u ṱoḓa ri tshi litsha u ita zwo lugaho. U ṱoḓa ri tshi humbula uri Yehova ha ri funi na uri a ri fanelei uri a ri tshidze. Fhedzi eneo ndi mazwifhi madaladala samusi ro zwi vhona.
18 Yehova u a ni funa. Ni wa ndeme khae. Arali na mu thetshelesa, u ḓo “dzula [a] tshi ni funa” lini na lini, samusi a tshi funa Yesu. (Yoh. 15:10) Ni songo thetshelesa musi Saṱhane kana mbilu yaṋu zwi tshi ni vhudza uri Yehova ha ni funi. Fhedzi ni thetshelese Yehova ane a vhona zwivhuya kha muṅwe na muṅwe washu. Ni vhe na vhungoho ha uri u “takalela vhathu vhawe,” u katela na inwi.
LUIMBO 141 Ḓembe Ḽa Vhutshilo
^ phar. 5 Vhaṅwe vhahashu zwi a vha konḓela u tenda uri Yehova u a vha funa. Kha ino thero, ri ḓo amba nga ha zwine zwa nga ri thusa u vha na vhungoho ha uri Yehova u funa muṅwe na muṅwe washu. Ri ḓo dovha ra guda nga ha zwine ra nga ita arali ri tshi timatima uri Yehova u a ri funa.
^ phar. 2 Maṅwe madzina o shandulwa.
^ phar. 67 ṰHALUSO YA TSHIFANYISO: Musi Paulo a sa athu u ḓivha ngoho, o tovhola Vhakriste, a valela vhunzhi havho dzhele. Musi o no tenda zwe Yesu a mu itela zwone, o shanduka, a ṱuṱuwedza vhahawe vha Vhakriste vhe khamusi vhaṅwe vhavho vha vha vhe mashaka a vhe a vha tovhola.
